1. Kua organisashon a remplasá Israel apóstata? (Wak e promé plachi.)

YEHOVA ta esun ku a establesé e kongregashon kristian den promé siglo i ta e mes tambe a restorá adorashon berdadero den nos tempu. Manera e artíkulo anterior a mustra, e kongregashon kristian a remplasá e nashon di Israel ku a bira apóstata. E organisashon nobo akí, ku a konsistí di Kristu su promé siguidónan, a bira e organisashon ku mester a karga Dios su nòmber. Sí, nan a representá Yehova riba tera. I komo ku e organisashon nobo akí tabatin Yehova su aprobashon, e no a ser destruí na aña 70 di promé siglo ora ku Herúsalèm a ser destruí. (Luk. 21:20, 21) Den e último dianan akí, lo ta meskos. E organisashon di Yehova lo no ser destruí ora e mundu di Satanas ser eliminá pa semper. (2 Tim. 3:1) Kon nos por ta sigur di esaki?

2. Kiko Hesus a bisa tokante e “tribulashon grandi,” i kon esaki lo kuminsá?

² Relashoná ku e konklushon di e era akí, Hesus a profetisá: “Lo tin un tribulashon grandi manera no a yega di sosodé nunka, for di prinsipio di mundu te awor, i ku lo no sosodé  nunka mas tampoko.” (Mat. 24:3, 21) E tribulashon akí lo kuminsá ora Yehova usa podernan polítiko pa destruí “Babilonia e Grandi,” e imperio mundial di religion falsu. (Rev. 17:3-5, 16) Kiko lo sosodé despues?

3. Kiko lo pasa ku e pueblo di Yehova despues ku religion falsu ser destruí?

³ Despues ku religion falsu ser destruí, Satanas i su mundu lo ataká Yehova su sirbidónan. Relashoná ku “Gòg di tera di Magòg,” Beibel ta bisa: “Lo bo subi bini manera un tempestat. Lo bo ta manera un nubia ku ta tapa e tera, abo ku tur bo trupanan i hopi pueblo huntu ku bo.” Komo ku Yehova su sirbidónan no tin ehérsito militar i ta e hendenan mas pasífiko na mundu, nan lo parse di ta un blanko fásil. Pero e atake ei lo ta un fayo garafal.—Eze. 38:1, 2, 9-12.

4, 5. Kon Yehova lo reakshoná ora Satanas i su kompinchinan ataká Su pueblo?

⁴ Kon Yehova lo reakshoná ora Satanas i su kompinchinan ataká Su pueblo? E Soberano di Universo lo sali mesora na nan defensa, pasobra Yehova ta konsiderá e atake ei komo un atake kontra su persona. (Lesa Zakarías 2:8.) P’esei, mesora nos Tata selestial lo dal paso pa reskatá nos, i lo e destruí e mundu di Satanas na Armagedon, “e guera ku lo tuma lugá riba e gran dia di Dios, e Todopoderoso.”—Rev. 16:14, 16.

⁵ Profeta Yeremías a bisa ku Yehova mes lo bringa kontra e nashonnan na Armagedon. El a bisa: “‘[SEÑOR] ta drenta den huisio ku tur karni; pa loke ta e malbadonan, el a entregá nan na spada,’ SEÑOR ta deklará. Asina e SEÑOR di ehérsitonan ta bisa: ‘Ata, maldat ta bai di nashon pa nashon, i un gran tempestat lo wòrdu lantá for di e partinan mas alehá di mundu. I esnan ku SEÑOR mata riba e dia ei lo keda bentá tur kaminda, for di esun ekstremo di mundu te na e otro. Hende lo no lamentá pa nan ni rekohé nan, ni dera nan; nan lo ta manera mèst riba superfisie di tera.’” (Yer. 25:31-33) Sí, Armagedon lo pone un fin na e mundu di Satanas, pero e parti terenal di Yehova su organisashon sí lo sobrebibí.

6, 7. (a) Di unda e hendenan ku ta forma e “multitut grandi” ta bini? (b) Ki oumento tabatin e último añanan?

⁶ Awe, e parti terenal di Yehova su organisashon ta sigui krese pasobra e ta abundá ku hende ku tin Yehova su aprobashon. Beibel ta sigurá nos ku “Yehova su wowo ta riba e hustunan, i [ku] su orea ta habrí pa nan súplika.” (1 Ped. 3:12) Entre e hustunan tin “un multitut grandi” di hende ku lo “sobrebibí e tribulashon grandi.” (Rev. 7:9, 14) E sobrebibientenan akí no ta djis “un multitut” ma “un multitut grandi,” pues un kantidat inmenso di hende. Bo ta mira bo mes entre e sobrebibientenan di “e tribulashon grandi”?

⁷ Awor, di unda e hendenan ku ta forma e multitut grandi ta bini? Hesus a profetisá: “E bon notisia akí di e Reino lo ser prediká den henter e tera habitá, komo testimonio pa tur nashon, anto e fin lo yega.” (Mat. 24:14) Pues, nan ta bini di rònt parti di mundu; nan ta ser reuní pa medio di e trabou di prediká, e trabou prinsipal di e organisashon di Dios. Debí na e trabou mundial akí, miónes di hende  a siña adorá Dios “ku spiritu i ku bèrdat.” (Huan 4:23, 24) Por ehèmpel, durante e añanan di sirbishi di 2003 pa 2012, mas ku 2.707.000 hende a batisá pa simbolisá nan dedikashon na Dios. Aworakí tin mas ku 7.900.000 Testigu di Yehova rònt mundu. I tin miónes di hende mas ta asosiá ku nos, spesialmente durante Memorial, e konmemorashon anual di e morto di Hesus. Nos no ta broma ku e sifranan akí, pasobra ta Dios ta pone ku su organisashon ta sigui krese. (1 Kor. 3:5-7) No opstante, nos ta masha kontentu ku tur aña e multitut grandi ta bira mas i mas grandi.

8. Dikon e organisashon di Yehova ta sigui krese konsiderablemente?

⁸ E kantidat di sirbidó di Yehova ta oumentá konsiderablemente pasobra ta Yehova mes ta sostené su Testigunan. (Lesa Isaías 43:10-12.) Isaías a papia di e oumento akí ora el a profetisá: ‘Esun di mas chikitu lo bira un tribu, i esun di mas ménos lo bira un nashon poderoso. Na su debido tempu, SEÑOR lo pura hasi esaki.’ (Isa. 60:22) Un tempu, e restu di kristiannan ungí, “e Israel di Dios,” tabata “esun di mas chikitu,” pero Yehova a bendishoná nan trabou di prediká. Nan a sigui oumentá segun ku mas ruman ungí tabata bini den e organisashon di Yehova. (Gal. 6:16) I atraves di añanan, miónes di hende ta aseptá e bèrdat i bira parti di e multitut grandi.

9. Kiko nos mester hasi si nos ke disfrutá di e maravioso futuro ku Yehova a primintí nos?

⁹ Sea ku nos ta kristian ungí òf ta forma parti di e multitut grandi, nos tur por disfrutá di e maravioso futuro ku Dios a primintí. Pero pa nos por logra esei, nos mester kumpli ku e rekisitonan di Yehova. (Isa. 48:17, 18) Tuma por ehèmpel e israelitanan. Yehova su boluntat tabata pa nan obedesé e Lei di Moises. E lei ei lo a protehá nan i siña nan entre otro kon pa logra un bida di famia felis, haña berdadero amigu, hasi negoshi na un manera onesto i trata otro hende ku bondat. (Éks. 20:14; Lev. 19:18, 35-37; Deu. 6:6-9) Awe ta meskos. Yehova su rekisitonan ta benefisiá nos tur, i nan no ta difísil pa kumpli kuné. (Lesa 1 Huan 5:3.) Si nos ta biba na armonia ku Dios su mandamentunan i su prinsipionan, nos lo ta felis i, mas importante ainda, nos lo tin “un fe firme.”—Tito 1:13.

10. Dikon nos mester apartá tempu pa studia Beibel i tene nos Adorashon Komo Famia tur siman?

¹⁰ E parti terenal di Yehova su organisashon ta progresando den vários aspekto. Por ehèmpel, nos komprondementu di bèrdatnan bíbliko ta bira mas i mas kla. I esaki ta loke Beibel ta primintí, pasobra e ta bisa ku “e berea di e hustu ta manera lus di ourora, ku ta bria mas i mas te ora ku bira di dia kla.” (Pro. 4:18) Pero kiko di kada un di nos? Nos mester puntra nos mes: ‘Mi ta keda al dia ku splikashonnan nobo di bèrdatnan bíbliko? Mi tin kustumber di lesa e Palabra di Dios tur dia? Mi ta lesa tur nos publikashonnan nobo? Ami ku mi sernan kerí tin un anochi di Adorashon Komo Famia?’ Mayoria di nos ta di akuerdo ku e kosnan akí no ta difísil pa hasi. Hopi bes ta un kuestion di apartá tempu pa hasi nan. I spesialmente awor ku e tribulashon grandi ta yegando mas i mas serka, ta masha importante pa nos sigui studia e Palabra di Dios, aplik’é den nos bida i sigui progresá spiritualmente.

11. Dikon e pueblo di Yehova ta bai nan reunion-, asamblea- i kongresonan?

 ¹¹ E organisashon di Yehova ta animá nos pa sigui e konseho akí di Pablo: “Laga nos presta atenshon na otro pa nos por stimulá otro pa mustra amor i hasi bon obra, i no keda sin bai e reunionnan, manera algun a tuma pa kustumber, sino mas bien animá otro, i muchu mas ainda ku boso ta mira e dia ta yega serka.” (Heb. 10:24, 25) Den Israel di antigwedat, e israelitanan tabata reuní regularmente pa adorá Yehova i pa risibí su instrukshon. Un di e okashonnan gososo akí tabata e Fiesta di Rekohementu, òf Tabernakel, ku e israelitanan tabata selebrá den tempu di Nehemías. (Éks. 23:15, 16; Neh. 8:9-18) Awe, nos tambe tin nos reunionnan, asamblea- i kongresonan. Nos mester hasi nos máksimo esfuerso pa asistí na tur e okashonnan akí pasobra nan ta yuda nos mantené un bon relashon ku Yehova i keda gososo den nos sirbishi na dje.—Tito 2:2.

12. Kon nos mester mira e trabou di prediká e Reino?

¹² Komo miembro di e organisashon di Yehova, ta un goso pa nos partisipá den “e trabou santu di deklará e bon notisia di Dios.” (Rom. 15:16) Hasiendo esaki, nos ta bira “kompañero di trabou” di Yehova, “Esun Santu.” (1 Kor. 3:9; 1 Ped. 1:15) I ora nos ta prediká e bon notisia, nos ta santifikando Dios su nòmber santu. Ademas, ta un gran privilegio ku nos por prediká “e glorioso bon notisia di e Dios felis.”—1 Tim. 1:11.

13. Di kiko nos bida i amistat ku Yehova ta dependé?

¹³ Yehova ke lo mihó pa nos tur. P’esei, e ke pa nos keda pegá na dje i na su organisashon. Pues, nos tin ku hasi un eskoho meskos ku e israelitanan, kendenan Moises a bisa: “Mi ta yama shelu i tera komo testigu kontra boso awe, ku mi a pone bida i morto boso dilanti, e bendishon i e maldishon. P’esei, skohe bida pa bo biba, abo i bo desendientenan, dor di stima SEÑOR bo Dios, dor di obedesé su bos i dor di tene duru na dje; pasobra esaki ta bo bida i e largura di bo dianan, pa bo biba na e tera ku SEÑOR a hura na bo tatanan, na Abraham, Isak i Yakòb, pa duna nan.” (Deu. 30:19, 20) Pues, laga nos skohe bida. Sí, laga nos stima Yehova i semper keda leal na dje i na su organisashon.

14. Kiko un ruman hòmber a bisa di e organisashon di Yehova?

¹⁴ Ruman Pryce Hughes, kende a haña e bèrdat promé ku 1914, semper a keda leal na Yehova i na Su organisashon. El a bisa ku e lès di mas importante ku el a siña tabata ku e mester keda pegá na Yehova su organisashon i no dependé riba pensamentu humano. Di e manera ei, e por a soportá prueba durante henter su bida. Ruman Hughes a bisa tambe ku e úniko manera pa haña Yehova su aprobashon i bendishon ta di sigui e guia di Su organisashon.

15. Duna un ehèmpel bíbliko ku ta mustra kon nos mester reakshoná ora bini ahuste relashoná ku nos komprondementu di bèrdatnan bíbliko.

¹⁵ Si nos ke tin Yehova su aprobashon i bendishon, nos mester apoyá su organisashon i aseptá ahustenan relashoná ku nos komprondementu di e Skritura. Pa ilustrá esaki, laga nos trata un ehèmpel bíbliko: Despues di Hesus su morto, míles di kristian hudiu, kendenan tabata yen di zelo pa e Lei di Moises, tabatin difikultat pa kita for di esaki. (Echo. 21:17-20) Pero apòstel Pablo a korigí nan  i a yuda nan komprondé ku nan a ser santifiká, no pa medio di sakrifisionan “ofresé segun Lei” ma, “pa medio di e ofrenda di e kurpa di Hesukristu ún biaha i pa semper.” (Heb. 10:5-10) Hopi di e kristiannan hudiu akí a kambia nan manera di pensa i a progresá spiritualmente. P’esei, nos tin ku studia Beibel i nos publikashonnan diligentemente. I ora bini ahuste relashoná ku nos komprondementu di e Palabra di Dios òf nos trabou di prediká, nos mester ta kla pa aseptá esaki.

16. (a) Ki bendishonnan lo hasi bida plasentero den e mundu nobo? (b) Kiko bo ta anhelá di eksperensiá den e mundu nobo?

¹⁶ Tur hende ku keda leal na Yehova i na su organisashon lo sigui disfrutá di su bendishon. E rumannan ungí lo tin e gran privilegio di ta heredero huntu ku Kristu den shelu. (Rom. 8:16, 17) I si nos tin e speransa di biba riba tera, nos por kuminsá imaginá nos mes kon dushi lo ta pa biba pa semper den Paradeis. I nos tur awe tin e plaser di por konta otro hende tokante Dios su mundu nobo primintí. (2 Ped. 3:13) Salmo 37:11 ta bisa: “E humildenan lo heredá e tera, i lo deleitá nan mes den pas abundante.” Hende “lo traha kas i biba den nan” i nan lo disfrutá “di e obra di nan mannan.” (Isa. 65:21, 22) Lo no tin opreshon, pobresa ni hamber mas. (Sal. 72:13-16) Lo no tin religion falsu mas pa gaña hende. (Rev. 18:8, 21) E mortonan lo haña resurekshon i e oportunidat di biba pa semper riba tera. (Isa. 25:8; Echo. 24:15) Ki un futuro maravioso ta spera e miónes di hendenan ku a dediká nan bida na Yehova! Pero pa nos por disfrutá di e maravioso bendishonnan ei, nos mester sigui fortalesé nos relashon ku Yehova i kana pareu ku su organisashon.

17. Ki deseo nos tur mester tin relashoná ku Yehova i su organisashon?

¹⁷ Satanas su mundu ta serka di yega na su fin. Pa nos por sobrebibí, nos mester keda ku un fe firme i sigui adorá Yehova lealmente huntu ku su organisashon. Nos mester tin mesun deseo ku e salmista David, kende a kanta: “Un kos mi a deseá di SEÑOR, esei lo mi buska: ku mi por keda den e kas di SEÑOR tur e dianan di mi bida, pa kontemplá e bunitesa di SEÑOR, i pa meditá den su tèmpel.” (Sal. 27:4) Laga nos kada un keda leal na Yehova i sigui kana pareu ku su organisashon.