1, 2. (a) Di ki manera miembronan di un famia por ta distinto for di otro? (b) Kua ta algun manera ku hende por haña e bèrdat?

TA YEHOVA a instituí e areglo di famia. (Efe. 3:14, 15) Sinembargo, asta si nos ta di mesun famia, nos sirkunstansia i personalidat no ta meskos. Podisé abo a krese huntu ku bo mayornan. Den kaso di otronan kisas esei tabata distinto ya ku nan mayornan a muri debí na malesa, aksidente òf un otro tragedia. Tin hende ku no sa mes ken ta nan mayornan.

² Komo adoradónan di Yehova, nos tambe ta forma un famia, pero no ta nos tur a haña e bèrdat na mesun manera. Por ehèmpel, kisas manera algun hende sa bisa, abo ‘a lanta den e bèrdat,’ i bo mayornan a inkulká prinsipionan bíbliko den bo. (Deu. 6:6, 7) Òf kisas bo ta un di e míles di hendenan ku a haña e bèrdat mediante e trabou di prediká.—Rom. 10:13-15; 1 Tim. 2:3, 4.

3. Kiko tur hende tin en komun?

³ Apesar di e faktornan ku nos a kaba di menshoná, tin sierto kosnan ku nos tur tin en komun. Debí ku Adam a desobedesé Yehova, nos tur a heredá imperfekshon, piká i morto for di dje. (Rom. 5:12) No opstante, komo adoradónan berdadero, korektamente  nos por yama Yehova “nos Tata.” P’esei, den pasado, e pueblo skohí di Dios a ekspresá e palabranan na Isaías 64:8, ku ta bisa: “O SEÑOR, abo ta nos Tata.” Es mas, Hesus a kuminsá su orashon modelo ku e palabranan akí: “Nos Tata ku ta den shelu, bo nòmber sea santifiká.”—Mat. 6:9.

4, 5. Ki faktornan nos lo analisá pa nos oumentá nos amor pa nos Tata, Yehova?

⁴ Yehova, nos Tata selestial, ta duna hende ku ta invoká su nòmber ku fe e kuido i protekshon ku nan tin mester. Refiriendo na un adoradó berdadero, Yehova a bisa: “Pasobra el a stima mi, p’esei lo mi libr’é; lo mi proteh’é, pasobra e konosé mi nòmber.” (Sal. 91:14) Sí, Yehova ta libra su pueblo na un manera amoroso for di nan enemigunan i ta protehá nan pa nan no kaba ku nan.

⁵ Awor, laga nos analisá tres faktor importante pa asina oumentá nos amor pa nos Tata selestial: (1) Nos Tata ta perkurá pa nos, (2) Yehova ta protehá nos i (3) Yehova ta nos mihó Amigu. Segun ku nos ta analisá e faktornan akí, ta bon pa nos meditá riba nos relashon ku Yehova i riba maneranan ku nos por onr’é komo nos Tata. Ta bon tambe pa nos reflekshoná riba e bendishonnan ku Yehova ta primintí hende ku hala serka dje.—Sant. 4:8.

6. Dikon nos por bisa ku Yehova ta Dunador di “tur don ku ta bon”?

⁶ Disipel Santiago a skirbi: “Tur don ku ta bon i tur regalo perfekto ta bini djariba; pues, nan ta baha for di e Tata di e lusnan selestial.” (Sant. 1:17) Bida riba su mes ta un regalo maravioso ku nos a risibí di Dios. (Sal. 36:9) Anto si nos usa nos bida pa hasi su boluntat, nos lo disfrutá di hopi bendishon awor i di bida eterno den futuro. (Pro. 10:22; 2 Ped. 3:13) Pero kon esei ta posibel siendo ku nos tur a heredá imperfekshon, piká i morto for di Adam?

7. Kon Dios a habri kaminda pa nos por tin un bon relashon kuné?

⁷ Definitivamente Yehova ta e Gran Perkurador den hopi manera ku nos no por ni imaginá. Su bondat inmeresí ta motiv’é pa sali na nos defensa. Por ehèmpel, ta bèrdat ku nos tur a heredá imperfekshon for di Adam i ta hasi piká. (Rom. 3:23) No opstante, debí na Yehova su amor, el a tuma inisiativa pa habri kaminda pa nos por tin un bon relashon kuné. Kon el a hasi esei? Apòstel Huan a skirbi: “Pa medio di esaki Dios a revelá e amor ku e tin pa nos: Dios a manda su Yu unigénito na mundu pa nos por haña bida pa medio di dje. E amor ei ta nifiká esaki: no ta nos a stima Dios, sino ta é a stima nos i a manda su Yu komo un sakrifisio di rekonsiliashon pa nos pikánan.”—1 Huan 4:9, 10.

8, 9. Kon Yehova a demostrá den tempu di Abraham ku Isak ku e ta e Gran Perkurador? (Wak e promé plachi.)

⁸ Alrededor di aña 1893 promé ku Kristu, un suseso profétiko a revelá te kon leu Yehova lo a bai pa hende obediente por risibí bida eterno. Hebreonan 11:17-19 ta splika: “Pa medio di fe Abraham, ora el a ser poné na prueba, na moda di papia, a ofresé Isak; e hòmber ku gustosamente a risibí e promesanan tabata kla pa sakrifiká su úniko yu, aunke Dios a bis’é: ‘Esnan ku lo ta yamá “bo desendientenan” lo bini pa medio di Isak.’ Ma el a rasoná ku Dios por a lanta su yu asta for di morto; i ta for di morto el a risibié simbólikamente.” Ta fásil pa mira e paralelo: Meskos ku Abraham tabata dispuesto pa sakrifiká su yu, Yehova a sakrifiká su yu boluntariamente pa reskatá humanidat.—Lesa Huan 3:16, 36.

⁹ Isak lo a keda masha kontentu ora ku e no mester a muri mas komo un sakrifisio. Sin duda el a keda masha gradisidu ku Yehova a perkurá un otro sakrifisio na su lugá: un chubatu di karné ku a pega den un  pida mondi-será. (Gén. 22:10-13) P’esei, no ta nada straño ku Abraham a yama e lugá ei “Jehovah-jireh” (NW), ku ta nifiká Yehova “Lo Proveé.”—Gén. 22:14.

10, 11. Ken awe ta enkabesá e “enkargo di rekonsiliashon,” i kon nan ta hasi esei?

¹⁰ Ora nos meditá riba tur loke Yehova a perkurá pa nos, nos ta realisá tambe ku Hesus a hunga un papel masha importante den esaki. Pablo tambe a realisá esei, i el a skirbi: “Na e konklushon akí nos a yega: ún hende a muri pa tur, pasobra tur hende a muri kaba; i el a muri pa tur, pa esnan ku ta biba no biba mas pa nan mes, ma pa esun ku a muri pa nan i a ser lantá for di morto.”—2 Kor. 5:14, 15.

¹¹ Komo ku e kristiannan den promé siglo tabata stima Dios i tabata apresiá e privilegio di por sirbié, nan a aseptá e “enkargo di rekonsiliashon” ku entusiasmo. Nan trabou di prediká i di hasi disipel a habri kaminda pa hende sinsero por a rekonsiliá ku Dios, disfrutá di su amistat i ku tempu bira su yunan. Awe, sirbidónan ungí di Yehova ta kumpli ku e mesun enkargo. Loke nan ta logra komo embahador di Dios i di Kristu ta hasi posibel ku hende ku ta dispuesto pa aseptá e bèrdat por hala serka Yehova i bira su sirbidó.—Lesa 2 Korintionan 5:18-20; Huan 6:44; Echo. 13:48.

12, 13. Kon nos por demostrá ku nos ta apresiá tur loke Yehova ta hasi pa nos?

¹² Apresio pa Yehova, e Gran Perkurador, ta motivá tur kristian ku tin speransa di biba riba tera pa semper pa partisipá huntu ku e ungínan den e trabou di prediká e Reino. Den e trabou akí, nos ta hasi uso di Beibel, un otro maravioso provishon di Dios. (2 Tim. 3:16, 17) Ora nos ta hasi bon uso di Beibel den sirbishi, nos ta duna otro hende e oportunidat di haña bida eterno. Pa yuda nos den e trabou akí, nos tur ta dependé riba un otro provishon di Yehova: su spiritu santu. (Zak. 4:6; Luk. 11:13) Tur edishon di e Anuario di Testigunan di Yehova ta mustra ku e resultadonan di e trabou di prediká ta masha impreshonante. Ta un onor pa partisipá den e trabou akí ku ta duna alabansa na nos Tata i Perkurador!

¹³ Mirando tur loke Yehova a perkurá pa nos, ta bon pa nos kada un puntra nos mes: ‘Mi ta hasiendo tur loke mi por den sirbishi pa mustra Yehova kuantu mi ta apresiá tur loke el a hasi i ta hasi pa mi? Den ki maneranan mi por mehorá i bira un mihó predikadó di e bon notisia?’ Un manera ku nos por mustra nos apresio pa e maravioso provishonnan di Yehova ta di sigui pone e Reino na promé lugá den nos bida. Si nos hasi esei, Yehova lo sòru pa nos haña tur loke nos tin mester. (Mat. 6:25-33) Yehova su amor ta motivá nos pa hasi tur loke nos por pa agrad’é i hasi su kurason kontentu.—Pro. 27:11.

14. Kon Yehova a demostrá di ta e Libertador di su pueblo?

¹⁴ Salmista David a kanta: “Ami ta afligí i den nesesidat; sinembargo, Señor [Yehova] ta kòrda riba mi. Bo ta esun ku ta yuda mi i ta libra mi.” (Sal. 40:17) Bes tras bes, Yehova a demostrá di ta e Libertador di su pueblo komo grupo, spesialmente ora nan enemigunan tabata persiguí nan severamente. Nos ta masha gradisidu pa e yudansa ku Yehova ta perkurá na momentonan asina i tambe pa tur e provishonnan spiritual ku e ta perkurá konstantemente pa nos.

15. Duna un ehèmpel ku ta mustra kon un tata ku ta stima su yu ta hasi esfuerso pa proteh’é.

¹⁵ Un tata ku ta stima su yunan no solamente ta perkurá pa nan ma ta hasi  esfuerso tambe pa protehá nan. Si nan ta den peliger, mesora e ta purba di reskatá nan. Un ruman hòmber, por ehèmpel, ta kòrda un insidente spesífiko ku a tuma lugá tempu ku e tabata hopi chikitu. El a konta ku un dia despues di sirbishi, bayendo kas, e i su tata mester a krusa un riu chikitu. Pero komo ku e mainta ei áwaseru a kai duru, e nivel di awa a subi, i e úniko manera pa krusa e riu tabata di bula di un piedra grandi pa otro. E ruman hòmber tabata dilanti di su tata. Ora e tabata bula di un piedra pa otro, el a pèrdè balansa i kai den e riu i a bai bou di awa dos biaha. El a keda masha kontentu ora su tata a gar’é na su skouder i asina evitá ku lo el a hoga. Di mes manera, nos Tata selestial ta libra nos for di e mundu malbado akí i for di su gobernante, Satanas. Sin duda Yehova ta e mihó Persona ku por protehá nos.—Mat. 6:13; 1 Huan 5:19.

16, 17. Kon Yehova a yuda i protehá e israelitanan ora nan tabata bringa ku e amalekitanan?

¹⁶ Na aña 1513 promé ku Kristu, Yehova a reskatá e israelitanan for di sklabitut na Egipto i a protehá nan milagrosamente segun ku nan tabata krusa Laman Kòrá. Durante e susesonan ku a sigui tambe Yehova a demostrá su amor na nan i a protehá nan. Despues di a kana den desierto den direkshon di Seru Sinaí, e nashon a yega Refidim.

¹⁷ Mirando loke Beibel ta profetisá na Génesis 3:15, nos por imaginá nos mes kon loko Satanas tabata pa haña un chèns p’e ataká e israelitanan ku den su bista a parse di ta indefenso. El a hasi esaki usando e amalekitanan, kendenan tabata enemigu di e pueblo di Dios. (Num. 24:20) Awor, kon Yehova a usa kuater hòmber fiel—Hosue, Moises, Aron i  Hur—pa protehá su pueblo? Segun ku Hosue tabata bringa kontra e amalekitanan, Moises, Aron i Hur tabata riba un seritu den serkania. Tanten ku Moises su mannan tabata na laira, Yehova tabata yuda e israelitanan vense nan enemigunan. Ora Moises su mannan tabata kansa, Aron ku Hur tabata wanta nan na laira. Pues, ta ku Yehova su yudansa i protekshon, “Hosue a derotá Amalek i su pueblo.” (Éks. 17:8-13) Despues, Moises a traha un altar einan i a yam’é “Jehovah-nissi,” ku ta nifiká Yehova ta mi Refugio (NW).—Éks. 17:14, 15.

18, 19. Kon Dios ta protehá su sirbidónan den nos tempu?

¹⁸ Yehova ta protehá hende ku ta stim’é i obedes’é. Meskos ku e israelitanan na Refidim, ora nos enemigunan ta ataká nos, nos ta akudí na Yehova pa protekshon. Hopi bes el a yega di protehá nos komo grupo, i yuda nos keda leu for di gara di Satanas. Pensa riba e hopi okashonnan ku Dios a protehá nos rumannan ku a haña nan ku persekushon pasobra nan a mantené nan neutralidat kristian. Esaki a sosodé, por ehèmpel, na Alemania i na otro paisnan ora e nazinan tabata na poder den dékada di 1930 pa prinsipio di añanan 1940. Ora nos lesa i meditá riba e historianan di bida i e relatonan den nos Anuario ku ta mustra kon Yehova a protehá nos rumannan den tempu di persekushon, nos konfiansa den Yehova, kende ta nos Refugio, ta bira mas fuerte.—Sal. 91:2.

¹⁹ Ademas, Yehova ta usa su organisashon i publikashonnan ku esaki ta produsí pa duna nos rekordatorionan amoroso pa protehá nos. Pensa kon e rekordatorionan akí a protehá nos den e último añanan. Segun ku e mundu akí ta sigui bira mas i mas opseshoná ku sèks, alkohòl i pornografia, Yehova ta duna nos rekordatorionan oportuno i yudansa práktiko pa nos por keda alerta pa peligernan moral. Resientemente, por ehèmpel, nos Tata selestial a konsehá nos pa evitá mal kompania via retnan sosial. *—1 Kor. 15:33.

20. Ki protekshon i guia nos ta haña mediante e kongregashon kristian?

²⁰ Kon nos por demostrá ku nos ta personanan realmente ‘siñá’ pa Yehova? Kumpliendo ku su mandamentunan kuidadosamente. (Isa. 54:13) Nos kongregashonnan ta lugánan safe kaminda nos ta haña guia i protekshon, pasobra einan tin hòmbernan fiel ku ta duna nos yudansa i konseho bíbliko. (Gal. 6:1) Sí, Yehova ta usa e ‘regalonan den forma di hende’ akí pa kuida nos ku amor. (Efe. 4:7, 8) Kon nos mester reakshoná na nan guia? Nos mester ta obedesidu i sumiso, i Yehova lo bendishoná nos.—Heb. 13:17.

21. (a) Kiko nos mester ta determiná pa hasi? (b) Kiko e siguiente artíkulo ta splika?

²¹ Laga nos ta determiná pa semper sigui guia di spiritu santu i asina someté nos mes na nos Tata selestial. Ademas, nos tin ku meditá riba e bida di su Yu, Hesukristu, kende su ehèmpel eksepshonal nos ta hasi esfuerso pa imitá. Komo ku e tabata obedesidu te na morto, Yehova a rekompens’é rikamente. (Flp. 2:5-11) Si nos ta konfia den Yehova ku henter nos kurason, Yehova lo bendishoná nos tambe. (Pro. 3:5, 6) P’esei, laga nos semper dependé riba Yehova pasobra no tin otro persona ku por perkurá pa nos ni protehá nos mihó kuné. Pues, ta un goso i privilegio pa sirbié! Nos amor pa Yehova lo sigui krese segun ku nos ta meditá riba e di tres faktor ku ta demostrá ku nos Tata ta interesá den nos—su amistat. E siguiente artíkulo ta splika dikon Yehova ta nos mihó Amigu.