1, 2. (a) Kiko sa pasa ora nos ta pensa riba un persona ku nos ta stima i ta papia di dje? (Wak e promé plachi.) (b) Kua ta algun pregunta ku nos lo analisá?

ORA nos ta pensa riba un hende ku nos ta stima i ta papia di dje, nos amistat ku e persona ei ta bira mas fuerte. Esei ta konta tambe pa nos amistat ku Yehova Dios. Tempu ku David tabata wardadó di karné, el a pasa hopi anochi ta wak shelu yen di strea i a meditá riba nan Kreador inkomparabel. David a skirbi: “Ora mi kontemplá bo shelunan, e obra di bo dedenan, e luna i e streanan ku abo a establesé, ta kiko hende ta, ku bo ta kòrda di dje? I e yu di hende, ku bo ta hasi kaso di dje?” (Sal. 8:3, 4) I despues ku apòstel Pablo a analisá e manera maravioso ku Yehova tabata kumpli ku Su propósito pa ku kristiannan ungí, el a deklará: “O ki profundo e rikesa, sabiduria i konosementu di Dios ta!”—Rom. 11:17-26, 33.

² Ora nos ta den sirbishi di vèlt, nos ta pensa riba Yehova i papia tokante dje. Esei so kaba ta benefisiá nos. Hopi pionero a ripará ku nan amor pa Yehova a krese komo ku nan ta pasa mas tempu den sirbishi. Sea ku bo ta trahando pionero kaba òf bo ta purbando di alkansá e meta ei, ta bon pa bo meditá riba e siguiente preguntanan: Kon e sirbishi di pionero por fortalesé mi amistat ku Yehova? Kiko lo yuda mi komo pionero pa keda den e sirbishi spesial akí ku ta duna mi asina tantu satifakshon? Ki kambionan mi tin ku hasi pa mi por kuminsá traha pionero? Promé, laga nos konsiderá algun manera ku e trabou di pionero por fortalesé nos amistat ku Dios.

3. Ora nos ta papia den sirbishi tokante e bendishonnan ku e Reino lo trese, ki efekto esei tin riba nos?

³ Nos ta hala mas serka Yehova ora nos ta papia ku otro hende tokante e bendishonnan ku e Reino lo trese.  Kua ta e tekstonan di Beibel ku bo gusta usa ora bo ta prediká di kas pa kas? Kisas bo teksto preferí ta Salmo 37:10, 11; Daniel 2:44; Huan 5:28, 29 òf Revelashon 21:3 i 4. Kada biaha ku nos papia ku un hende tokante e promesanan ei, nos mes ta ser rekordá ku “tur don ku ta bon i tur regalo perfekto” ta bini di nos Dios generoso. Esaki ta hala nos mas serka dje.—Sant. 1:17.

4. Dikon nos ta haña mas apresio pa Yehova su bondat ora nos ta prediká na otro hende?

⁴ Nos ta haña mas apresio pa e bèrdat ora nos mira kon infelis i indefenso mayoria di hende ku nos ta prediká na dje ta. Hende den mundu no tin un guia konfiabel pa yuda nan haña satisfakshon i felisidat. Mayoria di nan ta preokupá pa futuro i no tin ningun speransa. Nan ta buska e nifikashon di bida, pero asta esnan ku ta religioso sa masha poko di Beibel. Nan ta parse e hendenan di Nínive di antigwedat. (Lesa Yonas 4:11.) Ora nos ta partisipá mas tantu den sirbishi, nos ta mira mas kla e kontraste entre e kondishon spiritual di e hendenan ku nos ta prediká na dje i e kondishon di e pueblo di Yehova. (Isa. 65:13) Tambe nos ta ser rekordá di e bondat di Yehova, ya ku e ta hasi mas ku djis satisfasé e nesesidatnan spiritual di su pueblo so. Si nos wak bon, e ta duna tur hende e chèns di haña konsuelo i un berdadero speransa.—Rev. 22:17.

5. Kon nos ta kuminsá mira nos propio problemanan ora nos ta yuda otro hende siña e bèrdat?

⁵ Nos ta siña preokupá ménos ku nos propio problemanan ora nos ta yuda otro hende siña e bèrdat. Un pionero regular ku yama Trisha a komprobá esaki ora ku su mayornan tabata den proseso di divorsio. El a konta ku esei tabata un di e periodonan di mas difísil di su bida. Un dia, e tabata basta tristu i tabatin gana di keda kas. Pero tòg el a disidí di bai studia ku tres mucha ku tabatin un situashon masha difísil na kas. Nan tata a bandoná e famia, i nan ruman hòmber a maltratá nan. Trisha a bisa: “Mi problema- i preokupashonnan no tabata nada na komparashon ku di nan. Pero segun ku nos tabata studia, nan wowo a kuminsá bria i nan a hari di emoshon i alegria. E muchanan ei tabata un regalo di Yehova, foral e dia ei.”

6, 7. (a) Kon nos fe ta bira mas firme ora nos ta siña hende e bèrdatnan di Beibel? (b) Kon nos ta sinti nos ora nos mira ku prinsipionan bíbliko ta yuda nos studiantenan hiba un mihó kalidat di bida?

⁶ Nos fe ta bira mas firme ora nos ta siña hende e bèrdatnan di Beibel. Den tempu di apòstel Pablo tabatin algun hudiu ku no tabata hasi loke nan a siña otro hende. Pablo a skirbi tokante nan: “Abo ku ta siña otro hende, no ta siña bo mes?” (Rom. 2:21) Den nos tempu, e pioneronan ta kompletamente diferente. Por lo general, nan tin hopi oportunidat pa siña hende e bèrdat i pa dirigí estudio di Beibel. Pa nan por hasi esei bon, nan tin ku prepará pa kada estudio i, tin biaha, buska informashon pa kontestá sierto pregunta. Un pionero ku yama Janeen a splika: “Kada biaha ku mi haña un oportunidat pa siña otro hende e bèrdat, mi ta ripará ku esaki ta graba e bèrdatnan ei mas profundamente den mi mente i mi kurason. Komo resultado, mi fe no ta keda pará un kaminda sino ta sigui krese.”

⁷ Nos ta haña mas apresio ainda pa e sabiduria di Dios ora nos mira ku prinsipionan bíbliko ta yuda nos studiantenan hiba un mihó kalidat di bida. (Isa. 48:17, 18) Esei ta motivá nos mas ainda pa sigui apliká e prinsipionan akí den nos mes bida. Adrianna, un otro pionero, a bisa: “Ora hende ta konfia den nan mes sabiduria, nan bida por ta un desaster. Pero ora nan kuminsá konfia den e sabiduria di Yehova,  bo ta mira e benefisionan mesora.” Anto un pionero ku yama Phil a bisa: “Bo ta mira ku Yehova sí por kambia hende ku no a logra kambia nan bida ora nan a purba di hasié riba nan mes.”

8. Ki efekto trahamentu den sirbishi huntu ku nos rumannan tin riba nos?

⁸ Nos ta ser animá ora nos ta traha huntu ku nos rumannan den sirbishi. (Pro. 13:20) Mayoria di pionero ta pasa basta tempu den sirbishi huntu ku otro rumannan, i esei ta duna nan hopi oportunidat pa nan “por tin un interkambio di estímulo.” (Rom. 1:12; Lesa Hebreonan 10:24.) Un pionero ku yama Lisa a komentá: “Na trabou semper tin un spiritu di kompetensia i hasimentu di yalurs. Tur dia bo ta haña bo ku redashi i papiamentu di palabra malu. Tur hende ke bai dilanti kueste loke kueste. Tin biaha, nan ta hasi bofon di bo pa motibu di bo kondukta kristian. En kambio, traha den sirbishi ku bo rumannan ta masha edifikante. Na final di dia, mi ta yega kas animá, maske kon kansá mi ta.”

9. Ora un esposo i esposa ta traha pionero huntu, kon esei ta yuda nan matrimonio?

⁹ Bo matrimonio ta bira mas fuerte ora bo ta traha pionero huntu ku bo kasá. (Ekl. 4:12) Madeline, kende ta traha pionero huntu ku su kasá, a splika: “Ami ku mi kasá por papia tokante nos dia den sirbishi òf tokante un punto ku nos a haña den nos lesamentu di Beibel ku nos por usa den sirbishi. Kada aña ku nos pasa trahando huntu komo pionero, nos ta sera mas ku otro.” Trisha, menshoná anteriormente, tambe a bisa algu similar: “Nos tur dos ta desididu pa no hinka nos kurpa den debe, pues nos no tin pleitu tokante plaka.  Komo ku nos tin e mesun orario di sirbishi, nos ta bai estudio i rebishita huntu, i esei ta hala nos mas serka otro i mas serka Yehova.”

10. Kiko ta pasa ku nos konfiansa den Yehova ora ku nos pone su Reino na promé lugá i ta mira ku e ta apoyá nos?

¹⁰ Nos konfiansa den Yehova ta krese ora ku nos pone su Reino na promé lugá i ta mira ku e ta apoyá nos i kontestá nos orashonnan. Ta bèrdat ku, te na sierto grado, tur kristian leal ta konfia den Yehova. Pero esnan ku ta pionero ta deskubrí ku nan mester konfia den Yehova pa nan por keda traha pionero. (Lesa Mateo 6:30-34.) Por ehèmpel, Curt ta traha pionero huntu ku su esposa i ta sirbi komo superintendente di sirkuito supstituto. E rumannan a pidié bishitá un kongregashon ku ta keda dos ora i mei for di su kas, i el a aseptá pa hasié. Pero su outo tabatin nèt sufisiente gasolin pa bai, pero no pa bini bèk, i ainda tabata falta un siman p’e kobra su salario di trabou. Curt a konta kon el a kuminsá duda si el a hasi bon di aseptá pa bai bishitá un kongregashon asina leu. Ma despues di hasi orashon, nan a disidí ku nan lo bai, konfiando ku Yehova lo perkurá pa nan nesesidatnan. Nèt promé ku nan a sali bai, un ruman muhé a bèl i bisa nan ku e tin un regalo pa nan: tabata presis e suma di plaka ku nan tabata falta pa hasi e biahe. Curt a bisa: “Si kada bes e sorto di kosnan ei ta pasa ku bo, ta fásil pa mira e man di Yehova den e asuntu.”

11. Menshoná algun bendishon ku pioneronan ta disfrutá di dje.

¹¹ Hopi biaha pioneronan ta ripará ku mas será nan amistat bira ku Yehova i mas nan hasi den sirbishi, mas bendishon nan ta haña. (Deu. 28:2) Pero esei no ke men ku e trabou di pionero ta semper fásil. Tur sirbidó di Dios ta sufri di e konsekuensianan di e rebelion di Adam. Aunke ta asina ku algun pionero tabatin ku stòp ku nan sirbishi pa un tempu, hopi biaha pioneronan por solushoná òf asta evitá situashonnan difísil. Kiko por yuda nan sigui disfrutá di nan sirbishi privilegiá?

12, 13. (a) Kiko un pionero mester hasi si e tin problema pa yega su oranan? (b) Dikon ta asina importante pa traha tempu pa lesa Beibel tur dia, pa hasi estudio personal i pa meditá?

¹² Mayoria di pionero tin un programa yen. Kisas ta difísil pa nan logra hasi tur kos, i p’esei nan mester ta bon organisá. (1 Kor. 14:33, 40) Si un pionero tin problema pa yega su oranan, lo e tin ku analisá ta kon e ta usa su tempu. (Efe. 5:15, 16) Lo ta bon p’e puntra su mes: ‘Kuantu tempu mi ta dediká realmente na dibertishon? Lo mi mester ta mas disipliná? Lo mi por ahustá e orario ku mi ta traha pa gana mi pan?’ Sin duda, tur kristian sa ku ta masha fásil pa agregá kosnan innesesario na nan programa. Pues, pioneronan mester evaluá nan situashon regularmente i hasi kambio si ta nesesario.

¹³ Un pionero mester traha tempu den su programa pa lesa Beibel tur dia, pa hasi estudio personal i pa meditá. Pues, e tin ku disipliná su mes pa no laga aktividatnan ménos importante kita for di e tempu ku el a apartá pa kosnan nesesario. (Flp. 1:10) Por ehèmpel, imaginá bo ku un pionero ta yega kas despues di un dia largu den sirbishi. E tin pensá di usa e anochi ei pa prepará pa e siguiente reunion. Pero promé e ta bai lesa korant. Despues e ta sende kòmpiuter i ta lesa su e-mailnan i kontestá nan. Unabes e ta online, e ta probechá bai na un website pa wak si e preis di un artíkulo ku e ke kumpra a baha. Anto sin ku e ripará, kasi dos ora a pasa i ainda e no a kuminsá prepará pa reunion. Dikon esaki ta un problema? Wèl, si un  deportista profeshonal ke tin un karera largu, e tin ku kuida su kurpa i kome salú. Di igual manera, pa un pionero por keda den sirbishi di tempu kompleto, e mester tin un bon programa di estudio personal pa rekargá su mes spiritualmente.—1 Tim. 4:16.

14, 15. (a) Dikon pioneronan mester tene nan bida simpel? (b) Kiko un pionero mester hasi si e ta konfrontá difikultat?

¹⁴ Rumannan ku ke keda den e trabou di pionero ta hasi nan bèst pa tene nan bida simpel, manera Hesus a animá su disipelnan pa hasi. (Mat. 6:22) Hesus mes tambe a hiba un bida simpel pa asina e por a kumpli ku su sirbishi sin distraishon. Ta p’esei e por a bisa: “Zoro tin hòl i para di shelu tin nèshi, ma e Yu di hende no tin kaminda pa pone su kabes.” (Mat. 8:20) E pionero ku ke siña for di e ehèmpel di Hesus tin ku kòrda ku mas kos material e tin, mas kos e tin pa mantené, drecha i remplasá.

¹⁵ Pioneronan ta realisá ku nan privilegio di sirbishi ta spesial, pero esei no ta pasobra nan ta mihó ku otro hende. Mas bien, nan sa ku kualke privilegio òf don ku nan por tin ta debí na Yehova su bondat inmeresí. Pues, pa un ruman keda den e trabou di pionero, e tin ku konfia den Yehova. (Flp. 4:13) Un kos ta sigur, lo surgi problema i difikultat. (Sal. 34:19) Ma ora esei sosodé, pioneronan mester buska e guia di Yehova i dun’é chèns di yuda nan, en bes di kore bandoná nan privilegio di sirbishi. (Lesa Salmo 55:22.) Segun ku nan ta mira kon Yehova ta apoyá nan ku amor, nan lo sinti nan mas serka di nan Tata selestial.—Isa. 41:10.

16. Si bo ta deseá di traha pionero, kiko bo mester hasi?

¹⁶ Si bo tambe ta deseá di haña e bendishonnan ku pioneronan ta disfrutá di dje, bo tin ku laga Yehova sa esei. (1 Huan 5:14, 15) Papia ku rumannan ku ta trahando pionero. Pone metanan ku lo yuda bo bira pionero un dia. Esei ta loke Keith ku Erika a hasi. Nan tabata traha henter dia i, meskos ku hopi pareha di nan edat, nan a kumpra un kas i un outo nobo djis despues ku nan a kasa. Nan a atmití: “Nos a kere ku e kosnan ei lo a duna nos satisfakshon, pero esei no tabata e kaso.” Ora Keith a pèrdè trabou, el a kuminsá traha pionero ousiliar. El a bisa: “E trabou di pionero a laga mi kòrda e goso ku bo ta sinti ora bo ta prediká.” Nan a bira amigu di un pareha ku tabata traha pionero, i e pareha akí a laga nan mira e felisidat ku bo ta haña ora bo ta hiba un bida simpel i ta traha pionero. Kiko Keith ku Erika a hasi? “Nos a traha un lista di nos metanan spiritual, peg’é na frishidèr i a skrap nan un pa un segun ku nos tabata alkansá nan.” Ku tempu, nan por a kuminsá traha pionero.

17. Dikon lo ta sabí pa bo analisá bo situashon pa wak si bo por traha pionero?

¹⁷ Abo por bira pionero? Si bo ta pensa ku na e momentonan akí esei no ta posibel, hasi tur loke ta na bo alkanse pa partisipá plenamente den sirbishi. Esaki lo fortalesé bo amistat ku Yehova. Bo por pidi su guia den orashon, i despues analisá bo sirkunstansia. Kisas lo bo mira ku si bo djis hasi algun kambio den bo programa òf den bo estilo di bida, lo bo por bira pionero. Ora bo kuminsá traha pionero, lo bo ripará ku e goso ku bo ta haña ta superá kualke sakrifisio ku bo ta hasi. Lo bo sinti mayor satisfakshon, pasobra bo ta pone e Reino promé ku bo propio interesnan. (Mat. 6:33) Lo bo sinti e felisidat ku ta bini di duna. I lo bo tin mas oportunidat pa pensa riba Yehova i papia di dje, i esaki lo hasi bo amor p’e mas profundo i lo alegrá su kurason.