1, 2. (a) Ken su kasamentu lo kousa alegria den shelu? (b) Ki preguntanan ta lanta?

PREPARASHON di un kasamentu semper ta tuma tempu. E kasamentu ku nos ta bai papia di dje ta un kasamentu masha spesial—e kasamentu di un rei. Preparashon pa e kasamentu akí ta tumando lugá kasi 2.000 aña kaba. Bo por imaginá bo esei? Awor sí e tempu pa e brùidehòm uni ku su brùit ta yegando. Pronto músika alegre lo yena palasio di e Rei i multitut di bos selestial lo kanta: “Alabá Yah! Pasobra Yehova nos Dios, e Todopoderoso, a kuminsá reina komo rei. Laga nos alegrá i keda masha kontentu i dun’é gloria, pasobra e ora pa e kasamentu di e Lamchi a yega, i su brùit a prepará su mes kaba pa e kasamentu.”—Rev. 19:6, 7.

² Sin duda, “e Lamchi” ku e teksto akí ta papia di dje ta Hesukristu. (Huan 1:29) Kon e brùidehòm akí ta bistí pa su kasamentu? Ken ta su brùit? Kon e brùit ta ser prepará pa e matrimonio? Na ki tempu e kasamentu akí lo tuma lugá? E kasamentu akí lo kousa gran alegria den shelu. Pero, kiko di e personanan ku tin speransa di biba pa semper riba tera, nan tambe lo alegrá? Nos ta ansioso pa haña kontesta pa e preguntanan akí, p’esei laga nos sigui analisá Salmo 45.

3, 4. (a) Kiko e salmista a bisa tokante e pañanan di kasamentu di e Brùidehòm, i kiko ta hasié mas i mas felis? (b) Ken “e yu muhénan di reinan” i “e reina” ku ta alegrá ku e Brùidehòm ta simbolisá?

³ Lesa Salmo 45:8 i 9. E Brùidehòm, kende ta Hesukristu, ta bisti su paña real pa e kasamentu. Su pañanan tin un fragansia dushi manera di e “mihó spesereinan” tal komo mirra i kasia. Esakinan ta algun di e spesereinan ku nan tabata usa pa traha e zeta santu di ungimentu ku nan tabata usa na Israel.—Éks. 30:23-25.

⁴ E dushi músika selestial ku ta yena e palasio ta pone e Brùidehòm sintié mas i mas felis segun ku e dia di su kasamentu ta yega serka. E “reina” tambe ta kompartí e goso di e Brùidehòm. E reina ta simbolisá e parti selestial di Yehova su organisashon, ku ta konsistí di e angelnan santu, ku Beibel ta referí na dje tambe komo e “yu muhénan di reinan.” Ta masha emoshonante pa tende bosnan selestial deklará: “Laga nos alegrá i keda masha kontentu . . . pasobra e ora pa e kasamentu di e Lamchi a yega”!

5. Ken lo bira “esposa di e Lamchi”?

⁵ Lesa Salmo 45:10 i 11. Nos a identifiká e Brùidehòm, pero ken ta su brùit? E brùit no ta un persona literal; e ta simbolisá tur e 144.000 kristiannan ungí ku ta forma e kongregashon ungí ku Hesukristu ta dirigí. (Lesa Efesionan 5:23, 24.) Ta e kristiannan ungí akí lo bai reina huntu ku Kristu den su Reino Mesiániko. (Luk. 12:32) Nan ta “sigui e Lamchi unda ku e bai.” (Rev. 14:1-4) Nan ta bira “esposa di e Lamchi” i lo biba huntu kuné den shelu.—Rev. 21:9; Huan 14:2, 3.

6. Dikon Beibel ta referí na e ungínan komo “yu muhé di rei,” i dikon nan a haña instrukshon pa ‘lubidá nan pueblo’?

⁶ Beibel ta referí na e futuro brùit akí no solamente komo “yu muhé” ma tambe komo “yu muhé di rei.” (Sal. 45:13) Ken ta e otro “rei” akí ku Salmo 45:13 ta papia di dje? Yehova naturalmente, pasobra ta Yehova a adoptá e kristiannan ungí komo su ‘yunan.’ (Rom. 8:15-17) I komo ku e ungínan tin ku bira un brùit selestial, nan a haña instrukshon pa ‘lubidá nan pueblo i kas di nan tata [terenal].’ Nan tin ku keda ku nan “mente fihá riba e kosnan djariba, no riba e kosnan ku ta riba tera.”—Kol. 3:1-4.

7. (a) Kon Kristu ta preparando su futuro brùit? (b) Kon e brùit ta mira su futuro Brùidehòm?

⁷ Kristu tin siglonan ta prepará su futuro brùit pa nan matrimonio selestial. Apòstel Pablo a bisa ku Kristu “a stima e kongregashon i a entregá su bida p’e, pa e por santifik’é dor di purifik’é ku e baño di awa pa medio di e palabra, pa e por presentá e kongregashon na su mes den su splendor, sin mancha, sin ploi ni nada paresido, pa e kongregashon por ta santu i sin defekto.” (Efe. 5:25-27) Pablo a skirbi e kristiannan ungí na Korinto di antigwedat: “Mi ta profundamente interesá den boso, pasobra ami personalmente a primintí boso den matrimonio na ún esposo, esta, Kristu, i mi ke presentá boso komo un bírgen puru na dje.” (2 Kor. 11:2) Hesukristu, e Brùidehòm, ta balorá e bunitesa spiritual di su futuro brùit. E brùit, na su turno, ta ‘bùig dilanti’ di su futuro esposo i ta asept’é boluntariamente komo su “señor.”

8. Dikon ta apropiá ku Beibel ta bisa ku e brùit ta “den tur su gloria”?

⁸ Lesa Salmo 45:13 i 14a. “Den tur su gloria,” e brùit ta presentá pa e kasamentu  real. Sí, e ta masha bunita “dòrná pa su brùidehòm.” Revelashon 21:2 ta kompará e brùit ku un stat, Herúsalèm Nobo, i ta bisa ku e tin “e gloria di Dios.” E stat selestial akí ta bria manera ‘un piedra masha presioso, sí, manera un piedra di yaspe ku ta bria kla manera kristal.’ (Rev. 21:10, 11) Manera nos a mira, e buki di Revelashon ta deskribí e splendor di Herúsalèm Nobo na un manera masha bunita. (Rev. 21:18-21) No ta nada straño ku e salmista a bisa ku e brùit akí ta “den tur su gloria”! No por ta otro, pasobra ta den shelu e kasamentu akí lo tuma lugá.

9. Ken ta e “rei” ku nan ta hiba e brùit serka dje, i kon e brùit ta bistí?

⁹ Nan ta hiba e brùit pa su Brùidehòm, kende ta e Rei di e Reino Mesiániko. El a prepará su brùit, purifikand’é “ku e baño di awa pa medio di e palabra.” E brùit ta “santu i sin defekto.” (Efe. 5:26, 27) Anto e brùit mester ta apropiadamente bistí pa e okashon. I esei ta e kaso tambe pasobra su bistí ta “gewef ku hilu di oro,” i ku su “paña tur bòrdá” nan ta ‘hib’é serka e rei.’ Pa e kasamentu ku e Lamchi, ta ‘permití e brùit bisti lenen fini, briante i limpi; pasobra e lenen fini ta representá e echonan hustu di e santunan.’—Rev. 19:8.

10. Na ki tempu e kasamentu di e Lamchi lo tuma lugá?

¹⁰ Lesa Revelashon 19:7. Na ki tempu e kasamentu di e Lamchi lo tuma lugá? Maske Revelashon 19:7 ta bisa ku e brùit ta “prepará su mes” pa e kasamentu, e versíkulonan ku ta sigui no ta deskribí e kasamentu mes. Nan ta duna un deskripshon bibu di e último fase di e tribulashon grandi. (Rev. 19:11-21) Akaso esaki ta nifiká ku e kasamentu lo tuma lugá promé ku e Rei kompletá su viktoria? Nò. E vishonnan den e buki di Revelashon no ta skirbí den órden kronológiko. Salmo 45 ta mustra ku e kasamentu real akí lo tuma lugá despues ku Hesukristu, e Rei, faha su spada i derotá su enemigunan.—Sal. 45:3, 4.

11. Den ki órden Kristu lo derotá su enemigunan?

¹¹ A base di loke Beibel ta bisa, nos por konkluí ku e susesonan lo tuma lugá den e siguiente órden: Promé, “e gran prostituta,” Babilonia e Grandi, ku ta simbolisá e imperio mundial di religion falsu, lo ser eliminá kompletamente. (Rev. 17:1, 5, 16, 17; 19:1, 2) Despues, Kristu lo destruí e restu di Satanas su mundu malbado na Armagedon, “e guera ku lo tuma lugá riba e gran dia di Dios.” (Rev. 16:14-16; 19:19-21) Finalmente, e Rei-Guerero lo kompletá su viktoria, tirando Satanas i su demoñonan den abismo, unda nan lo ta inaktivo, komo si fuera morto.—Rev. 20:1-3.

12, 13. (a) Na ki tempu e kasamentu di e Lamchi lo tuma lugá? (b) Ken ta esnan ku lo alegrá den shelu debí na e kasamentu di e Lamchi?

¹² Durante Kristu su presensia, kristiannan ungí ku keda fiel te na morto ta ser resusitá pa biba den shelu. Poko despues di e destrukshon di Babilonia e Grandi, Hesus lo tuma e restu di e 144.000 rumannan ungí pa nan ta den shelu huntu kuné. (1 Tes. 4:16, 17) Konsekuentemente, promé ku e guera di Armagedon kuminsá, tur e personanan ku ta forma e “brùit” lo ser tumá den shelu. Despues di Armagedon, e kasamentu di e Lamchi lo tuma lugá. Esei lo ta sin duda un okashon masha gososo! Revelashon 19:9 ta bisa: “Felis ta esnan invitá na e bankete di kasamentu di e Lamchi.” Sí, e brùit lo ta realmente felis. E Brùidehòm tambe lo ta sumamente felis ya ku tur e miembronan ku ta forma e 144.000 ta huntu kuné. Manera Beibel ta bisa na un manera simbóliko, nan ta  kome i bebe huntu ku Hesus na mesa den su Reino. (Luk. 22:18, 28-30) Pero no ta e brùit i e Brùidehòm so ta alegrá ku nan kasamentu.

¹³ Manera nos a lesa anteriormente, bosnan den shelu lo kanta: ‘Laga nos alegrá i keda masha kontentu i duna [Yehova] gloria, pasobra e ora pa e kasamentu di e Lamchi a yega, i su brùit a prepará su mes kaba pa e kasamentu.’ (Rev. 19:6, 7) Awor, kiko di Yehova su sirbidónan riba tera? Nan tambe lo selebrá?

14. Ken ta “e bírgennan” ku Salmo 45 ta papia di dje?

¹⁴ Lesa Salmo 45:12, 14b i 15. Profeta Zakarías a bisa ku den e último dianan hende di rònt mundu lo ta kontentu di por sirbi Yehova huntu ku e restu di Israel spiritual. El a skirbi: “Den e dianan ei dies hòmber for di tur e nashonnan lo kohe bistí di un hudiu tene, bisando: ‘Laga nos bai ku boso, pasobra nos a tende ku Dios ta ku boso.’” (Zak. 8:23) Salmo 45:12 ta referí na e ‘dies hòmbernan’ simbóliko akí komo “e yu muhé di Tiro” i “e rikunan den e pueblo.” Nan ta duna e restu di e rumannan ungí regalo i ta traha duru pa apoyá nan i a la bes nan ta buska yudansa di e rumannan akí pa sirbi Yehova. Desde 1935 padilanti, e restu di e rumannan ungí a guia miónes di hende “na hustisia”: Nan a siña nan e bèrdat tokante Yehova. (Dan. 12:3) E kompañeranan leal akí di e rumannan ungí a purifiká nan mes: Nan a eliminá tur rastro di religion falsu for di nan bida. Ta p’esei Beibel ta yama e kompañeranan akí di e brùit ‘bírgen.’ Nan a dediká nan bida na Yehova i a proba ku nan ta siguidónan leal di Hesukristu, e Rei.

15. Kon e kompañeranan ‘bírgen’ ta yuda e rumannan ungí ku ainda ta riba tera?

 ¹⁵ E restu di e rumannan ungí ta masha kontentu ku e yudansa ku nan kompañeranan ‘bírgen’ ta duna nan den e trabou di prediká ‘e bon notisia di e Reino’ zelosamente den henter tera. (Mat. 24:14) No ta “e spiritu i e brùit” so “ta sigui bisa: ‘Bini!’” E hendenan ku tende e yamada ei tambe ta bisa: “Bini!” (Rev. 22:17) Sí, e ‘otro karnénan’ a tende e rumannan ungí bisa “Bini!,” p’esei nan a uni ku nan pa invitá hende di rònt mundu pa “Bini!”—Huan 10:16.

16. Ki privilegio Yehova a duna e otro karnénan?

¹⁶ E rumannan ungí ta stima nan kompañeranan i nan ta kontentu ku Yehova, Tata di e Brùidehòm, a duna e otro karnénan tambe e privilegio di alegrá ora e kasamentu di e Lamchi tuma lugá. Manera Beibel a profetisá, ku goso i alegria, e kompañeranan ‘bírgen’ ta ser hibá paden. Sí, e otro karnénan, kendenan tin e speransa di biba pa semper riba tera, lo alegrá huntu ku henter universo ora e matrimonio di e Lamchi tuma lugá den shelu. P’esei mes e buki di Revelashon ta bisa ku e “multitut grandi” ta “pará dilanti di e trono i dilanti di e Lamchi.” Nan ta rindi sirbishi sagrado na Yehova den e patio terenal di Yehova su gran tèmpel spiritual.—Rev. 7:9, 15.

17, 18. Ki benefisio e kasamentu di e Lamchi lo trese, i tata di ken Kristu lo bira durante su Reinado di Mil Aña?

¹⁷ Lesa Salmo 45:16. E kompañeranan ‘bírgen’ di Kristu su brùit selestial lo haña mas motibu ainda pa alegrá ora nan mira e benefisionan ku e kasamentu akí lo trese den e mundu nobo. Hesukristu, e Rei, lo dirigí su atenshon na tera i resusitá su “tatanan” terenal. Debí na esaki, nan lo bira su “yunan” terenal. (Huan 5:25-29; Heb. 11:35) Hesus lo nombra algun di e ‘yu’ hòmbernan akí komo “prens den henter e pais,” òf tera. I sin duda Kristu lo nombra algun di e ansianonan fiel di nos tempu tambe pa dirigí asuntu den e mundu nobo.—Isa. 32:1.

¹⁸ Durante su Reinado di Mil Aña, Kristu lo bira tata di otro hende tambe. Kon asina? Wèl, tur hende ku haña bida eterno ta haña esaki pasobra nan a pone fe den Hesus su sakrifisio di reskate. (Huan 3:16) Di e manera ei, Kristu ta bira nan “Tata Eterno.”—Isa. 9:6, 7.

19, 20. Ki efekto e susesonan asombroso registrá na Salmo 45 tin riba tur kristian berdadero djawe?

¹⁹ Lesa Salmo 45:1 i 17. No tin duda, e susesonan registrá na Salmo 45 mester interesá tur kristian. E rumannan ungí ku ainda ta riba tera ta masha kontentu ku pronto nan lo ser reuní den shelu huntu ku nan rumannan i nan Brùidehòm, Hesukristu. E otro karnénan ta sinti nan motivá pa bira mas sumiso na nan glorioso Rei. Ademas, nan ta kontentu ku nan a haña e privilegio di por ta kompañero di e rumannan ungí ku ta riba tera ainda. Despues di nan matrimonio, Kristu i su brùit lo bendishoná tera su habitantenan rikamente.—Rev. 7:17; 21:1-4.

²⁰ Sin duda, nos ta ansioso pa mira kumplimentu di e ‘bon palabranan,’ òf bon notisia, tokante e Rei di e Reino Mesiániko. Pero segun ku nos ta warda, nos ta sinti nos motivá pa sigui hasi e Rei su nòmber konosí pa asina yuda otronan “rekordá” su nòmber. Laga nos ta entre esnan ku ta “alabá,” òf onrá, e Rei “pa semper i semper.”