Abo Ta Probechá di Oportunidatnan pa Kompartí Bo Kreensia?

“BÈRDAT apsoluto ta eksistí?” Esaki tabata e tema di un konkurso nashonal di òpstèl na Polonia. E informashon adishonal ku nan a duna tokante e tema tabata: “Nos no tin mester di bèrdat apsoluto. Ningun hende no mester di dje. Pasobra tòg bèrdat apsoluto no ta eksistí.” Agata tin 15 aña, e ta bai skol sekundario i e ta un Testigu di Yehova. El a disidí di probechá di e oportunidat aki pa kompartí su kreensianan religioso ku otro hende.

Ora Agata a kuminsá prepará su òpstèl el a pidi e guia di Yehova, despues el a kuminsá buska informashon riba e tema. El a haña informashon den E Toren di Vigilansia di 1 di yüli 1995. Agata a sita e pregunta ku Ponsio Pilato a hasi Hesus: “Kiko ta bèrdat?” (Juan 18:38) Agata a skirbi, ta komo si fuera Pilato tabata hasi chèrchi, bisando: ‘Bèrdat? Kiko e kos ei ta? E kos ei no ta eksistí!’ Agata a skirbi: “Pilato su pregunta a hasi mi kòrda riba e informashon adishonal pa e òpstèl.”

Despues el a trata e desaroyo di relativismo: e idea ku loke ta bèrdat pa un persona kisas no ta bèrdat pa un otro i, ku kisas nan tur dos tin “rason.” El a hasi preguntanan manera, “Ken di nos lo tribi di subi un avion si nos no ta konvensí ku e leinan di airodinámika ta bèrdatnan apsoluto?” I el a hala atenshon na e Beibel, bisando: “Konfiansa den e Palabra di Dios ta firmemente fundá riba echonan verifikabel.” El a bisa ku e ta spera ku esnan ku sinseramente ta buska bèrdat apsoluto lo tin sufisiente pasenshi pa hañ’é.

Agata a gana un sertifikado spesial i a haña oportunidat pa duna un presentashon dilanti di henter su klas. Algun di su kompañeronan di skol a aseptá su oferta pa studia Beibel. Agata ta gradisidu ku el a probechá di e oportunidat aki pa kompartí su kreensianan ku hopi hende. Sí, bo por haña bon resultado si bo hasi bon uso di kualke chèns ku bo haña pa papia tokante bo fe. Kua ta e oportunidatnan ku abo tin?