1, 2. (a) Ki desishon Moises a tuma tempu ku e tabatin 40 aña di edat? (Wak e promé plachi.) (b) Dikon Moises a skohe pa biba komo un esklabo?

MOISES tabata sa kiko Egipto por a ofres’é. E tabata pertenesé na e kas real i tabata konosé e manshonnan di hende riku. El a risibí instrukshon den “tur e sabiduria di e egipsionan,” ku probablemente a inkluí arte, astronomia, matemátika i otro ramonan di siensia. (Echo. 7:22) E por a yega fásilmente na rikesa, poder i privilegio ku un egipsio komun i koriente no por a ni soña kuné!

² Apesar di esei, tempu ku Moises tabatin 40 aña di edat, el a tuma un desishon ku lo mester a sorprendé e famia real di Egipto ku a adopt’é. El a bira lomba pa tur e oportunidatnan ku Egipto a brind’é. Ta manera un egipsio komun e kier a biba? Nò, ni esei. El a preferá di biba komo un esklabo! Dikon? Pasobra Moises tabatin fe. (Lesa Hebreonan 11:24-26.) Su fe a permitié mira mas ayá di e mundu físiko rònt di dje. Komo un hòmber spiritual, Moises tabatin fe den Yehova, “Esun ku ta invisibel,” i den e kumplimentu di Dios su promesanan.—Heb. 11:27.

3. Ki tres pregunta e artíkulo akí lo kontestá?

³ Nos tambe mester wak mas ayá di loke nos ta mira ku nos wowonan literal. Nos mester ta “e tipo di hende ku tin fe.” (Heb. 10:38, 39) Pa nos fortalesé nos fe, laga nos analisá loke Hebreonan 11:24-26 ta bisa di Moises i purba di haña kontesta  pa e siguiente preguntanan: Kon e fe di Moises a motiv’é pa rechasá deseonan karnal? Ora otro hende a rechas’é, kon fe a yud’é balorá su privilegio di sirbi Yehova? I dikon Moises “tabatin su bista fihá riba e rekompensa”?

4. Kiko Moises a komprondé tokante ‘e plasernan di piká’?

⁴ Ku wowo di fe, Moises a mira ku e ‘plasernan di piká,’ esta, e supuesto bentahanan ku piká ta trese kuné, ta pasahero. Kisas otro hende a rasoná ku maske e egipsionan tabata praktiká tur sorto di idolatria i spiritismo, tòg nan nashon a krese i bira un potensia mundial, miéntras ku e pueblo di Yehova tabata esklabo! Sinembargo, Moises tabata sa ku Dios por a trese un kambio den e situashon ei. Maske por a parse ku kos tabata bai bon pa esnan ku tabata biba pa plaser, Moises tabatin fe ku hende malbado lo bai pèrdí. P’esei, e no a kai den e trampa di “gosa di e plasernan pasahero di piká.”

5. Kon nos por evitá di kai den e trampa di “gosa di e plasernan pasahero di piká”?

⁵ Kon bo por evitá di kai den e trampa di “gosa di e plasernan pasahero di piká”? Wèl, kòrda ku plaser pekaminoso no ta kos ku ta dura. Ku wowo di fe, realisá ku “mundu ta pasa bai i tambe su deseonan.” (1 Huan 2:15-17) Meditá riba kiko lo para di pekadónan ku no arepentí. Nan ta manera riba flur “ku ta slep,” i nan fin lo ta desastroso. (Sal. 73:18, 19) Ora bo sinti bo tentá pa kometé piká, puntra bo mes: ‘Ki futuro mi ke?’

6. (a) Dikon Moises a nenga “di ser yamá yu di e yu muhé di Fárao”? (b) Dikon bo ta kere ku Moises a tuma e desishon korekto?

⁶ E fe ku Moises tabatin tambe a yud’é den e karera ku el a skohe. “Pa medio di fe Moises, ora el a bira grandi, a nenga di ser yamá yu di e yu muhé di Fárao.” (Heb. 11:24) Moises no a rasoná ku lo e por a sirbi Dios komo parti di e famia real anto usa su rikesa i poder pa yuda su rumannan israelita. Mas bien, Moises a stima Yehova asina tantu ku e tabata determiná pa sirbié ku henter su kurason i alma, i ku tur su forsa. (Deu. 6:5) I su desishon a skap’é di hopi sufrimentu. Gran parti di e tesoronan di Egipto ku Moises a rechasá a bin kai den man di e israelitanan mes, despues ku nan a plùnder esakinan! (Éks. 12:35, 36) Yehova a humiá Fárao i a kaba kuné. (Sal. 136:15) En kambio, Moises sí a keda na bida i Dios a us’é pa guia i salba henter un nashon. Su bida tabatin un berdadero propósito.

7. (a) Segun Mateo 6:19-21, pakiko nos mester wak mas ayá di e futuro serkano? (b) Konta un eksperensia ku ta resaltá e diferensia entre tesoro material i tesoro spiritual.

⁷ Si bo ta un hóben ku ta sirbi Yehova, kon bo fe por yuda bo skohe loke bo ta bai hasi ku bo bida? No tin nada malu pa pensa riba futuro. Pero laga e fe ku bo tin den Dios su promesanan motivá bo pa plania pa un futuro eterno i no un futuro ku ta pasahero. (Lesa Mateo 6:19-21.) Tuma por ehèmpel, Sophie, un bailarina talentoso di balèt. Gruponan di balèt rònt Merka a ofres’é beka i oportunidat úniko pa forma un karera den nan grupo. El a atmití: “Mi a keda enkantá ku otro hende tabata atmirá mi. En realidat, mi a sinti ku mi tabata mihó ku mi pareunan. Pero mi no tabata felis.” Despues Sophie a wak e vidio Hóbennan Sa Puntra—Kiko Lo Mi Hasi ku Mi Bida? anto el a bisa: “Mi a realisá ku mundu a duna mi éksito i atmirashon di fanátiko a kambio di mi deboshon kompleto na Yehova. Mi a hasi orashon di kurason na dje, anto pone un punto final tras di mi karera di baile.” Kiko Sophie ta pensa awor di su desishon? El a bisa: “Mi no ta sinti falta di mi estilo di bida di ántes. Awe, mi ta 100 porshento felis. Mi ta traha pionero huntu ku mi esposo. Nos no tin fama, ni  nos no tin muchu kos material. Pero nos tin Yehova, vários studiante di Beibel i metanan spiritual. Mi no tin niun tiki duele.”

8. Ki konseho bíbliko por yuda un hóben disidí kiko pa hasi ku su bida?

⁸ Yehova sa kiko ta mihó pa bo. Moises a puntra: “Kiko SEÑOR bo Dios ta pidi di bo, si no ta pa teme SEÑOR bo Dios, pa kana den tur su kamindanan i stim’é, i pa sirbi SEÑOR bo Dios ku henter bo kurason i ku henter bo alma, i pa warda e mandamentunan di SEÑOR i su statutonan ku mi ta ordená bo awe pa bo mes bon?” (Deu. 10:12, 13) Si bo ta yòn ainda, skohe un karera ku lo permití bo stima Yehova i sirbié “ku henter bo kurason i ku henter bo alma.” Bo por tin sigur ku esei lo ta “pa bo mes bon.”

9. Splika dikon lo tabata difísil pa Moises kumpli ku su mishon.

⁹ Moises “a konsiderá e desonor ku el a sufri komo Ungí komo rikesa mas grandi ku e tesoronan di Egipto.” (Heb. 11:26) Aki Beibel ta referí na Moises komo e “Ungí,” den sentido ku Yehova a skohe é pa saka Israel for di Egipto. Moises tabata sa ku esaki lo tabata un mishon difísil p’e, i ku asta lo el a sufri e “desonor” òf rechaso di parti di otro hende. Un biaha kaba un israelita a puntr’é den forma di chèrchi: “Ta ken a hasi bo prens òf hues riba nos?” (Éks. 2:13, 14) Mas despues, Moises mes a puntra Yehova: “Kon anto Fárao lo skucha mi?” (Éks. 6:12) Pa Moises por a prepará su mes i soportá rechaso, el a papia ku Yehova di su miedu i preokupashonnan. Kon Yehova a yuda Moises kumpli ku su mishon?

10. Kon Yehova a kapasitá Moises pa kumpli ku su mishon?

¹⁰ Na promé lugá, Yehova a duna Moises e garantia akí: “Lo mi ta ku bo.” (Éks. 3:12) Na di dos lugá, Yehova a dun’é konfiansa dor di splik’é un aspekto di e nifikashon di su nòmber: “Lo Mi Bira Loke Mi Ke Bira.” * (Éks. 3:14, NW) Na di tres lugá, el a duna Moises poder pa hasi milager, lokual a demostrá ku en bèrdat ta Dios a mand’é. (Éks. 4:2-5) Na di kuater lugá, el a duna Moises un kompañero i bosero, esta, Aron, pa yud’é kumpli ku su mishon. (Éks. 4:14-16) Na final di Moises su bida, e tabata asina konvensí ku Dios ta kapasitá su sirbidónan pa kumpli ku kualke asignashon ku E duna nan, ku e por a bisa su susesor Hosue: “SEÑOR ta esun ku ta bai bo dilanti, e lo ta ku bo. E lo no faya bo ni bandoná bo. No tene miedu ni desmayá.”—Deu. 31:8.

11. Dikon Moises a balorá su asignashon asina tantu?

¹¹ Ku e apoyo di Yehova, Moises a balorá su mishon difísil i a konsider’é “mas grandi ku e tesoronan di Egipto.” Kon ku bai bin, e tarea di sirbi Fárao no tabata nada na komparashon ku e asignashon di sirbi e Dios Haltísimo. I kiko ser un prens na Egipto tabata na komparashon ku ser e ungí di Yehova? Moises a haña un gran rekompensa pa su bon aktitut. E tabatin un relashon masha spesial ku Yehova, kende a dun’é “gran poder” pa dirigí e israelitanan na e Tera Primintí.—Deu. 34:10-12.

12. Ki privilegionan Yehova a duna nos?

¹² Nos tambe tin un asignashon. Pa medio di Hesus, Yehova a enkargá nos ku un sirbishi, meskos ku el a hasi ku apòstel Pablo i otro kristiannan. (Lesa 1 Timoteo 1:12-14.) Nos tur tin e privilegio di prediká e bon notisia. (Mat. 24:14; 28:19, 20) Algun ta den e sirbishi di tempu kompleto. Ruman hòmbernan maduro ta sirbi otronan den kongregashon komo sirbidó ministerial i ansiano. Sinembargo, bo famianan ku no ta  Testigu i otro hende por kuestioná e balor di e privilegionan akí òf asta kritiká bo pa e sakrifisionan ku bo ta hasi. (Mat. 10:34-37) Si nan logra desanimá bo, lo bo por kuminsá puntra bo mes si ta bale la pena pa hasi tantu esfuerso asina òf si di bèrdat lo bo por kumpli ku bo asignashon. Si esei pasa ku bo, kon fe por yuda bo perseverá?

13. Kon Yehova ta kapasitá nos pa kumpli ku e asignashonnan ku e ta duna nos?

¹³ Ku fe, roga Yehova pa su sosten. Kont’é di bo miedu i di bo preokupashonnan. Al fin i al kabo, ta Yehova ta esun ku a duna bo un asignashon i lo e yuda bo kumpli kuné. Kon e ta hasi esei? Den e mesun manera ku el a yuda Moises. Na promé lugá, e ta garantisá bo: “Lo mi fortalesé bo, sí, lo mi yuda bo, sí, lo mi sostené bo ku mi man drechi di hustisia.” (Isa. 41:10) Na di dos lugá, e ta rekordá bo ku su promesanan ta konfiabel: “Di bèrdat mi a papia; di bèrdat lo mi kumpli kuné. Mi a plania esaki, siguramente lo mi hasié.” (Isa. 46:11) Na di tres lugá, e ta duna bo e “poder ku ta surpasá esun di hende” pa bo kumpli ku bo asignashon. (2 Kor. 4:7) I na di kuater lugá, pa yuda bo perseverá den bo asignashon, nos Tata amoroso ta duna bo un hermandat mundial di hende ku ta ador’é i ku ta “sigui animá otro i fortalesé otro.” (1 Tes. 5:11) Segun ku Yehova ta kapasitá bo pa bo kumpli ku bo asignashonnan, bo fe den dje lo krese i lo bo komprondé ku bo privilegionan den su sirbishi ta tesoronan mas balioso ku kualke tesoro di e mundu akí.

14. Dikon Moises tabata sigur ku lo el a haña un rekompensa?

¹⁴ Moises “tabatin su bista fihá riba e rekompensa.” (Heb. 11:26) Aunke su konosementu di futuro tabata limitá, el a laga loke e tabata sa di futuro gui’é den su desishonnan. Meskos ku su antepasado Abraham, e tabata sigur ku Yehova por resusitá morto. (Luk. 20:37, 38; Heb. 11:17-19) E speransa di risibí bendishon den futuro a yuda Moises pa e no mira e 40 añanan ku el a pasa komo fugitivo i e 40 añanan ku el a pasa den desierto komo pèrdèmentu di tempu. Maske e no tabata sa en detaye kon e promesanan di Dios lo a kumpli, ku wowo di fe e por a mira e rekompensa.

15, 16. (a) Dikon nos tin ku enfoká riba nos rekompensa? (b) Ki bendishon bou di e Reino di Dios bo ta anhelá pa risibí?

 ¹⁵ I kiko di abo? Bo ta ‘fiha bo bista riba bo rekompensa’? Meskos ku Moises, ainda nos no sa eksaktamente kon e promesanan di Dios lo kumpli. Por ehèmpel, nos “no sa ki ora [ta] e tempu stipulá” pa e tribulashon grandi dal aden. (Mar. 13:32, 33) Sinembargo, nos sa hopi mas tokante e futuro Paradeis ku Moises. Aunke nos no tin tur e detayenan, e promesanan di Dios di kon bida lo ta bou di e Reino di Dios ta sufisiente pa nos ‘fiha nos bista riba e rekompensa.’ E echo ku nos tin un imágen mental kla di e mundu nobo lo motivá nos pa buska e Reino ei promé. Dikon? Pensa riba esaki: Lo bo kumpra un kas si bo no sa kasi nada di dje? Klaru ku nò! Meskos tambe, nos lo no dediká nos bida pa kore tras di un speransa ku no ta real pa nos. Nos fe mester yuda nos haña un bista kla di kon bida bou di gobernashon di e Reino lo ta.

¹⁶ Pa bo por haña un imágen mas kla ainda di e Reino di Dios, ‘fiha bo bista’ riba bo bida den Paradeis. Usa bo imaginashon. Por ehèmpel, ora bo ta studia e bida di personahenan bíbliko ku a biba promé ku Kristu, pensa kiko lo bo por puntra nan ora ku nan resusitá. Imaginá bo kiko nan lo por puntra bo tokante bo bida durante e último dianan. Purba visualisá kon emoshoná lo bo ta ora bo topa bo antepasadonan di hopi siglo pasá i kon lo bo siña nan tokante tur loke Dios a hasi pa nan. Imaginá bo kon fasiná lo bo keda segun ku bo ta siña tokante hopi bestia salbahe dor di opservá nan den un ambiente pasífiko. Meditá riba kon lo bo haña un relashon mas íntimo ku Yehova segun ku bo ta alkansá perfekshon.

17. Kon un bista kla di nos futuro rekompensa ta yuda nos awe?

¹⁷ Un bista kla di nos rekompensa ta yuda nos pa sigui dal bai, pa mantené nos goso i pa tuma desishonnan ku mira riba nos futuro eterno. Pablo a bisa: “Si nos ta spera riba loke nos no ta mira, nos ta sigui warda ansiosamente riba dje ku perseveransia.” (Rom. 8:25) E palabranan akí ta dirigí na e ungínan, pero en prinsipio nan ta apliká na tur kristian ku tin e speransa di biba pa semper. Aunke nos no a risibí nos “rekompensa” ainda, nos fe ta asina fuerte ku nos ta sigui warda ku pasenshi riba e premio di bida eterno. Meskos ku Moises, nos no ta mira e añanan ku nos tin ta sirbi Yehova komo tempu pèrdí. Mas bien, nos ta konvensí di ku “e kosnan ku hende ta mira ta temporal, ma e kosnan ku hende no ta mira ta eterno.”—Lesa 2 Korintionan 4:16-18.

18, 19. (a) Pakiko nos tin ku lucha pa mantené nos fe fuerte? (b) Kiko nos lo analisá den e siguiente artíkulo?

¹⁸ Fe ta permití nos mira “evidensia konvisente di realidatnan ku [hende] no ta mira.” (Heb. 11:1; nota) Un hende ku ta bai tras di e kosnan di mundu no ta balorá e oportunidat di por sirbi Yehova. Pa un persona asina, tesoronan spiritual “ta bobedat.” (1 Kor. 2:14) Nos, sinembargo, ta spera di disfrutá di bida eterno i presensiá e resurekshon, kosnan ku mundu no ta mira. Meskos ku e filósofonan di e tempu di Pablo ku a bisa ku e ta ‘papia ko’i loko’ i ku e no sa nada, awe mayoria di hende ta pensa ku e speransa ku nos ta prediká ta puru fantasia.—Echo. 17:18.

¹⁹ Pa motibu ku nos ta biba den un mundu sin fe, nos tin ku lucha pa mantené nos fe fuerte. Roga Yehova pa “bo fe no debilitá.” (Luk. 22:32) Meskos ku Moises, no sera wowo pa e konsekuensianan di piká. Di otro banda, pensa riba e gran privilegio ku bo tin di sirbi Yehova i riba e speransa di biba pa semper. Pero, tin algu mas ku nos por siña for di e fe di Moises? Klaru ku sí. Den e siguiente artíkulo, nos lo analisá kon su fe a yud’é mira “Esun ku ta invisibel.”—Heb. 11:27.