1. Kiko nos por hasi debí ku nos a ser kreá segun e imágen di Dios?

“E MUCHA ei ta meskos ku su tata (òf, mama).” Esaki ta un ekspreshon ku hopi bes hende sa usa pa indiká ku un mucha ta parse su mayornan òf ta reflehá sierto karakterístika di nan. I esei no ta nada straño pasobra tur yu ta heredá algu di nan tata i nan mama. Yehova, nos Tata selestial, ta e Dunador di bida. (Sal. 36:9) Komo su yunan riba tera, nos tambe ta reflehá sierto karakterístikanan di dje te na sierto grado. Por ehèmpel, debí ku nos a ser kreá segun su imágen, nos por rasoná, saka konklushon, sera i mantené amistat ku otro persona.—Gén. 1:26.

2. Kon bini Yehova por bira nos mihó Amigu?

² Yehova por ta nos mihó Amigu. Un amistat asina por ta posibel debí na Dios su amor pa nos i nos fe den dje i den su Yu. Hesus a bisa: “Dios a stima mundu asina tantu ku el a duna su Yu unigénito, pa tur ku pone fe den dje no bai pèrdí, ma haña bida eterno.” (Huan 3:16) Nos tin ehèmpel di hopi persona ku tabatin bon relashon ku Yehova. Laga nos wak kiko nos por siña for di dos di nan.

3, 4. Dikon Abraham su amistat ku Yehova tabata distinto for di e relashon ku su desendientenan tabatin ku Yehova?

³ Yehova a referí na Abraham, e patriarka i tata di e israelitanan, komo “mi amigu.” (Isa. 41:8) Na 2 Krónikanan 20:7 tambe  Beibel ta yama Abraham amigu di Dios. Kon bini e hòmber fiel ei por tabatin un bon relashon asina ku su Kreador? Esei ta pasobra Abraham a pone fe den Yehova.—Gén. 15:6; lesa Santiago 2:21-23.

⁴ Na prinsipio, Abraham su desendientenan, kendenan a bira e nashon di Israel di antigwedat, tambe tabatin Yehova komo nan Tata i Amigu. Pero lamentablemente, nan a pèrdè nan amistat ku Dios. Kon bini? Esei ta pasobra nan no a sigui pone fe den e promesanan di Yehova.

5, 6. (a) Kon bini Yehova a bira bo Amigu? (b) Ki preguntanan nos mester hasi nos mes?

⁵ Mas bo siña konosé Yehova, mas bo fe den dje ta oumentá i mas bo ta stim’é. Laga nos ban bèk na e tempu ku bo a komprondé ku Dios ta un Persona real, esta, un persona ku bo por sera un amistat íntimo kuné. Bo a haña sa tambe ku nos tur a nase den piká debí na e desobedensia di Adam. I bo a komprondé ku humanidat en general ta alehá for di Dios. (Kol. 1:21) Despues bo a komprondé ku nos amoroso Tata selestial no ta un persona ku ta leu for di nos i ku no ta interesá den nos. I ora nos a siña ku Yehova a sakrifiká su yu pa nos i a pone fe den e sakrifisio ei, nos a kuminsá kultivá un amistat ku Dios.

⁶ Segun ku nos ta reflekshoná riba tur loke nos a siña di Yehova, nos mester puntra nos mes: ‘Mi amistat ku Dios ta birando mas estrecho? Mi ta konfia plenamente den mi Amigu stimá, Yehova? Mi amor p’e ta oumentando mas i mas?’ Un otro persona di pasado ku tabatin un amistat será ku Yehova tabata Gideon. Laga nos wak kiko nos por siña for di su ekselente ehèmpel pa nos por imit’é.

7-9. (a) Ki eksperensia remarkabel Gideon tabatin, i kiko tabata resultado di esei? (Wak e promé plachi.) (b) Kon nos por bira amigu di Yehova?

⁷ Hues Gideon a sirbi Yehova durante un tempu difísil despues ku e nashon di Israel a drenta e Tera Primintí. Huesnan kapítulo 6 ta konta ku un angel di Yehova a bishitá Gideon na Ofra. E tempu ei, nan bisiñanan, esta e madianitanan, tabata un berdadero menasa pa Israel. P’esei, Gideon no tabata bati trigu den aire liber ma den baki-di-pèrs-wendrùif; asina, tabata fásil p’e kore skonde e trigu balioso. Gideon a keda sorprendí ora e angel a aparesé na dje i a yam’é “guerero balente.” P’esei, Gideon a puntra e angel si Yehova, kende a saka e israelitanan for di Egipto, realmente lo a bai yuda nan atrobe. Papiando den nòmber di e Kreador, e angel a primintí Gideon ku Yehova lo a yud’é.

⁸ Gideon tabata ke sa kon lo e por a “libra Israel for di man di Madian.” El a haña un kontesta masha kla: “Siguramente lo mi ta ku bo, i lo bo derotá Madian komo si fuera ta ún hòmber so.” (Hues. 6:11-16) Sin duda, Gideon lo tabata ke sa kon esei lo a tuma lugá presis, i p’esei el a pidi Dios un señal. For di e kòmbersashon akí nos por komprondé ku Gideon no a duda ningun momento so ku Yehova ta un Persona real.

⁹ Loke a sosodé despues a fortalesé Gideon su fe i a hal’é mas serka Dios. Gideon a prepará un kuminda i a sirbi e angel. E angel a sende un kandela milagrosamente ku e punta di su garoti i a kima e kuminda kompletamente. E ora ei, Gideon a komprondé ku en bèrdat ta Yehova a manda e angel. P’esei, tur spantá Gideon a sklama: “Ai, SEÑOR Dios! Pasobra awor mi a mira e angel di SEÑOR kara-kara.” (Hues. 6:17-22) E eksperensia ei a afektá Gideon su amistat ku Yehova? Di ningun manera! Al kontrali, esaki a pone Gideon sintié na pas ku Dios. Nos por komprondé esaki for di e nòmber ku Gideon a duna e altar ku el a traha na e sitio ei; el a yam’é  “Jehovah-shalom” (NW), ku ta nifiká ‘Yehova ta Pas.’ (Lesa Huesnan 6:23, 24) Si nos ta meditá riba loke Yehova ta hasi pa nos tur dia, nos ta realisá ku e ta un berdadero Amigu. I si nos ta hasi orashon regularmente na Dios, mas nos ta sinti nos na pas kuné i nos amistat kuné lo bira mas fuerte.

10. Segun Salmo 15:3 i 5, kiko ta algun rekisito ku nos tin ku kumpli kuné pa nos por ta amigu di Yehova?

¹⁰ Sinembargo, pa nos por bira amigu di Yehova, tin sierto rekisitonan ku nos tin ku kumpli kuné. Salmo 15 ta un kantika den kua David a indiká kiko nos tin ku kumpli kuné pa nos por ‘biba den e tabernakel di Yehova,’ esta, pa nos por ta amigu di Dios. (Sal. 15:1) Laga nos enfoká riba dos di e rekisitonan ei: Nos mester evitá kalumnia i nos mester komportá nos mes na un manera onesto den tur kos. David a bisa ku un persona ku ke biba den e tabernakel di Yehova no mester “kalumniá ku su lenga” ni “aseptá plaka pasá bou di mesa kontra hende inosente.”—Sal. 15:3, 5.

11. Dikon nos mester evitá kalumnia?

¹¹ Den un otro salmo, David a duna e spièrtamentu akí: “Warda bo lenga di maldat.” (Sal. 34:13) Si nos no sigui e konseho akí, nos ta daña nos relashon ku nos Tata selestial. De echo, kalumnia ta un marka di identifikashon di Satanas, Yehova su gran enemigu. E palabra “Diabel” ta derivá for di un palabra griego ku ta nifiká “kalumniadó.” Pues, pa nos por tin un bon relashon ku Yehova, nos mester wak bon kiko nos ta bisa di otro hende. Nos mester wak spesialmente nos aktitut pa ku ruman hòmbernan nombrá den kongregashon.—Lesa Hebreonan 13:17; Hudas 8.

12, 13. (a) Dikon nos mester ta onesto den tur kos? (b) Ki efekto nos onestidat por tin riba otro hende?

¹² Sirbidónan di Yehova ta konosí pa nan onestidat. Apòstel Pablo a skirbi: “Sigui hasi orashon pa nos, pasobra nos tin e konfiansa ku nos tin un konsenshi limpi, i nos ke komportá nos mes na un manera onesto den tur kos.” (Heb. 13:18) Komo ku nos ta determiná pa “komportá nos mes na un manera onesto den tur kos,” nos no ta probechá di nos rumannan den fe. Por ehèmpel, si tin un ruman ta traha pa nos, nos ta sòru di trat’é onestamente i pag’é manera nos a akordá kuné. Debí ku nos ta kristian, nos ta trata nos trahadónan i tur otro hende onestamente. I si nos ta traha pa un kompañero kristian, nos no ta probechá di e ruman, eksigiendo p’e duna nos un trato preferensial.

¹³ Hopi bes hende ku no ta Testigu di Yehova ta ekspresá nan apresio pa nos onestidat. Por ehèmpel, un direktor di un kompania grandi di konstrukshon a ripará ku Testigunan ta kumpli ku nan palabra. El a bisa: “Semper boso ta kumpli ku loke boso a primintí.” (Sal. 15:4) Un kondukta asina ta yuda nos mantené nos amistat ku Yehova. Es mas, e ta duna alabansa na nos amoroso Tata selestial.

14, 15. Kon nos por yuda hende ku nos topa den sirbishi bira amigu di Yehova?

¹⁴ Aunke vários hende ku nos ta topa den sirbishi ta kere ku Dios ta eksistí, hopi di nan no ta konsider’é komo nan mihó Amigu. Kon nos por yuda nan? Wak e instrukshonnan ku Hesus a duna 70 di su disipelnan ora el a manda nan bai prediká dos dos: “Unda ku boso drenta un kas,  bisa promé: ‘Pas sea ku e kas akí.’ I si tin un amigu di pas einan, boso pas lo keda riba dje. Ma si no tin, boso pas lo bini bèk serka boso.” (Luk. 10:5, 6) Si nos ta amigabel, nos por atraé hende na e bèrdat. Ora nos topa hende ku ta trata nos malu den sirbishi, nos amabilidat por pone ku e ta kalma i ta mas dispuesto pa tende nos otro biaha.

¹⁵ Ora nos topa hende masha religioso òf ku ta sigui tradishonnan religioso falsu, nos ta keda amigabel i demostrá un aktitut pasífiko. Nos ta ekstendé un bonbiní kaluroso na tur hende ku ta asistí na nos reunionnan, spesialmente na esnan ku no ta kontentu ku e mundu djawe i ku ke siña mas tokante e Dios ku nos ta adorá. Artíkulonan di e seri “Beibel Ta Kambia Bida di Hende” ta kontené bunita ehèmpel di personanan asina.

16. Den ki sentido nos por ta Yehova su amigu i tambe su “kompañero di trabou”?

¹⁶ Hopi bes, hende ku ta traha huntu ta bira bon amigu di otro. Tur hende ku ta dediká na Yehova tin e privilegio di ser konsiderá komo su amigu i su “kompañero di trabou.” (Lesa 1 Korintionan 3:9.) Segun ku nos ta partisipá den e trabou di prediká i di hasi disipel, nos ta siña mas di e maravioso kualidatnan di nos Tata selestial. Nos ta mira tambe kon su spiritu santu ta yuda nos kumpli ku nos asignashon di prediká e bon notisia.

17. Den ki manera e alimento spiritual ku nos ta risibí na nos asamblea- i kongresonan ta demostrá ku Yehova ta nos Amigu?

¹⁷ Mas nos partisipá den e trabou di hasi disipel, mas estrecho nos amistat ku Yehova ta bira. Por ehèmpel, nos ta mira kon Yehova ta evitá ku opositornan ta para e trabou. Pensa riba e último añanan. Bo no ta mira bon kla kon Dios ta guia nos? Nos ta keda asombrá di e manera ku e ta sigui perkurá kuminda spiritual na abundansia pa nos. Nos asamblea- i kongresonan ta demostrá ku nos amoroso Tata ta komprondé kiko ta nos problemanan i kiko nos tin mester. Den un karta ku un famia a ekspresá nan apresio pa un kongreso, nan a skirbi: “E programa a ègt konmové nos kurason. Nos a sinti kuantu Yehova ta stima kada un di nos i ku e ke pa nos tin éksito.” Despues ku un pareha kasá di Alemania a asistí na un kongreso spesial na Irlanda, nan a ekspresá nan apresio pa e manera kaluroso ku e rumannan a risibí nan i trata nan einan. Ademas, nan a bisa: “Pero e personanan ku mas nos ta gradisí ta Yehova i su Rei Hesukristu. Nan a invitá nos pa forma parti di un pueblo ku realmente ta uní. E pueblo di Yehova no ta djis papia tokante union; nos ta ègt disfrutá di esaki tur dia. Nos eksperensianan en konekshon  ku e kongreso na Dublin semper lo rekordá nos ku nos tin e presioso privilegio di por sirbi nos gran Dios huntu ku boso tur.”

18. Ki preguntanan relashoná ku nos komunikashon ku Yehova nos mester hasi nos mes?

¹⁸ Un amistat ta bira mas estrecho ora tin bon komunikashon. Awendia, hende ta usa retnan sosial i mensahenan via telefòn selular masha hopi pa komuniká. Pero kon ta bai ku nos komunikashon ku Yehova, nos mihó Amigu? Ta bèrdat ku e ta “skucha orashon.” (Sal. 65:2) Pero kuantu biaha nos ta tuma inisiativa pa papia kuné?

19. Kiko por yuda nos si nos tin difikultat pa habri nos kurason pa nos Tata selestial?

¹⁹ Algun sirbidó di Dios tin problema pa habri nan kurason i ekspresá nan emoshonnan di mas profundo. No opstante, ta esei ta loke Yehova ke pa nos hasi ora nos ta hasi orashon. (Sal. 119:145; Lam. 3:41) Si nos tin difikultat pa ekspresá nos sintimentunan, tin yudansa pa nos. Pablo a bisa e kristiannan na Roma: ‘Pasobra nos no sa kiko nos mester pidi den orashon, e spiritu mes ta boga pa nos ora nos ta keña sin ekspresá palabra. Ma esun ku ta listra kurason sa kiko e spiritu ke, pasobra e spiritu ta boga di akuerdo ku e boluntat di Dios pa e santunan.’ (Rom. 8:26, 27) Si nos ta meditá riba e palabranan registrá den e bukinan di Beibel manera Yòb, Salmo i Proverbionan, nos ta siña ekspresá nos sintimentunan di mas profundo na Yehova.

20, 21. Ki konsuelo e palabranan di Pablo na Filipensenan 4:6 i 7 ta duna nos?

²⁰ Ora nos haña nos ku situashonnan angustioso, laga nos hasi kaso di e konseho ku Pablo a duna e Filipensenan. El a bisa nan: “No sea anshá tokante nada; mas bien, den tur kos, pa medio di orashon i súplika huntu ku gradisimentu, laga Dios sa kiko ta boso petishonnan.” Ora nos tin un bon komunikashon asina ku nos mihó Amigu, nos por haña berdadero konsuelo pasobra Pablo a sigui bisa: “E pas di Dios ku ta surpasá tur komprondementu lo protehá boso kurason i boso mente pa medio di Kristu Hesus.” (Flp. 4:6, 7) Laga nos semper ta gradisidu pa e “pas di Dios” ku realmente ta protehá nos kurason i mente.

²¹ Orashon ta yuda nos kultivá un amistat ku Yehova. Pues, laga nos “hasi orashon konstantemente.” (1 Tes. 5:17) E artíkulo akí tambe ta yuda nos fortalesé e bunita amistat ku nos tin ku Dios i nos determinashon pa kumpli ku su rekisitonan. Ademas, laga nos tuma tempu pa meditá riba e bendishonnan ku nos ta disfrutá di dje pasobra Yehova realmente ta nos Tata, nos Dios i nos Amigu.