Bo a tuma tempu pa lesa e último edishonnan di E Toren di Vigilansia? Wèl, wak si bo por kontestá e siguiente preguntanan:

Na ki tempu Hesus “a prediká na e spiritunan den prizòn”? (1 Ped. 3:19)

Aparentemente, un poko tempu despues ku Hesus a ser resusitá, el a anunsiá na e spiritunan malbado ku nan lo haña nan kastigu meresí.—15/6, página 23.

Kua ta tres difikultat ku bo tin ku vense pa bo por tin éksito den bo di dos matrimonio?

Di promé: No laga bo promé matrimonio afektá esun aktual. Di dos: Sa kon pa anda ku amigunan di ántes ku no sa bon kon pa trata bo kasá nobo. Di tres: Siña konfia bo partner nobo den kaso ku esun promé no tabata fiel.—1/7, página 9-10.

Na ki tempu Hesus lo husga hende komo karné òf kabritu? (Mat. 25:32)

Lo e hasi esei ora e bini pa husga hende durante e tribulashon grandi, despues ku tur religion falsu ser destruí.—15/7, página 6.

Na ki tempu hende malbado menshoná den e komparashon di trigu i mal yerba lo yora i morde riba djente? (Mat. 13:36, 41, 42)

Esei lo ta durante e tribulashon grandi, ora nan realisá ku nan lo no skapa destrukshon.—15/7, página 13.

Na ki tempu loke Hesus a bisa tokante e esklabo fiel i prudente a kumpli? (Mat. 24:45-47)

Loke el a bisa no a kuminsá kumpli na Pentekòste di aña 33, sino despues di 1914. Na aña 1919, Hesus a nombra e esklabo riba su sirbidónan di kas, i esaki ta inkluí tur kristian ku ta ser alimentá den sentido spiritual.—15/7, página 21-23.

Na ki tempu Hesus ta nombra su esklabo fiel riba tur su pertenensianan?

Esei lo ta den futuro, durante e tribulashon grandi, ora e esklabo fiel risibí nan rekompensa di bida den shelu.—15/7, página 25.

Akaso e personanan ku Beibel no ta menshoná nan nòmber tabata mal hende òf no tabata importante?

Nos no mester konkluí esei. Tin tantu bon hende komo mal hende ku Beibel no ta menshoná nan nòmber. (Rut 4:1-3; Mat. 26:18) Den kaso di e angelnan, Beibel ta duna nos e nòmber di solamente dos angel fiel.—1/8, página 10.

Aparte di “e poder ku ta bini di Dios,” kiko mas a yuda 230 Testigu sobrebibí e marcha largu for di kampo di konsentrashon di Sachsenhausen?

Nan tabata animá otro konstantemente pa sigui padilanti, apesar ku nan tabata suak pa motibu di hamber i malesa.—15/8, página 18.

Dikon e relato ku ta konta kon e nashon di Israel a krusa Riu Hordan pa drenta e Tera Primintí ta un gran animashon pa nos?

Apesar ku nivel di e awa tabata haltu i e riu tabata kore masha duru, Yehova a stòp e awa di kore pa asina su pueblo por a krusa. Esei sigur a fortalesé nan fe i konfiansa den Yehova, i e relato ei por ta masha alentador pa nos tambe.—15/9, página 16.

Kiko e echo ku Beibel frekuentemente ta hasi menshon di koló ta indiká?

Esei ta mustra ku Dios sa ku koló por tin efekto riba nos emoshonnan i tambe por yuda nos kòrda kos.—1/10, página 14-15.

Kon e profesia di Mikéas 5:5 tokante ‘wardadó di karné i lider’ ta kumpli awe?

Nos ta komprondé ku e ‘shete wardadó di karné i ocho lider’ ta representá e ansianonan nombrá den kongregashon. Nan ta esnan ku ta fortalesiendo e pueblo di Dios pa e binidero atake profetisá kontra nan.—15/11, página 20.

Kua ta algun motibu pakiko nos mester di Dios?

Nos tin mester di bon guia, instrukshon i tambe kontesta riba e preguntanan tokante problemanan di bida. Dios ta ofresé nos ámbos kos. Ademas, e ta duna e yudansa nesesario pa nos por biba bon i felis, i pa logra esaki lo e kumpli ku e promesanan ku tin den su Palabra.—1/12, página 4-6.