ORA Promé Guera Mundial a kuminsá na aña 1914, hopi hende a realisá ku e Studiantenan di Beibel no ta partisipá den guera. (Isa. 2:2-4; Huan 18:36; Efe. 6:12) Kon a bai ku sirbidónan di Dios na Gran Bretaña?

Na aña 1916, Gran Bretaña a pasa un lei ku ta obligá tur hende hòmber soltero entre 18 i 40 aña di edat pa bai guera. E lei akí a duna dispensashon solamente na esnan ku no kier a bai guera pa motibu di “religion òf prinsipionan moral.” Anto e gobièrnu a establesé tribunalnan pa determiná ken lo a haña dispensashon i te na ki grado nan lo a haña esei.

No opstante, no a dura mashá ku un 40 Studiante di Beibel a ser enkarselá den prizòn militar, i 8 a ser mandá kampo di bataya na Fransia. E akto inhustu akí a pone ku e rumannan na Gran Bretaña a manda un karta di protesta pa Promé Minister Herbert Asquith; huntu ku e karta, nan manda un karta di petishon ku 5.500 persona a firma.

Despues, e rumannan a haña sa ku e 8 Studiantenan di Beibel na Fransia a ser sentensiá na morto pasobra nan a nenga di bringa den guera. Pero ora nan tabata pará den fila pa ser tirá, outoridatnan a kambia nan sentensia pa dies aña di prizòn. Nan a manda nan Inglatera bèk pa sinta nan kastigu den un prizòn sivil.

Segun ku e guera a sigui, nan a eksigí pa hòmbernan kasá tambe bai guera. Den un kaso ku lo mester a krea un presedente na Manchester, Inglatera, e akusado tabata Henry Hudson, un dòkter i Studiante di Beibel. Dia 3 di ougùstùs 1916, korte a mustra ku Hudson a falta ku lei, a dun’é un but i a entreg’é na e militarnan. Na mes momento, nan a entamá un kaso similar kontra James Frederick Scott, un kolportur (pionero) di 25 aña di edat na Edinburgh, Eskosia. Pero el a ser deklará inosente. Ministerio públiko a apelá e sentensia, pero despues nan a legumai e kaso ei pa atendé un otro kaso similar na Lònden. Esei tabata e kaso kontra nos ruman Herbert Kipps. Pero e sí nan a deklará kulpabel; el a haña un but i a ser entregá na e militarnan.

Pa sèptèmber di aña 1916, un total di 264 ruman a pidi dispensashon di servisio militar. Solamente 5 di nan a haña dispensashon, miéntras ku 154 a ser obligá pa hasi trabou duru manera konstrukshon di kaminda, 23 a haña tarea militar ku no a enserá partisipá den guera, 82 a ser entregá na e kuerpo militar di kua algun a ser husgá i enkarselá. Pero hopi hende a protestá kontra e trato kruel ku e hòmbernan akí tabata haña den prizòn. I esei a pone ku gobièrnu a transferí nan di prizòn militar pa kampo sivil, unda nan mester a laborá.

 Edgar Clay i Pryce Hughes, kendenan a sirbi despues komo superintendente di sukursal, mester a traha riba un dam na Wales. Herbert Senior, ún di e ocho rumannan ku a bini bèk for di Fransia, a ser mandá e prizòn di Wakefield na Yorkshire. Otronan a sinta nan kastigu den prizòn di Dartmoor, unda nan mester a traha duru den kondishonnan masha difísil. Einan, e Studiantenan di Beibel tabata e grupo di mas grandi di hende ku a nenga di drenta servisio militar pa motibu di prinsipio.

Frank Platt, un Studiante di Beibel ku a bai di akuerdo pa hasi tarea ku no tabatin di haber ku bringamentu, a ser persiguí kruelmente pa hopi tempu pa motibu ku el a nenga di bringa ora nan a mand’é bai guera. Pa e mesun motibu, Atkinson Padgett, kende a haña e bèrdat poko despues ku el a drenta servisio militar, a ser maltratá severamente na man di ofisialnan militar.

Aunke e tempu ei nos rumannan no tabata komprondé bon kiko neutralidat kristian a enserá, nan a hasi nan bèst pa agradá Yehova Dios. Esnan menshoná den e relato akí a pone un ekselente ehèmpel di neutralidat durante “e ora di prueba” masha difísil ku nan a pasa den. (Rev. 3:10)—For di nos archivo na Gran Bretaña.