Alegrá Debí na Su “Viktoria Huntu ku e Lamchi”

DEN un karta ku Carey W. Barber a skirbi na 1971, el a reflekshoná riba e promé 50 aña di su sirbishi na e Dios berdadero: “E añanan den e sirbishi di Yehova tabata hopi bon mes. E kompañerismo di su pueblo; e protekshon kontra hende malbado di Satanas su mundu; e speransa di viktoria huntu ku e Lamchi, Hesukristu; i e evidensia di Yehova su amor, tur e kosnan aki huntu ta produsí un pas masha dushi i un satisfakshon ku ta protehá e kurason i ta duna un speransa sigur di e triunfo final.”

Seis aña despues Ruman Barber, kende ta un kristian ungí pa spiritu, a kuminsá sirbi komo un miembro di Kuerpo Gobernante di Testigunan di Yehova. Durante e siguiente 30 añanan el a sirbi den e funshon ei, i a sigui antisipá “viktoria huntu ku e Lamchi.” El a logra esei ya ku el a keda fiel te na su morto na edat di 101 aña, riba djadumingu 8 di aprel 2007.—1 Korintionan 15:57.

Carey Barber a nase na Inglatera na aña 1905 i a batisá na Winnipeg, Canada, na 1921. Dos aña despues, e ku su ruman ohochi, Norman a muda bai Brooklyn, New York, pa yuda ku un proyekto nobo. E tempu ei, Yehova su pueblo tabata kla pa kuminsá produsí nan mes bukinan pa plama e bon nobo di Reino “den henter mundu.” (Mateo 24:14) Un di Ruman Barber su promé asignashonnan tabata pa traha ku un mashin di imprenta chikitu. Mester a imprimí entre otro dokumentonan pa kasonan legal ku tabata ser hibá den Korte Supremo di Merka. Ku tempu, Ruman Barber a traha den Departamento di Sirbishi, enfokando riba asuntunan di kongregashon i e obra di prediká den henter e pais.

Ku e eksperensia ku el a gana, Ruman Barber tabatin tur e kualifikashonnan nesesario ora ku na 1948 el a haña asignashon komo superintendente biahero pa bishitá asamblea- i kongregashonnan den henter e parti wèst di Merka. El a bisa ku e tabata disfrutá spesialmente di ta pafó den aire fresku den e aktividat públiko di prediká. E asignashon aki a pone hopi ruman den kontakto ku Ruman Barber. Su kapasidat di kapta kos lihé i su selo pa e sirbishi a resultá masha útil mes ora mas despues el a asistí na e di 26 klas di e Skol Bíbliko di Galaad di Watchtower. Durante e temporada di skol ei, el a konosé un studiante di Canada, Sydney Lee Brewer. Despues di graduashon nan a kasa i tabatin un luna de miel kòrtiku riba kaminda pa bai sirbi e kongregashonnan den e área di Chicago, Illinois. Ruman Sydney Barber tabata un esposa masha bon mes i tabata un fuente kontinuo di sosten pa su esposo durante e dos dékadanan ku nan tabata den e trabou biahero.

Esnan ku a topa ku Ruman Barber i a siña konos’é durante e dékadanan ku el a sirbi komo superintendente di distrito i sirkuito òf, durante e 30 añanan ku el a traha i biaha komo miembro di Kuerpo Gobernante, lo keda kòrda su diskursonan i su komentarionan bibu pa hopi tempu. Nos tin tur motibu pa alegrá debí na su “viktoria huntu ku e Lamchi.”