Bo Ta Kòrda?
Bo a tuma tempu pa lesa e último edishonnan di E Toren di Vigilansia? Wèl, wak si bo por kontestá e siguiente preguntanan:
Kiko ta e “mundu” ku lo pasa bai?
E “mundu” ku lo pasa bai ta tur hende ku no ta biba di akuerdo ku e boluntat di Dios. (1 Huan 2:17) Tera i humanidat fiel lo keda eksistí pa semper.—1/1, página 5-7.
Maske Abel a muri, kon e ta papia ku nos? (Heb. 11:4)
Pa medio di su fe. Nos por siña di su fe i hasi esfuerso pa imit’é. Te ainda su ehèmpel ta bibu i vibrante.—1/1, página 12.
Den ki área di nos bida nos tin ku tene kuidou pa no laga nada alehá nos for di Dios?
Algun di e áreanan akí ta: nos trabou òf karera, e rekreo i dibertishon ku nos ta skohe, relashon ku miembro di famia ku ta ekspulsá, uso di teknologia moderno, preokupashon ku nos salú, un punto di bista robes tokante plaka i ponementu di demasiado énfasis riba nos punto di bista òf posishon.—15/1, página 12-21.
Kiko nos por siña for di Moises su humildat?
En bes di laga e echo ku e tabatin outoridat susha su kabes, Moises a dependé riba Dios, no riba su mes. Nos lo no ke laga poder, outoridat ni abilidat natural susha nos kabes; mas bien, nos ke konfia den Yehova. (Pro. 3:5, 6)—1/2, página 5.
Na unda e hendenan ku haña resurekshon lo bai biba?
Un kantidat limitá—144.000—lo bai biba den shelu. Pero mayoria di hende lo resusitá pa biba aki riba tera, ku e speransa di biba pa semper riba dje.—1/3, página 6.
Kiko e echo ku e israelitanan tabata “insirkunsidá di kurason” ta nifiká? (Yer. 9:26)
Nan tabata tèrko i rebelde, i nan mester a eliminá tur mal pensamentu i deseo òf motivashon inkorekto. (Yer. 5:23, 24)—15/3, página 9-10.
Pakiko nos por bisa ku Hesus su bida tabatin sentido?
E tabatin un propósito den bida, esta, di hasi e boluntat di Dios. E tabatin un gran amor pa su Tata i el a stima hende. Pues, Hesus tabata sa ku e tabatin e amor i aprobashon di su Tata. Esei ta e klave pa un bida ku berdadero sentido.—1/4, página 4-5.
Kiko e parti visibel di Dios su organisashon ta inkluí?
E ta inkluí e Kuerpo Gobernante, komiténan di sukursal, superintendentenan biahero, kuerponan di ansiano, kongregashonnan i publikadónan individual.—15/4, página 29.
Dikon nos por bisa ku Dios no tabata kruel ora el a ehekutá su huisionan den pasado?
Yehova no tin plaser den morto di e malbado. (Eze. 33:11) Loke el a hasi den pasado ta demostrá ku den su gran amor semper el a spièrta hende promé ku e ehekutá su huisio. Esaki por duna nos e speransa di sobrebibí e huisionan di futuro.—1/5, página 5-6.
E israelitanan tabata ehekutá kriminalnan kologando nan na staka?
Nò. Otro nashonnan di antigwedat sí tabata hasi esei, pero no e israelitanan. Por lo ménos, den tempu di e Skritura Hebreo, nan tabata mata e malbadonan promé, entre otro ku piedra. (Lev. 20:2, 27) Despues nan tabata kologá e kadavernan na staka òf palu komo un spièrtamentu pa otronan.—15/5, página 13.
Dikon ta asina difísil pa logra pas mundial?
Maske hende a logra hopi kos, nan no por dirigí nan mes paso. (Yer. 10:23) Satanas ta kontrolá e mundu, p’esei hende lo no por trese pas mundial. (1 Huan 5:19)—1/6, página 16.
