1, 2. Ora nos meditá riba Yehova su organisashon universal, kiko esei ta motivá nos pa hasi?

ORA nos para pensa riba e gran organisashon universal ku nos ta forma parti di dje, nos ta keda masha impreshoná. E vishonnan ku nos ta lesa di dje den Ezekiel kapítulo 1 i Daniel kapítulo 7 ta duna un deskripshon fasinante di e manera ku Yehova ta dirigí asuntunan pa realisá su propósito. Hesus ta na kabes di e parti di Yehova su organisashon ku ta riba tera. E ta dirigí e organisashon akí pa konsentrá riba e predikashon di e bon notisia, pa instruí i animá esnan ku ta hasi e trabou ei i pa yuda mas hende bira adoradó di Yehova. Esaki ta motivá nos pa konfia den Yehova su organisashon.—Mat. 24:45.

² Abo ta imitá e ehèmpel di e organisashon maravioso akí i keda okupá den e sirbishi di Dios? Bo ta bira dia pa dia mas entusiasmá ku e bèrdat, òf bo ta sinti ku bo entusiasmo ta menguando? Podisé ora nos pensa riba e preguntanan ei, nos ta ripará ku nos a kuminsá kansa òf kisas a pèrdè un poko di nos entusiasmo. Esei por pasa i ta loke a pasa tambe den promé siglo. Apòstel Pablo tabatin ku rekordá e kristiannan di su tempu pa konsiderá e ehèmpel i entusiasmo di Hesus. Pablo a bisa ku esaki lo a yuda nan pa nan ‘no kansa i pèrdè ánimo.’ (Heb. 12:3) Asina tambe, un análisis kuidadoso di e artíkulo anterior, ku ta mustra kiko Yehova su organisashon ta logrando awe, lo mester a stimulá nos pa mantené nos entusiasmo i perseverá den e sirbishi di Dios.

3. Kiko nos mester hasi pa nos no kansa, i kiko nos lo analisá den e artíkulo akí?

³ Ma Pablo a indiká ku nos tin ku hasi mas ku meditá so riba e ehèmpel di Yehova su organisashon si nos no ke “kansa,” òf pèrdè nos entusiasmo den nos sirbishi na Dios. El a bisa ku nos mester sigui “hasi loke ta bon.” (Gal. 6:9) Laga nos analisá sinku kos ku nos  mester hasi pa por mantené nos entusiasmo i pa nos por imitá e ehèmpel di Yehova su organisashon aktivo. E ora ei nos por evaluá si tin sierto aspektonan ku nos òf nos famia tin ku traha ariba.

4. Dikon nos por bisa ku nos reunionnan ta un parti integral di adorashon berdadero?

⁴ Semper Yehova su sirbidónan a bini huntu pa ador’é. Esei ta algu masha importante pa nan. Den shelu, e angelnan regularmente ta haña invitashon pa reuní ku Yehova. (1 Rei. 22:19; Yòb 1:6; 2:1; Dan. 7:10) Den Israel di antigwedat, e nashon mester a reuní “pa nan tende i siña.” (Deu. 31:10-12) Den promé siglo, e hudiunan tabatin e kustumber di bai snoa pa lesa for di e Skritura. (Luk. 4:16; Echo. 15:21) Ora e kongregashon kristian a ser formá, e reunionnan a keda algu importante i te awe nan ta un parti integral di nos adorashon. Kristiannan berdadero ta ‘presta atenshon na otro pa nan por stimulá otro pa mustra amor i hasi bon obra.’ Nos tin ku sigui “animá otro,” i muchu mas ainda ku nos ta mira e dia di Yehova ta yega serka.—Heb. 10:24, 25.

5. Kon nos por animá otro na nos reunionnan?

⁵ Un manera importante ku nos ta animá otro ta ora nos ta partisipá den e reunionnan. Tin vários manera ku nos por ekspresá nos fe. Por ehèmpel, nos por kontestá e pregunta riba un paragraf, komentá riba un teksto bíbliko òf konta un eksperensia kòrtiku ku ta mustra pakiko ta sabí pa sigui prinsipio di Beibel. (Sal. 22:22; 40:9) Maske kuantu tempu nos tin den e bèrdat, tur e komentarionan ku nos ta tende na reunion, tantu di hende grandi komo di mucha, ta un gran animashon pa nos.

6. Kon nos reunionnan ta yuda nos keda spiritualmente aktivo?

⁶ Pa ki otro motibu ta asina importante pa Dios pa nos no pèrdè nos reunionnan? Pasobra nos reunionnan, asambleanan i kongresonan ta yuda nos haña kurashi pa prediká, asta ora hende den nos teritorio ta oponé nos òf no ke skucha nos. (Echo. 4:23, 31) E diskursonan i otro partinan basá riba Beibel ta fortalesé nos fe. (Echo. 15:32; Rom. 1:11, 12) E siñansa i interkambio di estímulo ku nos ta haña na nos reunionnan ta duna nos berdadero felisidat i “sosiegu [òf, konsuelo] den e dianan di atversidat.” (Sal. 94:12, 13) E Komité di Siñansa di e Kuerpo Gobernante ta supervisá preparashon di tur e programanan spiritual pa instruí e pueblo di Yehova rònt mundu. Nos ta masha gradisidu pa e instrukshon ekselente ku nos ta haña tur siman na nos reunionnan durante henter aña!

7, 8. (a) Kiko ta e motibu prinsipal ku nos ta bai nos reunionnan di kongregashon? (b) Kon e reunionnan ta yuda bo den sentido spiritual?

⁷ Pero nos no ta bai reunion djis pa e benefisionan ku nos ta risibí. E motibu prinsipal pakiko nos ta bini huntu ta pa adorá Yehova. (Lesa Salmo 95:6.) Ki un privilegio nos tin di por kanta alabansa na nos Dios maravioso! (Kol. 3:16) Yehova ta meresé e adorashon ku nos ta dun’é ora nos ta asistí na reunionnan teokrátiko i partisipá den nan. (Rev. 4:11) Ta p’esei Beibel ta urgi nos pa “no keda sin bai e reunionnan, manera algun a tuma pa kustumber.”—Heb. 10:25.

⁸ Nos ta mira nos reunionnan komo un medio ku Yehova a duna nos pa yuda nos perseverá te ora e pone fin na e mundu malbado akí? Si esei ta e kaso, nos reunionnan lo ta entre “e kosnan mas importante” ku nos ta traha lugá p’e, maske kon drùk nos bida ta. (Flp. 1:10) Mester tin un motibu masha serio pa nos pèrdè un reunion, ya ku ta un oportunidat nos ta pèrdè pa adorá Yehova huntu ku nos rumannan.

9. Kon nos por sa ku e trabou di prediká ta importante?

⁹ Pa nos por imitá e ehèmpel di Yehova su organisashon aktivo, nos mester partisipá plenamente den e trabou di prediká. Hesus a kuminsá ku e trabou akí tempu e tabata riba tera. (Mat. 28:19, 20) Djei padilanti, e trabou di prediká e Reino i di hasi disipel ta un di e aktividatnan mas importante di henter e organisashon di Yehova. Tin hopi eksperensia den nos tempu ku ta duna prueba ku e angelnan ta apoyá nos trabou i ta yuda nos haña e hendenan ku ta “dispuesto pa aseptá e bèrdat ku ta hiba na bida eterno.” (Echo. 13:48; Rev. 14:6, 7) Henter e propósito di e parti visibel di Yehova su organisashon ta pa organisá i apoyá e trabou di prediká. E trabou akí ta un di e kosnan mas importante den bo bida tambe?

10. (a) Duna un ehèmpel kon nos por keda ku nos entusiasmo pa e bèrdat. (b) Kon sirbishi a yuda bo pa bo no kansa di hasi loke ta bon?

¹⁰ Ora nos ta prediká ku entusiasmo den sirbishi, nos amor pa e bèrdat ta keda fuerte. Asina Mitchel, un ruman pionero regular i ansiano pa hopi tempu, ta sinti. El a bisa: “Mi gusta papia ku hende tokante e bèrdat. Ora mi pensa riba un artíkulo nobo di E Toren di Vigilansia òf ¡Despertad!, mi ta keda masha impreshoná ku e manera asina rasonabel i balansá ku e informashon den kada edishon ta keda presentá i tambe ku e sabiduria i perspikasia ku nan ta reflehá. Mi ta keda ansioso pa bai den sirbishi pa mira kon e hendenan lo reakshoná, kon mi  por lanta nan interes. Mi sirbishi ta tene mi stabil. Si mi tin kos di hasi, mi ta sòru di hasi nan sea promé òf despues di e ora ku mi tin reservá pa sirbishi.” Nos tambe por sigui firme den e último dianan akí si nos keda okupá den nos sirbishi sagrado.—Lesa 1 Korintionan 15:58.

11. Dikon nos mester hasi bon uso di e alimento spiritual ku nos ta risibí for di Yehova?

¹¹ Yehova a perkurá un abundansia di alimento spiritual mediante nos publikashonnan pa fortalesé nos. Sin duda, bo por kòrda ku bo a yega di lesa un publikashon i pensa: ‘Esaki ta presis loke mi tin mester! Ta komo si fuera pa mi Yehova a laga skirbi esaki!’ Esei no ta un koinsidensia. Yehova ta usa e publikashonnan ei pa siña nos i guia nos. El a bisa: “Lo mi instruí bo i siña bo e kaminda ku bo tin ku kana.” (Sal. 32:8) Nos ta hasi nos bèst pa lesa tur e publikashonnan ku nos ta risibí? Nos ta meditá riba loke nos a lesa? Esei lo yuda nos sigui perseverá i mantené nos entusiasmo den e sirbishi di Dios durante e último dianan difísil akí.—Lesa Salmo 1:1-3; 119:97.

12. Kiko por duna nos mas apresio pa nos publikashonnan?

¹² Ta bon pa nos pensa un ratu riba kuantu trabou tin enbolbí den perkurá e suministro regular akí di alimento spiritual saludabel. Esei lo duna nos mas apresio pa nos publikashonnan. E Komité di Redakshon di e Kuerpo Gobernante ta supervisá tur e trabou di investigá, skirbi, kontrolá, skohe plachi i tradusí tur publikashon ku nos ta imprimí òf pone riba nos website. E sukursalnan ku ta imprimí e publikashonnan ta manda nan e ora ei na kongregashonnan ku ta keda den serkania i tambe esnan mas leu. Dikon nos rumannan ta hasi tur e trabou akí? Pa e pueblo di Yehova por ta bon alimentá den sentido spiritual. (Isa. 65:13) P’esei, laga nos benefisiá plenamente di tur instrukshon i guia ku nos ta risibí mediante e organisashon di Yehova.—Sal. 119:27.

13, 14. Ken den shelu ta apoyando e organisashon di Yehova, i kon nos riba tera tambe por demostrá ku nos ta hasi esei?

¹³ Den e vishon ku apòstel Huan a haña, el a mira Hesus ta kore riba un kabai blanku, bayendo pa vense e hendenan ku ta rebeldiá kontra Yehova. (Rev. 19:11-15) Anto el a mira djis tras di Hesus, tambe riba kabai, e angelnan fiel huntu ku e ungínan fiel ku a resusitá pa bida den shelu. Esaki ta indiká ku nan ta apoyá Hesus komo nan Lider. (Rev. 2:26, 27) Nan ehèmpel ekselente ta siña nos ku nos mester demostrá ku nos ta apoyá esnan ku ta dirigí e organisashon di Yehova.

¹⁴ E multitut grandi tambe ta demostrá pleno apoyo pa e trabou ku e rumannan ungí di Kristu ku ta riba tera ainda ta hasi i kendenan ta dirigí e organisashon awe. (Lesa Zakarías 8:23.) Kon abo por demostrá ku bo ta apoyá e organisashon di Yehova? Un manera pa hasi esei ta di ‘obedesé esnan ku ta dirigí nos.’ (Heb. 13:7, 17) Esaki ta kuminsá for di den nos kongregashon. Nos por puntra nos mes: Loke nos ta bisa di e ansianonan den nos kongregashon ta animá otro hende pa respetá nan i tambe e trabou ku nan ta hasi? Nos ta siña nos yunan pa respetá e hòmbernan fiel akí i pa bai serka nan pa haña konseho basá riba Beibel? Ademas, nos ta analisá komo famia kon nos lo por usa nos rekursonan finansiero pa apoyá e obra mundial? (Pro. 3:9; 1 Kor. 16:2; 2 Kor. 8:12) Nos ta yuda limpia i mantené e Salòn di Reino i ta konsiderá esei un privilegio importante? Yehova ta duna nos su spiritu santu libremente ora e mira nos apoyá e organisashon den e maneranan akí.  I su spiritu ta duna nos e fortalesa ku nos mester pa nos no kansa den e último dianan akí.—Isa. 40:29-31.

15. Dikon nos tin ku lucha konstantemente pa biba na armonia ku Yehova su propósito?

¹⁵ Por último, si nos ke perseverá i sigui e ehèmpel di Yehova su organisashon aktivo, nos tin ku sòru ku nos mes ta biba na armonia ku e mensahe ku nos ta prediká. Pa logra esei, nos tin ku “hasi sigur di loke ta agradá Señor.” (Efe. 5:10, 11) Satanas, e mundu malbado akí i nos kurpa imperfekto ta pone ku konstantemente nos tin ku bringa kontra influensianan negativo den nos bida. Algun di boso, nos rumannan stimá, tin un lucha pisá tur dia pa mantené boso amistat ku Yehova. Yehova ta stima boso pa e esfuerso ku boso ta hasi. No stòp di hasi loke ta bon! Ora nos ta biba na armonia ku e propósito di Yehova, nos lo sinti un gran satisfakshon i nos por tin sigur ku nos adorashon no ta enbano.—1 Kor. 9:24-27.

16, 17. (a) Kiko nos mester hasi si nos kometé un piká serio? (b) Kiko nos por siña for di e ehèmpel di Annie?

¹⁶ Pero kiko bo mester hasi si bo kometé un piká serio? Buska yudansa mas pronto posibel. E situashon lo bira pió so si bo tene e asuntu skondí. Kòrda ku David a bisa ku ora el a keda ketu tokante su pikánan, ‘su kurpa a para kaba na nada dor di su kehamentu henter dia.’ (Sal. 32:3) Pues, si nos purba di skonde piká serio, nos lo pèrdè nos goso i kisas asta nos amistat ku Yehova, “ma esun ku konfesá i laga nan lo haña miserikòrdia.”—Pro. 28:13.

¹⁷ Konsiderá e ehèmpel di Annie. * Tempu Annie tabata tiner, e tabata un pionero regular. Ma el a kuminsá hasi malu na skondí, i esaki a molestiá su konsenshi mashá. El a konta: “Mi tabata tur ora bai infelis i deprimí.” Un dia na reunion, nan a analisá Santiago 5:14 i 15. Esaki a pone Annie realisá ku e tabatin mester di yudansa, i el a bai papia ku e ansianonan. Despues el a bisa: “E versíkulonan ei ta un resèpt ku Yehova a skirbi pa bo haña kurashon spiritual. E remedi no ta fásil pa guli, pero e ta kura bo sí. Mi a sigui e konseho di e versíkulonan ei, i nan a duna resultado.” Awor, despues di algun aña, Annie ta sirbiendo Yehova atrobe ku entusiasmo i ku un konsenshi limpi.

18. Nos mester ta desididu pa hasi kiko?

¹⁸ Esta un gran privilegio nos tin di biba den e último dianan akí i di ta parti di Yehova su organisashon maravioso! Sea desididu pa nunka despresiá e gran onor akí. Mas bien, huntu ku nos famia, laga nos hasi esfuerso pa asistí ku regularidat na nos reunionnan, pa buska diligentemente e hendenan di kurason sinsero ku tin den nos teritorio i pa benefisiá di e alimento spiritual ku nos ta haña regularmente. Ademas, laga nos demostrá ku nos ta apoyá esnan ku ta dirigí e organisashon, i laga nos biba na armonia ku e mensahe ku nos ta prediká. Si nos hasi e kosnan akí, nos lo ta imitando e ehèmpel di Yehova su organisashon aktivo i nos lo no kansa di hasi loke ta bon.