Investigando “e Kosnan Profundo di Dios”

“E spiritu ta skudriñá tur kos, asta e kosnan profundo di Dios.”—1 KORINTIONAN 2:10, NW.

1. Menshoná algun bèrdat bíbliko ku ta duna hopi goso na studiantenan nobo di Beibel.

MAYORIA di nos den e kongregashon kristian por kòrda e goso ku nos a sinti ora nos a siña e bèrdat pa promé bes. Nos a haña sa dikon e nòmber di Yehova ta importante, dikon e ta permití sufrimentu, dikon algun hende ta bai shelu i ki futuro ta spera e restu di humanidat fiel. Kisas promé ku esei nos a analisá loke Beibel ta bisa, pero e kosnan ei tabata skondí pa nos, manera nan ta pa mayoria parti di humanidat. Nos tabata manera un hòmber ku ta purba wak un ref di koral bou di awa. Sin ningun aparato, e ta mira masha poko di e kosnan bunita ku tin bou di e superfisie di laman. Pero ku yudansa di un dùikbrel òf un boto ku bòm di glas, e ta keda emoshoná ora pa promé bes e ta mira e kolónan briante di koral-, piská-, bestianan di laman ku parse mata i otro kriaturanan fasinante. Di mes manera, ora un persona a kuminsá yuda nos komprondé e Skritura, nos a haña e promé bista di “e kosnan profundo di Dios.”—1 Korintionan 2:8-10, NW.

2. Dikon e goso ku nos a sinti ora nos a siña konosé e Palabra di Dios por dura pa semper?

² Nos mester keda satisfecho ku djis un komprondementu superfisial di bèrdat bíbliko? E ekspreshon “kosnan profundo di Dios” ta enserá e komprondementu di e sabiduria di Dios ku e ta revelá mediante su spiritu santu na kristiannan, pero ku ta skondí pa otro hende. (1 Korintionan 2:7) Yehova su sabiduria ta sin límite, i nos por haña hopi goso ora nos ta  investigá su kamindanan. Nunka nos lo kaba di siña tur kos tokante e sabiduria di Dios su kamindanan. Pa nos por konserbá pa semper e goso ku nos a sinti ora ku pa promé bes nos a siña konosé e siñansanan básiko di Beibel, nos tin ku sigui investigá “e kosnan profundo di Dios” sin stòp.

3. Dikon nos mester tin un bon komprondementu di e base pa nos kreensianan?

³ Dikon nos tin ku komprondé e “kosnan profundo” ei? E echo ku nos no solamente ta komprondé loke nos ta kere sino tambe pakiko nos ta kere esei—esta, e base pa nos kreensianan—ta edifiká nos fe i konfiansa. E Skritura ta manda nos usa nos “mente,” pa “komprobá [pa nos mes] kiko ta e bon i agradabel i perfekto boluntat di Dios.” (Romanonan 12:1, 2) Ora nos ta komprondé dikon Yehova ke pa nos biba na un sierto manera, esaki ta fortifiká nos determinashon pa obedes’é. P’esei, konosementu di “e kosnan profundo” por duna nos forsa pa resistí e tentashon pa kometé malecho i tambe por motivá nos pa ta ‘seloso den hasimentu di bon obra.’—Tito 2:14.

4. Kiko studiamentu di Beibel ta enserá?

⁴ Pa nos por komprondé kosnan profundo nos tin ku studia. Sin embargo, studiamentu no ta meskos ku lesa algu aribariba. E ta enserá analisá informashon kuidadosamente i wak kon e ta relashoná ku loke nos sa kaba. (2 Timoteo 1:13) E ta rekerí pa bo komprondé e motibu pakiko algu ta ser bisá. Ora nos ta studia, nos tin ku meditá riba e maneranan ku nos por usa loke nos ta siña pa tuma desishonnan sabí i pa yuda otro hende. Ademas, siendo ku “tur Skritura ta inspirá pa Dios i ta útil pa siñansa,” nos estudio mester inkluí “tur palabra ku ta sali for di boka di Dios.” (2 Timoteo 3:16, 17; Mateo 4:4) Studiamentu por rekerí hopi trabou! Pero e por ta dushi tambe, i “e kosnan profundo di Dios” no ta demasiado difísil pa komprondé.

Yehova Ta Yuda Hende Humilde Komprondé

5. Ken por komprondé “e kosnan profundo di Dios”?

⁵ Asta si bo no tabata un studiante sobresaliente na skol i no tin e kustumber di studia, no pensa ku bo no por komprondé “e kosnan profundo di Dios.” Durante Hesus su ministerio terenal, Yehova a revelá komprondementu di Su propósito, no na hende sabí i inteligente, sino na hende ku no tabata eduká ni siñá pero ku humildemente a aseptá pa ser siñá dor di e sirbidó di Dios. Na komparashon ku esnan eduká na skolnan nan tabata manera beibi. (Mateo 11:25; Echonan 4:13) Relashoná ku “e kosnan ku Dios a prepará pa esnan ku ta stim’é,” apòstel Pablo a skirbi su kompañeronan kreyente: “Ta na nos Dios a revelá nan mediante su spiritu, pasobra e spiritu ta skudriñá tur kos, asta e kosnan profundo di Dios.”—1 Korintionan 2:9, 10, NW.

6. Kiko 1 Korintionan 2:10 ke men?

⁶ Kon e spiritu di Dios ta investigá òf “skudriñá tur kos, asta e kosnan profundo di Dios”? En bes di duna kada kristian un revelashon personal di e bèrdat, Yehova ta usa su spiritu santu pa dirigí su organisashon ku ta perkurá pa e pueblo ku ta sirbi Dios unidamente risibí komprondementu di Beibel. (Echonan 20:28; Efesionan 4:3-6) Mundialmente, tur kongregashon ta disfrutá di e mesun programa di estudio di Beibel. Atraves di un periodo di añanan, nan ta abarká e totalidat di siñansanan  bíbliko. Mediante e kongregashon bou di direkshon di spiritu santu hende ta ser yudá pa adoptá e aktitut nesesario pa komprondé “e kosnan profundo di Dios.”—Echonan 5:32.

Loke “e Kosnan Profundo di Dios” Ta Enserá

7. Dikon hopi hende no ta komprondé “e kosnan profundo di Dios”?

⁷ Nos no tin ku pensa ku “kosnan profundo” mester ta kosnan difísil pa komprondé. Konosementu di “e kosnan profundo di Dios” ta skondí pa mayoria di hende, no pasobra e sabiduria di Dios ta demasiado difísil pa atkerí, sino pasobra Satanas ta gaña hende i pone ku nan ta rechasá e yudansa ku Yehova ta perkurá mediante Su organisashon.—2 Korintionan 4:3, 4.

8. Kua kosnan profundo Pablo a referí na dje den kapítulo tres di su karta na e efesionan?

⁸ Kapítulo tres di e karta ku Pablo a skirbi e efesionan ta mustra ku “e kosnan profundo di Dios” ta inkluí hopi bèrdat ku gran parti di e pueblo di Yehova ta komprondé bastante bon. Esakinan ta bèrdatnan tokante entre otro, e identidat di e Simia primintí, e skohementu di esnan entre humanidat ku tin un speransa selestial i e Reino Mesiániko. Pablo a skirbi: “Den otro generashonnan [“e sekreto aki,” NW] no a wòrdu hasí konosí na e yunan di hende, manera el a wòrdu revelá awor na su apòstelnan i profetanan santu den spiritu: ku e paganonan ta ko-herederonan i miembronan di e mesun kurpa, i ko-partisipantenan di e promesa den Kristu Hesus.” Pablo a bisa ku el a haña e asignashon pa “trese na klaridat kiko ta e atministrashon di e misterio [òf, “sekreto sagrado,” NW] ku pa siglonan tabata skondí den Dios.”—Efesionan 3:5-9.

9. Dikon ta un privilegio pa komprondé “e kosnan profundo di Dios”?

⁹ Pablo a sigui splika ku ta Dios su boluntat tambe pa ‘e sabiduria multiforme di Dios awor por bira konosí pa medio di e iglesia den e lugánan selestial.’ (Efesionan 3:10) Ora angelnan opservá i komprondé e sabiduria di Yehova su trato ku e kongregashon kristian, esaki ta benefisiá nan. Nos tin e gran privilegio di por komprondé kosnan ku asta angelnan ta interesá den dje! (1 Pedro 1:10-12) Despues Pablo a bisa ku nos mester hasi esfuerso pa “por komprondé, huntu ku tur e santunan, kual ta e hanchura i largura i haltura i profundidat,” di e fe kristian. (Efesionan 3:11, 18) Awor, laga nos konsiderá algun ehèmpel di kosnan profundo ku por amplia nos komprondementu.

Ehèmpelnan di Kosnan Profundo

10, 11. Segun e Skritura, ki ora Hesus a bira e parti prinsipal di e “simia” di Dios su esposa òf “muhé” selestial?

¹⁰ Nos sa ku Hesus ta e parti prinsipal di e “simia” di Dios su esposa òf “muhé” selestial ku Génesis 3:15 ta referí na dje. Pa amplia nos konosementu nos lo por puntra: ‘Ki ora Hesus a bira e Simia primintí? Tabata durante su eksistensia prehumano, ora el a nase komo hende, ora el a batisá òf ora el a ser resusitá?’

¹¹ Dios a primintí ku e parti selestial di su organisashon ku profétikamente ta ser yamá su “muhé” òf esposa, lo a produsí un simia ku lo heridá e kolebra den su kabes. Sin embargo, míles di aña a pasa sin ku e esposa di Dios a produsí un simia ku por a destruí Satanas i su obranan. P’esei e profesia di Isaias a yama e muhé “steril” i a bisa ku e ta “tristu den spiritu.” (Isaias 54:1, 5, 6) Ku tempu Hesus a nase na Bètlehèm. Pero ta despues di su boutismo numa, ora el a ser ungí ku spiritu pa bira un yu spiritual di Dios, Yehova a anunsiá: “Esaki ta mi Yu.” (Mateo 3:17; Juan 3:3) Por fin e parti prinsipal di e “simia” di e muhé a presentá. Mas despues, siguidónan di Hesus tambe a ser ungí i engendrá ku spiritu santu. Yehova su esposa òf “muhé” ku pa hopi tempu a sinti su mes manera un ‘muhé ku nunka a haña yu,’ por fin por a “dal gritu di goso.”—Isaias 54:1; Galationan 3:29.

12, 13. Kua tekstonan di Beibel ta mustra ku “e esklabo fiel i prudente” ta konsistí di tur kristian ungí riba tera?

 ¹² Un segundo ehèmpel di kosnan profundo ku a ser revelá na nos tin di haber ku Dios su propósito pa skohe 144.000 persona for di entre humanidat. (Revelashon 14:1, 4) Nos ta aseptá e siñansa ku tur e ungínan ku ta biba riba tera na kualke momento dado ta forma “e esklabo fiel i prudente” ku manera Hesus a bisa, lo a perkurá “kuminda” na e tempu oportuno pa su kas. (Mateo 24:45) Kua tekstonan di Beibel ta duna prueba ku e komprondementu aki ta korekto? Akaso Hesus por a referí na kualke kristian en general ku ta edifiká su rumannan ku alimento spiritual?

¹³ Dios a bisa e nashon di Israel: “Boso ta mi testigunan . . . i mi sirbidó ku mi a skohe.” (Isaias 43:10) Pero dia 11 di nisan na aña 33 di nos era, Hesus a bisa e lidernan di Israel ku Dios a rechasá nan nashon komo Su sirbidó. El a bisa nan: “E reino di Dios lo wòrdu kitá for di boso, i duná na un nashon ku sí ta hasié produsí fruta.” Hesus a bisa e multitut: “Mira, boso kas ta keda desolá pa boso!” (Mateo 21:43; 23:38) Komo esklabo di Yehova, e kas di Israel no tabata ni fiel ni prudente. (Isaias 29:13, 14) Mas despues riba e mesun dia ei, Hesus a puntra: “Ken anto ta e esklabo fiel i prudente?” Ku e pregunta ei, de echo e tabata puntrando: ‘Kua nashon prudente lo remplasá Israel komo Dios su esklabo fiel?’ Apòstel Pedro a duna e kontesta ora el a bisa e kongregashon di kristiannan ungí: “Boso ta . . . un nashon santu, un pueblo pekuliar.” (1 Pedro 1:4; 2:9) E nashon spiritual ei, “e Israel di Dios,” a bira Yehova su esklabo nobo. (Galationan 6:16) Meskos ku tur e miembronan di Israel di antigwedat a forma un “sirbidó,” asina tur kristian ungí riba tera na kualke momento dado ta forma un “esklabo fiel i prudente.” Nos tin e gran privilegio di por risibí “kuminda” for di e esklabo di Dios!

Estudio Personal Por Ta Plasentero

14. Dikon studiamentu di Beibel ta duna mas goso ku ora nos djis les’é?

¹⁴ Ora nos haña komprondementu nobo di e Skritura ku ta ser revelá na nos, nos ta sinti nos felis pasobra esaki ta fortalesé nos fe, no ta bèrdat? Ta p’esei studiamentu di Beibel—mas ku djis lesamentu—por ta algu asina gososo. Pues anto, ora bo ta lesa publikashonnan kristian, puntra bo mes: ‘Kon e splikashon aki ta diferente for di e komprondementu anterior ku mi tabatin di e tópiko aki? Kua otro tekstonan òf argumentonan bíbliko mi ta kòrda ku ta duna prueba adishonal pa e konklushonnan ku e artíkulo aki ta saka?’ Si bo tin ku hasi mas investigashon, skirbi e pregunta pa kua lo bo ke haña kontesta, i hasié e tópiko di un futuro proyekto di estudio.

15. Kua proyektonan di estudio por ta plasentero, i kon nan por tin benefisio duradero pa bo?

¹⁵ Ki proyektonan di estudio lo por duna bo e goso di atkerí komprondementu nobo? Nos por siña masha hopi di proyektonan manera un análisis profundo di e vários paktonan òf aliansanan ku Dios a sera na benefisio di humanidat. Pa esaki, nos por usa e buki Hala Serka Yehova, kapítulo 19. * Bo por fortalesé bo fe mediante un estudio di e profesianan ku a señalá na Hesukristu òf mediante un konsiderashon versíkulo pa versíkulo di un di e bukinan profétiko di Beibel. Un otro proyekto ku tambe ta fortalesé fe ta un repaso di e historia moderno  di Testigunan di Yehova. Ora bo ta repasá artíkulonan di e rúbrika “Pregunta di Lektor” ku a yega di sali den E Toren di Vigilansia, esaki sigur lo refreská bo komprondementu di sierto tekstonan di Beibel. Tuma bon nota di e rasonamentu basá riba Beibel ku a ser usá pa yega na sierto konklushonnan ku e artíkulonan ta presentá. Esaki lo yuda bo entrená bo ‘mente’ pa asina bo por diserní loke ta bon i loke ta malu. (Hebreonan 5:14) Segun ku bo ta studia, hasi anotashon sea den bo kopia personal di Beibel òf riba un blachi pa asina bo estudio por tin benefisio duradero pa bo i pa esnan ku bo por yuda.

Yuda Hóbennan Disfrutá di Estudio di Beibel

16. Kon bo por yuda hóbennan disfrutá di estudio di Beibel?

¹⁶ Mayornan por hasi hopi pa stimulá e apetit spiritual di nan yunan. No balotá hóbennan su kapasidat di komprondé kosnan profundo. Si bo duna nan e tarea pa investigá un tópiko komo preparashon pa e estudio bíbliko di famia, bo por hasi nan pregunta tokante loke nan a siña. Durante estudio di famia por tin seshonnan di práktika tambe pa yuda hóbennan siña kon pa defendé nan fe i proba ku loke nan a ser siñá ta bèrdat. Ademas, bo por usa e foyeto “Mira e Tera Bunita” * pa siña nan e geografia di Beibel i pa mustra nan e lugánan ku ta ser menshoná den e porshon ku boso ta abarká den e lesamentu semanal di Beibel.

17. Dikon nos mester ta balansá relashoná ku nos proyektonan di estudio personal di Beibel?

¹⁷ Proyektonan di estudio personal di Beibel por ta fasinante i fortalesedor di fe, pero tene kuidou sí pa bo no laga nan stroba bo di prepará pa e reunionnan di kongregashon. E reunionnan ta un otro manera ku Yehova ta instruí nos mediante “e esklabo fiel i prudente.” Sin embargo, investigashon adishonal por yuda bo duna komentarionan signifikativo na reunionnan manera por ehèmpel, na e Estudio di Buki di Kongregashon òf durante e parti di puntonan sobresaliente for di e lesamentu semanal di Beibel pa e Skol di Ministerio Teokrátiko.

18. Dikon ta bale la pena pa hasi e esfuerso nesesario pa studia “e kosnan profundo di Dios”?

¹⁸ Estudio personal profundo di e Palabra di Dios por yuda bo hala serka Yehova. Mustrando e balor di un estudio asina, Beibel ta bisa: “Sabiduria ta protekshon meskos ku plaka ta protekshon. Ma e bentaha di konosementu ta ku sabiduria ta preservá bida di esnan ku ta pose’é.” (Eklesiastés 7:12) P’esei, ta bale la pena pa bo hasi e esfuerso nesesario pa profundisá bo komprondementu di bèrdatnan ku ta bini di Dios. Beibel ta primintí hende ku ta sigui investigá: ‘Lo bo deskubrí e konosementu di Dios.’—Proverbionan 2:4, 5.

[Nota]

Bo Por Splika?

• Kiko ta “e kosnan profundo di Dios”?

• Dikon nos no mester stòp nunka di studia kosnan profundo?

• Dikon ta tur kristian por tin e goso di komprondé “e kosnan profundo di Dios”?

• Kon bo por benefisiá mas plenamente di “e kosnan profundo di Dios”?

[Preguntanan di Estudio]

[Plachi na página 28]

Ki ora Hesus a bira e Simia primintí?

[Plachi na página 31]

Mayornan por duna nan yunan tarea pa investigá tópikonan komo preparashon pa e estudio di famia