Hasi Kaso di Bo Konsenshi

“Pa esnan ku ta puru, tur kos ta puru; ma pa esnan ku ta kontaminá i ku ta inkrédulo, nada no ta puru.”—TITO 1:15.

1. Ki papel Pablo a hunga den e kongregashonnan na Kreta?

DESPUES ku apòstel Pablo a kaba ku su di tres biahe komo misionero, el a keda arestá i ku tempu nan a mand’é Roma, kaminda nan a ser’é pa dos aña. Kiko el a hasi ora el a haña su libertat? Na dado momento, el a bishitá e isla di Kreta huntu ku Tito, na kende Pablo a skirbi: “Mi a laga bo na Kreta, pa bo regla loke ta falta, i nombra ansianonan.” (Tito 1:5) Lokual ku Tito mester a hasi aya tabatin di haber ku e konsenshi.

2. Ki problema Tito mester a atendé riba e isla di Kreta?

² Pablo a bisa Tito kiko ta e rekisitonan pa un hende bira ansiano di kongregashon i despues el a hala atenshon na e echo ku tabatin “hopi hende rebelde, hende ku ta papia pa papia, i gañadónan.” Nan tabata “trastorná famianan kompletu, siñando hende kosnan ku nan no mag siña nan.” Tito mester a sigui “reprendé nan.” (Tito 1:10-14; 1 Timoteo 4:7) Pablo a bisa ku nan mente i konsenshi tabata “kontaminá.” E palabra aki ku el a usa a duna e idea ku e konsenshi ta haña un mancha, meskos ku enk por mancha un paña bunita. (Tito 1:15) Ta posibel ku algun di e hòmbernan ei tabata di antesedente hudiu, pasobra nan a pega na “e sirkunsishon.” Awendia no tin hòmbernan ku un punto di bista asina ku ta korumpí e kongregashonnan; pero tòg nos por siña hopi tokante e konsenshi for di e konseho ku Pablo a duna Tito.

Esnan ku un Konsenshi Kontaminá

3. Kiko Pablo a skirbi Tito tokante e konsenshi?

³ Tuma nota bou di ki sirkunstansia Pablo a menshoná e palabra konsenshi. “Pa esnan ku ta puru, tur kos ta puru; ma pa esnan ku ta kontaminá i ku ta inkrédulo, nada no ta puru, ma tantu nan mente komo nan konsenshi ta kontaminá. Nan ta profesá ku nan konosé Dios, ma ku nan echonan nan ta neng’é.” Ta klaru ku den e tempu ei algun di nan mester a hasi kambio pa nan por ta “sano den fe.” (Tito 1:13, 15, 16) Nan tabatin problema pa distinguí entre loke ta puru i loke ta impuru, i esaki tabatin di haber ku nan konsenshi.

4, 5. Ki defisiensia algun hende den e kongregashonnan tabatin, i kon esaki a afektá nan?

⁴ Mas ku dies aña promé, e kuerpo gobernante kristian a yega na e konklushon ku sirkunsishon no tabata un rekisito mas pa bira un adoradó berdadero, i nan a informá e kongregashonnan debidamente. (Echonan 15:1, 2, 19-29) Tòg, algun kristian na Kreta a sigui pega na “e sirkunsishon.” Nan tabata ‘siña hende kosnan ku nan no mag siña  nan,’ i di e manera ei a mustra públikamente ku nan no tabata di akuerdo ku e kuerpo gobernante. (Tito 1:10, 11) Ku nan pensamentu trosí, nan kisas a promové reglanan di e Lei tokante kuminda i puresa seremonial. Podisé nan asta a agregá kos na e Lei, meskos ku nan predesesornan den Hesus su dia a hasi, i tambe nan a propagá fábulanan hudiu i mandamentunan di hende.—Marko 7:2, 3, 5, 15; 1 Timoteo 4:3.

⁵ E pensamentunan ei tabatin un efekto negativo riba nan manera di husga i nan sentido moral, esta nan konsenshi. Pablo a skirbi: “Pa esnan ku ta kontaminá i ku ta inkrédulo, nada no ta puru.” Nan konsenshi a bira asina trosí ku e no tabata un guia konfiabel mas pa nan akshon- i evaluashonnan. Ademas, nan tabata husga otro kompañeronan kristian pa kosnan personal, asuntunan riba kua kada kristian lo por tuma un desishon diferente. Den e sentido aki e kretensenan tabata konsiderá komo impuru kos ku en realidat no tabata impuru. (Romanonan 14:17; Kolosensenan 2:16) Ounke nan tabata profesá ku nan konosé Dios, nan echonan a proba nèt lo kontrario.—Tito 1:16.

“Pa Esnan Ku Ta Puru, Tur Kos Ta Puru”

6. Pablo a menshoná kua dos tipo di hende?

⁶ Kon nos por benefisiá for di loke Pablo a skirbi Tito? Wèl, tuma nota di e kontraste ku tin den e siguiente deklarashon: “Pa esnan ku ta puru, tur kos ta puru; ma pa esnan ku ta kontaminá i ku ta inkrédulo, nada no ta puru, ma tantu nan mente komo nan konsenshi ta kontaminá.” (Tito 1:15) Klaru ku Pablo no a bisa ku pa un kristian moralmente puru, tur kos ta puru i aseptabel. Nos por tin sigur di esei pasobra Pablo a splika bon kla den un otro karta ku hende ku ta praktiká fornikashon, idolatria, spiritismo, etcetera, “lo no heredá e reino di Dios.” (Galationan 5:19-21) Pues nos ta konkluí ku Pablo tabata menshoná un bèrdat general tokante dos tipo di hende: esnan ku den e sentido moral i spiritual ta puru i esnan ku ta impuru.

7. Kiko Hebreonan 13:4 ta prohibí, pero ki pregunta por lanta?

⁷ No ta solamente loke Beibel ta prohibí spesífikamente un kristian sinsero mester evitá. Por ehèmpel, konsiderá e siguiente deklarashon franko: “Laga matrimonio wòrdu onrá pa tur hende, i laga e kama matrimonial ta sin mancha; pasobra Dios lo husga fornikadónan i adúlteronan.” (Hebreonan 13:4) Asta hende ku no ta kristian i hende ku no sa nada di Beibel lo konkluí ku bon motibu ku e versíkulo aki ta prohibí adulterio. E teksto aki i otro tekstonan di Beibel ta mustra bon kla ku Dios ta desaprobá di relashon seksual entre un hende kasá i un otro hende ku no ta su kasá legal. Pero kiko awor di dos hende soltero ku ta praktiká sèks oral? Hopi teenager ta pretendé ku e práktika aki ta inofensivo pasobra e no ta relashon seksual. Un kristian por konsiderá sèks oral komo algu puru?

8. Enkuanto sèks oral, ki diferensia tin entre kristiannan i hopi hende di mundu?

 ⁸ Hebreonan 13:4 i 1 Korintionan 6:9 ta mustra bon kla ku Dios ta desaprobá di tantu adulterio komo fornikashon (na griego: por·néi·a). Kiko por·néi·a ta enserá? E palabra aki ta enserá e uso di e órganonan seksual sea den un manera natural òf pèrvèrso ku intenshon inmoral. Esei ta inkluí tur forma di relashon seksual pafó di matrimonio. Pues, sèks oral tambe ta kai aden, apesar ku hopi teenager rònt mundu ta haña e impreshon for di loke nan ta tende ku sèks oral ta aseptabel òf ku nan mes ta yega na e konklushon ei. Kristiannan berdadero no ta laga opinion di “hende ku ta papia pa papia, i gañadónan” guia nan pensamentu i akshonnan. (Tito 1:10) Nan ta kumpli ku e normanan haltu di e Santu Skritura. En bes di hustifiká sèks oral, nan ta komprondé ku bíblikamente e ta fornikashon, esta por·néi·a, i nan ta entrená nan konsenshi na armonia ku esei. *—Echonan 21:25; 1 Korintionan 6:18, NW; Efesionan 5:3, NW.

Konsenshi Diferente, Desishon Diferente

9. Si “tur kos ta puru,” ki papel e konsenshi ta hunga?

⁹ Pero kiko Pablo tabata ke men ora el a bisa ku “pa esnan ku ta puru, tur kos ta puru”? Pablo tabata referí na kristiannan ku a pone nan pensamentu i sentido moral na armonia ku e normanan di Dios, ku nos por haña den su Palabra inspirá. E kristiannan ei ta rekonosé ku tin hopi kos ku Dios no ta desaprobá direktamente; pues por tin variashon den e manera ku kreyentenan ta mira asuntu. En bes di ta kla pa husga, nan ta konsiderá komo “puru” kosnan ku Dios no ta desaprobá. Nan no ta spera ku tur otro kristian lo pensa presis meskos ku nan den aspektonan di bida ku Beibel no ta duna guia spesífiko. Laga nos konsiderá algun ehèmpel.

10. Ki desafio un kasamentu (òf un entiero) por trese kuné?

¹⁰ Tin hopi famia den kua e esposo òf e esposa so a bira un kristian. (1 Pedro 3:1; 4:3) Esaki por trese vários desafio kuné, manera por ehèmpel ora tin un kasamentu òf un entiero di un famia. Laga nos bisa ku ta trata di un kaso den kua e esposa ta un kristian pero e esposo tin un otro kreensia. Un famia di e esposo ta bai kasa na misa. (Òf un famia, kisas un mayor a muri i e entiero lo ta den misa.) E pareha a haña un invitashon, i e esposo ke pa su esposa bai kuné. Kiko e esposa su konsenshi ta bis’é? Bai òf no bai? Kiko lo e hasi? Ban wak e dos posibilidatnan aki.

11. Splika kon un esposa kristian lo por sinta rasoná pa wak si lo e bai un kasamentu na misa òf no. I esei ta hiba na ki konklushon?

¹¹ Loida ta reflekshoná riba e mandamentu bíbliko, ‘sali for di Babilonia e Grandi,’ e imperio mundial di religion falsu. (Revelashon 18:2, 4) E tabata pertenesé na e iglesia kaminda e kasamentu lo tuma lugá i e sa ku durante e seremonia lo pidi tur hende pa partisipá entre otro den orashon, kantika i otro aktonan religioso. Loida no ke tin nada di haber ku esei i e no ke ta einan mes pa e no sintié preshoná pa kibra su integridat. Loida ta respetá su esposo, kende segun Beibel ta su kabes, i kier koperá kuné; sin embargo e no kier violá prinsipionan bíbliko tampoko. (Echonan 5:29) P’esei ku takto e ta splika su esposo ku asta si e esposo disidí di bai, e sí no por bai. Loida por splik’é ku si e bai i nenga di partisipá den algu, kisas lo e por pone e kara di su esposo na bèrgwensa, p’esei lo ta mas mihó pa Loida keda sin bai. E desishon aki ta laga e esposa keda ku un konsenshi limpi.

12. Un kristian a haña un invitashon pa un kasamentu na misa, kon lo e por rasoná i ki desishon lo e por tuma?

¹² Ruth ta enfrentá kasi e mesun problema. E ta respetá su esposo, ta determiná pa keda leal na Dios, i ta hasi kaso di su konsenshi  bíblikamente entrená. Ora e kaba di evaluá e mesun puntonan ku Loida a konsiderá, Ruth ta hasi orashon i ta konsultá “Pregunta di Lektor” den E Toren di Vigilansia di 15 di mei 2002. E ta kòrda ku e tres hebreonan a kumpli ku e mandato pa hasi akto di presensia kaminda idolatria lo tuma lugá, sin embargo nan a mantené nan integridat ya ku nan no a partisipá den un akto di idolatria. (Daniel 3:15-18) Ruth ta disidí di bai ku su esposo pero lo e no partisipá den nada di karakter religioso, i e ta aktua di akuerdo ku su konsenshi. E ta splika su esposo ku takto pero di un manera bon kla kiko su konsenshi lo permitié hasi i kiko e no por hasi. Ruth ta spera ku su esposo lo por mira e diferensia entre adorashon berdadero i adorashon falsu.—Echonan 24:16.

13. Pakiko nos no mester keda straño ku dos kristian ta yega na konklushon diferente?

¹³ E echo ku dos kristian lo por yega na konklushon diferente ta nifiká ku no ta importá kiko un hende ta hasi? Òf ku un di nan tin un konsenshi débil? Nò, esei no ta e kaso. Podisé Loida ta realisá ku debí na su eksperensia den pasado ku e músika i otro kosnan ku tin di haber ku seremonianan religioso, lo por ta masha peligroso p’e si e bai misa. I e echo ku su esposo a yega di insistí den pasado pa e partisipá den adorashon falsu lo por afektá su konsenshi. Pues e ta konvensí ku e desishon ku el a tuma ta e mihó desishon p’e.

14. Kiko kristiannan mester tene na mente ora ta trata di desishon personal?

¹⁴ Pero e desishon ku Ruth a tuma ta malu? Ningun hende no tin derecho di bisa esei. Nan no mester husg’é òf kritik’é pasobra el a disidí di asistí, pero lo no partisipá den e aktonan religioso. Tene Pablo su konseho na mente ora ta trata di desishonnan personal ku tin di haber ku komementu di sierto kuminda òf no: “No laga esun ku ta kome despresiá esun ku no ta kome, i no laga esun ku no ta kome husga esun ku sí ta kome . . . Pa su mes shon e ta keda para òf e ta kai; i e lo keda para, pasobra Señor tin poder pa hasié para.” (Romanonan 14:3, 4) Klaru ku ningun kristian berdadero lo no konsehá un otro hende pa ignorá e guia di un konsenshi entrená, pasobra esei lo ta meskos ku ignorá un stèm ku ta duna un mensahe ku por salba bida.

15. Pakiko ta importante pa nos tene kuenta ku e konsenshi i sintimentunan di otro hende?

¹⁵ Laga nos sigui ku e mesun senario. Ámbos kristian tin ku konsiderá faktornan adishonal. Un di nan ta: Ki efekto e desishon lo por tin riba otro hende? Pablo a konsehá nos: “Disidí esaki: pa no pone ningun opstákulo òf piedra di trompeká den un ruman su kaminda.” (Romanonan 14:13) Podisé Loida sa ku situashonnan similar a kousa difikultat  den e kongregashon òf den su famia, i loke e hasi por tin un efekto grandi riba su yunan. Na kontraste, por ta Ruth ta konsiente ku desishonnan similar no a kousa problema den e kongregashon ni den komunidat. Ámbos hende muhé, i nos tur, mester realisá ku un konsenshi debidamente entrená ta sensitivo i p’esei ta tene kuenta ki efekto sierto desishon por tin riba otro hende. Hesus a bisa: “Ken ku hasi ún di e chikitunan aki, ku ta kere den mi, trompeká, ta mihó p’e ku un piedra di mulina pisá wòrdu kologá na su garganta, i ku e wòrdu hogá den profundidat di laman.” (Mateo 18:6) Si un hende no tin kunes ku e por trompeká otro hende, su konsenshi por bira kontaminá meskos ku den e kaso di algun kristian na Kreta.

16. Ki kambionan nos lo por spera ku un kristian lo hasi ku tempu?

¹⁶ Un kristian mester sigui mehorá su relashon ku Dios, meskos ku e tin ku sigui mehorá den skucha e bos di su konsenshi i hasi kaso di dje. Laga nos bisa ku un tal Marko a batisá resientemente. Su konsenshi ta bis’é pa no hasi kosnan ku Beibel ta desaprobá i ku el a yega di hasi, kisas kosnan ku tin di haber ku adorashon di imágen òf uso di sanger. (Echonan 21:25) Awor asta e ta tene kuidou pa evitá kosnan ku ta hopi similar na loke Dios ta prohibí. Di otro banda, e ta haña straño dikon algun kristian ta rechasá algun kos ku e ta haña ta aseptabel, manera sierto programa di televishon.

17. Ilustrá kon tempu i un mihó relashon ku Dios por tin efekto riba e konsenshi i desishonnan di un kristian.

¹⁷ Ku tempu Marko ta haña mas konosementu i ta hala mas serka Dios. (Kolosensenan 1:9, 10) Ku ki resultado? E bos di su konsenshi ta haña bastante entrenamentu. Awor Marko ta mas inkliná na skucha su konsenshi i konsiderá kuidadosamente prinsipionan bíbliko. E ta realisá ku algun di e kosnan “hopi similar” ku e tabata evitá en realidat no ta kontra Dios su pensamentu. Es mas, siendo ku Marko su konsenshi ta reakshoná bon riba prinsipio di Beibel i e ta dispuesto pa hasi kaso di su konsenshi bon entrená, awor su konsenshi ta motiv’é pa evitá programanan ku promé e tabata konsiderá komo aseptabel. Sí, su konsenshi a ser refiná.—Salmo 37:31.

18. Ki motibu nos tin pa alegrá?

¹⁸ Den mayoria di kongregashon tin kristian den diferente etapa di desaroyo. Tin di nan ta nobo den e bèrdat. Kisas nan konsenshi kasi no ta reakshoná en konekshon ku sierto asuntu, pero den otro asuntunan sí e ta masha sensitivo. E kristiannan ei tin mester di tempu i yudansa pa nan konsenshi por reakshoná mihó riba Yehova su guia i pa nan hasi kaso di nan konsenshi entrená. (Efesionan 4:14, 15) Felismente, den e mesun kongregashonnan, probablemente tin hopi kristian ku tin konosementu profundo, eksperensia den apliká prinsipionan bíbliko i un konsenshi ku ta kuadra debidamente ku Dios su pensamentu. Esta un goso pa ta rònt di “esnan ku ta puru,” kendenan ta mira komo moralmente i spiritualmente “puru” e kosnan ku ta aseptabel pa Señor! (Efesionan 5:10) Ohalá ku nos tur tin komo meta pa progresá te na e grado ei i mantené un konsenshi asina ku ta na armonia ku konosementu eksakto di e bèrdat i deboshon na Dios.—Tito 1:1.

[Nota]

Kon Lo Bo Kontestá?

• Dikon algun kristian na Kreta tabatin un konsenshi kontaminá?

• Kon ta posibel ku dos kristian ku konsenshi bon entrená por tuma desishon ku ta diferente?

• Ku tempu, kiko mester pasa ku nos konsenshi?

[Preguntanan di Estudio]

[Mapa na página 18]

(Pa e teksto den su formato kompleto, wak e publikashon)

Sisilia

GRESIA

Kreta

ASIA MENOR

Chipre

LAMAN MEDITERÁNEO

[Plachi na página 20]

Dos kristian ku ta enfrentá un situashon similar por tuma desishon diferente