1, 2. Dikon tin asina tantu engaño awe, i den ki forma esaki ta bini padilanti? (Wak e promé plachi.)

ENGAÑO i mentira ta masha normal den e mundu ku nos ta biba awe. I esaki no mester sorprendé nos pasobra Beibel ta mustra bon kla ku Satanas e Diabel, kende ta gobernante di e mundu akí, ta eksperto den gañamentu. (1 Tim. 2:14; 1 Huan 5:19) Mas serka e fin di e mundu malbado akí yega, mas furioso Satanas ta bira pasobra e sa ku “a ked’é masha poko tempu.” (Rev. 12:12) P’esei, nos por ferwagt ku e personanan ku ta bou di influensia di Satanas ta sigui bini ku mas mentira pa purba di gaña spesialmente e sirbidónan di Yehova.

² Tin biaha, medionan di komunikashon ta publiká mitar bèrdat òf mentiranan flagrante tokante Yehova su sirbidónan i nan kreensianan. Sí, hende sa usa korant, programa di televishon i Internet pa plama mentira. I algun hende ku ta kore kere e mentiranan akí sin hasi sigur ku nan ta bèrdat ta keda konfundí òf asta ta rabia.

3. Kiko por yuda nos kontrarestá engaño?

³ Nos ta masha kontentu ku nos tin e Palabra di Dios, ku ta probechoso pa “rektifiká kosnan”; e ta yuda nos kontrarestá e mentiranan di nos enemigu Satanas. (2 Tim. 3:16, nota) For di e palabranan ku apòstel Pablo a skirbi na e kristiannan na Tesalónika, nos por komprondé ku algun di nan a ser engañá. El a urgi nan pa “no pèrdè kabes muchu lihé,” òf manera Beibel na papiamentu koriente ta bisa, pa nan ‘no laga nada kita nan lihé fo’i skel.’ (2 Tes. 2:1, 2) Awor, ki lès nos por saka for di Pablo su spièrtamentu amoroso, i kon nos por apliká esakinan den nos bida?

4. Ki spièrtamentu relashoná ku “e dia di Yehova” Pablo a duna e kristiannan na Tesalónika, i kon nos ta ser spièrtá awe?

⁴ Den Pablo su promé karta na e kongregashon di  Tesalónika, el a hala atenshon na e binida di “e dia di Yehova.” E no tabata ke pa su rumannan ta mal prepará pa e dia ei ni konfundí. P’esei, el a urgi nan pa komo ‘yunan di lus,’ nan ‘keda lantá i mantené nan sano huisio.’ (Lesa 1 Tesalonisensenan 5:1-6.) Awe nos ta spera riba e destrukshon di Babilonia e Grandi, e imperio mundial di religion falsu. Esaki lo ta komienso di e gran dia di Yehova. Nos ta kontentu ku nos sa kon Yehova ta bai kumpli ku su propósito. Ademas, mediante e kongregashon kristian, regularmente nos ta haña rekordatorionan oportuno ku ta yuda nos mantené nos sano huisio. Si nos ta hasi kaso di e spièrtamentunan akí, esaki por yuda fortalesé nos determinashon pa rindi ‘sirbishi sagrado na Dios ku nos kapasidat di pensa.’—Rom. 12:1.

5, 6. (a) Kiko Pablo a splika den su di dos karta na e Tesalonisensenan? (b) Kiko Dios lo hasi pronto mediante Hesus, i kiko nos mester puntra nos mes?

⁵ Djis despues ku Pablo a manda su promé karta pa e kristiannan na Tesalónika, el a manda su di dos karta. Den esaki el a hala atenshon na e binidero tribulashon ora ku Señor Hesus lo ehekutá e huisio di Dios riba “esnan ku no konosé Dios i riba esnan ku no ta obedesé e bon notisia.” (2 Tes. 1:6-8) Loke awe ta kapítulo 2 di e karta akí ta mustra ku ora algun hende den e kongregashon ei a tende ku e binida di e dia di Yehova tabata masha serka, nan a haña miedu i a keda perturbá. (Lesa 2 Tesalonisensenan 2:1, 2.) E kristiannan di promé siglo no tabatin pleno komprondementu di e manera ku Yehova lo kumpli ku su propósito. I Pablo a atmití esaki ora el a skirbi: “Nos tin konosementu parsial i nos ta profetisá parsialmente; pero ora loke ta kompleto yega, loke ta parsial lo yega na su fin.” (1 Kor. 13:9, 10) No opstante, e spièrtamentunan ku Pablo, apòstel Pedro i otro fiel ruman hòmbernan ungí di e tempu ei a skirbi bou di inspirashon a yuda e kristiannan keda ku un fe firme.

⁶ Por ehèmpel, pa korigí loke e kristiannan tabata pensa, Yehova a inspirá Pablo pa splika ku apostasia na gran eskala i “e hòmber di maldat” mester a bini promé ku e dia di Yehova. * Despues di esei, na  Yehova su debido tempu, Señor Hesus lo kaba ku “e hòmber di maldat” i tur esnan ku esaki a gaña. Apòstel Pablo a mustra ku nan lo haña e kastigu akí pasobra “nan no a aseptá pa stima e bèrdat.” (2 Tes. 2:3, 8-10) P’esei, ta bon pa nos puntra nos mes: ‘Kuantu ami ta stima e bèrdat? Mi ta al dia ku nos komprondementu bíbliko? Mi ta lesa i studia e revista akí i tur otro publikashon basá riba Beibel ku e esklabo fiel ta perkurá pa e pueblo di Dios mundialmente?’

7, 8. (a) Ki peliger e promé kristiannan a konfrontá? (b) Kiko spesialmente ta un peliger pa berdadero kristiannan awe?

⁷ Nos tin ku atmití ku no ta e apóstatanan i nan siñansanan so ta forma un peliger pa kristiannan. Den un karta na Timoteo, Pablo a skirbi ku “amor pa plaka ta rais di tur sorto di kos perhudisial” i ku “algun hende ku a kai pa e amor akí a desviá for di fe i a kousa nan mes hopi doló.” (1 Tim. 6:10) Un otro peliger ku konstantemente ta menasá kristiannan ta “e obranan di karni.”—Gal. 5:19-21.

⁸ Pero apòstel Pablo a spièrta e kristiannan na Tesalónika enfátikamente pa e peliger di e hòmbernan ku, den un otro karta, el a yama “apòstelnan falsu.” Sí, entre e kristiannan na Tesalónika tabatin hòmbernan ku tabata “trose e bèrdat pa pone e disipelnan bai nan tras.” (2 Kor. 11:4, 13; Echo. 20:30) Mas despues, Hesus a elogiá e kongregashon na Efeso pasobra nan no a “tolerá mal hende.” Nan a pone e tipo di hendenan ei “na prueba” i a haña sa ku nan ta apòstel falsu i mentiroso. (Rev. 2:2) Den su di dos karta na e Tesalonisensenan, Pablo a duna e siguiente konseho: “Nos ta duna boso instrukshon, rumannan, den nòmber di nos Señor Hesukristu, pa boso kita pia for di tur ruman ku ta hiba un bida desordená.” Kaba, el a menshoná spesífikamente kristiannan ku “no ke traha.” (2 Tes. 3:6, 10) Si for di un hende ku no kier a traha mes nan tabatin ku kita pia, kuantu mas esei lo mester tabata e kaso ku hende ku kuminsá komportá nan mes manera apóstata? Sí, asosiashon estrecho ku hende asina tabata masha peligroso den e tempu ei i e kristiannan no mester a anda ku personanan asina. Esei ta konta pa nos awe tambe.—Pro. 13:20.

9. Dikon nos mester tene kuidou ora un persona kuminsá spekulá òf kritiká otro sirbidó di Yehova?

⁹ E tribulashon grandi i e fin di e mundu malbado akí ta masha serka. Pues, e spièrtamentunan ku e kristiannan a risibí for di Yehova den promé siglo ta asta mas importante awe. I nos no ke “aseptá Dios su bondat inmeresí i keda sin kumpli ku su propósito.” Esei por pone nos pèrdè e oportunidat di biba pa semper, sea den shelu òf riba tera. (2 Kor. 6:1) P’esei, nos mester tene kuidou ora un persona ku ta asistí na nos reunionnan kuminsá spekulá riba kosnan ku Beibel no ta splika òf kritiká otronan ku ta sirbi Yehova.—2 Tes. 3:13-15.

10. Na ki siñansanan Pablo a urgi e kristiannan na Tesalónika pa pega?

¹⁰ Pablo a urgi su rumannan na Tesalónika pa “para firme” i pega na loke nan a siña. (Lesa 2 Tesalonisensenan 2:15; wak nota.) Na kua siñansanan, òf “tradishonnan,” Pablo a manda nan pega? Eseinan sigur no tabata loke religion falsu tabata siña hende komo e bèrdat di Beibel. Mas bien, Pablo tabata referí na e siñansanan  di Hesus i loke Dios a inspirá é i otronan pa skirbi i siña hende. Hopi di e siñansanan akí a bira parti di e Skritura. Pablo a elogiá su rumannan den e kongregashon na Korinto, pasobra nan ‘a kòrda riba dje den tur kos i a tene duru na e tradishonnan, manera el a pasa esakinan pa nan.’ (1 Kor. 11:2) Komo ku e siñansanan akí a bini di Yehova i di su Yu, hende por a pone konfiansa den nan.

11. Kon engaño por afektá un persona?

¹¹ Ora Pablo a skirbi su karta na e Hebreonan, el a hala atenshon na dos manera ku un kristian por pèrdè su fe i stòp di para firme. (Lesa Hebreonan 2:1; 3:12.) El a usa e verbonan “drif bai” i “alehá for di.” Un boto por drif bai for di kantu sin ku hende ta ripará esei na promé instante. I tiki tiki, e por drif bai mas i mas leu. Di otro banda, un hende mes por pusha su boto for di kantu. Tur e dos situashonnan akí ta ilustrá loke por pasa ora un persona permití su mes ser engañá i laga su konfiansa den e bèrdat mengua.

12. Kiko ta e kosnan ku por afektá nos relashon ku Yehova awe?

¹² Kisas algun di e kristiannan na Tesalónika a permití otronan gaña nan. I kiko di nos awe? Tin masha hopi kos ku por kita nos tempu. Pensa riba e kantidat di tempu ku hende ta gasta pa mantené kontakto ku amigunan via retnan sosial, pa lesa i kontestá mensahe via medionan elektróniko, praktiká un hòbi i pa keda al dia ku resultadonan di deporte. Tur e aktividatnan akí por distraí un kristian i mengua su zelo. Anto kiko por ta e resultado? Su orashonnan sinsero ta mengua, e ta dediká ménos tempu na estudio di Beibel, na e trabou di prediká òf e ta kuminsá falta reunion. Awor, kiko nos por hasi pa nos no kita lihé fo’i skel?

13. Manera Beibel a profetisá, ki aktitut hopi hende tin, i kon nos por protehá nos fe?

¹³ Un kos ku sigur por yuda nos ta si nos keda kòrda ku nos ta bibando den “e último dianan” i ku asosiashon ku hende ku no ta rekonosé esei por ta peligroso. Relashoná ku e tempu akí, apòstel Pedro a skirbi: “Lo tin hasidó di bofon ku ta aktua segun nan propio deseonan i ku ta bisa den forma di chèrchè: ‘El a primintí ku lo e bini, pero unda su binida a keda? Figurá bo, for di dia ku nos antepasadonan a bai sosegá, tur kos ta sigui eksaktamente manera nan tabata for di kuminsamentu di kreashon.’” (2 Ped. 3:3, 4) Si nos ta lesa Beibel tur dia i studi’é regularmente, esaki lo yuda nos keda kòrda ku nos ta bibando den “e último dianan.” E apostasia ku Beibel a profetisá di dje a kuminsá hopi tempu pasá i te awe e ta sigui. Sí, “e hòmber di maldat” ta eksistí ainda i ta sigui oponé e sirbidónan di Dios. P’esei, awor mas ku nunka, nos mester keda alerta i konsiente ku e dia di Yehova ta serka.—Sof. 1:7.

14. Kon e trabou di prediká ta protehá nos?

¹⁴ Eksperensia ta mustra ku un manera importante ku nos por evitá ku nos ta kita fo’i skel ta di prediká e bon notisia regularmente. Pues, ora Kristu Hesus, e Kabes di e kongregashon kristian, a manda su siguidónan pa hasi disipel di hende di tur nashon i siña nan hasi tur loke el a siña nan, e tabata dunando un konseho ku lo a protehá su siguidónan. (Mat. 28:19, 20) Pero, pa nos por kumpli ku su mandato, nos mester prediká ku entusiasmo. Bo ta kere ku e kristiannan di Tesalónika lo a sinti nan bon si nan tabata prediká i siña hende na un manera mekániko djis pasobra nan a sinti ku nan tabata obligá di  hasi esei? Kòrda ku Pablo a bisa nan pa ‘no paga e kandela di spiritu santu ni trata profesia ku despresio.’ (1 Tes. 5:19, 20) Anto e profesianan ku nos ta studia i ta splika hende ta masha interesante, no ta bèrdat?

15. Menshoná algun kos ku nos por hasi durante nos Adorashon Komo Famia.

¹⁵ Ta lógiko ku nos ke yuda nos famia mehorá nan predikashon. Pa logra esei, hopi ruman ta usa un parti di nan Adorashon Komo Famia pa prepará pa sirbishi. Kisas boso por prepará pa rebishitá hende ku a mustra interes. Preguntanan ku boso por pensa riba ta entre otro: Ki tópiko lo bo papia riba dje na e siguiente bishita? Kiko bo por bisa pa sigui lanta e persona su interes? Ki ora ta mihó pa hasi rebishita? Tin hopi ruman tambe ku ta usa un parti di nan Adorashon Komo Famia pa prepará pa e reunionnan di kongregashon asina nan por ta na altura di loke lo ser tratá na e reunionnan ei. Abo por hasi mas pa partisipá? Wèl, ora bo ta partisipá durante e reunionnan, bo ta fortalesé bo fe, i esaki ta evitá ku bo ta ser kitá for di skel. (Sal. 35:18) Sí, Adorashon Komo Famia ta evitá ku nos ta kuminsá spekulá òf duda.

16. Kiko ta motivá kristiannan ungí pa mantené nan kapasidat di pensa i no laga nada kita nan fo’i skel?

¹⁶ Atraves di añanan, Yehova a bendishoná su pueblo ku mas i mas komprondementu di profesia di Beibel. Esaki ta duna nos e konfiansa ku tin un maravioso rekompensá ta spera nos. E kristiannan ungí tin e speransa di uni ku Kristu den shelu. Esaki sigur ta motivá nan pa sigui hasi esfuerso pa nada no kita nan for di skel. Loke Pablo a bisa e kristiannan na Tesalónika ta konta pa nan tambe. El a bisa nan: “Nos ta sinti nos obligá di gradisí Dios pa boso, rumannan stimá pa Yehova, ya ku debí na boso fe den e bèrdat, el a skohe boso . . . , santifikando boso ku su spiritu.”—2 Tes. 2:13.

17. Ki animashon nos ta haña na 2 Tesalonisensenan 3:1-5?

¹⁷ Hende ku tin e speransa di biba pa semper riba tera tambe ta hasi esfuerso pa nada no kita nan fo’i skel. Si abo tin e speransa di biba pa semper riba tera, hasi kaso di e animashon amoroso ku Pablo a duna su kompañeronan ungí na Tesalónika. (Lesa 2 Tesalonisensenan 3:1-5.) Nos mester ta masha gradisidu pa e palabranan amoroso ei. Sí, e kartanan na e kristiannan na Tesalónika ta spièrta nos seriamente pa no spekulá ni kere den ideanan kuestionabel. I komo ku nos ta bibando asina serka di e fin, nos ta masha kontentu ku e spièrtamentunan akí.