Nos tin bon motibu pa kere ku e yu hòmbernan akí di Dios ta referí na angelnan. Pero ki evidensia nos tin?

Wèl, Génesis 6:2 ta bisa: “E yu hòmbernan di Dios a mira ku e yu muhénan di hende tabata bunita; i nan a tuma esposanan pa nan mes, esun ku nan tabata kier a skohe.”

Den e Skritura Hebreo, e ekspreshon “e yu hòmbernan di Dios” ta aparesé den e idioma original na Génesis 6:2 i 4; Yòb 1:6; 2:1; 38:7. Awor, kiko e tekstonan ei ta bisa di “e yu hòmbernan di Dios”?

No tin duda ku “e yu hòmbernan di Dios” ku Yòb 1:6 ta papia di dje ta kriaturanan selestial kendenan a reuní den presensia di Dios. Satanas, kende tabata “bai-bin riba tera,” tambe tabata entre nan. (Yòb 1:7; 2:1, 2) Na Yòb 38:4-7, nos ta lesa ku “e yu hòmbernan di Dios” a “grita di alegria” ora Dios a pone ‘e piedra di skina’ pa e planeta Tera. E teksto akí mester tabata referí na angelnan, pasobra e tempu ei Dios no a krea hende ainda.

Ken anto ta “e yu hòmbernan di Dios” ku Génesis 6:2 i 4 ta papia di dje? Di akuerdo ku e evidensianan bíbliko ku nos a kaba di trata, ta lógiko pa konkluí ku e versíkulonan akí ta referí na kriaturanan selestial ku a bini na tera.

Algun hende tin difikultat pa kere ku angelnan lo por tabatin interes den relashon seksual. E palabranan ku Hesus a ekspresá na Mateo 22:30 ta mustra bon kla ku no tin kasamentu ni relashon seksual den shelu. No opstante, tabatin angel ku a yega di tuma kurpa humano i a asta kome i bebe ku hende. (Gén. 18:1-8; 19:1-3) Pues, ta lógiko pa konkluí ku angelnan lo por a tene relashon seksual ku hende muhé ora nan a tuma kurpa di hende.

I nos tin prueba bíbliko ku ta esei algun angel a hasi. Hudas 6 i 7 ta kompará e piká di e hòmbernan di Sódoma, kendenan a kore tras di deseonan karnal innatural, ku esun di “e angelnan ku no a keda na nan puesto original pero ku a bandoná nan propio lugá di biba.” Tantu e angelnan ei komo e habitantenan di Sódoma “a entregá nan mes na inmoralidat seksual desenfrená i a kore tras di deseonan karnal innatural.” Na 1 Pedro 3:19 i 20 tin un relato similar ku ta relashoná angelnan desobediente ku “e dianan di Noe.” (2 Ped. 2:4, 5) A base di e tekstonan akí, nos por konkluí ku e kondukta di e angelnan desobediente den tempu di Noe por ser kompará ku e piká di Sódoma i Gomora.

E konklushon akí tin sentido solamente si nos aseptá ku “e yu hòmbernan di Dios” ku Génesis 6:2 i 4 ta papia di dje ta referí na e angelnan ku a tuma kurpa di hende i kometé inmoralidat ku hende muhé.

Apòstel Pedro a identifiká e spiritunan akí komo esnan “ku anteriormente tabata desobediente ora Dios tabata warda ku pasenshi den e dianan di Noe.” (1 Ped. 3:20) Pedro tabata referí na e angelnan ku a djòin Satanas den su rebelion. Hudas tambe a papia di e angelnan ku “no a keda na nan puesto original pero ku a bandoná nan propio lugá di biba,” i el a bisa ku Dios “a mara [nan] ku kadena eterno, i [ku] nan ta den un skuridat profundo pa e huisio di e gran dia.”—Hudas 6.

Ki akto di desobedensia e kriaturanan selestial ei a kometé den tempu di Noe? Pa kuminsá, promé ku e Diluvio, e spiritunan malbado akí a hasi algu ku Dios no a outorisá nan pa hasi: Nan a tuma kurpa di hende. (Gén. 6:2, 4) Despues, nan a tene relashon seksual ku hende muhé—loke tabata algu innatural pasobra Dios no a krea angel pa tene relashon seksual. (Gén. 5:2) E angelnan malbado i desobediente akí lo ser destruí na e debido tempu. Pero mientrastantu, manera Hudas a bisa, nan ta den “skuridat profundo”—den prizòn spiritual.

Pero na ki tempu i kon Hesus a prediká na e “spiritunan den prizòn” akí? Pedro a bisa ku esaki a sosodé despues ku Hesus “a haña bida bèk den spiritu.” (1 Ped. 3:18, 19) Ripará tambe ku Pedro a bisa ku Hesus “a prediká.” E echo ku Pedro a usa e forma pasado di e verbo “prediká” ta laga nos komprondé ku Hesus a prediká na e spiritunan ei promé ku Pedro a skirbi su promé karta. Pues, ta parse ku un poko tempu despues ku Hesus a ser resusitá, el a anunsiá na e spiritunan malbado ki kastigu nan lo haña. Hesus su mensahe no tabata un mensahe ku a duna speransa. Mas bien, e tabata un proklamashon di huisio. (Yon. 1:1, 2) Anto Hesus tabatin un base sólido pa a proklamá e huisio ei, pasobra el a demostrá su fe i lealtat te na morto i a ser resusitá—dunando prueba ku en bèrdat Diabel no tabatin poder riba dje.—Huan 14:30; 16:8-11.

Den futuro, Hesus lo mara i tira tantu Satanas komo e angelnan ei den abismo. (Luk. 8:30, 31; Rev. 20:1-3) Ma mientrastantu, e spiritunan desobediente akí ta den un skuridat spiritual profundo, i nan destrukshon final lo tuma lugá sigur.—Rev. 20:7-10.