‘Bisti Boso ku Humildat’

E TA un hòmber ku a bini for di un stat renombrá. E tabatin e siudadania romano di nasementu i probablemente el a bini di un famia prominente. E hòmber ei, esta Saulo, a risibí e mihó edukashon ku tabata disponibel den e promé siglo di nos era. E por a papia por lo ménos dos idioma i tabata forma parti di un grupo religioso hudiu bon konosí: e fariseonan.

Saulo mester a siña menospresiá hende komun i pa ta orguyoso di su propio hustisia. (Lukas 18:11, 12; Echonan 26:5) Saulo su kompañeronan fariseo a adoptá un aire di superioridat i tabata stima prominensia i títulonan ku a laga nan parse importante. (Mateo 23:6, 7; Lukas 11:43) Probablemente tabata Saulo su asosiashon ku e hendenan ei a hasié arogante. Nos sa ku e tabata un persiguidó seloso di e kristiannan. Añanan despues, ora e tabata konosí komo apòstel Pablo, el a bisa ku anteriormente e tabata “un blasfemadó i un persiguidó i masha agresivo mes.”—1 Timoteo 1:13.

Sí, Saulo a bira un kristian, esta apòstel Pablo, i su personalidat a kambia kompletamente. Komo un apòstel kristian, humildemente el a deklará ku e tabata “esun di mas ménos entre tur e santunan.” (Efesionan 3:8) E tabatin éksito komo predikadó, pero e no a duna mérito na su mes pa esaki. Mas bien, el a duna tur onor na Dios. (1 Korintionan 3:5-9; 2 Korintionan 11:7) Ta Pablo tabata esun ku a konsehá su kompañeronan kristian: “Bisti un kurason di kompashon, kariño, humildat, mansedumbre i pasenshi.”—Kolosensenan 3:12.

E konseho aki ta práktiko den nos siglo 21? Ser humilde  ta trese benefisio? Humildat por ta realmente un señal di fortalesa?

E Kreadó Todopoderoso Ta Humilde?

Ki ora ku nos ta papia di humildat, nos tin ku tene kuenta ku Dios su punto di bista. Dikon? Pasobra e ta nos Soberano i nos Kreadó. Na kontraste kuné, nos tin ku rekonosé ku nos tin limitashon. Nos ta dependé di dje. Un hòmber sabí di antigwedat ku yama Eliú a bisa: “E Todopoderoso—nos no por hañ’é; E ta ekselente den poder.” (Jòb 37:23) Sí, ora nos djis kontemplá e inmenso universo rònt di nos, esei so kaba ta pone nos realisá kon insignifikante nos ta. Profeta Isaias a ekstendé e invitashon: “Hisa bo wowo wak ariba i mira ta ken a krea e streanan aki; Esun ku ta guia nan ehérsito segun nan kantidat, ta e ta yama nan tur na nan nòmber; pa motibu di e grandesa di su forsa i su poder ningun di nan no ta falta.”—Isaias 40:26.

Ademas di ta todopoderoso, Yehova Dios ta humilde tambe. Rei David a resa na dje: “Bo a duna mi e eskudo di bo salbashon, i bo gentilesa [òf, “humildat,” NW] ta hasi mi grandi.” (2 Samuel 22:36) Dios ta humilde den e sentido ku e ta desplegá interes den hende humilde ku ta hasi esfuerso pa agrad’é, mustrando miserikòrdia na nan. Ta komo si fuera Yehova ta baha for di shelu pa asina e por mustra bondat na hende ku ta tem’é.—Salmo 113:5-7.

Tambe Yehova ta balorá humildat di su sirbidónan. Apòstel Pedro a skirbi: “Dios ta resistí e orguyosonan, ma ta duna grasia na e humildenan.” (1 Pedro 5:5) Relashoná ku Dios su punto di bista di orguyo, un eskritor bíbliko a remarká: “Kada hende ku ta orguyoso di kurason ta un abominashon pa SEÑOR.” (Proverbionan 16:5) Pero den ki sentido humildat por ta un señal di fortalesa?

Loke Humildat No Ta

Humildat no ta meskos ku humiashon. Den algun kultura di pasado, un persona humilde normalmente tabata un esklabo, esta, un persona humiá, miserabel i den un kondishon deplorabel. Na kontraste ku esei, Beibel ta enfatisá ku humildat ta hiba na onor. Por ehèmpel, e hòmber sabí a skirbi: “E rekompensa di humildat i e temor di SEÑOR ta rikesa, onor i bida.” (Proverbionan 22:4) I na Salmo  138:6, nos ta lesa: “Ounke SEÑOR ta halsá, tòg e ta atendé e hende humilde; ma e hende orguyoso e ta konosé djaleu.”

Ora un persona ta humilde, esei no ta nifiká ku e no tin ningun abilidat òf logro den bida. Hesukristu por ehèmpel, nunka a pretendé ku e no tabata Yehova su Yu unigénito, ni nunka e no a pretendé ku su ministerio riba tera no tabata importante. (Marko 14:61, 62; Juan 6:51) Pero, Hesus a mustra humildat sí dor di duna krédito pa su obranan na su Tata i dor di usa su poder pa sirbi i yuda otro hende en bes di dominá i oprimí nan.

Un Señal di Fortalesa

No tin ningun duda ku Hesukristu su “milagernan” òf obranan poderoso a hasié konosí serka su kontemporáneonan. (Echonan 2:22) Pero den bista di algun, e tabata e “hende di mas humilde.” (Daniel 4:17) No solamente el a hiba un bida modesto, sino tambe bes tras bes el a siña hende e balor di humildat. (Lukas 9:48; Juan 13:2-16) I tòg, su humildat no a hasié un persona débil. El a demostrá kurashi segun ku el a defendé e nòmber di su Tata i a kumpli ku su ministerio. (Filipensenan 2:6-8) Beibel ta deskribí Hesus komo un leon ku kurashi. (Revelashon 5:5) Hesus su ehèmpel ta mustra ku humildat ta kuadra ku fortalesa moral i un karakter firme.

Segun ku nos ta lucha pa kultivá berdadero humildat, nos ta realisá ku nos tin ku hasi berdadero esfuerso pa nos desaroyá e kustumber di semper reflehá humildat. Esaki ta enserá ku semper nos mester someté nos mes na e boluntat di Dios en bes di sigui e kaminda di ménos resistensia òf entregá na inklinashonnan karnal. Pa nos kultivá humildat nos tin mester di fortalesa moral, pasobra nos tin ku hala nos interesnan personal un banda pa nos por sirbi Yehova i e interesnan di otro hende sin egoismo.

E Benefisionan di Humildat

Humildat ta enserá un karakter liber di orguyo òf arogansia. Nos por kultivá humildat di mente ora nos tin un punto di bista realístiko di nos mes, di nos puntonan fuerte i nos debilidatnan, di nos éksito- i nos fayonan. Pablo a duna un ekselente konseho relashoná ku esaki ora el a skirbi: “Mi ta bisa kada un di boso pa no pensa mas haltu di su mes ku e mester pensa; ma pa mas bien pensa di su mes ku sano huisio.” (Romanonan 12:3) Tur persona ku ta sigui e konseho ei ta manifestando humildat.

Nos ta manifestá humildat tambe ora nos sinseramente ta pone interesnan di otro hende riba esnan di nos. Bou di inspirashon Pablo a spièrta kristiannan: “No hasi nada ku un aktitut di egoismo òf orguyo, ma ku humildat laga kada un di boso konsiderá e otro mas importante ku e mes.” (Filipensenan 2:3) Esaki tabata na armonia ku e mandamentu ku Hesus a duna su siguidónan: “Esun di mas grandi meimei di boso lo ta boso sirbidó. I ken ku halsa su mes lo wòrdu humiá, i ken ku humiá su mes lo wòrdu halsá.”—Mateo 23:11, 12.

Sí, Dios ta halsa hende humilde. Disipel Santiago a enfatisá e punto ei ora el a skirbi: “Humiá boso mes den e presensia di Señor, i e lo halsa boso.” (Santiago 4:10) Ken lo no ke pa Dios halsa nan?

Falta di humildat a kousa hopi konfushon i konflikto entre hendenan individual i entre gruponan. Di otro banda, ora nos ta humilde  nos ta saka benefisio. Nos por sinti e goso di tin Dios su aprobashon. (Mikeas 6:8) Nos por disfrutá di pas mental pasobra un persona humilde tin mas chèns di ta felis i satisfecho ku un persona orguyoso. (Salmo 101:5) Lo ta mas fásil i plasentero pa trata ku nos famia-, amigu-, koleganan i otro hende. Hende humilde ta evitá di bira personanan desagradabel i eksigente, un komportashon ku fásilmente por hiba na rabia, alehamentu, resentimentu i amargura.—Santiago 3:14-16.

Sí, ora nos ta kultivá humildat, esei ta un manera ekselente pa mantené bon relashon ku otro hende. E por yuda nos trata ku e desafionan di e mundu egoista i kompetitivo aki. Ku yudansa di Dios, apòstel Pablo por a vense e arogansia i orguyo ku e tabatin anteriormente. Di mes manera, ta bon pa nos frena kualke inklinashon pa ku arogansia òf e pensamentu ku nos ta mihó ku otro hende. Beibel ta spièrta: “Orguyo ta bin promé ku destrukshon, i un spiritu arogante promé ku kaida.” (Proverbionan 16:18) Ora nos ta sigui e ehèmpel i konseho di Pablo, nos lo mira e sabiduria di ‘bisti nos ku humildat.’—Kolosensenan 3:12.

[Plachi na página 4]

Pablo por a vense arogansia i orguyo

[Plachi na página 7]

Humildat ta yuda nos mantené bon relashon ku otro hende

[Rekonosementu pa Potrèt na página 5]

Anglo-Australian Observatory/David Malin Images