Liberashon for di e Trampanan di e Yagdó

“[Yehova] ta esun ku ta libra bo for di e trampa di e yagdó.”—SALMO 91:3.

1. Ken ta e “yagdó,” i dikon e ta peligroso?

TUR kristian berdadero tin ku lucha kontra un enemigu ku tin un inteligensia i astusia sobrehumano. Salmo 91:3 ta yam’é “e yagdó” (literalmente “e yagdó di para,” NW). Ken e enemigu aki ta? For di tempu di su edishon di 1 di yüni 1883, e revista aki a mustra bon kla ku e no ta ningun otro sino Satanas e Diabel. Ku astusia e enemigu poderoso aki ta trata na engañá e pueblo di Yehova i kue nan den trampa meskos ku un yagdó di para ta purba kue un para den trampa.

2. Dikon Beibel ta kompará Satanas ku un yagdó di para?

² Den tempu antiguo, hende tabata kue para pa nan kantamentu bunita, nan plumanan kolorido i tambe pa kome i pa usa komo sakrifisio. Sin embargo, di naturalesa para ta bestia kouteloso i hopi alerta, pues difísil pa kue den trampa. P’esei, promé kos ku un yagdó di para den tempu bíbliko tabata hasi ta studia kuidadosamente e karakterístika- i kustumbernan di e sorto di paranan ku e kier a kue den trampa. Kaba, e tabata inventá métodonan astuto pa kue nan. Dor ku Beibel ta kompará Satanas ku un yagdó di para e ta yuda nos komprondé ki métodonan e ta usa. Diabel ta studia nos kada un individualmente. E ta opservá nos kustumber- i karakterístikanan i e ta pone trampanan skondí den un intento pa kue nos prezu. (2 Timoteo 2:26) Si e kue nos den trampa, esei lo nifiká ku nos ta daña nos relashon ku Yehova i esaki finalmente lo por hiba na nos destrukshon. P’esei, pa nos protekshon, nos tin ku identifiká e vários trampanan di e “yagdó.”

3, 4. Ki ora e trikinan di Satanas ta parse esnan di un leon, i di un kobra?

³ Ademas, na un manera bibu, e salmista ta kompará Satanas su trikinan ku esnan di un leon òf di un kobra. (Salmo 91:13) Meskos ku leon, tin biaha Satanas ta bin ku atakenan abierto i direkto pa medio di persekushon òf akshonnan gubernamental kontra e pueblo di Yehova. (Salmo 94:20) E atakenan feros aki por pone ku algun persona ta bandoná Yehova. Sin embargo, hopi bes e atakenan abierto aki tin un resultado nèt kontrali di loke e oponentenan ta ferwagt; mas bien, nan ta uni e pueblo di Dios. Pero kiko di e atakenan di Satanas ku ta mas sutil, manera esnan di un kobra?

⁴ Meskos ku un kolebra venenoso, Diabel ta usa su inteligensia sobrehumano pa lansa atakenan engañoso i mortal for di un lugá skondí. Di e manera aki el a logra venená mente di algun miembro dje pueblo di Dios, i engañá nan di tal forma ku nan a bai hasi su boluntat en bes di esun di Yehova. I esei tabatin resultadonan trágiko. Nos por ta kontentu ku Satanas su trampanan no ta deskonosí pa nos. (2 Korintionan 2:11) P’esei, laga nos konsiderá awor kuater trampa mortal ku “e yagdó” ta usa.

Temor pa Hende

5. Dikon e trampa di “temor pa hende” ta asina efikas?

⁵ “E yagdó” sa ku normalmente hende ke tin e aseptashon i aprobashon di otronan. Kristiannan no ta totalmente indiferente pa loke ta pensamentu- i sintimentunan di hende rònt di nan. Diabel sa esaki, p’esei e ke probechá di e echo ku nan ta preokupá pa loke hende ta bisa di nan. Por ehèmpel, el a pone algun miembro dje pueblo di Dios bira desbalansá dor di usa e trampa di “temor pa hende.” (Proverbionan 29:25) Si pa motibu di miedu di hende, sirbidónan di Dios ta djòin otronan den hasi loke Yehova ta prohibí òf ta keda sin hasi loke e Palabra di Dios ta manda, e ora ei nan a kai den e trampa di e “yagdó.”—Ezekiel 33:8; Santiago 4:17.

6. Ki ehèmpel ta mustra kon “e yagdó” por kue un hóben den trampa?

 ⁶ Por ehèmpel, un hóben kisas ta entregá na preshon di su kompañeronan di skol i ta huma un sigaria. Podisé ora el a sali pa bai skol e dia ei, niun ratu so e no a pensa di huma un sigaria. Pero no a dura mashá ku e tabata hasiendo algu ku ta malu pa su salú i ku ta desagradá Dios. (2 Korintionan 7:1) Kon bin el hañ’é ku e tentashon? Podisé e tabata asosiá ku muchanan di su mes edat ku tabatin un mal influensia riba dje i e tabatin miedu ku nan lo a hasi bofon di dje. Hóbennan, no laga “e yagdó” tenta boso ni kue boso den trampa! Pa evitá ku e ta kue boso prezu, tene kuidou ku asta kompromisonan chikitu. Hasi kaso di e spièrtamentu di Beibel pa evitá mal asosiashon.—1 Korintionan 15:33.

7. Kon Satanas lo por pone algun mayor pèrdè nan balansa spiritual?

⁷ Mayornan kristian ta tuma masha na serio nan responsabilidat di perkurá den sentido material pa nan famia. (1 Timoteo 5:8) Sin embargo, Satanas su meta ta pa pone kristiannan pèrdè nan balansa den e aspekto aki. Podisé algun tin e kustumber di falta reunion pasobra nan ta entregá na e preshon ku nan doño di trabou ta pone riba nan pa traha oranan èkstra. Kisas nan tin miedu di pidi liber pa asistí na tur e seshonnan di e kongreso di distrito pa adorá Yehova huntu ku nan rumannan. Pa nos haña protekshon kontra e trampa aki nos tin ku “konfia” den Yehova. (Proverbionan 3:5, 6) Ademas, ora nos kòrda ku nos tur ta miembro di e famia di Yehova i ku el a komprometé su mes pa perkurá pa nos, esaki lo yuda nos mantené nos balansa. Mayornan, boso tin fe ku Yehova lo perkurá di un òf otro manera pa boso i boso famia ora boso ta hasi su boluntat? Òf e Diabel lo kue boso prezu i pone boso hasi su boluntat debí ku boso tin miedu di hende? Nos ta urgi boso pa pensa seriamente riba e preguntanan aki i hasi orashon tokante e asuntu.

E Trampa di Materialismo

8. Den ki manera Satanas ta usa e trampa di materialismo?

⁸ Satanas ta usa e trampa di materialismo tambe pa atrapá nos. Hopi bes e sistema komersial di e mundu aki ta promové proyektonan pa bira riku lihé ku por asta gaña algun miembro dje pueblo di Dios. Tin bes algun persona por haña e konseho: “Traha duru. Ora bo alkansá un bon posishon finansiero, bo por bai mas trankil i disfrutá di bida. Bo por asta traha pionero.” E palabranan ei por ta e rasonamentu desbalansá di algun persona ku ta probechá finansieramente di nan rumannan den e kongregashon kristian. Analisá e konseho pa gana plaka ei bon. E no ta reflehá e mesun pensamentu ku e hòmber riku “bobo” den e komparashon di Hesus tabatin?—Lukas 12:16-21.

9. Kon bin algun kristian por kai den e trampa di deseá kos material?

⁹ Satanas ta manehá su sistema malbado di tal manera ku e ta influensiá hende pa deseá kos material. Ku tempu e deseo ei por afektá bida di un kristian di tal forma ku e ta choka e palabra i pone ku e ta “keda sin duna fruta.” (Marko 4:19) Beibel ta animá nos pa keda kontentu ora nos tin kuminda i paña pa bisti. (1 Timoteo 6:8) Sin embargo, hopi kristian ta kai den trampa di “e yagdó” pasobra nan no ta apliká e konseho ei den nan mes bida. Akaso orguyo ta pone nan pensa ku nan tin ku mantené un sierto estilo di bida? Kiko di nos personalmente? Nos deseo pa poseé kos material ta pone nos pusha interesnan di adorashon berdadero na di dos lugá den nos bida? (Hageo 1:2-8) Lamentablemente, durante periodonan di difikultat ekonómiko, algun ruman a sakrifiká nan spiritualidat pa asina nan por mantené un nivel di bida ku nan a kustumbrá kuné. E aktitut materialista ei ta hasi “e yagdó” masha kontentu!

E Trampa di Entretenimentu Perhudisial

10. Kon kada kristian mester eksaminá nan mes?

¹⁰ Un otro método ku “e yagdó” ta usa ta di debilitá un persona su sentido natural di loke ta bon i loke ta malu. E mentalidat meskos ku esun ku a reina den Sodoma i Gomora tin hopi influensia den e industria di entretenimentu. Asta reportahe di notisia na televishon i den revista ta enfatisá violensia i ta satisfasé e fasinashon ku hende tin pa mira asuntunan relashoná ku sèks ku luho di detaye. Loke medionan di komunikashon ta  presentá komo entretenimentu ta nubla hende su abilidat di “diserní loke ta bon i loke ta malu.” (Hebreonan 5:14) Sin embargo, kòrda loke Yehova a bisa mediante profeta Isaias: “Ai di esnan ku ta yama loke ta malu, bon, i loke ta bon, malu.” (Isaias 5:20) E manera sutil ku “e yagdó” ta usa e klase di entretenimentu perhudisial ei a afektá bo manera di pensa? Ta masha importante pa bo eksaminá bo mes.—2 Korintionan 13:5.

11. Ki spièrtamentu e revista aki a duna kontra telenovela?

¹¹ Kasi un kuart siglo pasá, La Atalaya! na un manera amoroso a spièrta berdadero adoradónan kontra serinan na televishon. * E revista a hasi e remarke aki tokante e influensia sutil di novelanan popular: “Nan ta usa e deseo pa haña amor komo hustifikashon pa kualke kondukta. Por ehèmpel, un hóben soltera ku ta na estado ta bisa su amiga: ‘Pero mi ta stima Victor. Mi no tin kunes. . . . E yu aki ku mi ta bai haña kuné ta tur kos pa mi!’ E músika suave den fondo ta stroba hende di realisá ku loke e hóben ei ta hasi ta malu. Abo ku ta wak e novela, tambe ta gusta Victor. Bo ta sinti pa e mucha muhé. Bo ta ‘komprond’é.’ Un televidente ku despues a bolbe na su sano huisio a bisa: ‘Ta asombroso kon bo por hustifiká bo manera di pensa. Nos sa ku inmoralidat ta malu. . . . Pero mi a realisá ku mentalmente mi tabata simpatisá ku hende inmoral.’”

12. Kua faktornan ta indiká ku e spièrtamentu kontra sierto programanan di televishon ta apropiá awe?

¹² For di tempu ku e artíkulonan aki a ser publiká, e presentashon di e tipo di programanan degradá aki a oumentá mas i mas. Den hopi pais nan ta transmití e programanan ei 24 ora pa dia. Tantu hende hòmber komo hende muhé i hopi tiner ta alimentá nan mente i kurason frekuentemente ku e tipo di entretenimentu ei. Sin embargo, nos no mester gaña nos mes ku rasonamentu falsu. Lo ta inkorekto pa rasoná ku e entretenimentu degradá ei no ta mas malu ku loke nos ta mira den e mundu real. Un kristian por realmente hustifiká e echo ku e ta skohe pa entretené su mes ku e klase di hendenan ei ku hamas lo e soña di invitá den su kas?

13, 14. Kon algun ruman a mustra ku nan a benefisiá di e spièrtamentunan kontra programanan di televishon?

¹³ Hopi kristian a benefisiá ora nan a hasi kaso di e spièrtamentu ku “e esklabo fiel i prudente” a duna. (Mateo 24:45-47) Despues ku algun di nan a lesa e konseho franko basá riba Beibel, nan a skirbi i konta e editornan di e revista aki ki efekto e artíkulonan tabatin riba nan personalmente. * Un di nan a konfesá: “Diestres aña largu mi tabata adikto na novela. Mi a pensa ku esaki lo no hasi daño na mi spiritualidat, basta mi asistí na e reunionnan kristian i bai de bes en kuando den sirbishi di vèlt. Pero mi a adoptá e aktitut mundano ku mi a opservá den novela, esta, ku si bo esposo ta maltratá bo òf bo ta sinti ku e no ta stima bo, adulterio ta hustifiká. Mi a rasoná ku si esei sosodé, ta e esposo ei mes su falta. I p’esei ora ku mi a pensa ku mi tabatin un motibu ‘hustifiká,’ mi a kometé adulterio i a peka kontra Yehova i mi kasá.” E señora aki a ser ekspulsá for di e kongregashon kristian. Ku tempu el a bini na su sano huisio, el a repentí i a ser restorá. E artíkulonan ku a spièrta kontra telenovela a dun’é e fortalesa pa nenga di entretené su mes ku loke Yehova ta odia.—Amos 5:14, 15.

¹⁴ Un otro lektor ku e artíkulonan tabatin efekto riba su bida a bisa: “Ora mi a lesa e artíkulonan, mi a yora pasobra mi a deskubrí ku mi kurason no tabata kompletu mas pa ku Yehova. Mi a primintí mi Dios ku lo mi no sigui ser un esklabo di e serinan aki mas.” Despues ku un señora kristian a ekspresá su gratitut pa e artíkulonan, el a atmití ku e tabata adikto na nan i a skirbi: “Mi tabata puntra mi mes . . . si esaki lo por a afektá mi relashon ku Yehova. Kon mi por a konsiderá ‘nan’ komo mi amigu i ser amigu di Yehova tambe?” Si 25 aña pasá e programanan di televishon ei tabata korumpí kurason di hende, ki efekto nan tin awe? (2 Timoteo 3:13) Nos tin ku tene kuidou ku tur e formanan di entretenimentu perhudisial—sea ta telenovela, wega di vidio violento òf vidio klep inmoral—ku Satanas ta usa pa kue nos den trampa.

 E Trampa di Desakuerdonan Personal

15. Kon Diabel ta kue algun ruman den trampa?

¹⁵ Satanas ta usa desakuerdonan personal komo un trampa pa kousa divishon den e pueblo di Yehova. No ta importá ki privilegio di sirbishi nos tin; nos tur por kai den e trampa aki. Diabel ta kue algun di nos rumannan den trampa pasobra nan ta permití desakuerdonan personal afektá e pas i union i e maravioso prosperidat spiritual ku Yehova ta duna nos.—Salmo 133:1-3.

16. Kon Satanas ta purba astutamente di kibra nos union?

¹⁶ Durante Promé Guera Mundial, Satanas a purba destruí e parti terenal di Yehova su organisashon dor di lansa un atake frontal kontra dje, pero el a faya. (Revelashon 11:7-13) For di e tempu ei e ta trahando di un manera astuto pa kibra nos union. Ora nos ta permití desakuerdonan personal trese desunion, nos ta duna “e yagdó” kaminda pa kana. Asina nos por stroba e fluho liber di spiritu santu tantu den nos bida personal komo den e kongregashon. Si esei mester sosodé, Satanas lo keda kontentu pasobra kualke kos ku ta perturbá e pas i union di e kongregashon ta stroba e trabou di prediká.—Efesionan 4:27, 30-32.

17. Kiko por yuda rumannan ku tin desakuerdonan personal resolvé esakinan?

¹⁷ Kiko bo por hasi si bo tin desakuerdo personal ku un kompañero kristian? Klaru ku kada situashon ta diferente. Sin embargo, ounke por tin hopi motibu pakiko problemanan ta desaroyá, no tin ningun motibu pakiko mester keda sin resolvé desakuerdonan personal. (Mateo 5:23, 24; 18:15-17) E konseho den Dios su Palabra inspirá ta perfekto. Ora nos ta apliká prinsipionan di Beibel, nan no ta faya nunka. Semper nan ta duna bon resultado!

18. Dikon ora nos ta imitá Yehova esaki ta yuda nos resolvé desakuerdonan personal?

¹⁸ Yehova ta “kla pa pordoná” i e ta ‘pordoná’ nos di bèrdat. (Salmo 86:5; 130:4) Ta ora nos ta imitá Yehova nos ta demostrá ku nos ta su yunan stimá. (Efesionan 5:1) Nos tur ta pekadó i tin mester di Yehova su pordon urgentemente. Pues, nos mester tene kuidou ora nos ta sinti ku nos no tin gana di pordoná un persona. Nos lo por bira manera e esklabo den e komparashon di Hesus ku a nenga di pordoná su kompañero esklabo un debe ku tabata meramente un frakshon chikitu di e debe ku su doño a pordon’é anteriormente. Ora e doño a haña sa loke a pasa, el a laga tira e esklabo ku no a pordoná den prizon. Hesus a konkluí su komparashon bisando: “Asina tambe mi Tata selestial lo hasi ku boso, si kada un di boso no pordoná su ruman di henter su kurason.” (Mateo 18:21-35) Ora nos ta meditá riba e komparashon ei i ta reflekshoná riba e kantidat di biaha ku Yehova a pordoná nos libremente, esaki sigur lo yuda nos ora nos ta purba resolvé desakuerdonan personal ku nos ruman.—Salmo 19:14.

Keda Safe “den e Lugá Sekreto dje Haltísimo”

19, 20. Kon nos mester konsiderá Yehova su “lugá sekreto” i “sombra” durante e último dianan peligroso aki?

¹⁹ Nos ta biba den tempunan peligroso. Si no tabata pa e protekshon amoroso di Yehova, ta sigur ku Satanas lo a destruí nos tur. P’esei pa evitá ku “e yagdó” ta kue nos den trampa, nos tin ku keda den e lugá figurativo di protekshon, esta, “biba den e lugá sekreto dje Haltísimo,” i asina permanesé “bou dje sombra dje Todopoderoso.”—Salmo 91:1, NW.

²⁰ Laga nos semper mira Yehova su rekordatorio- i instrukshonnan komo un protekshon i nunka komo algu ku ta restringí nos. Nos tur tin ku lucha kontra un enemigu ku tin inteligensia sobrehumano. Sin e yudansa amoroso di Yehova, niun hende lo no skapa di su trampanan. (Salmo 124:7, 8) P’esei, laga nos resa pidi Yehova pa e libra nos for di e trampanan di “e yagdó”!—Mateo 6:13.

[Nota]

Bo Ta Kòrda?

• Dikon “temor pa hende” ta un trampa mortal?

• Kon Diabel ta usa e trampa di materialismo?

• Kon Satanas a kue algun ruman den e trampa di entretenimentu perhudisial?

• Ki trampa Diabel ta usa pa kibra nos union?

[Preguntanan di Estudio]

[Plachi na página 31]

Algun ruman a kai den e trampa di “temor pa hende”

[Plachi na página 31]

Bo ta entretené bo mes ku loke Yehova ta odia?

[Plachi na página 31]

Kiko bo por hasi si bo tin desakuerdo personal ku un otro kristian?