1, 2. Kiko e apòstelnan lo a pensa promé ku Hesus su último biahe pa Herúsalèm?

E GUARDIANAN na Herúsalèm a mira e promé rant di luna nobo. Asina ku nan a informá Sanedrin di esaki, Sanedrin a anunsiá ku un luna nobo a kuminsá: luna di nisan. Nan a usa sea señal di kandela òf mensahero pa plama e notisia ei. E apòstelnan tabata sa ku e tempu pa selebrá nan Pasku tabata yega serka. Nan lo mester a realisá ku Hesus lo kier a kue rumbo pa Herúsalèm pa e por a yega promé ku e selebrashon.

² E tempu ei Hesus ku su apòstelnan tabata na Perea (na e otro banda di Riu Hordan) riba su último biahe pa Herúsalèm. (Mat. 19:1; 20:17, 29; Mar. 10:1, 32, 46) Unabes ku e hudiunan tabata sa ki dia tabata e promé dia di luna di nisan, nan lo a warda 13 dia mas pa selebrá e Pasku, riba 14 di nisan, despues ku solo baha.

3. Dikon kristiannan ta interesá den e fecha di e Pasku Hudiu?

³ E fecha di e Sena di Señor—ku ta korespondé ku e fecha di e Pasku Hudiu—lo ta despues ku solo baha dia 14 di aprel 2014. Esei lo ta un dia spesial pa kristiannan berdadero i personanan interesá. Dikon? Debí na loke nos ta lesa na 1 Korintionan 11:23-25: “Riba e anochi ku nan lo a traishoná Señor Hesus, el a kue un pan i despues di gradisí Dios, el a kibr’é i a bisa: ‘Esaki ta representá mi kurpa ku ta ser duná pa boso. Sigui hasi esaki na mi memoria.’ El a hasi meskos ku e kopa.”

4. (a) Ki pregunta asina lo bo por hasi bo mes tokante e Memorial? (b) Kon e fecha di Memorial ta ser determiná kada aña? (Wak e kuadro  “Memorial 2014.”)

⁴ Sin duda lo bo ta presente na e úniko evento ku Hesus a bisa su siguidónan ku nan mester konmemorá tur aña. Promé ku e dia ei, puntra bo mes: ‘Kon mi mester prepará pa e anochi ei? Kiko ta e kosnan òf símbolonan ku lo bai usa na e okashon ei? Ki prosedura lo sigui na e reunion ei? Dikon e Memorial (Konmemorashon) i e símbolonan ku lo bai usa ta importante pa mi?’

5. Kiko Hesus a bisa e apòstelnan hasi pa prepará pa su último Pasku ku nan?

⁵ Ora Hesus a bisa e apòstelnan pa prepará un kamber pa tene e sena di Pasku, e no a papia nada tokante dekorashon. Probablemente lo e tabata ke djis un kuarto simpel, limpi i ku sufisiente lugá pa e ku su apòstelnan. (Lesa Marko 14:12-16.) Tambe nan lo mester a prepará e kosnan nesesario pa e sena, inkluso pan sin zürdeg i biña kòrá. Despues di e sena di Pasku, Hesus a konsentrá riba e dos kosnan ei, e pan ku e biña.

6. (a) Despues di e sena di Pasku, kiko Hesus a bisa di e pan? (b) Ki tipo di pan ta usa na Memorial?

⁶ Apòstel Mateo tabata presente na e okashon ei, i despues el a skirbi: “Hesus a kue un pan, i despues di hasi un orashon, el a kibr’é, duna su disipelnan i bisa nan: ‘Tuma, kome.’” (Mat. 26:26) E “pan” tabata pan sin zürdeg, e mesun pan ku a usa pa e selebrashon di Pasku. (Éks. 12:8; Deu. 16:3) Nan a traha e pan di hariña di trigu ku awa, sin agregá nada di zürdeg (òf, yist). Nan no a sason’é tampoko, por ehèmpel, ku salu. Komo ku e pan no tabatin zürdeg, e no a reis. E tabata simpel i bròs manera buskuchi soda, fásil pa kibra na pida pida. Awe, promé ku Memorial, e ansianonan por pidi un ruman traha e tipo di pan ei. E mester trah’é di hariña (preferiblemente hariña di trigu integral) ku awa i hòrn’é den fòrnu òf prepar’é riba un plancha huntá ku poko zeta. (Kaminda no por haña hariña di trigu, por usa hariña di aros, di puspas, di funchi òf di maishi chikí.) Por usa tambe e buskuchi hudiu matzo, pero e mester ta esun sin ingrediente adishonal, manera malta, webu òf siboyo.

7. Ki tipo di biña tabatin den e kopa ku Hesus a usa, i ki sorto di biña nos por usa awe na Memorial?

⁷ Mateo a sigui konta: “[Hesus] a kue un kopa, i despues di gradisí Dios, el a pas’é pa nan, bisando: ‘Boso tur bebe for di dje.’” (Mat. 26:27, 28) Den e kopa ku Hesus a kue tabatin biña kòrá. (Lo e no tabata djus fresku di wendrùif ya ku e kosecha di wendrùif  a tuma lugá basta dia promé.) Biña no tabata parti di e promé sena di Pasku na Egipto. Pero Hesus no a bisa ku tabata malu pa beb’é na e selebrashon di Pasku. Al kontrario, el a usa un poko di e biña durante e Sena di Señor. Pues, awe kristiannan tambe ta usa biña na Memorial. E biña ku nos ta usa no mester tin nada agregá na dje, manera brèndi òf speserei, ya ku no tabatin nodi di agregá nada na e sanger di Hesus pa hasié mas balioso. Mester usa biña kòrá puru, sea biña trahá na kas òf biña komersial, manera biña tipo Beaujolais, Burgundy òf Chianti.

8. Dikon kristiannan ta interesá den loke e pan ku e biña ta representá?

⁸ Apòstel Pablo a indiká bon kla ku no ta e apòstelnan so mester a selebrá e Sena di Señor sino otro kristiannan tambe. El a skirbi lo siguiente na e rumannan di Korinto: “Loke mi a risibí di Señor, mi a siña boso, esta, ku riba e anochi ku nan lo a traishoná Señor Hesus, el a kue un pan i despues di gradisí Dios, el a kibr’é i a bisa: ‘Esaki ta representá mi kurpa ku ta ser duná pa boso. Sigui hasi esaki na mi memoria.’” (1 Kor. 11:23, 24) Ta p’esei te awe kristiannan ta konmemorá e evento spesial akí tur aña i ta interesá den loke e pan ku e biña ta representá.

9. Ki punto di bista robes algun hende tin di e pan ku Hesus a usa?

⁹ Tin hende religioso, influensiá pa nan tradukshon di Beibel, ta indiká ku Hesus a bisa literalmente: ‘Esaki ta mi kurpa.’ Pues, nan ta kere ku e pan milagrosamente a bira e kurpa òf karni di Hesus. Ma esaki no ta kuadra ku echo. * Tantu e kurpa di Hesus komo e pan sin zürdeg ku nan tabata bai kome tabata dilanti di e apòstelnan fiel. Ta bisto ku Hesus tabata papia den sentido simbóliko, manera el a hasi na hopi  otro okashon.—Huan 2:19-21; 4:13, 14; 10:7; 15:1.

10. Kiko e pan ku ta usa na e Sena di Señor ta representá?

¹⁰ E pan ku e apòstelnan por a mira i ku nan tabata a punto di bai kome a representá e kurpa di Hesus. Kua kurpa? Un tempu, e sirbidónan di Dios a kere ku e pan a representá e kongregashon di kristiannan ungí, ku Beibel ta yama “e kurpa di Kristu.” Nan tabata kere esaki pasobra Hesus a kibra e pan pero ni ún di su mes wesunan no a ser kibrá. (Efe. 4:12; Rom. 12:4, 5; 1 Kor. 10:16, 17; 12:27) Pero despues di mas investigashon, nan a bin komprondé ku tantu e Skritura komo rasonamentu lógiko ta indiká ku e pan ta representá e kurpa humano di Hesus ku a ser prepará p’e. Hesus “a sufri den karni” i asta a ser klabá na staka. Pues, e pan na e Sena di Señor ta representá e kurpa físiko di Hesus ku “a karga nos pikánan.”—1 Ped. 2:21-24; 4:1; Huan 19:33-36; Heb. 10:5-7.

11, 12. (a) Kiko Hesus a bisa tokante e biña? (b) Kiko e biña ku ta usa na e Sena di Señor ta representá?

¹¹ Awor ku nos sa kiko e pan ta representá, nos por komprondé mihó kiko Hesus a bisa tokante e biña. Nos ta lesa: “El a hasi meskos ku e kopa tambe despues di e sena, bisando: ‘E kopa akí ta representá e pakto nobo a base di mi sanger.’” (1 Kor. 11:25) Hopi Beibel ta bisa meskos ku Beibel Santu: “E kopa akí ta e aliansa nobo den mi sanger.” Ta e kopa ku Hesus tabatin den su man tabata e pakto, òf aliansa, nobo? Nò. E “kopa” a referí na loke tabatin den dje, esta, e biña. Segun Hesus, kiko e biña a representá? E sanger ku lo el a drama.

¹² Den e Evangelio di Marko, nos ta lesa ku Hesus a bisa: “Esaki ta representá mi ‘sanger di e pakto,’ ku lo mi drama pa hopi hende.” (Mar. 14:24) I den Mateo, nos ta lesa ku Hesus lo a drama su sanger “pa pordon di piká di hopi hende.” (Mat. 26:28) Pues, e biña kòrá ta un bon representashon di Hesus su sanger literal. Su sanger a perkurá e reskate di manera ku nos por “haña pordon di nos faltanan.”—Lesa Efesionan 1:7.

13. Deskribí kon nos ta tene e Konmemorashon anual di e morto di Kristu.

¹³ Si ta pa promé biaha bo ta bai asistí na e Memorial huntu ku Testigunan di Yehova, kiko bo por spera? E reunion lo ta na un lugá simpel i limpi, kaminda tur hende por disfrutá kómodamente di e okashon. Por tin algun areglo floral simpel, pero lo bo no mira dekorashon buyá ni un ambiente di fiesta. Na un manera digno, un ansiano kualifiká lo duna un diskurso ku ta splika bon kla kiko Beibel ta bisa di e Sena di Señor. Lo e yuda tur presente komprondé kiko Kristu a hasi pa nos: El a muri komo un reskate pa nos por haña bida.—Lesa Romanonan 5:8-10.

14. Ki dos speransa e oradó lo papia di dje durante e diskurso di Memorial?

¹⁴ E oradó lo splika tambe ku Beibel ta papia di dos speransa distinto pa kristiannan. Un speransa ta di reina huntu ku Kristu den shelu. Ta un kantidat relativamente chikí di siguidó di Kristu, manera su apòstelnan fiel, tin e speransa akí. (Luk. 12:32; 22:19, 20; Rev. 14:1) E otro speransa ta loke mayoria di kristian fiel tin. Esei ta e speransa di biba pa semper riba e tera transformá den un paradeis. E tempu ei por fin e boluntat di Dios lo sosodé na tera meskos ku den shelu, algu ku kristiannan semper a pidi p’e den orashon. (Mat. 6:10) E Skritura ta deskribí e bida maravioso ku nan lo disfrutá di dje pa semper.—Isa. 11:6-9; 35:5, 6; 65:21-23.

15, 16. Kiko ta hasi ku e pan na Memorial?

 ¹⁵ Despues di splika e dos speransanan ei, e oradó lo bisa ku e momento a yega pa kumpli ku loke Hesus a bisa su apòstelnan hasi. Lo tin pan sin zürdeg i biña kòrá riba un mesa banda di e oradó. Lo e lesa un relato di Beibel ku ta deskribí loke Hesus a bisa i hasi ora el a introdusí e evento. Por ehèmpel, den e relato di Mateo nos ta lesa: “Hesus a kue un pan, i despues di hasi un orashon, el a kibr’é, duna su disipelnan i bisa nan: ‘Tuma, kome. Esaki ta representá mi kurpa.’” (Mat. 26:26) Hesus a kibra e pan sin zürdeg pa e por a duna un pida na e apòstelnan ku tabata na kada banda di dje. Na e Memorial di 14 di aprel, lo bo mira algun pida pan sin zürdeg den skalchi.

¹⁶ Promé ku pasa e skalchinan, un ruman hòmber lo hasi un orashon kòrtiku. Lo tin sufisiente skalchi pa asina por pasa e pan rònt pa tur hende den un tempu kòrtiku i na un manera ordená. Lo no tin ningun seremonia spesial pa pasa e skalchi i ta hasié na un manera ku ta práktiko pa e lugá kaminda ta tene e reunion. Masha poko hende (òf kisas ningun mes) lo kome di e pan, manera tabata e kaso den mayoria di kongregashon durante e Memorial di 2013.

17. Kon nos ta sigui e instrukshon di Hesus tokante e biña na Memorial?

¹⁷ Kaba e oradó lo enfoká riba loke Mateo a sigui deskribí: “[Hesus] a kue un kopa, i despues di gradisí Dios, el a pas’é pa nan, bisando: ‘Boso tur bebe for di dje, pasobra esaki ta representá mi “sanger di e pakto,” ku lo mi drama pa pordon di piká di hopi hende.’” (Mat. 26:27, 28) Siguiendo e patronchi ei, lo hasi un orashon mas i despues ta pasa e biña entre tur presente.

18. Si ta masha poko hende òf kisas ningun mes ta kome di e pan i bebe di e biña, dikon ta importante tòg pa nos t’ei na e Memorial?

¹⁸ Hesus a indiká ku ta solamente esnan ku lo reina huntu kuné den e Reino selestial mester kome di e pan i bebe di e biña. Pues, mayoria di hende presente ta djis pasa e pan ku e biña pa e persona sintá banda di nan. (Lesa Lukas 22:28-30; 2 Tim. 4:18) Aunke mayoria di kristian no ta kome di e pan ni bebe di e biña, ta importante tòg pa nan t’ei na e Memorial. Dikon? Pasobra nan presensia ta indiká kuantu apresio nan tin pa e sakrifisio di Hesus. Durante e konmemorashon, nan por pensa riba tur e bendishonnan ku nan por haña a base di e sakrifisio di reskate di Hesus. Por ehèmpel, nan tin e speransa di ta entre e “multitut grandi” ku lo sobrebibí e binidero “tribulashon grandi.” Debí na nan fe den e sakrifisio di Hesus, nan lo ta hustu den bista di Dios, komo si fuera “nan a laba nan pañanan largu i a hasi nan blanku den sanger di e Lamchi.”—Rev. 7:9, 14-17.

19. Kiko bo por hasi pa prepará pa Memorial i benefisiá di dje?

¹⁹ Testigunan di Yehova rònt mundu ta prepará pa e reunion spesial akí. Kon? Wèl, vários siman promé, nos lo invitá mas tantu hende posibel pa asistí na e Konmemorashon. Den e dianan promé ku Memorial, mayoria di nos lo lesa e relatonan di Beibel ku ta deskribí loke Hesus a hasi i loke a pasa riba e fechanan korespondiente na aña 33. Tambe nos lo a regla nos asuntunan personal pa nos por tin sigur ku nos ta presente e dia ei. Nos ta hasi nos bèst pa yega e reunion basta promé ku e kantika i orashon di apertura, ya asina nos por yama e bishitantenan bonbiní i disfrutá di henter e programa. Nos tur, tantu miembro di kongregashon komo bishitante, lo benefisiá si nos sigui e oradó den nos Beibel segun ku e ta lesa i splika e tekstonan. Es mas, nos presensia na Memorial lo demostrá ku nos tin apresio profundo pa e sakrifisio di Hesus i ku nos ta obedesé e mandamentu ku el a duna: “Sigui hasi esaki na mi memoria.”—1 Kor. 11:24.