“Kiko Ta Bèrdat?”

GOBERNADÓ romano, Ponsio Pilato a hasi Hesus e pregunta ei den un forma di despresio. Pilato no tabata interesá pa haña un kontesta riba su pregunta; Hesus no a dun’é tampoko. Kisas Pilato a opiná ku ta imposibel pa komprondé e bèrdat.—Juan 18:38.

Awendia tin hopi hende, entre otro lidernan religioso, maestronan di skol i polítikonan, ku tin e mesun tipo di aktitut pa ku e bèrdat. Nan ta kere ku partikularmente bèrdat moral i spiritual no ta apsoluto sino relativo; i ta kambia kontinuamente. Esaki naturalmente ta pone hende konkluí ku nan mes por determiná kiko ta bon i kiko ta malu. (Isaias 5:20, 21) Ademas, e aktitut aki ta pone hende mira e norma- i balornan moral di generashonnan pasá, komo antikuá.

Ta bale la pena pa wak ta kiko a pone Pilato hasi e pregunta ei. Hesus a bisa: “Pa esaki mi a nase i pa esaki mi a bin den mundu, pa duna testimonio di e bèrdat.” (Juan 18:37) Pa Hesus bèrdat no tabata un konsepto vago ni inkomprendibel. El a primintí su disipelnan: “Boso lo konosé e bèrdat, i e bèrdat lo hasi boso liber.”—Juan 8:32.

Na unda un hende por haña e bèrdat ei? Wèl, na un okashon Hesus a bisa den orashon na Dios: “Bo palabra ta bèrdat.” (Juan 17:17) Beibel, e palabra inspirá di Dios, ta revelá e bèrdat ku ta duna tantu guia konfiabel komo un speransa sigur pa futuro, esta bida eterno.—2 Timoteo 3:15-17.

Pilato no a mustra niun tiki interes den e oportunidat ku el a haña pa siña e bèrdat ei. Kiko di abo? Puntra Testigunan di Yehova libremente kiko ta “e bèrdat” ku Hesus a siña otro hende. Ku muchu gustu nan lo kompartí e bèrdat ei ku bo.