ESEI ta un di e promé kosnan ku mi ta kòrda di mi tata, un hòmber humilde ku tabata traha duru. E tabata stima hustisia; p’esei ora el a tende e mensahe di Beibel na aña 1953, el a gust’é mesora. Desde e tempu ei, e tabata hasi su bèst pa siña nos, ku tabata su yunan, tur loke e tabata siña. Na promé instante, mi mama no tabata muchu inkliná pa bandoná su tradishonnan katóliko. Pero ku tempu, e tambe a kuminsá biba segun e siñansanan di Beibel.

No tabata fásil pa mi mayornan studia ku nos, pasobra mi mama kasi no tabata sa lesa i mi tata tabata traha duru i oranan largu den kunuku. Tin biaha e tabata asina kansá ku e tabata pega soño durante e estudio. Pero su esfuersonan a duna fruta. Ami tabata e yu mayó, i mi tabata yuda siña mi ruman muhé i mi dos ruman hòmbernan. Esei a inkluí algu ku mi tata hopi bes tabata menshoná: E amor ku Noe a demostrá pa su famia mediante su obedensia na Dios. Semper esaki tabata mi relato bíbliko faborito! No a dura mashá ku nos tur tabata asistí na reunion na e Salòn di Reino na Roseto degli Abruzzi, un stat na kosta di Laman di Adria na Italia.

Na 1955, tempu mi tabatin 11 aña, ami ku mi mama a pasa atraves di e serunan bai den direkshon wèst pa asistí na nos promé kongreso na Roma. Desde e tempu ei, kongreso a bira un di eventonan masha spesial pa mi.

E siguiente aña mi a batisá i un poko tempu despues mi a kuminsá traha pionero. Ku 17 aña di edat, mi a bira pionero spesial na Latina, un stat ku ta keda zùit di Roma, situá un 300 kilometer for di nos kas. Komo ku e tabata un stat basta nobo, ningun hende no tabata preokupá mashá ku loke su bisiñanan tabata pensa. I esei a pone ku tabata mas fásil pa hende aseptá literatura bíbliko serka ami ku mi kompañera pionero. Aunke mi tabata sinti mi masha kontentu ku esaki, mi tabata yòn ainda i tabata sinti hopi falta di kas. Pero mi a komprondé ku Yehova tabata ke pa mi keda einan, i mi kier a obedes’é.

Despues mi a haña asignashon pa bai Milan pa yuda ku e preparashonnan pa e Asamblea Internashonal “Bon Notisia  Eterno” di 1963. Durante e asamblea mi a traha komo boluntario huntu ku hopi otro ruman; un di nan tabata Paolo Piccioli, un ruman hòmber yòn di Florence. Riba e di dos dia di e asamblea, e ruman akí a duna un tremendo diskurso tokante bida soltero. Mi ta kòrda ku ora mi a tend’é, mi a pensa ku ‘e ruman ei sí lo no kasa nunka.’ Sinembargo, nos a kuminsá skirbi otro i nos a realisá ku nos tabatin hopi kos en komun: nos metanan, nos amor pa Yehova i nos deseo fuerte pa sirbié. I na 1965, ami ku Paolo a kasa.

Mi a traha dies aña komo pionero regular na Florence. Tabata emoshonante pa mira kon e kongregashonnan tabata krese, spesialmente kon e hóbennan tabata progresá. Ami ku Paolo tabata gusta dediká tempu na e hóbennan; nos tabata kòmbersá ku nan tokante Beibel i tabata rekreá ku nan. Hopi biaha Paolo tabata hunga bala ku nan. Ta klaru ku lo mi a preferá pa ami ku mi kasá dediká tempu na otro. Pero mi tabata komprondé ku e hóbennan i famianan di kongregashon tambe tabatin mester di dje i ku e mester a dediká su tempu i atenshon na nan tambe.

Ainda mi ta sinti un goso ora mi kòrda riba tur e estudionan di Beibel ku nos tabatin. Un di e personanan ku mi a studia kuné tabata Adriana, kende a papia ku dos miembro di su famia tokante loke e tabata siña. Nan a traha un afsprak ku nos i ku un pastor pa papia tokante doktrinanan di iglesia manera Trinidat i alma inmortal. Finalmente, tres pastor a presentá na e enkuentro. Nan splikashon tabata konfuso i inkonsistente, i nos studiantenan a mira mesora ku loke nan tabata splika no tabata kuadra ku e siñansanan di Beibel. Komo resultado di e enkuentro ei, ku tempu mas o ménos 15 miembro di e famia ei a bira Testigu di Yehova.

Klaru, awendia nos métodonan di prediká ta basta diferente. E tempu ei, Paolo a bira “eksperto” den papia ku pastor, i el a hasi esei na vários okashon. Mi ta kòrda kon el a papia un biaha ku algun di nan dilanti di un grupo di hende ku no tabata Testigu. Tabata bisto ku e opositornan a plania adelantá pa algun hende di e grupo hasi pregunta pa pone su kara na bèrgwensa. Pero e kòmbersashon a kue un otro rumbo. Un hende a puntra si ta korekto pa religion mete den asuntunan polítiko manera e ta hasiendo pa hopi siglo kaba. Tabata bisto ku esei a hinka e pastornan den pèrtá. Diripiente e lusnan a paga, i e reunion a ser kanselá. Hopi aña despues, nos a bin komprondé ku e blackout tabata planiá den kaso ku e kòmbersashon no a bai manera e pastornan a spera.

Despues ku ami ku Paolo tabatin dies aña kasá, nos a ser invitá den e trabou di sirkuito. Paolo tabatin un bon trabou, p’esei no tabata un desishon fásil. Pero despues ku nos a hasi orashon tokante e asuntu, nos a hasi nos mes disponibel pa e asignashon nobo akí. Nos a disfrutá di e tempu ku nos a pasa serka e famianan ku a risibí nos den nan kas. Anochi, hopi biaha nos tabata studia huntu ku e famianan akí, anto despues Paolo tabata yuda e muchanan ku nan hùiswèrk, spesialmente ora esaki tabata trata di wiskunde. Ademas, Paolo tabata gusta lesa i ku entusiasmo e tabata kompartí e kosnan interesante i edifikante ku e tabata lesa. Riba djaluna, hopi biaha nos tabata prediká den e pueblonan kaminda no tabatin Testigu, i nos tabata invitá e hendenan pa un diskurso pa e mesun anochi ei.

Despues di dos aña den e trabou di sirkuito, nan a invitá nos pa sirbi na Bètel di Roma. Paolo a keda enkargá ku asuntunan legal, i ami a bai traha den e Departamento di Revista. E kambio ei no tabata fásil, pero nos tabata determiná pa obedesé. Tabata un goso pa mira kon e sukursal tabata bira mas grandi i kon e kantidat di rumannan tabata oumentá enormemente na Italia. Den e tempu ei, Testigunan di Yehova na Italia a haña un rekonosementu legal importante. Sí, nos tabata masha kontentu ku nos asignashon nobo.

Tempu ku nos tabata sirbi na Bètel, nos posishon bíbliko tokante sanger a bini den publisidat na Italia. Na prinsipio di añanan 80, tabatin un kaso legal riba e kuestion akí ku a kousa basta konsternashon. Nan a akusá un pareha Testigu falsamente di ta kulpabel di e morto di nan yu muhé, apesar ku e yu a muri di un problema serio di sanger ku hopi hende di Italia i paisnan den bisindario tabata haña. E rumannan di e famia di Bètel a yuda e abogadonan ku a representá e mayornan kristian. Un pamfleta i un edishon spesial di ¡Despertad! a yuda e hendenan haña e otro banda di e medaya i komprondé loke e Palabra di Dios ta bisa tokante sanger. Den e lunanan ei, hopi biaha Paolo tabata traha 16 ora pa dia sin stòp. Mi a hasi tur loke mi tabata por pa sosten’é den su trabou.

Tempu nos tabatin 20 aña kasá, nos a haña nos ku algu inesperá. Mi tabatin 41 aña i Paolo tabatin 49 aña di edat ora mi a bis’é ku mi kier sa ku mi ta na estado. Den su dagboek, mi a topa e palabranan pa e dia ei: “Orashon: Si esaki ta bèrdat, yuda nos keda den e sirbishi di tempu kompleto, sin floha spiritualmente, i yuda nos pa nos pone un bon ehèmpel komo mayor. Riba tur kos, yuda mi pone na práktika maske ta 1 porshento di tur loke mi a bisa riba plataforma durante e último 30 añanan.”  Ora mi pensa awor riba esei, mi por mira ku di bèrdat Yehova a kontestá su orashon, i esun di mi.

Nasementu di Ilaria a trese kambio grandi den nos bida. Pa ta franko, tabatin momentonan ku nos a sinti nos desanimá, manera Proverbionan 24:10 ta bisa: “Si bo desmayá den e dia di angustia, bo forsa ta keda limitá.” Pero nos a sigui apoyá otro.

Semper Ilaria sa bisa kon kontentu e ta ku e ta yu di mayornan Testigu ku tabata hopi aktivo den e sirbishi di tempu kompleto. Nunka el a sinti su mes neglishá; el a lanta den un famia kompletamente normal. Durante dia, ami tabata kuid’é. Anochi ora Paolo tabata yega kas, aunke hopi biaha e tabatin trabou di kaba, e tabata dediká tempu na dje, hunga kuné i yud’é ku su hùiswèrk. E tabata hasi esaki maske e tabatin ku keda lantá te dos or òf tres or di mardugá pa kaba su trabou. Ilaria tabata gusta bisa: “Mi tata ta mi mihó amigu.”

Manera bo por imaginá, pa nos por a yuda Ilaria keda riba e kaminda kristian, nos tabatin ku disiplin’é na un manera konsistente i asta tin biaha firme. Mi ta kòrda ku un biaha e tabata hunga ku un amiguita, pero el a komportá su mes masha malu. Nos a usa Beibel pa mustr’é dikon e no mester a komportá su mes asina. Tambe nos a pon’é pidi su amiga despensa dilanti nos.

Semper Ilaria ta bisa ku e ta masha gradisidu pa e amor ku su mayornan tabatin pa sirbishi. Awor ku e mes ta kasá, e ta komprondé mihó ki importante ta pa obedesé Yehova i sigui su guia.

Na 2008, Paolo a haña sa ku e tin kanser. Na promé instante, tabata parse ku Paolo lo por a sobrebibí e malesa, i esei a animá mi hopi. Ademas di buska e mihó tratamentu médiko posibel, huntu ku Ilaria nos tabata hasi orashon largu na Yehova, buskando su yudansa pa enfrentá e dianan difísil ei. Tòg, mi a mira un hòmber ku un tempu tabata asina fuerte i dinámiko kaba na nada. Su morto na 2010 tabata un gòlpi duru. Ma mi a haña hopi konsuelo den loke nos a logra huntu den 45 aña. Nos a duna Yehova lo mihó, sabiendo ku nunka lo e lubidá loke nos a hasi den su sirbishi. Mi ta anhelá pa mira Paolo bèk den e resurekshon, na armonia ku Hesus su palabranan na Huan 5:28, 29.

Den fondo di mi kurason, ainda mi ta e mucha chikitu ku ta stima e relato di Noe. Ainda mi a keda ku e mesun determinashon. Mi ke obedesé Yehova, sin importá kiko e pidi mi hasi. Mi ta sigur ku kualke opstákulo, sakrifisio òf pèrdida no ta nada na komparashon ku e bendishonnan maravioso ku Dios lo drama riba nos. Esei ta mi eksperensia personal, i mi por sigurá bo ku esaki ta bale la pena.