MAINTA trempan, ora un señora tabata saliendo kas, el a ripará ku tabatin un pakete riba su stupi. El a kohe e pakete i a wak rònt, pero e no a mira niun hende. Un hende lo mester a pone e pakete ei durante anochi. Ora el a habri e pakete un tiki, mesora el a bai paden i sera su porta. Ta komprendibel ku el a bai paden bèk mesora: E pakete tabata kontené literatura bíbliko prohibí! Ku e pakete brasá, el a gradisí Yehova silensiosamente den orashon pa e balioso kuminda spiritual ku el a risibí.

Esei ta un esena ku a tuma lugá vários bes na Alemania durante e añanan di 1930. Despues ku e nazinan a bini na poder na 1933, e trabou di Testigunan di Yehova a ser prohibí na hopi parti di e pais. Richard Rudolph, * kende aworakí tin mas ku 100 aña di edat, a bisa: ‘Nos tabata konvensí ku niun lei humano no por a stroba nos di papia tokante Yehova i su nòmber. Literatura bíbliko tabata un medio importante pa yuda nos studia Beibel i prediká. Pero pa motibu di e prohibishon, no tabata fásil mas pa haña esakinan. I nos tabata puntra nos mes kon e trabou por a sigui.’ Ma no a dura muchu ku Richard a haña sa kon e mes por a yuda pa e rumannan haña literatura. E por a hasi esei na un manera masha inusual: den sombra di e serunan.—Hues. 9:36.

Si bo bai den e direkshon kontrali di e koriente di riu Elbe (òf, Labe), na un dado momento, bo ta yega e Serunan Gigantesko (Krkonoše), ku ta keda na e frontera aktual di Repúblika Cheko i Polonia. Aunke e serunan akí tin un haltura di solamente un 1.600 meter, nan ta ser yamá e isla ártiko di Europa debí na e klima hopi friu. E serunan akí ta kubrí ku hopi sneu. Durante seis luna largu, sneu te ku 3 meter haltu ta kubri nan. E wer ta impredisibel; si un hende balot’é, e por hañ’é den neblina diki ku diripiente ta tapa tòp di e serunan.

Atraves di siglonan, e serunan akí a forma un frontera natural entre algun provinsia, imperio i pais. E teritorio peligroso akí tabata difísil pa vigilá, p’esei ántes hopi hende ku tabata biba den e área ei tabata  pasa ilegalmente ku vários produkto via e serunan akí. Komo ku e Serunan Gigantesko akí tabata separá Chekoslovakia for di Alemania, durante e añanan di 1930 Testigunan determiná tambe a kuminsá usa e ruta ku kontrabandistanan tabata usa. Pa hasi kiko? Pa transportá literatura bíbliko balioso for di lugánan kaminda tabata mas fásil pa haña nan. Tempu ku Richard tabata hóben, e tambe tabata hasi esei.

Richard ta kòrda: ‘Den wikènt, un grupo di mas o ménos shete ruman hòmber hóben, bistí manera subidó di seru, tabata kana bai e serunan. Biniendo for di Alemania, tabata tuma nos kasi tres ora pa subi i baha e serunan pa nos yega Špindlerův Mlýn’—un resòrt ku tabata keda un 16,5 kilometer leu, na e banda Cheko. E tempu ei, tabatin hopi aleman ta biba den e área ei. Ún di nan tabata un kunukero ku a bai di akuerdo pa kooperá ku e rumannan. E rumannan tabata manda literatura ku trein for di Praga. Anto ku un garoshi (ku kabai tabata hala) ku e tabata usa normalmente pa transportá turista, e tabata buska e kahanan di literatura na un pueblito den serkania. E tabata hiba e kahanan na su boerderij i skonde nan kaminda e tabata warda yerba seku te ora e rumannan bin buska nan pa hiba Alemania.

Richard ta sigui konta: ‘Ora nos a yega e boerderij, nos tabata yena nos rùgtas, ku tabata spesialmente trahá pa karga kos pisá, ku literatura. Nos kada un tabata karga un 50 kilo.’ Pa nos rumannan no ser gará, nan tabata kana ora tabata skur. Nan tabata kuminsá kana despues ku solo baha i tabata yega kas bèk promé ku solo sali. Ernst Wiesner, kende tabata un superintendente di sirkuito e tempu ei, a menshoná algun di e medidanan di siguridat ku nan tabata tuma. El a bisa: ‘Dos ruman hòmber tabata bai dilanti i, asina ku nan topa hende, mesora nan tabata manda señal ku nan flèshlait. E señal akí tabata nifiká ku e rumannan ku rùgtas pisá kendenan tabata un 100 meter patras tabatin ku skonde den mondi te ora e dos rumannan ku a bai dilanti bolbe i laga nan komprondé, pa medio di un sierto kode, ku nan por a sigui; tur siman, nan tabata kambia e kode akí.’ Pero, no ta e polisnan aleman den unifòrm blou tabata e úniko peliger ku nan mester a konfrontá.

Richard ta kòrda: ‘Un biaha atardi, mi mester a keda traha un tiki mas, pues mi a sali un tiki mas lat ku mi rumannan pa bai e banda Cheko. Tabata skur i tabatin  hopi neblina. Mi tabata tembla segun ku mi tabata kana den áwaseru friu. Mi a pèrdè den e palunan di pino i pa vários ora mi no por a haña e kaminda. Hopi subidó di seru a muri asina. Ta te mainta, ora ku mi rumannan tabata regresá kas trempan, mi a topa nan.’

Pa un tres aña asina, tur siman, e grupo chikitu akí di ruman hòmber ku kurashi tabata subi i baha e serunan akí. Den wenter, nan tabata ski pa transportá nan karga balioso den rùgtas. Tabatin biaha ku gruponan di te ku 20 ruman hòmber tabata krusa e frontera di dia kla hasiendo uso di e rastronan ku e subidónan di seru a laga atras. Pa laga parse ku nan tabata djis un par di subidó di seru inofensivo, algun ruman muhé tambe tabata bai ku nan. Algun di e ruman muhénan akí tabata kana dilanti i ora nan a sospechá di kualke peliger, nan tabata tira nan sombré na laira.

Awor, kiko tabata sosodé despues ku e ruman hòmbernan akí regresá di nan biahe di anochi? Wèl, e areglo tabata pa distribuí e literatura mesora. Kon? Tabata empaketá e publikashonnan komo si fuera ta habon nan tabata i hiba nan stashon di trein na Hirschberg. Di e manera ei, tabata transportá e paketenan pa diferente parti di Alemania, i e rumannan ku risibí esakinan tabata parti nan diskretamente pa nan kompañeronan kristian, manera nos a lesa na komienso di e artíkulo akí. Tabatin asina tantu hende enbolbí den e operashon klandestino akí di distribuí literatura ku si kualke informashon lèk, e konsekuensianan lo por tabata masha serio. I en bèrdat, un dia nos a haña un sla duru ku nos no a spera.

Na 1936, nan a deskubrí un depósito di literatura den bisindario di Berlin. Entre e kosnan ku nan a haña tabatin tres pakete anónimo prosedente di Hirschberg. Polis a analisá e letra riba e paketenan i asina nan a identifiká un miembro klave di e grupo i a arest’é. Poko despues, dos sospechoso mas, inkluso Richard Rudolph, a ser arestá. Debí ku e rumannan akí a tuma tur e kulpa riba nan, pa algun tempu otro rumannan por a sigui hasi e biahenan akí ku kada bes tabata bira mas i mas peligroso.

Debí ku e rumannan tabata transportá nos publikashonnan den rùgtas via e Serunan Gigantesko, Testigunan na Alemania tabata haña literatura bíbliko di gran importansia. Pero no ta e Serunan Gigantesko so tabata e úniko ruta ku nan a usa. Te ku 1939, ora ku forsanan aleman a okupá Chekoslovakia, nan tabata usa rutanan similar ku tabatin den área di e frontera di Chekoslovakia. Tantu e Testigunan na Alemania komo esnan den otro paisnan ku tambe tin frontera ku Alemania, manera por ehèmpel Fransia, Hulanda i Suisa, tabata tuma rísiko grandi pa perkurá alimento spiritual pa nan rumannan den fe ku tabata ser persiguí.

Awendia, mayoria di nos por haña kuantu publikashon bíbliko ku nos ke i na vários manera (sea ta den forma imprimí, di oudio, vidio òf elektrónikamente). Ora ku nos haña un publikashon nobo na Salòn di Reino òf nos a download e for di e website jw.org, ta bon pa nos para ketu un ratu i pensa kiko ta tur loke mester a sosodé promé ku nos por a hañ’é. Probablemente loke a ser hasí no tabata mes dramátiko i peligroso ku subi i baha serunan tapá ku sneu meianochi, pero sin duda esaki a rekerí trabou duru di hopi ruman ku inegoistamente ta traha pa sirbi nos.