1, 2. (a) Ki problemanan hopi famia ta konfrontá, i ki preguntanan ta surgi? (b) Kon mayor- i yunan por ta mihó prepará pa e posibel desafionan ku behes ta trese kuné?

TA MASHA doloroso ora nos realisá ku nos mayornan, kendenan un tempu tabata yen di vigor i independiente, no por perkurá pa nan mes mas. Kisas un di nan a kai kibra hep, a bira desorientá i ta kana dual òf tin un malesa grave. Podisé nos mayornan tambe ta haña masha difísil pa aseptá ku nan no por ta independiente mas debí na nan salú i otro sirkunstansianan. (Yòb 14:1) Kiko nos por hasi pa yuda? Kon nos por kuida nan?

² Un artíkulo ku ta papia tokante kuido pa hende grandi ta bisa: ‘Aunke ta difísil pa papia tokante e desafionan ku behes por trese kuné, famianan ku ta konsiderá e diferente opshonnan ku tin i ku ta palabrá di antemano kiko nan lo hasi si un sierto situashon presentá ta mihó prepará.’ Nos mester realisá ku nos no por evitá e desafio- i problemanan ku edat avansá ta trese kuné. P’esei, ta masha importante pa famianan prepará di antemano. Laga nos wak kon famianan por kooperá na un manera amoroso ku otro pa nan por ta prepará pa tuma desishonnan difísil tokante kuido di nan mayornan.

3. Kiko famianan lo tin ku hasi ora nan mayornan di edat mester di mas yudansa? (Wak e promé plachi.)

³ Mayoria di persona di edat avansá lo haña nan konfrontá ku e tempu ku nan no por kuida nan mes bon mas; e ora ei, nan mester di yudansa. (Lesa Eklesiástes 12:1-7.) Ora ta asina leu, mayornan i nan yunan adulto mester determiná huntu kua ta e mihó kuido ku nan lo por afòrt. Ta sabí pa reuní komo famia pa papia tokante e yudansa ku e mayornan tin mester, kon lo duna esaki i kon tur miembro di famia por kooperá. Henter e famia, spesialmente e mayornan, mester ta realístiko i ekspresá nan opinion i deseonan abiertamente. Por ehèmpel, nan por evaluá si e mayornan lo por sigui biba na kas mes si nan haña sierto yudansa. * Nan por palabrá tambe kiko kada miembro di famia por hasi pa yuda e mayornan. (Pro. 24:6) Podisé algun yu por perkurá pa e kuido diario, miéntras ku otronan por duna mas yudansa finansiero. Tur miembro di famia mester sa kiko ta su responsabilidat. Sinembargo, segun ku tempu ta pasa, un miembro su papel por kambia i nan tin ku kambia di tarea.

4. Unda miembronan di famia por haña yudansa?

⁴ Ora bo ta kuida bo mayornan, tuma tempu pa haña sa mas tantu posibel tokante nan problemanan ku salú. Si bo tata òf mama tin un malesa ku gradualmente lo bira pió, purba di haña sa kiko bo por ferwagt despues. (Pro. 1:5) Tuma kontakto ku instansianan di gobièrnu ku ta duna servisio na personanan di edat. Buska pa sa si tin kualke servisio ku por hasi bo trabou mas fásil òf yuda mehorá kalidat di kuido pa bo mayornan. Bo por sinti bo malu, tristu òf asta konfundí ora bo pensa so kon situashon di e famia lo kambia. Si ta asina, papia ku un amigu di konfiansa tokante bo preokupashonnan. Pero mas ku tur kos, deshogá bo kurason serka Yehova. E por duna bo e pas mental ku bo tin mester pa trata ku kualke situashon.—Sal. 55:22; Pro. 24:10; Flp. 4:6, 7.

5. Dikon ta bon pa buska informashon adelantá tokante kuido pa hende di edat avansá?

⁵ Ta bon pa personanan di edat i nan famia buska informashon adelantá tokante kualke kuido ku esnan di edat lo bai tin mester. Por ehèmpel, ta mas práktiko pa un mayor biba serka un yu? Òf kisas e mester bai un kas di kuido òf tin un otro opshon? Hasiendo esaki, famianan lo ta prepará pa kualke problema i doló ku behes por trese kuné. (Sal. 90:10) Lamentablemente, hopi famia no ta plania adelantá, p’esei nan ta haña nan obligá di tuma desishonnan difísil purá purá ora un problema presentá. Anto un eksperto a yega di bisa: “Esei ta e momento di mas malu pa tuma desishon.” Ora miembronan di famia mester tuma desishon den purá, e situashon por bira tenso i por surgi konflikto. Pero si nan a plania adelantá, lo ta mas fásil pa adaptá ora bini kambio.—Pro. 20:18.

6. Dikon ta bon pa famianan plania di antemano unda nan mayornan lo biba i ki kuido nan lo haña ora esaki ta nesesario?

⁶ Ta normal ku nos por sinti nos inkómodo pa papia ku nos mayornan tokante e nesesidat di hasi kambio na nan kas òf tokante e posibilidat di bai biba otro kaminda. Pero hopi famia a atmití ku esei a benefisiá nan despues. Dikon? Pasobra ta mas fásil pa nos papia di asuntunan delikado, skucha otro ku rèspèt i plania bon promé ku problema surgi. Ora miembronan di famia ta papia ku otro den un ambiente relahá i na un manera amoroso, nan por ekspresá nan opinion i preferensianan libremente i nan lo ta mas uní. Asta si e mayornan ta preferá di biba riba  nan mes, ta bon pa nan papia ku nan yunan tokante e sorto di kuido ku nan ta deseá si un dia un nesesidat surgi.

7, 8. Tokante kiko famianan mester papia i dikon?

⁷ Mayornan, ora boso ta papia ku boso famia tokante e asuntunan akí, laga nan sa presis kiko ta boso deseo, kuantu plaka boso tin i ki klase di kuido boso ta preferá. E informashon akí por yuda nan tuma desishonnan korekto si yega un momento ku boso mes no por hasi esei. I probablemente nan lo ke kumpli ku boso deseo i hasi tur loke ta na nan alkanse pa boso por sigui biba riba boso mes. (Efe. 6:2-4) Por ehèmpel, boso ta ferwagt pa un di boso yunan invitá boso pa bai biba serka dje òf boso ta preferá algu otro? Pero boso mester ta realístiko sí i rekonosé ku no ta tur miembro di famia ta pensa meskos ku boso i ku ta tuma tempu pa hende ahustá nan manera di pensa.

⁸ Ora tin bon komunikashon i bon planiamentu, nos por evitá hopi doló di kabes. (Pro. 15:22) P’esei, papia ku boso famia tokante e kuido médiko ku boso ta preferá. Ora boso ta hasi esei, kòrda papia tambe riba e puntonan menshoná den e dokumento “Apoderashon Duradero pa Kuido Médiko,” ku Testigunan di Yehova ta usa. Tur hende tin derecho di haña informashon tokante e diferente tratamentunan médiko ku tin i di disidí kiko nan ta aseptá òf rechasá. Pues, ta importante pa, di antemano, boso yena e formulario di instrukshon médiko akí ku ta indiká kiko ta boso deseonan relashoná ku kuido médiko. Ta bon tambe pa boso skohe un persona di konfiansa komo boso representante legal (si leinan di boso pais ta permití esei) i ku por tuma e desishonnan korekto si ta nesesario. Ta sabí pa tur persona enbolbí tin un kopia di e dokumentonan importante. Algun ruman di edat avansá ta warda e dokumento “Apoderashon Duradero pa Kuido Médiko” huntu ku otro dokumentonan importante, manera tèstamènt, papelnan di seguro, di banko i otro dokumentonan legal.

9, 10. Ki ora mayornan di edat avansá mester di mas yudansa di nan yunan?

⁹ Den hopi kaso, mayornan i yunan ta preferá pa e mayornan keda ku un sierto grado di independensia si nan abilidat i limitashonnan ta permití esei. Por ehèmpel, si ainda e mayornan por kushiná, limpia nan kas, usa nan remedi i komuniká ku otro hende sin ningun problema, e yunan no tin nodi di ta enbolbí den tur loke nan mayornan ta hasi diariamente. Pero si, segun ku tempu ta pasa, e mayornan no por move bon mas, no por bai hasi kompra mas òf kisas nan memoria a kuminsá bai atras, e yunan mester tuma akshon.

¹⁰ Algun di e problemanan ku behes por trese kuné ta: desorientashon, depreshon, inkontinensia (ora un hende no por wanta su orina ni su sushi), pèrdida di  oido, bista i di memoria. Algun di e problemanan akí por ser tratá, p’esei ta bon pa buska yudansa médiko asina ku nan surgi. Den situashonnan asina, kisas yunan tin ku tuma inisiativa, i podisé nan lo mester kuminsá atendé otro asuntunan personal tambe di nan mayornan. Kisas nan tin ku papia pa nan mayornan, yuda nan ku sierto dokumentonan, kore outo pa nan i yuda nan ku otro kosnan por estilo pa hasi sigur ku nan mayornan di edat ta risibí e mihó kuido posibel.—Pro. 3:27.

11. Kiko nos por hasi pa yuda mayornan di edat adaptá na kambio?

¹¹ Si bo mayornan tin algun problema króniko ku salú, kisas lo bo mester hasi algun kambio na nan bibienda òf na e kuido ku nan ta risibí. Mas chikitu e kambionan akí ta, mas fásil ta pa bo mayornan adaptá. Si bo ta biba leu for di bo mayornan, kisas ta sufisiente si un Testigu òf un bisiña pasa regularmente serka bo mayornan i laga bo sa kon ta bai ku nan. Kisas ta djis un hende nan mester pa kushiná i limpia kas pa nan. Òf podisé ta algun adaptashon chikitu mester hasi na nan kas pa nan por move, baña i hasi otro kos na un manera mas fásil i safe. Pa algun persona di edat avansá por sigui biba na kas, kisas nan mester di solamente un hende ku por yuda nan ku trabou di kas. Pero si no ta safe mas pa nan sigui biba nan so, nan mester haña yudansa permanente. Sea kual sea e situashon, ta bon pa investigá ki servisionan ta disponibel den nan área. *—Lesa Proverbionan 21:5.

12, 13. Kiko algun yu adulto ku ta biba leu for di nan mayornan ta hasi pa sigui onra i kuida nan mayornan?

¹² Yunan ku ta stima nan mayornan ta hasi tur loke ta na nan alkanse pa nan mayornan ta safe i kómodo. I ora nan sa ku nan mayornan ta bon kuidá, nan ta sinti nan trankil. Pero debí na otro obligashonnan, hopi yu no ta biba den serkania di nan mayornan. Den kasonan asina, algun yu ta usa nan fakansi pa bishitá nan mayornan, pa yuda kuida nan i hasi trabounan ku nan mayornan no por hasi mas. Algu otro ku yunan por hasi pa laga nan mayornan sa ku nan ta stima nan ta yama nan regularmente, tur dia si ta posibel, e-mail nan òf manda karta pa nan.—Pro. 23:24, 25.

¹³ Sea kual sea e kaso, nos mester plania i perkurá pa nos mayornan haña e mihó kuido diariamente. Si nos ta biba leu for di nan i nan ta Testigu di Yehova, nos por aserká e ansianonan di nan kongregashon pa konseho. I nos no mester lubidá di hasi orashon tokante e asuntu. (Lesa Proverbionan 11:14.) Asta si nos mayornan no ta Testigu, nos mester kumpli ku e mandato bíbliko ku ta bisa pa “onra bo tata i bo mama.” (Éks. 20:12; Pro. 23:22) Ta klaru ku no ta tur famia lo tuma mesun desishon. Algun ta regla un ke otro pa nan tata òf mama bin biba huntu ku nan òf mas den nan serkania. Pero, no ta tur ora esei ta posibel. Algun mayor no ke bai biba serka niun yu adulto i nan famia pasobra nan ke biba riba nan mes i no ke ta un peso pa nan yunan. Algun mayor, ku tin e rekursonan, kisas ta opta pa paga un hende pa kuida nan na nan mes kas.—Ekl. 7:12.

14. Ki problemanan e persona ku prinsipalmente ta kuida e mayornan por hañ’é kuné?

¹⁴ Den hopi famia, ta parse ku e responsabilidat di kuida mayornan di edat ta kai riba un yu so, mayoria di biaha esun ku ta biba mas serka di e mayornan. Meskos ku tur otro hende, ta un sierto kantidat di tempu i energia e yu akí tin. Pues, e mester sa kon pa pone e nesesidatnan di su propio famia i esnan di su mayornan den balansa. Ademas, su sirkunstansianan  tambe por kambia; i e ora ei, mester evaluá e asuntu atrobe. P’esei, e siguiente preguntanan ta na nan lugá: Tin un miembro di famia ku tin demasiado responsabilidat riba dje? E otro yunan por yuda un poko mas? Kisas nan por tuma turno pa kuida e mayornan?

15. Kon e yu ku ta kuida su mayornan di edat por evitá ku e ta keda agotá?

¹⁵ Ora un mayor di edat avansá konstantemente mester di yudansa, e chèns ta grandi ku esun ku ta kuid’é ta keda tur agotá. (Ekl. 4:6) Komo ku nos ta stima nos mayornan, nos ke hasi tur loke nos por pa kuida nan bon. Pero tin biaha esaki por bira demasiado pa un persona so. Esnan ku haña nan den un situashon asina mester ta realístiko i pidi yudansa. Por ta ku djis un tiki yudansa ta evitá ku mester hiba e mayornan na un kas di kuido.

16, 17. Kon yunan por sinti nan ora nan ta kuida nan mayornan di edat, i kon nan por trata ku e sintimentunan akí? (Wak tambe e kuadro “Mi Ta Kontentu Ku Mi Por Yuda Kuida Nan.”)

¹⁶ Ta tristu pa mira kon behes ta pone nos mayornan stimá sufri. Hopi biaha, esnan ku ta kuida e mayornan akí ta sinti nan tristu, angustiá, frustrá, rabiá, kulpabel i asta amargá. Tin biaha, un mayor di edat avansá por mustra falta di apresio òf bisa kosnan ku ta hasi bo doló. Si esei sosodé, bo no mester ta lihé pa sinti bo ofendí. Un eksperto riba tereno di salú mental a bisa ku ‘e mihó manera pa trata ku kualke sintimentu negativo, spesialmente si e ta laga nos sinti nos inkómodo, ta di rekonosé ku nos tin e sintimentu ei i no kulpa nos mes pa esei.’ Papia ku bo kasá, un otro miembro di famia òf un amigu di konfiansa tokante e asuntu. Kòmbersashonnan asina por yuda bo komprondé bo sintimentunan i keda balansá.

¹⁷ Por yega un tempu ku kisas no ta posibel mas pa famianan sigui kuida nan ser kerí na kas. Podisé nan lo tin ku hiba nan ser kerí un kas di kuido. Un ruman muhé ku kasi tur dia tabata bishitá su mama na un kas di kuido a bisa: ‘Mama tabatin mester di kuido 24 ora pa dia; nos no por a dun’é esei. E desishon pa hib’é un kas di kuido no tabata fásil; tabata algu masha difísil pa nos. Pero esei tabata e mihó solushon p’e, spesialmente den su último lunanan di bida, i el a komprondé esei.’

18. Di kiko personanan ku ta kuida rumannan di edat por ta sigur?

¹⁸ No tur biaha ta fásil pa kuida nos mayornan di edat avansá; e responsabilidat akí por kaba ku nos emoshonalmente. Ademas, no tin un sèt di solushon ku ta resolvé tur kaso, pasobra kada situashon ta diferente. No opstante, si nos plania bon, kooperá i komuniká bon ku otro, i riba tur kos, hasi orashon fervientemente tokante e asuntu, nos por kumpli ku nos responsabilidat di onra nos sernan kerí. Hasiendo esei, nos por tin e satisfakshon ku nan ta risibiendo e kuido i atenshon ku nan tin mester. (Lesa 1 Korintionan 13:4-8.) Mas importante ainda, nos lo tin pas mental i Yehova su bendishon.—Flp. 4:7.