1, 2. Kiko e Reino di Dios lo hasi, i dikon nos por tin sigur ku e Reino ei lo bini?

 NA AÑA 31, riba un seru serka di Kapernaum, Hesukristu a siña su disipelnan pa pidi den orashon: “Laga bo Reino bini.” (Mat. 6:10) Awe, hopi hende ta duda ku e Reino ei lo bini. Ma nos sí tin sigur ku Yehova lo kontestá nos orashon sinsero pa su Reino bini.

² Yehova lo usa e Reino pa uni su famia den shelu i riba tera. E propósito akí di Dios lo kumpli sigur. (Isa. 55:10, 11) E susesonan emoshonante di e último 100 añanan ta duna prueba ku Yehova a bira Rei kaba i ku e ta hasiendo kosnan maravioso pa miónes di su sirbidónan. (Zak. 14:9; Rev. 15:3) Pues, no ta ora e Reino di Dios bini, manera Hesus a siña nos pidi p’e den orashon, Yehova ta bira Rei. Ta trata akí di dos suseso diferente. Kiko ta e diferensia entre nan, i ki efekto kada un tin riba nos bida?

3. (a) Na ki tempu Hesus a keda koroná komo Rei, i na unda? (b) Kon lo bo proba un hende ku Hesus a kuminsá goberná na aña 1914? (Wak e nota.)

³ Rònt di fin di siglo 19, un profesia ku Daniel a skirbi mas ku 2.500 aña promé a kuminsá bira mas kla pa e sirbidónan di Dios. Segun e profesia, “den e dianan di e reinan ei e Dios di shelu lo lanta un reino ku nunka lo no wòrdu destruí.” (Dan. 2:44) Pa vários dékada, e Studiantenan di Beibel a proklamá  ku aña 1914 lo a bira un aña masha importante. Hopi hende den e tempu ei tabata masha optimista tokante futuro. Un eskritor a deklará: “E mundu di 1914 tabata yen di speransa i promesa.” Pero mas lat den e aña ei, Promé Guera Mundial a kuminsá i profesia di Beibel a kumpli. Despues di esei a sigui hamber, temblor, pèst i tambe kumplimentu di otro profesianan di Beibel ku a proba definitivamente ku Hesukristu a kuminsá goberná den shelu komo Rei di e Reino di Dios na 1914. a Pues, Yehova a bira Rei den un otro sentido ora el a koroná su Yu komo e Rei Mesiániko!

4. Kiko tabata e promé kos ku Hesus a hasi ora el a bira Rei, i kiko el a hasi despues di esei?

⁴ E promé kos ku Dios su Rei nobo a hasi tabata di bringa kontra Satanas, e enemigu prinsipal di su Tata. Hesus ku su angelnan a saka Diabel ku su demoñonan for di shelu. Esaki a kousa gran alegria den shelu. Ma riba tera el a kousa un tempu di kalamidat nunka bisto. (Lesa Revelashon 12:7-9, 12.) Despues di esei, e Rei a dirigí su atenshon na su siguidónan riba tera pa refiná, eduká i organisá nan pa hasi e boluntat di Dios. Laga nos ban wak kon e manera positivo ku nan a reakshoná riba e tres akshonnan akí di e gobernashon di e Reino ta un bon ehèmpel pa nos awe.

5. Ki purifikashon a tuma lugá entre 1914 i e promé parti di 1919?

⁵ Despues ku Hesus a eliminá e mal influensia di Satanas ku su demoñonan for di den shelu, Yehova a dun’é instrukshon pa inspekshoná i refiná e kondishon spiritual di su siguidónan riba tera. Profeta Malakías a deskribí esaki komo un purifikashon spiritual. (Mal. 3:1-3) Historia ta mustra ku e purifikashon akí a tuma lugá entre 1914 i e promé parti di 1919. b Si nos ke forma parti di e famia universal di Yehova, nos mester ta limpi, òf santu. (1 Ped. 1:15, 16) Nos adorashon no mester ta kontaminá ku nada di religion falsu ni di polítika.

6. Ken ta perkurá pa nos haña kuminda spiritual, i dikon e kuminda akí ta asina importante?

⁶ Siguientemente, Hesus a usa su outoridat komo Rei pa nombra un “esklabo fiel i prudente.” E esklabo akí lo a perkurá bon kuminda spiritual regularmente pa tur esnan ku tabata parti di e “ún tou” bou di kuido di Hesus. (Mat. 24:45-47; Huan 10:16) Desde 1919, e esklabo fiel i prudente ei a kumpli fielmente ku e responsabilidat importante di alimentá e “sirbidónan di kas.” E kuminda spiritual na abundansia ku nan ta duna nos ta nutri nos bon pa asina nos por krese den fe. Tambe e ta hasi nos mas determiná pa keda limpi, tantu den sentido spiritual, moral, mental komo físiko. Ademas, e kuminda spiritual akí ta eduká nos i ta prepará nos pa partisipá plenamente den e trabou di mas importante ku ta tumando lugá riba tera awe: e trabou di prediká. Abo ta probechá plenamente di e kuminda spiritual akí?

7. Ki obra importante Hesus a kuminsá kuné ora e tabata riba tera, i te na ki tempu esei lo a sigui?

⁷ Ora Hesus a kuminsá ku su sirbishi riba tera, el a anunsiá: “Mi tin ku deklará e bon notisia di e Reino di Dios na e otro statnan tambe, pasobra ta pa esaki Dios a manda mi.” (Luk. 4:43) Durante tres aña i mei, e sirbishi akí tabata e obra di mas importante den e bida di Hesus. El a instruí su disipelnan: “Segun ku boso ta bai, prediká i bisa:  ‘E Reino di shelu a yega serka.’” (Mat. 10:7) Despues di su resurekshon, el a profetisá ku su siguidónan lo plama e mensahe akí “te na e parti mas leu di tera.” (Echo. 1:8) I el a primintí nan ku e mes lo apoyá e obra importante akí te na fin di e sistema akí.—Mat. 28:19, 20.

8. Kon e Rei a stimulá su siguidónan riba tera pa prediká?

⁸ Di aña 1919 en adelante, e ‘bon notisia di e Reino’ a haña mas nifikashon. (Mat. 24:14) E Rei tabata goberná den shelu, i el a reuní un grupo chikitu di siguidó purifiká riba tera. E grupo akí ku entusiasmo a obedesé Hesus su mandato: Prediká den henter e tera e bon notisia ku e Reino di Dios ta gobernando den shelu! (Echo. 10:42) Por ehèmpel, kasi 20.000 hende ku tabata apoyá e Reino a asistí na un kongreso internashonal na Cedar Point (Ohio, Merka) na sèptèmber 1922. Nos por imaginá kon emoshoná nan tabata ora ku Ruman Rutherford a duna e diskurso “E Reino” i a deklará: “Tende! E Rei ta reina! Boso ta su agentenan di publisidat. P’esei, anunsiá, anunsiá, anunsiá e Rei i su reino.” E siguiente dia, 2.000 delegado a partisipá den un dia spesial di predikashon. Algun di nan a bishitá kasnan ku tabata mas ku 70 kilometer leu for di e lugá di kongreso. Un ruman hòmber a deklará: “Hamas lo mi lubidá e yamada pa anunsiá e Reino ni e zelo di e multitut ku tabatin presente!” I e no tabata e úniko ku a sinti asina.

9, 10. (a) Kiko e esklabo fiel a hasi pa entrená proklamadónan di Reino? (b) Kon abo a benefisiá personalmente di e entrenamentu akí?

⁹ Pa aña 1922, tabatin mas ku 17.000 proklamadó di Reino aktivo den 58 pais rònt mundu. Pero nan tabatin mester di entrenamentu. Den e promé siglo, e futuro Rei a duna su disipelnan instrukshonnan bon kla tokante kiko nan mester a prediká, na unda i kon. (Mat. 10:5-7; Luk. 9:1-6; 10:1-11) Awe ta meskos. Hesus ta sòru pa tur hende ku ta partisipá den e trabou di prediká e Reino haña instrukshon i pa nan tin e hèrmèntnan nesesario pa prediká na un manera efektivo. (2 Tim. 3:17) Hesus ta usa e kongregashon kristian pa entrená su siguidónan pa sirbishi. Un manera ku e ta entrená nan ta via di e Skol di Ministerio Teokrátiko ku ta ser tené den mas ku 111.000 kongregashon rònt mundu. Hasiendo bon uso di e instrukshon akí, awor mas ku shete mion publikadó tin e preparashon nesesario pa prediká i duna siñansa na un manera ku ta atraé “tur sorto di hende.”—Lesa 1 Korintionan 9:20-23.

¹⁰ Fuera di e Skol di Ministerio Teokrátiko, e esklabo fiel a establesé mas skol bíbliko pa entrená ansiano di kongregashon, pionero, ruman hòmber soltero, pareha kasá, miembro di Komité di Sukursal ku  nan esposa, superintendente biahero ku nan esposa i misionero. c E studiantenan di un klas di e Skol Bíbliko pa Pareha Kristian a ekspresá nan apresio pa e skol ku e palabranan: “E entrenamentu spesialisá akí ku nos a risibí a duna nos mas amor pa Yehova i a prepará nos mas mihó ainda pa yuda otro hende.”

11. Kon bini e siguidónan di Hesus por a sigui prediká apesar di e atakenan di Satanas?

¹¹ Nos enemigu, Satanas, no a keda sin ripará e esfuersonan ekstenso ku e rumannan ta hasi pa prediká i siña hende e bon notisia. E ke para e trabou di prediká i ta usa tantu atake direkto komo indirekto kontra e mensahe di Reino i kontra esnan ku ta predik’é. Pero su atakenan ta enbano. Yehova a pone su Yu ‘sinta muchu mas haltu ku tur gobièrnu, outoridat, poder i dominio.’ (Efe. 1:20-22) Komo Rei, Hesus ta usa su outoridat pa protehá i guia su disipelnan pa asina hasi sigur ku e boluntat di su Tata ta sosodé. d Nan ta prediká e bon notisia i ta siña miónes di hende di kurason sinsero pa adorá Yehova. Ki un gran privilegio nos tin di por partisipá den e obra magnífiko akí!

12. Deskribí algun aspekto di nos organisashon ku Hesus a refiná desde ku el a kuminsá goberná.

¹² Desde ku Hesus a kuminsá goberná komo Rei na 1914, el a bin ta refiná e manera ku e sirbidónan di Dios ta organisá pa hasi e boluntat di su Tata. (Lesa Isaías 60:17.) Na 1919, nan a kuminsá nombra un direktor di sirbishi den kada kongregashon pa dirigí e trabou di prediká. Na 1927, e kongregashonnan a kuminsá prediká regularmente riba djadumingu. Na 1931, sirbidónan di Dios a kuminsá usa e nòmber bíbliko Testigunan di Yehova, i esei a motivá nan pa hasi mas den e trabou di prediká. (Isa. 43:10-12) Na 1938, nan a stòp di vota ora di skohe ruman hòmber pa dirigí e kongregashon. Na lugá di esei a bini nombramentu teokrátiko, esta, un ruman hòmber mester kumpli ku sierto rekisito bíbliko p’e keda nombrá. Na 1972, e responsabilidat di supervisá e kongregashon a pasa pa un kuerpo di ansiano en bes di ta den man di un solo ruman hòmber. Tur ruman hòmber ku por a sirbi den e kapasidat ei a haña e animashon pa hasi esfuerso pa ‘pastoriá e tou di Dios ku tabata bou di nan kuido.’ (1 Ped. 5:2) Na 1976, a organisá e Kuerpo Gobernante den seis komité pa supervisá e obra mundial di Reino. Djei padilanti, Hesus a  sigui organisá su siguidónan progresivamente pa nan hasi kos na Dios su manera, esta, na e manera teokrátiko.

13. Loke e Rei Mesiániko a logra durante e promé 100 añanan di su reinado tabatin ki efekto riba bo bida?

¹³ Pensa riba tur loke e Rei Mesiániko a logra durante e promé 100 añanan di su reinado. El a purifiká un grupo di hende pa karga e nòmber di Yehova. El a dirigí e predikashon di e bon notisia di Reino den 239 pais i a siña miónes di hende pa adorá Yehova. El a uni mas ku shete mion siguidó fiel, kendenan a pone nan mes disponibel pa hasi e boluntat di su Tata. (Sal. 110:3) Yehova a usa e Reino Mesiániko pa hasi kosnan realmente grandi i maravioso. I tin kosnan mas emoshonante ainda na kaminda!

14. (a) Kiko nos ta pidiendo Dios pa hasi ora nos ta resa: “Laga bo Reino bini”? (b) Kiko ta nos teksto di aña pa 2014, i dikon e teksto akí ta na su lugá?

¹⁴ Aunke Yehova a koroná su Yu, Hesukristu, komo Rei Mesiániko na 1914, esaki no tabata e kontesta kompleto riba nos orashon pa “laga bo Reino bini.” (Mat. 6:10) Beibel a profetisá ku Hesus lo “goberná meimei di [su] enemigunan.” (Sal. 110:2) Gobièrnunan humano bou di poder di Satanas ta oponé e Reino ainda. Ora nos ta resa pa e Reino di Dios bini, nos ta pidiendo Dios pa e Rei Mesiániko—huntu ku e 144.000 reinan ku ta kuné den shelu—bini pa pone fin na e gobernashon di hende i tambe na e personanan riba tera ku ta oponé e Reino. E akshon akí lo kumpli ku e palabranan di Daniel 2:44, ku ta bisa ku e Reino di Dios “lo garna i pone un fin na tur e reinonan akí.” Lo e eliminá e enemigunan polítiko di e Reino. (Rev. 6:1, 2; 13:1-18; 19:11-21) E tempu pa esaki sosodé ta hopi serka. Aña 2014 ta hasi 100 aña ku Hesus a kuminsá goberná den shelu. Pues, ta na su lugá ku nos teksto di aña pa 2014 ta Mateo 6:10: “Laga bo Reino bini”!

15, 16. (a) Menshoná algun suseso emoshonante ku lo tuma lugá durante e Reinado di Mil Aña. (b) Kiko lo ta e último kos ku Hesus lo hasi komo Rei Mesiániko, i kiko esei lo nifiká pa Yehova su propósito en konekshon ku henter su kreashon?

¹⁵ Despues ku e Rei Mesiániko kaba ku e enemigunan di Dios, lo e benta Satanas ku su demoñonan den abismo pa 1.000 aña. (Rev. 20:1-3) Unabes e mal influensia ei no t’ei mas, e Reino lo kuminsá yuda hende benefisiá mesora di e sakrifisio di reskate di Hesus i eliminá e efektonan di e piká heredá di Adam. E Rei lo resusitá miónes di hende ku ta den graf i lo organisá un programa mundial pa siña nan tokante Yehova. (Rev. 20:12, 13) Henter e tera lo bira un paradeis meskos ku Hòfi di Edén. Tur hende fiel lo bira perfekto.

¹⁶ Na final di Kristu su Reinado di Mil Aña, e Reino Mesiániko lo a kumpli ku su propósito. E ora ei Hesus lo entregá e Reino bèk na su Tata. (Lesa 1 Korintionan 15:24-28.) Lo no tin mester di un mediador mas entre Yehova i su yunan riba tera. Tur yu di Dios, tantu den shelu komo riba tera, lo ta den union ku nan Tata selestial komo parti di su famia universal.

17. Kiko bo ta determiná pa hasi en konekshon ku e Reino?

¹⁷ E susesonan emoshonante ku a tuma lugá durante e 100 añanan di gobernashon di e Reino ta duna nos e garantia ku Yehova ta esun ku ta na poder i ku su propósito pa e tera lo kumpli. Pues, laga nos sigui sirbié fielmente i anunsiá e Rei i su Reino. Nos ta hasi esaki ku e pleno konfiansa ku pronto Yehova lo kontestá nos orashon sinsero: “Laga bo Reino bini”!