1. (a) Menshoná algun kualidat di Yehova. (b) Kon un análisis di e kualidatnan di Dios lo benefisiá bo?

KI KUALIDATNAN ta bini na bo mente ora bo pensa riba Yehova? Hopi di nos lo pensa riba amor, hustisia, sabiduria i poder. Pero Yehova tin hopi kualidat maravioso. De echo, nos por menshoná mas ku 40 kualidat di Yehova ku nos publikashonnan a yega di analisá atraves di añanan. Bo no por imaginá bo kuantu kos fasinante bo por siña tokante Yehova si bo analisá e kualidatnan akí durante bo estudio personal òf boso Adorashon Komo Famia. Kon un estudio asina por benefisiá bo? Lo bo haña aun mas apresio pa nos Tata selestial i pa su kualidatnan. I esei na su turno lo motivá bo pa hala mas serka dje i imit’é.—Hos. 23:8; Sal. 73:28.

2. (a) Ilustrá kon nos por haña mas apresio pa Yehova su kualidatnan. (b) Kiko nos lo trata den e artíkulo akí i e dosnan siguiente?

² Awor, kon bo por siña apresiá algu mas i mas? Wèl, suponé ku bo ta bai purba un kuminda ku nunka bo a yega di kome. E promé kos ku ta hala bo atenshon ta ku e kuminda ta hole bon. I ora bo purb’é, bo ta realisá ku e ta masha dushi mes. P’esei, bo ta disidí ku bo mes ta bai kushin’é. Di mes manera, nos ta siña apresiá un sierto kualidat di Yehova mas i mas ora nos siña tokante e kualidat akí, meditá riba e manera ku Yehova ta despleg’é i finalmente imitá Yehova desplegando e kualidat akí den nos bida. (Efe. 5:1) E artíkulo akí i e dosnan ku ta sigui lo analisá algun kualidat di Yehova ku nos no sa pensa mesora riba dje. E análisis akí lo oumentá nos apresio pa e kualidatnan akí. Segun ku nos ta analisá kada un di e kualidatnan akí, nos lo kontestá tres pregunta. Nan ta: Kiko e kualidat ta enserá? Kon Yehova ta despleg’é? I kon nos por imitá Yehova desplegando e kualidat akí?

3, 4. (a) Kon lo bo deskribí un persona aserkabel? (b) Kon Yehova ta demostrá ku e ta aserkabel?

³ Laga nos kuminsá wak kiko ke men ser aserkabel. Kon lo bo deskribí un persona aserkabel? Kisas lo bo bisa ku un persona asina ta kariñoso, semper kla pa yuda hende i fásil pa papia kuné. Hopi biaha, bo por saka afó si un persona ta aserkabel òf nò si bo paga tinu na su komentarionan, su ekspreshon di kara i otro gestonan ku e ta hasi.

⁴ Awor, kon Yehova ta demostrá ku e ta aserkabel? Aunke Yehova ta e Kreador i e Persona di mas poderoso den universo, e ta sigurá nos ku e ta dispuesto i kla pa skucha nos orashonnan i kontestá nan. (Lesa Salmo 145:18; Isaías 30:18, 19.) Nos por papia kuné kuantu ku nos ke, ki ora ku nos ke i unda ku nos ta. Nos por aserk’é libremente pasobra nos sa ku nunka lo e rabia ni tira kos na nos kara. (Sal. 65:2; Sant. 1:5) E manera ku e Palabra di Dios ta deskribí Yehova ta indiká ku Yehova ke pa nos aserk’é. Por ehèmpel, David a skirbi ku “e wowonan di SEÑOR ta riba” nos i ku Su “man drechi ta sostené” nos. (Sal. 34:15; 63:8) Profeta Isaías a kompará Yehova ku un wardadó di karné, bisando: “E lo kohe e lamchinan den su brasa, i tene nan serka di su kurason.” (Isa. 40:11) Imaginá bo! Yehova ke pa nos sinti nos pegá na dje meskos ku un lamchi den brasa di un wardadó amoroso. Sí, Yehova ta un Tata aserkabel. Awor kon nos por imitá e kualidat akí di Yehova?

5. Dikon ta importante pa ansianonan ta aserkabel?

⁵ “Ki kualidat abo ta gusta mas di un ansiano?” Esaki ta un pregunta ku a ser hasí resientemente na vários Testigu di Yehova di diferente parti di mundu. Mayoria di nan a bisa: “E echo ku e ta aserkabel.” Ta bèrdat ku tur kristian mester  ta aserkabel. Pero ta masha importante pa spesialmente ansianonan desplegá e kualidat akí. (Isa. 32:1, 2) Un ruman muhé a splika dikon e ta haña ku ta masha importante pa un ansiano ta aserkabel. El a bisa: ‘Ta solamente si un ansiano ta aserkabel, nos lo por konosé su otro bon kualidatnan.’ Esei ta lógiko, no ta bèrdat? Pero awor, kiko un persona mester hasi pa e ta aserkabel?

6. Kon un persona por ta aserkabel?

⁶ Pa un persona ta aserkabel, e mester demostrá interes sinsero den otro hende. Si un ansiano ta interesá den su rumannan, inkluso hóbennan, i ta dispuesto pa duna di su mes pa yuda nan, nan lo sinti nan mas liber pa aserk’é. (Mar. 10:13-16) Carlos, un hobensito di 12 aña di edat, a bisa: “Mi ta gusta wak kon e ansianonan na Salòn ta smail i ta trata e rumannan bon.” Ta klaru ku no ta sufisiente pa un ansiano djis bisa ku e ta aserkabel; e mester demostrá esei. (1 Huan 3:18) Kon e por hasi esei?

7. Kon bini nos badge di kongreso por lanta un kòmbersashon, i kiko nos por siña for di esaki?

⁷ Pensa riba e ehèmpel akí: Resientemente, un ruman hòmber tabata den avion, regresando kas despues di a asistí na un kongreso den eksterior. E tabatin su badge di kongreso bistí, ku ta bisa: “Laga e Reino di Dios Bini!” Un steward ku a tuma nota di esaki a bisa e ruman: “Lag’é bini bèrdè.” Ademas, el a bisa e ruman ku nan tin ku papia. Nan tabatin un kòmbersashon ameno i gustosamente e steward a aseptá nos revistanan. Hopi di nos tin eksperensianan similar. Pero, kon bini un badge di kongreso por lanta un kòmbersashon? Pasobra den un sentido, e badge ta papia ku e hendenan, bisando: “Sinti boso liber pa aserká mi i puntra mi unda mi ta bai.” Sí, e badge ta laga hende sa ku nos ta dispuesto pa papia tokante nos kreensianan. Di mes manera, un ansiano mester laga su rumannan den fe komprondé ku nan por aserk’é libremente. Kon ta algun manera ku e por hasi esei?

8. Kon ansianonan por demostrá ku nan tin interes sinsero den otro hende, i ki efekto esaki tin riba e kongregashon?

⁸ Wèl, aunke hende su kustumbernan ta varia di un pais pa otro, generalmente un smail amigabel òf un saludo kariñoso ta laga otronan komprondé ku bo ta sinseramente interesá den nan. Pero, ken mester tuma e inisiativa? Laga nos wak ki ehèmpel Hesus a pone. Mateo ta konta ku na un reunion ku Hesus tabatin ku su disipelnan, ta ‘Hesus a yega serka nan i a papia ku nan.’ (Mat. 28:18) Di mes manera, ansianonan ta tuma inisiativa awe pa aserká nan rumannan i papia ku nan. Ki efekto esaki lo por tin riba e kongregashon? Un ruman muhé pionero di 88 aña di edat a bisa: “Mi ta stima mi ansianonan pasobra ora mi yega Salòn di Reino, nan ta risibí mi ku un smail kaluroso i ku palabranan di animashon.” Un otro ruman muhé a bisa: “Kisas esaki por parse algu chikitu, pero ora un ansiano yama mi bonbiní na reunion ku un sonrisa riba su kara, pa mi esaki ta nifiká masha hopi.”

9, 10. (a) Ki ehèmpel ekselente Yehova ta pone? (b) Kon ansianonan por imitá Yehova su ehèmpel?

 ⁹ Ta klaru ku nos no por ta aserkabel si nos no tin tempu pa papia ku otro hende i skucha nan. Yehova ta un ekselente ehèmpel den esaki. Beibel ta bisa ku Yehova “no ta masha leu for di kada un di nos.” (Echo. 17:27) I un manera ku  ansianonan por imitá Yehova su ehèmpel ta di apartá tempu promé i despues di reunion pa papia ku nan rumannan den fe—grandi i chikí. Un ruman hòmber pionero a remarká: “Ora un ansiano puntra mi ‘kon a bai awe’ i e para skucha mi kontesta, mi ta sinti ku mi ta ser apresiá.” Un ruman muhé ku tin kasi 50 aña ta sirbi Yehova a bisa: “Ansianonan ku ta tuma un tiki tempu pa papia ku mi despues di reunion ta laga mi sinti ku nan ta balorá mi.”

¹⁰ Ta klaru ku ansianonan tin hopi responsabilidat, pero nan mester pone e meta pa na tur reunion nan presta atenshon na e karnénan.

11, 12. (a) Kiko ta nifiká ser imparsial? (b) Kon Beibel ta mustra ku Yehova ta imparsial?

¹¹ Imparsialidat ta un otro bunita kualidat di Yehova. (Echo. 10:34) Kiko ta nifiká ser imparsial? Wèl, esei ta enserá trata tur hende na un manera hustu, sin demostrá faboritismo òf prehuisio. Pero pa nos por demostrá imparsialidat tin dos faktor ku ta hunga un papel importante: nos aktitut i nos echonan. Dikon tur dos ta importante? Pasobra ta solamente si un persona ta kere ku tur hende mester ser tratá na un manera hustu, lo e trata nan asina. Ser imparsial ta enserá no faboresé un persona riba e otro. P’esei, un persona imparsial ta trata tur hende na un manera hustu, sin importá nan aparensia òf kuantu plaka nan tin.

¹² Yehova ta e mihó ehèmpel di imparsialidat. Su Palabra ta bisa ku e “no ta hasi distinshon di persona.” (Lesa Echonan 10:34, 35; Deuteronomio 10:17.) Laga nos wak kon el a demostrá esaki ora el a resolvé un problema ku a surgi den tempu di Moises.

13, 14. (a) Den ki situashon e sinku yu muhénan di Zelofehad a haña nan? (b) Kon Yehova a demostrá ku e ta imparsial?

 ¹³ Djis promé ku e israelitanan a drenta e Tera Primintí, sinku ruman muhé soltero a haña nan ku un dilema. Ta trata di e sinku yu muhénan di Zelofehad, di e tribu di Manases. Kiko tabata e problema? Wèl, Zelofehad, nan tata, a muri i nan no por a bini na remarke pa risibí e pida tereno ku a korespondé na dje. Dikon? Pasobra segun Lei, ora un tata muri, ta su yu hòmbernan tabatin e derecho di haña su pida tereno. Pero Zelofehad no tabatin yu hòmber. (Num. 26:33, 52-55) Awor, esei lo a nifiká ku otro miembronan di e famia lo a haña e tereno i su yu muhénan lo a keda sin herensia?

¹⁴ E sinku ruman muhénan a aserká Moises i a puntr’é: “Pakiko nòmber di nos tata mester wòrdu kitá for di meimei di su famia pasobra e no tabatin yu hòmber?” I nan a rog’é: “Duna nos un  propiedat meimei di e ruman hòmbernan di nos tata.” Kon Moises a reakshoná? El a bisa nan ku e no por hasi eksepshon pa nan? Nò. Mas bien, el ‘a hiba nan kaso dilanti di Yehova.’ (Num. 27:2-5) Ki kontesta Moises a haña? Yehova a bis’é: “E yu muhénan di Zelofehad tin rason den loke nan ta bisa. Siguramente bo mester duna nan un propiedat komo herensia meimei di e ruman hòmbernan di nan tata, i bo mester pasa e herensia di nan tata pa nan.” Pero Yehova a bai mas leu ainda: E eksepshon akí a bira lei. El a bisa Moises: “Si un hòmber muri i no tin yu hòmber, e ora ei boso mester pasa su herensia pa su yu muhé.” (Num. 27:6-8; Hos. 17:1-6) For di e tempu ei, tur hende muhé israelita ku a haña nan den e mesun situashon por a risibí herensia.

15. (a) Kon Yehova ta trata su pueblo, inkluso esnan ku no tin ningun hende pa yuda nan? (b) Kua otro relato bíbliko ta mustra ku Yehova ta imparsial?

¹⁵ Esei sigur tabata un desishon imparsial! E sinku ruman muhénan ei no tabatin niun hende pa yuda nan, pero Yehova a trata nan na un manera hustu i ku rèspèt, meskos ku el a trata tur e otro israelitanan. (Sal. 68:5) Esaki ta djis un di e hopi relatonan den Beibel ku ta proba e bèrdat alentador akí: Yehova ta trata tur su sirbidónan na un manera imparsial.—1 Sam. 16:1-13; Echo. 10:30-35, 44-48.

16. Kon nos por ta imparsial, meskos ku Yehova?

¹⁶ Kon nos por ta imparsial, meskos ku Yehova? Kòrda, imparsialidat tin dos aspekto. Nos por trata otro hende na un manera hustu solamente si nos ta kere ku tur hende mester ser tratá asina. Ta bèrdat ku nos tur gusta pensa ku nos ta hende imparsial. Pero, manera bo sa, tin biaha no ta fásil pa un persona evaluá su mes ophetivamente. P’esei, kon bo por haña sa si di bèrdat bo ta un persona imparsial? Hesus a pone un ekselente ehèmpel pa nos. Ora e tabata ke sa kiko hende tabata pensa di dje, el a puntra su amigunan di konfiansa: “Ken e hendenan ta bisa ku e Yu di hende ta?” (Mat. 16:13, 14) Kisas lo bo por puntra un amigu ku bo sa ku lo ta franko ku bo: ‘Bo ta haña ku mi ta un persona imparsial?’ Si e bisa bo ku bo tin e tendensia di trata sierto hendenan mihó ku otronan debí na nan rasa, edukashon, klase sosial òf situashon finansiero, bo tin kos pa traha ariba. Kiko bo tin ku hasi? Hasi orashon sinsero na Yehova i rog’é pa e yuda bo kambia bo aktitut pa bo por ta mas manera e i trata tur hende na un manera imparsial.—Mat. 7:7; Kol. 3:10, 11.

17. Kon ta algun manera ku nos por trata otro hende na un manera imparsial?

 ¹⁷ Nos ta imitá Yehova den kongregashon ora nos ta trata tur ruman ku rèspèt i bondat. Por ehèmpel, ora di mustra hospitalidat, ta bon pa nos invitá rumannan di diferente kultura, rumannan ku nan kasá a muri, esnan pober òf huérfano. (Lesa Galationan 2:10; Santiago 1:27.) Ademas, nos ta proklamá e bon notisia di e Reino na tur sorto di hende, inkluso na hende di otro pais. Nos ta masha kontentu ku nos tin literatura bíbliko den mas o ménos 600 idioma. Esei ta otro prueba palpabel ku nos ta un pueblo imparsial!

18. Kon abo personalmente por demostrá ku bo ta apresiá e echo ku Yehova ta aserkabel i imparsial?

¹⁸ Sí, ora nos meditá riba e echo ku Yehova ta un persona aserkabel i imparsial i riba e manera ku e ta demostrá e kualidatnan akí, nos ta haña mas apresio pa Yehova. Komo resultado, nos lo sinti nos motivá pa imit’é mas i mas den nos trato ku nos rumannan i e personanan ku nos ta prediká na dje.