1, 2. (a) Ora karné ta bon kuidá, kiko ta e resultado? (b) Dikon hopi hende den tempu di Hesus tabata manera karné sin wardadó?

PA UN tou di karné ta bon kuidá, e karnénan mester tin un wardadó ku ta interesá den nan bienestar. Un buki ku ta siña kon pa kria karné ta bisa ku si un wardadó di karné ta djis hiba su karnénan kunuku pa kome i laga nan pa nan kuenta, sin atendé nan otro nesesidatnan, denter di un par di aña e karnénan ta bira suak i haña tur sorto di malesa. Ma si un wardadó ta duna bon kuido na kada karné, henter e tou lo ta fuerte i salú.

² Esaki ta konta tambe pa e kongregashon. E kuido i atenshon ku e wardadónan kristian ta duna kada karné lo benefisiá e kondishon spiritual di henter e kongregashon. Kisas bo ta kòrda ku Hesus a sinti duele di un multitut pasobra “nan tabata soyá i deskuidá, manera karné sin wardadó.” (Mat. 9:36) Dikon nan tabata den e kondishon deplorabel ei? Pasobra e hendenan ku tabatin e responsabilidat di siña e pueblo e Lei di Dios tabata kruel, eksigente i hipókrita. En bes di kuida e miembronan di nan tou i yuda nan sirbi Dios, e lidernan spiritual ei di Israel a pone “karga pisá” riba nan skouder.—Mat. 23:4.

3. Segun ku ansianonan ta ehersé nan papel di wardadó spiritual, kiko nan mester kòrda?

³ E wardadónan di karné kristian djawe—e ansianonan—tin un responsabilidat serio. E karnénan ku nan ta kuida ta di Yehova i di Hesus, kende a yama su mes “e bon wardadó.” (Huan 10:11) Dios a kumpra e karnénan “pa un preis haltu,” esta, ku e “sanger presioso” di Hesus. (1 Kor. 6:20; 1 Ped. 1:18, 19) I Hesus ta stima e karnénan asina tantu ku el a sakrifiká su bida pa nan. Semper ansianonan mester kòrda ku nan ta bou  di supervishon di Hesukristu, “e gran wardadó di karné.” Pues, nan tin ku rindi kuenta i rason na dje pa e manera ku nan ta trata e tou.—Heb. 13:20.

4. Kiko e artíkulo akí lo konsiderá?

⁴ Kon wardadó kristian mester trata e karnénan? Beibel ta animá tur hende den kongregashon pa “obedesé esnan ku ta dirigí” nan. Di otro banda, e ansianonan ta haña e konseho pa nan no “manda riba esnan ku ta propiedat di Dios.” (Heb. 13:17; lesa 1 Pedro 5:2, 3.) Pues, kon ansiano por “dirigí” e tou sin “manda” riba e karnénan? Ku otro palabra, kon nan por atendé nesesidat di e karnénan sin bai mas ayá di e outoridat ku Dios a duna ansiano?

5. Kiko Isaías 40:11 ta siña nos di Yehova?

⁵ Profeta Isaías a bisa di Yehova: “Manera un wardadó di karné e lo kuida su tou, e lo kohe e lamchinan den su brasa, i tene nan serka di su kurason; ku ternura e lo guia esnan ku tin yu chikitu.” (Isa. 40:11) E versíkulo akí ta deskribí kon Yehova ta interesá den nesesidat di e rumannan ku ta suak òf ku tin mester di protekshon. Meskos ku un wardadó sa presis kiko ta nesesidat di kada karné den su tou i ta kla pa yuda nan, asina Yehova ta konsiente di e nesesidatnan di e rumannan den kongregashon i gustosamente ta sòru pa nan haña e kuido nesesario. Ademas, meskos ku un wardadó tin biaha ta karga un lamchi resien nasí den su brasa, asina Yehova, “e Tata di tierno miserikòrdia,” ta duna nos konsuelo i kuido spesial ora nos ta konfrontá un prueba grandi òf un periodo difísil.—2 Kor. 1:3, 4.

6. Kon un ansiano por imitá e ehèmpel di Yehova?

⁶ Esta un bunita lès un wardadó den kongregashon por siña for di nos Tata selestial! Meskos ku Yehova, e mester presta atenshon na nesesidat di e karnénan. Si un ansiano sa kiko ta e difikultatnan ku e karnénan ta pasa aden i kua nesesidat spesífiko mester di atenshon mesora, lo e ta den un mihó posishon pa sa ki ora i kon pa duna nan e animashon i apoyo ku nan mester. (Pro. 27:23) Ta bisto anto ku un ansiano mester tuma tempu pa papia ku e rumannan i skucha nan. Aunke e ta respetá e rumannan su privasidat, tòg e ta paga tinu na loke e ta mira i tende den kongregashon i, motivá pa amor, ta tuma tempu pa “yuda esnan ku ta suak.”—Echo. 20:35; 1 Tes. 4:11.

7. (a) Kon e wardadónan den tempu di Ezekiel i Yeremías a trata e karnénan di Dios? (b) Kiko ansianonan por siña for di e echo ku Yehova a rechasá wardadónan infiel?

⁷ Pensa un ratu riba e aktitut di e wardadónan ku Yehova a kondená den tempu di Ezekiel i Yeremías. Yehova a rechasá e wardadónan ei pasobra nan tabatin e tarea di kuida e karnénan pero no tabata hasi esei. Komo ku niun hende no tabata vigilá e tou, e karnénan a bira proi di bestia salbahe i a plama for di otro. Pió ainda, e wardadónan ei a probechá di e karnénan, i en bes di alimentá nan, nan “a alimentá nan mes.” (Eze. 34:7-10; Yer. 23:1) Pa e mesun motibunan ei Dios ta rechasá e lidernan di kristiandat. Ki lès importante ansianonan ta siña for di e echo ku Yehova a rechasá wardadónan infiel? Wèl, nan mester duna e tou di Yehova e debido atenshon i amor.

8. Kon ansianonan por imitá e bon ehèmpel di Hesus ora nan ta konsehá e rumannan?

⁸ Imperfekshon humano por pone ku algun karné di Dios no ta komprondé bon kiko Yehova ta ferwagt di nan. Kisas nan ta tuma desishonnan ku no ta kuadra ku  prinsipio bíbliko òf nan komportashon ta indiká ku ainda nan no ta kristiannan maduro. Kon ansianonan mester reakshoná riba esei? Ku pasenshi, meskos ku Hesus. Su disipelnan tabata diskutí tur ora bai entre nan ta ken lo ta esun di mas grandi den e Reino. Hesus no a pèrdè pasenshi ku nan, sino mas bien el a sigui siña nan i a duna nan konseho amoroso tokante humildat. (Luk. 9:46-48; 22:24-27) El a asta laba nan pia pa laga nan mira kiko ke men ser humilde. Awe, ansianonan tambe mester demostrá humildat.—Lesa Huan 13:12-15; 1 Ped. 2:21.

9. Ki aktitut Hesus a rekomendá su disipelnan pa nan tin?

⁹ Hesus su punto di bista di e papel di un wardadó spiritual tabata distinto for di loke Santiago ku Huan a pensa un tempu. E dos apòstelnan ei a pidi Hesus pa duna nan un puesto prominente den e Reino. Pero Hesus a korigí nan aktitut i a siña nan pensa otro. E di ku nan: “Boso sa ku gobernantenan ta dominá e hendenan di nan nashon i ku lidernan ta hunga bas riba nan. Esei no mester tuma lugá serka boso. Al kontrario, esun ku ke ta grandi meimei di boso mester sirbi e otronan.” (Mat. 20:25, 26, BPK) E apòstelnan mester a resistí e inklinashon di ke “manda riba” nan kompañeronan, òf di “hunga bas riba nan.”

10. Kon Hesus ke pa ansianonan trata e tou, i ki bon ehèmpel Pablo a pone den esaki?

¹⁰ Hesus ta ferwagt di ansianonan ku nan ta trata e tou manera é a trat’é. Nan mester ta dispuesto pa sirbi nan rumannan; no hunga doño riba nan. Apòstel Pablo tabatin e aktitut humilde ei, pasobra el a bisa e ansianonan di e kongregashon na Efeso: “Boso mes sa kon mi a komportá mi meimei di boso for di e promé dia ku mi a pone pia na Asia. Mi a sirbi manera esklabo pa Señor ku gran humildat.” E apòstel tabata ke pa e ansianonan ei yuda e rumannan ku sinseridat i humildat. El a bisa nan: “Mi a mustra boso den tur kos ku pa medio di trabou duru boso mester yuda esnan ku ta suak.” (Echo. 20:18, 19, 35) Pablo a bisa e rumannan di Korinto ku e no tabata doño di nan fe. Al kontrario, e tabata un humilde sirbidó di Dios meskos ku nan, i e kier a yuda nan sirbi Dios ku goso. (2 Kor. 1:24) Pues, Pablo ta un bon ehèmpel pa ansianonan djawe. E tabata un persona humilde ku a traha duru pa otronan.

11, 12. Kon un ansiano lo por yuda un ruman tuma un desishon?

¹¹ Un ansiano di kongregashon mester “tene firmemente na e palabra fiel pa loke ta su arte di siña.” (Tito 1:9) Ma e tin ku hasi esei “ku suavedat.” (Gal. 6:1) En bes di obligá e rumannan pa hasi algu na un sierto manera, un bon wardadó ta purba di yuda nan tuma nan mes desishon a base di nan amor pa Yehova i pa su Palabra. Por ehèmpel, si un ruman hòmber tin ku tuma un desishon importante, un ansiano por yud’é dor di konsiderá kuné algun prinsipio bíbliko. Kisas e por repasá un artíkulo kuné ku a sali den nos publikashonnan tokante e tópiko ei. Tambe lo e por animá e ruman pa pensa riba diferente opshon ku tin i e manera ku kada un lo por afektá su relashon ku Yehova. Kaba, e ansiano por kòrda e ruman riba e importansia di pidi Dios su guia den orashon promé ku e tuma un desishon. (Pro. 3:5, 6) Despues di a konsiderá tur e asuntunan ei ku e ruman, e ansiano lo lag’é tuma su propio desishon.—Rom. 14:1-4.

¹² E úniko base ku ansianonan tin pa duna instrukshon ta for di e Skritura. P’esei ta masha importante pa nan usa Beibel  bon i pega na loke e ta bisa. Si ansianonan hasi asina, esei ta yuda nan evitá kualke posibel abusu di poder. Al fin i al kabo, e karnénan no ta di nan, i kada ruman den kongregashon tin ku duna kuenta i rason na Yehova ku Hesus pa e desishonnan ku nan tuma.—Gal. 6:5, 7, 8.

13, 14. Menshoná algun manera ku un ansiano mester ta un ehèmpel pa e tou.

¹³ Despues ku apòstel Pedro a konsehá e ansianonan pa no ‘aktua komo si fuera nan ta doño di e karnénan ku nan tin responsabilidat p’e,’ el a animá nan pa nan “bira ehèmpel pa e tou.” (1 Ped. 5:3; BPK) Kon un ansiano por ta un ehèmpel pa e tou? Laga nos konsiderá dos kualidat ku un ruman hòmber mester tin pa por sirbi komo ansiano. Di promé, e mester ta “di sano huisio.” Esaki ta nifiká ku e tin un bon komprondementu di prinsipionan bíbliko i sa kon pa usa nan den su bida. E ta keda kalmu den situashonnan difísil i ta pensa bon promé ku e tuma desishon. Di dos, e mester “dirigí su kas na un manera ekselente.” Esaki ke men ku si un ansiano tin un famia, e mester ta un bon ehèmpel komo esposo i tata, pasobra “si un hòmber no sa kon pa dirigí su mes kas, kon lo e por kuida e kongregashon di Dios?” (1 Tim. 3:1, 2, 4, 5) E rumannan den kongregashon ta sinti ku nan por konfia e ansianonan ku tin e kualidatnan akí.

¹⁴ Un otro tereno kaminda ansianonan ta pone un bon ehèmpel pa nan rumannan kristian ta ora nan ta sali den sirbishi di vèlt i tambe dirigí e aktividatnan di sirbishi. Hesus tabata un ehèmpel pa e ansianonan den esaki. Un parti importante di su aktividat riba tera tabata e predikashon di e bon notisia di Reino. El a mustra su disipelnan kon mester a hasi e trabou akí. (Mar. 1:38; Luk. 8:1) Den nos tempu, ta un gran animashon pa e publikadónan ora nan por prediká huntu ku e ansianonan. Nan ta mira e ansianonan su entusiasmo pa e trabou importante akí i ta siña for di nan manera di siña hende. Ora e rumannan ta mira ku e ansianonan ta usa nan tempu i energia regularmente pa prediká e bon notisia apesar ku nan ta hopi drùk, esei ta motivá henter e kongregashon pa demostrá e mesun entusiasmo pa e trabou di prediká. Ademas, ansianonan por ta un bon ehèmpel pa nan rumannan ora nan ta prepará pa e reunionnan i duna komentario i tambe ta yuda ku limpiesa i mantenshon di Salòn di Reino.—Efe. 5:15, 16; lesa Hebreonan 13:7.

15. Dikon ansianonan ta hasi bishita di pastoreo?

¹⁵ Un bon wardadó ta kla pa yuda un karné ku ta malu òf heridá. Asina tambe e ansianonan mester ta kla pa yuda e rumannan ku ta sufriendo òf ku mester di konseho òf animashon. Kisas e rumannan  di edat i esnan enfermo tin mester di yudansa ku nan nesesidatnan físiko, pero loke mas nan tin mester di dje ta yudansa spiritual, esta, animashon i konsuelo for di e Skritura. (1 Tes. 5:14) Hóbennan den e kongregashon kisas tin ku lucha kontra “di e deseonan di hubentut.” (2 Tim. 2:22) E ansianonan ta yuda tur ruman den kongregashon dor di hasi bishita di pastoreo. Esaki ta enserá ku e ansianonan ta bishitá nan periódikamente pa purba di komprondé kiko ta e difikultatnan ku e rumannan ta konfrontá i pa animá nan ku konseho bíbliko apropiá. Ora ansianonan ta kla pa duna nan rumannan e yudansa ku nan tin mester, nan por resolvé hopi problema promé ku esakinan bira grave.

16. Kiko e ansianonan por hasi ora un ruman den kongregashon tin un problema serio?

¹⁶ Kiko si un ruman den kongregashon tin un problema asina serio ku su relashon ku Yehova ta na peliger? E disipel Santiago a skirbi: “Tin un hende den boso ku ta malu? Lag’é manda yama e ansianonan di kongregashon, i laga nan hasi orashon p’e i hunt’é ku zeta den nòmber di Yehova. I e orashon hasí ku fe lo kura esun ku ta malu, i Yehova lo lant’é. Ademas, si el a kometé piká, lo e ser pordoná.” (Sant. 5:14, 15) Asta ora e ruman ku ta spiritualmente “malu” no “manda yama e ansianonan,” nan mester trata di yud’é asina ku nan haña sa di su situashon. Ora e ansianonan ta hasi orashon ku nan rumannan—i pa nan—i ta apoyá nan durante tempu difísil, nan ta demostrá ku nan ta bon wardadó ku ta animá nan rumannan pa sigui sirbi Dios ku goso.—Lesa Isaías 32:1, 2.

17. Ora ansianonan ta imitá “e gran wardadó di karné,” kon e kongregashon ta benefisiá?

¹⁷ Den tur loke ansianonan kristian ta hasi den Yehova su organisashon, nan ta traha duru pa imitá “e gran wardadó di karné,” Hesukristu. E tou ta benefisiá mashá di e yudansa di e rumannan responsabel akí i ta sigui bira mas fuerte. Tur esaki ta yena nos ku gratitut i ta motivá nos pa alabá nos Wardador inkomparabel, Yehova.