1-3. Relatá brevemente kon Hesus a alimentá un multitut grandi di hende den serkania di Bètsaida. (Wak e plachi na kuminsamentu di e artíkulo akí.)

VISUALISÁ e siguiente esena: (Lesa Mateo 14:14-21.) Tabata djis promé ku Pasku Hudiu di aña 32 di nos era. Un multitut di hende—un 5.000 hòmber, sin konta hende muhé i mucha—a sigui Hesus i su disipelnan te na un pueblito aislá ku tabata keda den bisindario di Bètsaida na kosta nort di Laman di Galilea.

² Ora Hesus a mira e multitut, el a haña duele di nan. P’esei, el a kura esnan ku tabata malu i despues el a siña e multitut hopi kos tokante e Reino di Dios. Pero ora a kuminsá bira lat, e disipelnan a bisa Hesus pa manda e multitut bai, ya nan por a bai den e pueblitonan den serkania i kumpra algu di kome. Ma Hesus a bisa su disipelnan: “Boso duna nan algu di kome.” Su palabranan lo mester a turdi nan un poko pasobra nan no tabatin muchu kos di kome: sinku pan i dos piská chikitu so.

³ Hesus su kompashon a motiv’é pa hasi un milager—e úniko milager ku ta registrá den tur e kuater Evangelionan. (Mar. 6:35-44; Luk. 9:10-17; Huan 6:1-13) Hesus a instruí su disipelnan pa nan laga e multitut sinta riba yerba den grupo di 50 òf di 100. Despues di a hasi orashon, el a kibra e pannan i parti e piskánan den porshon. Pero en bes di Hesus mes distribuí e kuminda, el a duna su disipelnan e pannan i e piskánan, “i e disipelnan a parti nan pa e multitut.” Tabatin asina tantu kuminda, ku tur hende a kome, i asta a sobra. Pensa riba esaki: Hesus a alimentá míles di hende usando un par di hende so—su disipelnan. *

4. (a) Ki tipo di kuminda, segun Hesus, tabata mas importante pa su siguidónan risibí, i dikon? (b) Kiko nos lo trata den e artíkulo di estudio akí i den e siguiente?

⁴ No opstante, loke tabata mas importante pa Hesus tabata pa su siguidónan haña kuminda spiritual. Dikon? Pasobra e tabata sa ku kuminda spiritual, esta, e bèrdatnan ku nos ta haña den e Palabra di Dios, ta hiba na bida eterno. (Huan 6:26, 27; 17:3) P’esei, impulsá pa e mesun  kompashon ku a motiv’é pa alimentá un multitut di hende ku pan i piská, Hesus a dediká oranan largu siñando su siguidónan. (Mar. 6:34) Pero e tabata sa ku su ora pa bai shelu bèk tabata yegando serka. (Mat. 16:21; Huan 14:12) Awor, unabes ku el a bai shelu, kon lo el a sigui perkurá pa su siguidónan riba tera ser bon alimentá den sentido spiritual? Wèl, Hesus lo a sigui e mesun sistema ku e tabata sigui na tera—esta, di usa algun hende pa alimentá míles. Pero, ken Hesus lo a usa? Laga nos wak promé kon Hesus a usa poko hende pa alimentá su grupo grandi di siguidó ungí den promé siglo. I e siguiente artíkulo lo kontestá un pregunta ku ta di vital importansia pa kada un di nos, esta: Ken ta e poko hendenan ku Kristu ta usa awe pa alimentá nos?

5, 6. (a) Ki desishon importante Hesus a tuma pa hasi sigur ku despues di su morto su siguidónan lo tabata bon kuidá den sentido spiritual? (b) Kon Hesus a prepará su apòstelnan pa nan por a kumpli ku un asignashon sumamente importante despues di su morto?

⁵ Un kabes di famia responsabel ta hasi areglo pa, si en kaso e muri, su famia por ta semper bon kuidá. Di mes manera, Hesus—kende lo a bira Kabes di e kongregashon Kristian—a hasi areglo pa su siguidónan tabata bon kuidá den sentido spiritual despues di su morto. (Efe. 1:22) Por ehèmpel, mas o ménos dos aña promé ku el a muri, Hesus a tuma un desishon masha importante: El a skohe e promé hendenan ku lo a forma e grupo chikitu di hende ku lo el a usa pa alimentá hopi siguidó. Laga nos wak kon el a hasi esei.

⁶ Despues di a hasi orashon henter anochi, Hesus a reuní su disipelnan i, for di nan, el a skohe 12 apòstel. (Luk. 6:12-16) E siguiente dos añanan, el a sera un amistat íntimo ku su diesdos apòstelnan i a dediká hopi tempu na nan, siñando nan ku echo i palabra. E tabata sa ku nan tabatin hopi kos mas di siña; de echo, nan tabata sigui ser yamá su “disipelnan,” ku ta nifiká studiante. (Mat. 11:1; 20:17) El a duna nan konsehonan balioso i a entrená nan bon pa sirbishi. (Mat. 10:1-42; 20:20-23; Luk. 8:1; 9:52-55) Evidentemente, e tabata preparando nan pa nan por a kumpli ku un asignashon sumamente importante despues ku e muri i bai shelu bèk.

7. Kon Hesus a indiká kiko lo tabata e responsabilidat prinsipal di e apòstelnan?

⁷ Ki asignashon e apòstelnan lo a haña? Segun ku Pentekòste di aña 33 di nos era tabata yegando serka, tabata bisto ku e apòstelnan lo a sirbi komo “superintendente” den e kongregashon kristian. (Echo. 1:20) Pero, kiko lo tabata nan responsabilidat prinsipal? Despues di Hesus su resurekshon, el a duna un indikashon di esei den un kòmbersashon ku e tabatin ku apòstel Pedro. (Lesa Huan 21:1, 2, 15-17.) Den presensia di algun di e otro apòstelnan, Hesus a bisa Pedro: “Kuida mi lamchinan.” E verbo tradusí komo “kuida” na Huan 21:17 ta ser tradusí tambe komo ‘duna di kome.’ (BPK) Pues, Hesus su palabranan ta indiká bon kla ku su apòstelnan lo tabata entre e poko hendenan ku lo el a usa pa perkurá kuminda spiritual pa hopi hende. Sin duda, Hesus su palabranan ta mustra tambe kuantu e ta stima su “lamchinan.” *

8. Kon esnan ku a bira kristian na Pentekòste a demostrá ku nan no tabatin ningun duda ta ken tabata esnan ku Kristu tabata usa pa alimentá su siguidónan?

⁸ Desde Pentekòste di aña 33 di nos era, Kristu resusitá a kuminsá usa su apòstelnan pa duna e restu di kristian ungí ku tabata riba tera kuminda spiritual. (Lesa Echonan 2:41, 42.) E hudiunan i e prosélitonan ku e dia ei a kombertí i bira kristian ungí no tabatin ningun duda ku ta e apòstelnan Kristu tabata usa pa alimentá otronan den sentido spiritual. Ku pleno konfiansa, “nan a sigui presta atenshon na siñansa di e apòstelnan.” Un eksperto riba tereno di Beibel a bisa ku e verbo griego tradusí  akinan komo “sigui presta atenshon” por nifiká tambe “sigui sierto rumbo lealmente.” E kristiannan nobo tabata ansioso pa siña e bèrdatnan ku tin den e Palabra di Dios, i nan tabata sa presis ken por a siña nan e bèrdatnan akí. P’esei ku pleno konfiansa, nan a akudí na e apòstelnan pa haña splikashon di e kosnan ku Hesus a bisa i hasi i di e tekstonan ku ta papia tokante Hesus. *—Echo. 2:22-36.

9. Kon e apòstelnan a demostrá ku nan enfoke prinsipal tabata nan responsabilidat di siña i dirigí e kongregashon kristian?

⁹ E apòstelnan tabata enfoká prinsipalmente riba nan responsabilidat di siña i dirigí e kongregashon kristian. Wak, por ehèmpel, kon nan a resolvé un problema delikado ku por a kousa divishon den e kongregashon kristian ku a kaba di ser formá. Pa straño ku por parse, e problema tabata enkuanto kuminda. Tabata asina ku algun disipel a kuminsá keha pasobra tabata neglishá e biudanan di abla griego ora tabata parti kuminda di tur dia, siendo ku e biudanan di abla hebreo sí tabata haña. Kon “e 12 apòstelnan” a resolvé e asuntu delikado akí? Wèl, nan a pone shete ruman hòmber di bon reputashon na enkargo di “e tarea nesesario akí,” esta, e repartishon di kuminda. Probablemente, mayoria di e apòstelnan akí a yuda repartí e kuminda ku Hesus a proveé na un manera milagroso pa alimentá e multitut di hende. Pero awor nan tabata konsiente ku nan trabou di mas importante tabata pa alimentá e kongregashon den sentido spiritual. P’esei, nan a dediká nan mes na e trabou di “siña hende e palabra di Dios.”—Echo. 6:1-6.

10. Kon Kristu a usa e apòstelnan i e ansianonan na Herúsalèm?

¹⁰ Na aña 49 di nos era, algun otro ansiano kualifiká a uni ku e apòstelnan ku tabata na bida e tempu ei i huntu nan tabata fungi komo un kuerpo gobernante. (Lesa Echonan 15:1, 2.) Beibel ta referí na nan komo “e apòstelnan i e ansianonan na Herúsalèm.” Kristu, e Kabes di e kongregashon kristian, tabata usa e grupo chikitu akí di hòmber kualifiká pa resolvé asuntunan di doktrina i pa supervisá i dirigí e trabou di prediká i di siña hende tokante e bon notisia di e Reino.—Echo. 15:6-29; 21:17-19; Kol. 1:18.

11, 12. (a) Kiko ta mustra ku Yehova a bendishoná e sistema ku su Yu a establesé pa alimentá e kongregashonnan den promé siglo? (b) Kon bini e hendenan por tabata sa presis ken Hesus tabata usa pa alimentá e kongregashonnan?

¹¹ Manera nos a mira, den promé siglo Kristu a usa un kuerpo gobernante pa alimentá e kongregashonnan. Yehova a bendishoná e areglo akí? Sigur ku sí. Kon nos por ta asina sigur? Wèl, e buki di Echonan ta bisa: “Awor  bon, segun ku nan [apòstel Pablo i su kompañeronan di biahe] tabata bishitá e statnan, nan tabata entregá e rumannan e dekretonan ku e apòstelnan i e ansianonan di Herúsalèm a stipulá pa nan kumpli kuné. Sí, p’esei e kongregashonnan a sigui bira firme den fe i krese na kantidat dia tras dia.” (Echo. 16:4, 5) Ripará ku e kongregashonnan a bira fuerte spiritualmente i tabata oumentá den kantidat pasobra nan tabata kooperá fielmente ku e kuerpo gobernante na Herúsalèm. Esei no ta un prueba ku Yehova a bendishoná e sistema ku su Yu a establesé pa alimentá e kongregashonnan spiritualmente? Laga nos nunka lubidá: Ta ku e bendishon di Yehova so e kongregashon kristian por prosperá.—Pro. 10:22; 1 Kor. 3:6, 7.

¹² Pues, nos a mira ku den promé siglo Hesus tabata alimentá su siguidónan den sentido spiritual di e mesun manera ku el a alimentá e multitut tempu ku e tabata riba tera: El a usa un par di hende pa alimentá un multitut. Anto e tempu ei, e hendenan tabata sa presis ken tabata esnan ku Hesus tabata usa pa perkurá kuminda spiritual pa e kongregashonnan. Al fin al kabo, e apòstelnan—e promé miembronan di e kuerpo gobernante—por a duna prueba palpabel ku nan tabatin Yehova su aprobashon. Echonan 5:12 ta bisa: “E apòstelnan a sigui hasi hopi milager i kos maravioso den e pueblo.” * Pues, esnan ku a bira kristian no tabatin ningun motibu pa puntra nan mes ‘ken realmente Kristu tabata usa pa alimentá su karnénan.’ Pero na final di promé siglo, e situashon a kambia.

13, 14. (a) Enkuanto ki atake Hesus a duna spièrtamentu, i na ki tempu su palabranan a kuminsá kumpli? (b) Menshoná e dos maneranan ku e kongregashon kristian lo a ser ataká. (Wak nota 5.)

¹³ Hesus a profetisá ku e kongregashon kristian lo ta blanko di atake. Kòrda ku, den su ilustrashon profétiko di trigu i mal yerba, el a bisa ku e enemigu lo a sembra mal yerba (kristiannan falsu) meimei di e trigu (kristiannan ungí). Anto el a bisa ku lo permití e dos gruponan akí krese huntu te na kosecha, ku lo ta na “konklushon di un era.” (Mat. 13:24-30, 36-43) I no a dura mashá ku Hesus su palabranan a kuminsá kumpli. *

¹⁴ Apostasia a lanta kabes for di promé siglo, pero Hesus su fiel apòstelnan a fungi komo “frena.” Sí, nan a prevení ku siñansa falsu lo a kontaminá e kongregashon kristian. (2 Tes. 2:3, 6, 7) Sinembargo, despues ku e último apòstel a muri, apostasia a plama, i asina e trigu i mal yerba a krese huntu pa hopi siglo. Durante e periodo ei, e mal yerba a bira mas tantu ku e trigu. No tabatin un grupo organisá ku tabata alimentá Hesus su siguidónan den sentido spiritual riba un base regular. Pero esei lo a kambia ku tempu. Ma na ki tempu?

15, 16. Kiko tabata e resultado di e estudio diligente ku e Studiantenan di Beibel a hasi di e Skritura, i ki pregunta esaki ta lanta?

¹⁵ Segun ku e periodo pa e trigu i mal yerba krese huntu tabata yegando su fin, algun hende a kuminsá interesá mashá den bèrdatnan bíbliko. Kòrda ku den e añanan di 1870, un grupo chikitu ku tabata yama nan mes Studiantenan di Beibel tabata bini huntu i forma klasnan pa analisá Beibel. E klasnan akí no tabata forma parti di ningun iglesia òf grupo religioso di kristiandat. E Studiantenan di Beibel akí tabata studia e Palabra di Dios kuidadosamente, ku un kurason humilde i un mente habrí, pa nan por a haña sa e bèrdat.—Mat. 11:25.

¹⁶ I nan estudio kuidadoso di e Skritura a duna bon resultado. E hòmber- i muhénan leal akí a saka doktrinanan falsu na kla i a plama bèrdatnan bíbliko rònt mundu mediante literatura basá riba Beibel ku nan tabata publiká i distribuí. Hopi hende sinsero ku tabatin hamber i set pa e bèrdat a lesa nan  literatura i a keda konvensí ku esaki ta e bèrdat. P’esei ta lanta un pregunta masha interesante: Ta e Studiantenan di Beibel akí Kristu tabata usa promé ku 1914 pa alimentá su karnénan? Nò. Dikon nò? Pasobra e tempu ei, ainda e trigu i mal yerba tabata kresiendo huntu, i e grupo ku Kristu lo a usa pa perkurá kuminda spiritual tabata den desaroyo; nan no tabata kla ainda. Sí, ainda no tabata tempu pa separá e supuesto kristiannan for di esnan berdadero.

17. Ki susesonan importante a kuminsá tuma lugá na 1914?

¹⁷ Manera nos a siña den e artíkulo anterior, e tempu di kosecha a kuminsá na 1914. I un kantidat di suseso importante a kuminsá tuma lugá desde e aña ei. Hesus a ser entronisá komo Rei, i e último dianan a kuminsá. (Rev. 11:15) Desde di 1914 pa komienso di aña 1919, Hesus i su Tata a inspekshoná e tèmpel spiritual i a hasi esaki limpi. * (Mal. 3:1-4) Despues di esei, na kuminsamentu di aña 1919, tabata tempu pa e kosechadónan kuminsá rekohé e trigu. Awor sí tabata tempu pa Kristu nombra, òf asigná, un grupo organisá pa perkurá kuminda spiritual!

18. Ki nombramentu Hesus a bisa lo e hasi, i ki pregunta importante a surgi despues ku e último dianan a kuminsá?

¹⁸ Den su profesia tokante e tempu di fin, Hesus a profetisá ku lo el a nombra un esklabo, un grupo organisá, pa perkurá “kuminda [spiritual] na e debido tempu.” (Mat. 24:45-47) Ken ta e esklabo ei? Siguramente Hesus lo a usa e mesun sistema ku el a establesé den promé siglo: Lo e usa un par di hende pa alimentá un multitut. Pero ora e último dianan a kuminsá, a lanta e pregunta importante: Ken ta esklabo, òf e par di hendenan, ku Hesus lo a usa? E siguiente artíkulo lo kontestá e pregunta akí i algun otro pregunta tokante e profesia di Hesus.