1. Ki desaroyo alarmante Nehemías a topa ora el a regresá Herúsalèm? (Wak e promé plachi.)

E HABITANTENAN di Herúsalèm tabata aribabou. Dikon? Pa motibu di loke tabata pasa den nan stat. Un notorio opositor di Yehova tabata keda den un di e kambernan di e tèmpel. E levitanan no tabata hasi nan trabou mas. En bes di e ansianonan guia e pueblo den e adorashon di Yehova, nan tabata hasi negoshi riba sabat. I hopi israelita tabata kasa ku hende di otro nashon. Esaki ta apénas algun di e desaroyonan alarmante ku Nehemías a topa ora el a regresá Herúsalèm despues di aña 443 promé ku Kristu.—Neh. 13:6.

2. Kon Israel a bira un nashon santifiká?

² Israel tabata un nashon dediká na Dios. Na aña 1513 promé ku Kristu, e israelitanan tabata ansioso pa obedesé Yehova. E tempu ei nan a bisa: “Tur e palabranan ku SEÑOR a papia nos lo hasi!” (Éks. 24:3) Pues, Dios a santifiká nan. Ku otro palabra, el a skohe nan pa ta su pueblo i tabata ke pa nan ta santu i separá for di e otro nashonnan. Ki un gran privilegio esei tabata! Kuarenta aña despues, Moises a kòrda nan: “Bo ta un pueblo santu pa SEÑOR bo Dios; SEÑOR bo Dios a skohe bo, for di tur e pueblonan ku tin riba superfisie di tera, pa ta un pueblo spesial pa su mes.”​—Deu. 7:6.

3. Den ki kondishon spiritual e hudiunan tabata ora Nehemías a bini Herúsalèm pa di dos biaha?

³ Lamentablemente, e entusiasmo ku Israel tabatin na prinsipio komo un nashon santu no a dura mashá. Semper tabatin algun hudiu ku a sirbi Dios, pero mayoria di nan tabata mas interesá den parse santu òf deboto ku den hasi e boluntat di Dios. Ora Nehemías a bini Herúsalèm pa di dos biaha, esei tabata kasi shen aña despues ku un restu di hudiu fiel a bolbe for di Babilonia pa restorá adorashon berdadero. Pero un biaha mas,  e nashon su entusiasmo pa asuntunan spiritual tabata menguando.

4. Kiko por yuda nos keda santu i útil pa e sirbishi di Yehova?

⁴ Meskos ku e israelitanan, Dios a santifiká Testigunan di Yehova djawe. Tantu e kristiannan ungí komo e miembronan di e “multitut grandi” ta santu, es desir, separá òf apartá pa sirbishi sagrado. (Rev. 7:9, 14, 15; 1 Kor. 6:11) E israelitanan ku tempu a pèrdè nan amistat ku Yehova pasobra nan no a keda santu. Nos no ke pa esei pasa ku nos. Kiko nos por hasi anto pa keda santu i útil pa e sirbishi di Yehova? Nehemías kapítulo 13 ta siña nos kuater kos ku nos por hasi: (1) Evitá mal kompania; (2) apoyá loke e organisashon di Dios ta hasi; (3) pone e kosnan di Yehova na promé lugá i (4) protehá nos identidat kristian. Laga nos ban analisá e puntonan akí.

5, 6. Ken Eliasib ku Tobias tabata, i dikon kisas nan tabata amigu?

⁵ Lesa Nehemías 13:4-9. Nos ta rondoná pa mal influensia, pues no ta fásil pa keda santu. Por ehèmpel, laga nos wak e kaso di Eliasib ku Tobias. Eliasib tabata sumo saserdote. I Tobias tabata un amonita ku probablemente tabata traha komo un funshonario di rango inferior pa rei di Persia. Anteriormente, Tobias ku su kompinchinan a purba di stroba Nehemías di rekonstruí e murayanan di Herúsalèm. (Neh. 2:10) Ademas, segun e Lei di Dios, amonitanan no tabatin mag di bini mes riba e tereno di tèmpel. (Deu. 23:3) Pues, dikon e sumo saserdote a duna un hòmber manera Tobias un kamber den e tèmpel?

⁶ Tabatin tres motibu: Di promé, Eliasib a sera amistat ku Tobias. Di dos, Tobias ku su yu Johanan a kasa ku muhénan hudiu, i hopi hudiu tabata papia masha bon di Tobias. (Neh. 6:17-19) Di tres, Tobias tabata bon amigu di Sanbalat, gobernador di Samaria. E yu muhé di Sanbalat tabata kasá ku un nietu di Eliasib. (Neh. 13:28) Tur e lasonan akí kisas ta splika dikon Sumo Saserdote Eliasib a laga Tobias influensi’é, apesar ku Tobias no tabata un kreyente i tabata oponé e obra di e pueblo di Dios. Pero Nehemías sí a demostrá ku e tabata leal na Yehova, ya ku el a saka tur e kosnan di kas for di e kamber di Tobias benta afó.

7. Kon sirbidónan di Dios, inkluso e ansianonan, por keda santu?

⁷ Nos ta un pueblo dediká na Dios, pues nos lealtat na dje semper mester ta na promé lugá den nos bida. Pa nos por keda santu den su bista, nos mester biba segun su normanan hustu. P’esei nos no mester laga lasonan familiar bira mas importante ku prinsipionan di Beibel. I ansianonan ta tuma desishon basá riba Yehova su manera di pensa, no basá riba nan propio opinion òf sintimentu. (1 Tim. 5:21) Nan ta paga bon tinu pa nan no hasi nada ku lo por pone nan pèrdè e aprobashon di Dios.—1 Tim. 2:8.

8. Kiko tur sirbidó dediká di Yehova mester kòrda tokante e hendenan ku nan ta anda kuné?

⁸ Ta bon pa nos kòrda ku “mal kompania ta daña bon kustumber.” (1 Kor. 15:33) Asta algun miembro di nos famia por tin un mal influensia riba nos. Un tempu Sumo Saserdote Eliasib tabata un bon ehèmpel i a kooperá ku Nehemías pa rekonstruí e murayanan di Herúsalèm. (Neh. 3:1) Pero ku tempu e mal influensia di Tobias i di otro hende aparentemente a pon’é hasi kosnan ku a lag’é bira impuru den bista di Yehova. Nos tin ku anda ku hende ku ta animá nos pa hasi bon kosnan, manera lesa Beibel, asistí na reunion i bai den sirbishi di vèlt. Nos mester ta masha gradisidu si nos tin miembronan di famia ku tin e bon influensia ei riba nos.

9. Ki situashon tabata reina na e tèmpel, i kiko Nehemías a hasi pa korigí esei?

⁹ Lesa Nehemías 13:10-13. Parse ku ora Nehemías a regresá Herúsalèm e israelitanan kasi no tabata duna kontribushon mas na tèmpel. Esei a pone ku e levitanan a laga nan asignashon para i a bai traha den nan kunuku pa kria nan famia. Nehemías a kulpa e ofisialnan hudiu pa e situashon ei, kisas pasobra nan no tabata kolektá e diesmo serka e pueblo òf pasobra nan no tabata trese e diesmo tèmpel manera tabata nan deber. (Neh. 12:44) Pues, Nehemías a tuma medida pa kolektá e diesmo: El a nombra hòmbernan konfiabel pa supervisá e depósitonan di tèmpel i pa duna e diesmo na e levitanan.

10, 11. Kon nos por apoyá adorashon berdadero?

¹⁰ Kiko nos por siña for di esaki? Wèl, e ta rekordá nos ku nos tin e privilegio di onra Yehova ku nos rikesa, esta, ku nos kosnan balioso. (Pro. 3:9) Ora nos ta duna kontribushon pa apoyá su obra, eigenlijk nos ta dunando Yehova loke ta di dje kaba. (1 Kró. 29:14-16) Kisas nos ta pensa ku nos no por dun’é mashá, pero si nos tin e deseo, nos tur por kontribuí ku nos granito, i gustosamente e ta aseptá esei.—2 Kor. 8:12.

¹¹ Durante hopi aña, un famia ku ocho yu tabata invitá un pareha di edat ku tabata pionero spesial pa bin kome un biaha pa siman serka nan. E mama semper tabata bisa: ‘Kaminda 10 por kome, 12 por kome!’ Un kuminda pa siman kisas no ta parse gran kos, pero e pioneronan ei sí tabata masha gradisidu pa e hospitalidat! Nan, na nan turno, tabata un bendishon pa e famia. E palabranan di animashon i e eksperensianan di e pareha akí a motivá e yunan pa hasi progreso den e bèrdat. Despues, tur e yunan a drenta den sirbishi di tempu kompleto.

12. Ki bon ehèmpel e ansiano- i sirbidónan ministerial ta pone den kongregashon?

¹² Un otro lès ku e relato di Nehemías ta siña nos ta ku e ansiano- i sirbidónan ministerial mester ta un ehèmpel den apoyá e areglonan ku e organisashon di Dios tin, i asina nan ta yuda e otro rumannan den kongregashon. Den esaki e ansianonan ta imitá tambe e ehèmpel di apòstel Pablo. El a apoyá adorashon berdadero i a duna konseho útil. Por ehèmpel, el a duna algun sugerensia práktiko tokante kon pa duna kontribushon.—1 Kor. 16:1-3; 2 Kor. 9:5-7.

13. Kon algun hudiu no tabata respetá sabat?

¹³ Lesa Nehemías 13:15-21. Si nos ta demasiado preokupá ku asuntunan material, pokopoko pero sigur nos por pèrdè nos  relashon ku Yehova. Segun Éksodo 31:13, e israelitanan mester a usa e sabat semanal pa kòrda riba nan relashon ku Yehova komo su pueblo separá i santu. E tabata un dia reservá pa adorá Yehova huntu komo famia, pa hasi orashon i pa meditá riba e Lei di Dios. Pero pa algun israelita den tempu di Nehemías, e sabat a bira un dia di trabou meskos ku tur otro dia. Nan a pone adorashon di Dios na di dos lugá. Ora Nehemías a mira loke tabata pasando, el a kore ku e komersiantenan estranhero promé ku sabat a kuminsá i a laga sera e portanan di e stat.

14, 15. (a) Kiko por pasa si nos no limitá e kantidat di tempu ku nos ta dediká na gana plaka? (b) Kon nos por drenta den e sosiegu di Dios?

¹⁴ Kiko nos por siña for di esaki? Un lès ku nos ta saka ta ku nos mester limitá e kantidat di tempu ku nos ta dediká na gana plaka. Si nos no hasi esei, fásilmente nos trabou por kita nos atenshon for di Yehova su adorashon òf nos kurason por bira dividí, foral si e ta un trabou ku nos ta gusta. Kòrda ku Hesus a bisa ku nos no por ta esklabo di dos doño. (Lesa Mateo 6:24.) Nehemías por a gana hopi plaka, i e por a usa su tempu pa hasi negoshi ku e hòmbernan di Tiro i otro komersiantenan. Pero na lugá di esei, kiko el a hasi? (Neh. 5:14-18) El a dediká su tempu na yuda su rumannan i na hasi kosnan ku a trese onor pa Yehova su nòmber. Awe ta meskos. E ansiano- i sirbidónan ministerial ta konsentrá riba aktividatnan ku ta benefisiá e kongregashon, i p’esei e rumannan ta stima nan. Komo resultado, ta reina un ambiente di amor, pas i siguridat den e pueblo di Dios.—Eze. 34:25, 28.

¹⁵ Kristiannan no tin nodi di warda un sabat semanal, pero tòg Pablo a bisa ku “ta keda un sosiegu di sabat pa e pueblo di Dios.” I el a agregá: “E hende ku a drenta den e sosiegu di Dios tambe a sosegá di su obranan, meskos ku Dios a sosegá di esnan di dje.” (Heb. 4:9, 10) Komo kristian, nos por drenta den e sosiegu di Dios dor di obedesé Yehova i hasi nos bèst pa apoyá su propósito. Abo ku bo famia ta pone Yehova na promé lugá dor di tene boso adorashon komo famia, asistí na reunion i partisipá den sirbishi di vèlt? Tal bes nos doño di trabou òf e hendenan ku nos ta traha kuné no ta konsiderá e kosnan akí importante. Den tal kaso, nos mester para firme. Kisas nos lo tin ku hasi manera Nehemías i ‘sera e portanan i kore ku e hòmbernan di Tiro,’ pa asina nos por duna prioridat na kosnan sagrado. Ya ku Dios ta konsiderá ku nos ta su pueblo santu i separá, nos tin ku puntra nos mes: ‘E manera ku mi ta biba ta demostrá ku mi ta pone Yehova na promé lugá?’—Mat. 6:33.

16. Kon e identidat di e pueblo di Dios komo un nashon santifiká tabata na peliger den tempu di Nehemías?

¹⁶ Lesa Nehemías 13:23-27. Den tempu di Nehemías, e hòmbernan israelita tabata kasa ku muhé estranhero. Durante su promé bishita na Herúsalèm, Nehemías a laga tur e ansianonan firma un akuerdo skirbí den kua nan ta hura ku nan lo no kasa ku muhé pagano. (Neh. 9:38; 10:30) Pero durante su di dos bishita na Herúsalèm, el a ripará ku e hudiunan no solamente a kasa ku muhé estranhero, sino ku tambe nan tabata a punto di pèrdè nan identidat komo Dios su pueblo santifiká! E yunan di e muhénan pagano ei no por a papia ni lesa hebreo. Akaso e muchanan ei lo a identifiká nan mes komo israelita ora nan a bira grandi? Òf mas bien nan lo a konsiderá nan mes asdodita, amonita òf moabita? Kon nan lo por a komprondé e Lei di Dios si nan no tabata sa hebreo? Kon nan lo por a siña konosé Yehova i skohe pa sirbi é en bes di e diosnan falsu ku nan mamanan tabata adorá?  Nehemías a aktua lihé i firme pa protehá e identidat di e israelitanan.—Neh. 13:28.

17. Kon mayornan por yuda nan yunan sera un amistat personal ku Yehova?

¹⁷ Awe nos tin ku dal pasonan firme pa yuda nos yunan haña e identidat kristian, sí, pa nan sinti nan berdadero kristian. Abo komo mayor, puntra bo mes: ‘Kon bon mi yunan ta dominá e “idioma puru,” es desir, kon bon nan ta komprondé e bèrdatnan di Beibel i kuantu nan ta papia tokante dje? (Sof. 3:9, NW) Loke mi yunan ta kòmbersá ta mustra ku nan ta bou di e influensia di e spiritu di Dios òf di e spiritu di mundu?’ No desanimá muchu lihé si bo ripará ku bo yunan tin ku mehorá den esaki. Ta tuma tempu pa siña un idioma, foral si rònt di bo tin hopi kos pa kita bo tinu. Mundu ta pone hopi preshon riba bo yunan pa nan desobedesé Dios. Pues tene pasenshi, i usa bo Adorashon Komo Famia i otro okashonnan pa yuda nan kultivá un amistat será ku Yehova. (Deu. 6:6-9) Laga nan mira e benefisionan di ser diferente for di e mundu di Satanas. (Huan 17:15-17) I hasi bo bèst pa yega nan kurason.

18. Dikon mayornan kristian ta den e mihó posishon pa yuda nan yunan skohe pa dediká nan mes na Yehova?

¹⁸ Na final di kuenta, kada yu mes tin ku disidí si e ke sirbi Dios òf nò. Pero tin hopi manera ku abo, komo mayor, por yuda nan. Bo por ta un bon ehèmpel, bo por splika nan bon kla ki komportashon ta inaseptabel i bo por papia ku nan tokante e konsekuensianan ku nan desishonnan por tin. Mayornan, boso ta den e mihó posishon pa yuda nan skohe pa dediká nan mes na Yehova. Nan tin mester di boso yudansa pa haña e identidat kristian i proteh’é. De echo, nos tur tin ku tene kuidou pa nos no pèrdè nos “paña” simbóliko, esta, e kualidatnan i normanan ku ta identifiká nos komo siguidónan di Kristu.—Rev. 3:4, 5; 16:15.

19, 20. Kiko nos mester hasi pa Yehova kòrda riba nos “pa bon”??

¹⁹ Un profeta ku a biba den tempu di Nehemías tabata Malakías. El a splika ku Yehova ta kòrda ‘esnan ku ta tem’é i ku ta onra su nòmber’ i ku e ta skirbi nan nòmber den “un buki di memoria.” (Mal. 3:16, 17) Pues, Dios hamas lo lubidá hende ku tin rèspèt i temor p’e i ku ta stima su nòmber!​—Heb. 6:10.

²⁰ Nehemías a pidi den orashon: “Kòrda di mi, o mi Dios, pa bon.” (Neh. 13:31) E tabata ke pa Yehova kòrda kon el a sirbié. Dios lo kòrda nos tambe i skirbi nos nòmber den su buki di memoria si nos evitá mal kompania, apoyá loke su organisashon ta hasi, pone su kosnan na promé lugá i protehá nos identidat kristian. Pues, laga nos ‘sigui saminá nos mes pa sa si nos ta den e fe.’ (2 Kor. 13:5) Si nos hasi nos bèst pa keda den e pueblo santu i separá di Yehova, lo e kòrda riba nos “pa bon.”