1. Dikon e manera ku nos ta trata hende den sirbishi ta importante? Duna un ehèmpel. (Wak e promé plachi.)

UN PAR di aña pasá, ora un pareha kristian na Fidji tabata invitá hende pa e Konmemorashon di e Morto di Kristu, áwaseru a kuminsá kai. Nèt na momento ei, nan tabata kòmbersando ku un señora pafó di su kas. E ruman hòmber a fia e señora un paraplü i e ku su esposa a usa un otro. E pareha a keda masha kontentu ora ku nan a mira e señora na Memorial. Mas despues, e señora a bisa ku e no ta kòrda mashá di loke e Testigunan a papia kuné ora nan a bishit’é. Pero loke a impreshon’é ta e manera ku nan a trat’é, i p’esei el a bai Memorial. Kon bini e bunita resultado akí? E pareha a sigui un konseho di Hesus ku a bira masha famoso.

2. Kiko ta e Regla di Oro, i kiko nos tin ku hasi pa por sigui esaki?

² Kua konseho di Hesus e pareha a sigui? Wèl, e asina yamá Regla di Oro ku nos ta haña na Mateo 7:12, ku ta bisa: “Tur loke boso ke pa hende hasi ku boso, boso tambe mester hasi ku nan.” Awor, kiko nos tin ku hasi pa nos por sigui e konseho ei? Básikamente, nos tin ku hasi dos kos: Promé, puntra bo mes: ‘Si ami tabata den sapatu di e persona ei, kon lo mi tabata ke pa  hende trata mi?’ Di dos, hasi bo máksimo esfuerso pa trata e persona asina.—1 Kor. 10:24.

3, 4. (a) Splika dikon no ta ora nos ta trata ku nos rumannan den fe so nos mester sigui e konseho di Hesus. (b) Kiko nos lo trata den e artíkulo akí?

³ Hopi bes, nos ta sigui e konseho famoso akí di Hesus ora nos ta trata ku nos rumannan den fe. Pero ta nos rumannan so nos mester trata asina? Nò! Ora Hesus a duna e konseho akí, e tabata papiando di e manera ku nos mester trata hende en general, inkluso nos enemigunan. (Lesa Lukas 6:27, 28, 31, 35.) Awor, si asta nos enemigunan nos mester trata bon, kiko di hende ku lo ta “dispuesto pa aseptá e bèrdat ku ta hiba na bida eterno”? Nos no tin muchu mas motibu ainda pa sigui e konseho akí ora nos ta prediká na nan?—Echo. 13:48.

⁴ P’esei, laga nos trata kuater pregunta ku nos tin ku tene na mente si nos ke tin éksito den sirbishi. Ora nos ta den sirbishi, nos mester puntra nos mes: ‘Ken e persona ku mi ta papiando kuné ta? Unda mi ta papiando kuné?’ Ademas, nos por puntra: ‘Ki ora ta mihó pa papia ku hende? I kon mi mester papia ku nan?’ Manera nos lo mira, e preguntanan akí por yuda nos saka afó kon hende ku nos ta duna testimonio lo ke pa nos trata nan. Di e manera ei, nos por trata nan na e mihó manera posibel.—1 Kor. 9:19-23.

5. Ki preguntanan nos tin ku hasi nos mes?

⁵ Kada hende ku nos topa den sirbishi ta un persona riba su mes ku su propio sirkunstansianan, antesedensia i problemanan. (2 Kró. 6:29) Ora bo ta purba di kompartí e bon notisia ku un persona, puntra bo mes: ‘Si ami tabata e persona ei, kon lo mi tabata ke ser tratá? Lo mi gusta pa hende saka nan konklushon tokante mi persona òf husga mi sin ku nan konosé mi? Òf lo mi a preferá pa nan siña konosé mi komo persona?’ E preguntanan akí por yuda nos trata kada hende komo un persona riba su mes.

6, 7. Kiko nos mester hasi si un persona ku nos topa den sirbishi ta parse rabiá òf ta trata nos malu?

⁶ Ningun hende no ke tin mal nòmber. Laga nos duna un ehèmpel: Komo kristian, nos tur ta hasi nos bèst pa sigui e konseho di Beibel ku ta bisa “laga boso palabranan semper ta ku grasia.” (Kol. 4:6) Pero komo ku nos ta imperfekto, tin biaha nos ta bisa algu ku nos ta lamentá despues. (Sant. 3:2) Por ehèmpel, si nos tabatin un mal dia, por sosodé ku nos ta papia malu ku un persona. Si esei sosodé, nos lo no ke pa e persona kana bisa ku nos tin mal manera; mas bien, nos lo ke pa e komprondé ku esei no ta nos kustumber. Awor, nos tambe no mester mustra e mesun komprondementu ei pa otro hende?

⁷ P’esei, ora bo topa un persona den sirbishi ku ta parse rabiá òf ta trata bo malu, lo bo no tin ku dun’é benefisio di duda? Kisas e tin hopi preshon na trabou òf na skol? E tin problema serio ku salú? Den hopi kaso, doñonan di kas ku na promé instante a trata Testigunan di Yehova malu ta reakshoná bon ora e Testigunan trata nan ku suavedat i rèspèt.—Pro. 15:1; 1 Ped. 3:15.

8. Dikon nos mester papia ku “tur sorto di hende” tokante e mensahe di Reino?

⁸ Den sirbishi nos ta topa tur sorto di hende. Den e último añanan, esklabo fiel a publiká mas ku 60 eksperensia den E Toren di Vigilansia, den e seri “Beibel Ta Kambia Bida di Hende.” Anteriormente algun di e hendenan den e eksperensianan akí tabata ladron, buraché, miembro di gang òf adikto na droga; otronan tabata polítiko,  lider religioso, hende ku tabata kore tras di un karera òf hende ku tabatin un bida inmoral. No opstante, nan tur a tende e bon notisia, a aseptá un estudio di Beibel, a hasi kambio den nan bida i a bini den e bèrdat. P’esei, nunka nos mester asumí ku sierto hendenan lo no aseptá e mensahe di Reino. (Lesa 1 Korintionan 6:9-11.) Al kontrario, nos mester ta konsiente ku “tur sorto di hende” por bini den e bèrdat.—1 Kor. 9:22.

9. Dikon nos mester respetá kas di hende?

⁹ Hopi bes nos ta bai na kas di e hendenan pa papia ku nan. (Mat. 10:11-13) Nos kas ta importante pa nos; nos ke pa e ta un lugá kaminda nos tin nos privasidat i ta sinti nos safe. P’esei, nos ta apresiá mashá ora hende ta mustra rèspèt pa nos kas i otro propiedat ku nos tin. Pues, ora nos ta den sirbishi, nos tambe mester mustra rèspèt pa kas di otro hende.—Echo. 5:42.

10. Kon nos por evitá ku hende den sirbishi ta rabia ku nos?

¹⁰ Komo ku nos ta biba den un tempu pèstá ku krímen, hopi doño di kas no ta konfia hende straño. (2 Tim. 3:1-5) Nos tin ku tene kuidou pa nos no hasi nan mas deskonfiá. Kon asina? Wèl, suponé ku bo a yega na un kas i ta yama ma niun hende no ta sali. Podisé bo por haña gana di habri kurá, kana drenta, wak den bentana òf kana rònt di e kas pa wak unda e doño di kas ta. Un doño di kas lo gusta pa bo hasi esei? Kiko e bisiñanan lo pensa? Ta bèrdat ku nos ke hasi e trabou di prediká kabalmente. (Echo. 10:42) Sí, ta bon ku nos ta ansioso pa haña tur hende. (Rom. 1:14, 15) Pero ta sabí pa evitá tur loke por pone hende den nos teritorio rabia. Apòstel Pablo a skirbi: “Nos no ke hasi nada ku ta duna otro hende motibu pa trompeká, pa hende no kritiká nos sirbishi.” (2 Kor. 6:3) Si nos ta mustra rèspèt pa kas i otro propiedat di hende den nos teritorio, nan por sinti nan atraí na e bèrdat.—Lesa 1 Pedro 2:12.

11. Dikon nos ta keda kontentu ora otro hende ta tene kuenta ku nos programa?

¹¹ Mayoria di nos tin un bida drùk. P’esei, pa nos por kumpli ku nos obligashonnan, nos ta pone prioridat i ta plania bon kon nos ta usa nos tempu. (Efe. 5:16; Flp. 1:10) I si algu inesperá kambia nos programa, nos por sinti nos malu. P’esei nos ta apresiá mashá ora otro hende ta tene kuenta ku nos programa i ta komprondé ora nos no por dediká muchu tempu na nan. Awor, teniendo kuenta ku e konseho ku Hesus a duna na Mateo 7:12, kon nos lo por mustra rèspèt pa e hendenan ku nos ta prediká na dje?

12. Kon nos por sa ki ora ta mihó pa prediká den nos teritorio?

¹² Nos tin ku purba di saka afó ki ora ta mihó pa prediká den nos teritorio. Un manera ku nos por hasi esei ta di puntra nos mes: ‘Ki ora generalmente hende den nos teritorio sa ta na kas? Ki ora nan lo ta mas dispuesto pa skucha nos?’ Unabes nos sa kontesta pa e preguntanan ei, ta bon pa nos adaptá nos programa pa nos por prediká durante e oranan ei. Na algun parti di mundu, ta mihó pa bai di kas pa kas atardi òf atardi lat. Si esei ta e kaso kaminda bo ta biba, lo bo por ahustá bo programa pa bo por prediká tambe durante e oranan ei? (Lesa 1 Korintionan 10:24.) Nos por ta sigur ku Yehova lo bendishoná kualke sakrifisio ku nos ta hasi pa prediká durante e oranan ku ta kumbiní e hendenan den nos teritorio.

13. Kon nos por mustra rèspèt pa un doño di kas?

¹³ Kon otro nos por mustra rèspèt pa e hendenan ku nos ta prediká na dje? Por ehèmpel, ora nos haña un persona ku  ke skucha nos, nos mester dun’é un bon testimonio pero nos no mester abusá di su hospitalidat i keda papia muchu largu kuné. Podisé e doño di kas a plania pa hasi algu otro ku ta importante p’e. Si e bisa ku e ta okupá, nos por bis’é ku nos lo ta breve, i nos mester kumpli ku nos palabra. (Mat. 5:37) Na final di nos kòmbersashon, ta bon pa nos puntra e persona ki dia nos lo por bolbe serka dje. Algun publikadó tabatin bon resultado ora nan a bisa: “Mi tin gana di bolbe pa nos por sigui kòmbersá. Ta mihó mi bèl bo òf manda un mensahe promé ku mi bini?” Ora nos ta adaptá nos programa na e hendenan den nos teritorio, nos ta sigui e ehèmpel di Pablo, kende ‘no tabata buska su mes benefisio, sino mas bien di e mayoria a fin ku nan por haña salbashon.’—1 Kor. 10:33.

14-16. (a) Dikon nos mester laga e doño di kas sa kiko ta e propósito di nos bishita? Ilustrá. (b) Ki método un superintendente biahero tabatin bon resultado kuné?

¹⁴ Imaginá bo ku un dia bo ta risibí un yamada di un persona ku bo no konosé. E persona akí ta puntra bo ki tipo di kuminda bo ta gusta. Bo ta kuminsá puntra bo mes ta ken e persona akí ta i kiko e ke realmente. Pa desensia, kisas bo ta kòmbersá un ratu kuné pero despues, probablemente, bo ta terminá e kòmbersashon. Awor imaginá bo ku e persona ku ta yama ta identifiká su mes. E ta bisa bo ku e ta traha riba tereno di nutrishon i, na un manera bondadoso, e ta bisa bo ku e tin algun informashon útil pa bo. Probablemente lo bo ta mas dispuesto pa skuch’é ya ku  nos tur ta gusta pa hende laga nos sa ken nan ta i kiko ta nan propósito. Awor, kon nos por trata hende ku nos topa den sirbishi ku e mesun kortesia òf rèspèt?

¹⁵ Den hopi teritorio, nos mester laga e doño di kas komprondé bon kla kiko ta e propósito di nos bishita. Ta bèrdat ku nos tin informashon ku ta balioso pa e doño di kas. Pero imaginá bo ku bo no ta identifiká bo mes ni ta bisa kiko ta e propósito di bo bishita i ta bula kuminsá bo presentashon di e siguiente manera: “Si Señora por a solushoná un di e problemanan ku mundu ta konfrontá, kua di nan Señora lo a solushoná?” Nos sa ku e propósito di e pregunta ei ta pa saka afó kiko e persona ta pensa pa nos por kuminsá papia tokante Beibel. Sinembargo, e doño di kas lo por puntra su mes: ‘Ta ken e hende straño akí ta, i pakiko e ta hasi mi e pregunta akí?’ Pa esei no sosodé, nos tin ku sòru pa e doño di kas sintié trankil. (Flp. 2:3, 4) Kon nos por hasi esei?

¹⁶ Un superintendente biahero ta hasié asin’akí: Despues di kumindá e doño di kas i introdusí su mes, e ta bis’é: “Awe nos ta duna tur hende den e área akí e tratado akí: Bo Ke Haña Sa e Bèrdat? E ta kontestá seis pregunta ku hopi hende ta hasi. Ata bo ehemplar aki.” E ruman a bisa ku ta parse ku mayoria di hende ta sinti nan mas trankil ora nos laga nan sa kiko ta e propósito di nos bishita. Asina ta mas fásil pa kuminsá un kòmbersashon. Despues, e superintendente biahero ta puntra e persona: “Bo a yega di pensa riba un di e preguntanan akí?” Si e doño di kas skohe un pregunta, e ruman ta habri e tratado i ta trata e kontesta ku Beibel ta duna riba e pregunta ei. Si no ta asina, e ruman mes ta skohe un pregunta i sigui ku e kòmbersashon pa e doño di kas no sintié malu. Klaru ku tin hopi manera pa kuminsá un kòmbersashon. Den algun área, kisas e doñonan di kas ta ferwagt mas ku djis un saludo promé ku nos bisa kiko ta e propósito di nos bishita. Pues, si nos ke pa hende skucha nos ku smak, nos tin ku adaptá nos presentashon na nan.

17. Segun e artíkulo akí kua ta algun manera ku nos por sigui e Regla di Oro?

¹⁷ Pues, kua ta algun manera ku nos por sigui e Regla di Oro ora nos ta den sirbishi? Wèl, nos ta trata kada hende komo un persona riba su mes. Nos ta mustra rèspèt pa kas i otro propiedat di e hendenan. Nos ta hasi esfuerso pa partisipá den sirbishi ora nos tin mas chèns di haña hende na kas i ora nan tin tempu pa skucha nos. Ademas, nos ta introdusí nos mensahe na un manera ku hende den nos teritorio ta haña gana di skucha nos.

18. Kiko ta e benefisionan di trata hende den teritorio manera nos ke pa nan trata nos?

¹⁸ E echo ku nos ta trata hende den nos teritorio manera nos ke pa nan trata nos tin hopi benefisio. Sí, ora nos ta trata hende na un manera bondadoso i ta tene kuenta ku nan sintimentunan, nos ta laga nos lus bria, nos ta mustra ku nos ta sigui prinsipionan bíbliko i ta duna gloria na nos Tata selestial. (Mat. 5:16) Ademas, e manera respetuoso ku nos ta trata hende por atraé nan na e bèrdat. (1 Tim. 4:16) I sea ku hende ta aseptá e bèrdat òf nò, nos lo tin e satisfakshon ku nos ta hasiendo nos bèst pa kumpli ku nos sirbishi kabalmente. (2 Tim. 4:5) P’esei, nos tur mester imitá apòstel Pablo, kende a skirbi: “Mi ta hasi tur kos pa kousa di e bon notisia, pa mi por kompartié ku otro hende.” (1 Kor. 9:23) Pa nos logra esei, laga nos semper trata hende den sirbishi manera nos ke pa nan trata nos.