1, 2. (a) Ken ta e promé kreashon di Dios, i kon Yehova a usa e persona akí? (b) Kiko ta indiká ku e angelnan ta bon organisá?

YEHOVA, e Kreador di universo, ta hasi tur kos na un manera organisá. Su promé kreashon tabata su Yu unigénito, Hesus. Beibel ta yama Hesus “e Palabra” pasobra e ta Dios su representante prinsipal. Hesus tin hopi siglo ta sirbi Yehova, p’esei Beibel ta bisa ku “na kuminsamentu e Palabra tabat’ei, i e Palabra tabata huntu ku Dios.” Beibel ta bisa tambe ku “tur kos a yega di eksistí pa medio di e Palabra; nada no a yega di eksistí sin dje.” I un poko mas ku 2.000 aña pasá, Dios a manda e Palabra na tera. I ora e tabata riba tera, e hòmber perfekto akí a kumpli fielmente ku e boluntat di su Tata.—Huan 1:1-3, 14.

² Promé ku Hesus a bini na tera, el a sirbi Dios lealmente komo su “trahadó eksperto.” (Pro. 8:30) Pa medio di dje, Yehova a krea miónes i miónes di angel den shelu. (Kol. 1:16) Relashoná ku e angelnan akí, Beibel ta bisa: “Míles i míles tabata sirbié [esta, Yehova], i dies mil biaha dies mil tabata pará su dilanti.” (Dan. 7:10) E numeroso kantidat di kriatura selestial ta asina bon organisá ku Beibel ta referí na nan komo “ehérsitonan” di Yehova.—Sal. 103:21.

3. Kuantu strea tin, i kon e strea- i planetanan ta organisá?

 ³ Awor kiko nos por bisa di e kantidat inkontabel di strea i planeta ku Yehova a krea? Tokante e streanan, un revista di Houston, Texas, a bisa ku, segun un estudio resien, tin “300 triljard” strea, tres biaha mas tantu ku sientífikonan a yega di kalkulá. Esei ta un 3 ku 23 sero! Awor, e streanan i e planetanan ta organisá? Sí, míles di miónes di strea i vários planeta ta forma un galaksia. Mayoria di galaksia ta forma klùster i kombinashon di klùster ta forma superklùster.

4. Dikon ta lógiko pa konkluí ku Yehova su sirbidónan riba tera ta bon organisá?

⁴ Pues, manera nos a mira, e angelnan den shelu, e streanan i e planetanan ta maraviosamente organisá. (Isa. 40:26) P’esei, ta lógiko pa konkluí ku Yehova lo organisá su sirbidónan riba tera tambe. I Yehova ke pa su sirbidónan ta bon organisá, pasobra nan tin ku hasi vários trabou importante. E trayektoria di sirbishi fiel di míles di sirbidó di Yehova, tantu esnan den pasado komo esnan djawe, ta duna prueba ku Yehova ta ku su pueblo i ku e “no ta un Dios di desòrdu, sino di pas.”—Lesa 1 Korintionan 14:33, 40.

5. Kon bini Dios su propósito relashoná ku tera no a kumpli mesora?

⁵ Ora Yehova a krea e promé pareha, el a bisa nan: “Sea fruktífero i multipliká, i yena e tera i hasi esaki someté na bo; i goberná riba e piskánan di laman i riba e paranan di shelu, i riba tur ser bibu ku ta move riba tera.” (Gén. 1:28) Yehova no a krea miónes di hende mesora. Adam ku Eva mester a haña yu, nan yunan mester a haña yu i esei mester a sigui asina, na un manera organisá, te ora tera yena. I Dios su propósito tabata pa hende hasi henter e tera un paradeis. Pero komo ku Adam ku Eva a desobedesé Dios, Dios su propósito relashoná ku tera no a kumpli mesora. (Gén. 3:1-6) Mayoria di Adam ku Eva su desendientenan no a sirbi Yehova i, ku tempu, ‘maldat di hende tabata grandi riba tera, i tur intenshon di e pensamentunan di nan kurason tabata kontinuamente maldat so.’ Konsekuentemente, “tera tabata korumpí den bista di Dios” i “yen di violensia.” P’esei, Dios a disidí di trese un Diluvio riba henter e tera i destruí tur malbado.—Gén. 6:5, 11-13, 17.

6, 7. (a) Dikon Noe a haña grasia den bista di Yehova? (Wak e promé plachi.) (b) Kiko a pasa ku tur e hendenan ku no a hasi kaso di Noe su spièrtamentu?

⁶ Pero Noe ‘a haña grasia den bista di Yehova’ pasobra e “tabata un hòmber hustu,” kende “a resultá di ta sin kulpa entre su kontemporáneonan” (NW). ‘Noe a kana ku e Dios berdadero,’ p’esei Yehova a instruyé pa konstruí un arka inmenso. (Gén. 6:8, 9, 14-16) E arka a ser konstruí di tal manera ku tantu hende komo bestia por a sobrebibí. Noe a hasi tur loke Yehova a orden’é i, ku yudansa di su famia, el a kaba e arka. Despues ku nan a hinka e bestianan den e arka, Yehova “a sera e porta.”—Gén. 7:5, 16.

⁷ Ora e Diluvio a bini na aña 2370 promé ku Kristu, Yehova “a destruí tur loke tabata eksistí i ku tabata riba superfisie di tera,” pero el a skapa e hòmber fiel Noe i su famia, kendenan tabata den e arka. (Gén. 7:23) Tur hende riba tera awe ta desendiente di Noe i su famia. Pero e personanan ku no a hasi kaso di e spièrtamentunan di Noe, “un predikadó di hustisia,” no a sobrebibí e Diluvio.—2 Ped. 2:5.

8. Ki evidensia tin ku e pueblo di Israel tabata bon organisá ora ku Dios a manda nan drenta e Tera Primintí?

 ⁸ Mas ku 8 siglo despues di e Diluvio, Dios a organisá e israelitanan komo un nashon. Tur aspekto di nan bida tabata organisá, spesialmente e manera ku nan mester a adorá Yehova. Por ehèmpel, Yehova a nombra algun komo saserdote i levita i a enkargá algun hende muhé pa “sirbi na entrada di e tènt di reunion.” (Éks. 38:8) Ora Yehova a instruí e israelitanan pa bai Kanan i biba ayanan, mayoria di nan a nenga di hasi esei pa motibu di miedu. P’esei Yehova a bisa nan: “Siguramente boso lo no bini den e tera kaminda mi a hura di establesé boso, ku eksepshon di Kalèb, yu hòmber di Yefone, i Hosue, yu hòmber di Nun.” Dikon? Pasobra ta Hosue i Kalèb so a bini bèk ku bon informe despues di a spioná e Tera Primintí. (Num. 14:30, 37, 38) Mas despues, Yehova a nombra Hosue komo susesor di Moises. (Num. 27:18-23) Ora e israelitanan tabata a punto di drenta Kanan bou di guia di Hosue, Yehova a bisa Hosue: “Sea fuerte i tene kurashi! No tembla ni desmayá, pasobra SEÑOR bo Dios ta ku bo unda ku bo bai.”—Hos. 1:9.

9. Ki efekto e manera ku Yehova a trata su pueblo tabatin riba Rahab?

⁹ Yehova Dios realmente tabata ku Hosue, unda ku el a bai. Tuma por ehèmpel loke a pasa na aña 1473 promé ku Kristu ora e israelitanan tabata kampa serka di e stat kananeo Yériko. Hosue a manda dos hòmber pa spioná e stat Yériko. Einan, nan a topa ku un prostituta ku yama Rahab. Rahab a skonde e spionnan akí riba dak di su kas pa e hòmbernan ku e rei di Yériko a manda no kapturá nan. I Rahab a bisa e spionnan israelita: “Mi sa ku SEÑOR a duna boso e tera . . . , pasobra nos a tende kon SEÑOR a seka e awa di  Laman Kòrá boso dilanti . . . i kiko boso a hasi ku e dos reinan di e amoreonan.” Ademas, el a bisa: ‘Yehova boso Dios ta Dios ariba den shelu i abou na tera.’ (Hos. 2:9-11) Debí ku Rahab a apoyá e organisashon di Yehova di e tempu ei, Yehova a skapa é i su famia ora e israelitanan a konkistá Yériko. (Hos. 6:25) Rahab a pone fe den Yehova. E tabatin rèspèt profundo pa Yehova i pa Su pueblo.

10. Kiko Hesus a bisa e lidernan religioso hudiu di su tempu, i dikon el a bisa nan esei?

¹⁰ Bou di guia di Hosue, e israelitanan a konkistá un stat tras di otro i asina nan a poderá di henter e tera di Kanan. Pero kiko a sosodé despues? Wèl, atraves di siglonan, bes tras bes e israelitanan a violá e leinan di Dios. P’esei, tempu ku Yehova a manda su Yu na tera, nan tabata asina desobediente i desinteresá den Yehova su profetanan ku Hesus a bisa ku Herúsalèm tabata “mata e profetanan.” (Lesa Mateo 23:37, 38.) Dios a rechasá e lidernan religioso hudiu pasobra nan tabata infiel na dje. Hesus a bisa nan: “Lo kita e Reino di Dios for di boso i dun’é na un nashon ku ta duna fruta pa e Reino.”—Mat. 21:43.

11, 12. (a) Kiko a mustra ku Yehova a rechasá e nashon di Israel i kuminsá bendishoná un organisashon nobo den promé siglo? (b) Ken a forma parti di e organisashon nobo akí?

¹¹ Un poko despues ku Hesus a bini na tera, Yehova a rechasá e nashon di Israel komo su pueblo. Pero esei no a nifiká ku Yehova a keda sin un organisashon di sirbidónan fiel aki riba tera. Al kontrario, na Pentekòste di aña 33 di promé siglo, Yehova a establesé i a kuminsá bendishoná un organisashon nobo, basá riba Hesukristu i su siñansanan. Riba e dia ei, tabatin alrededor di 120 disipel di Hesus reuní den un kas na Herúsalèm ora ku ‘diripiente un zonido for di shelu manera di un bientu fuerte a resoná den henter e kas.’ I ‘loke tabata parse lenga di kandela a bai para riba kada un di nan, i nan tur a yena ku spiritu santu i a kuminsá papia otro idioma.’ (Echo. 2:1-4) E suseso asombroso akí a mustra bon kla ku Yehova tabata sostené e organisashon nobo akí, ku a konsistí di disipelnan di Kristu.

¹² Riba e dia emoshonante ei, “mas o ménos 3.000 alma” a bira disipel di Hesus. Ademas, “tur dia Yehova tabata trese mas hende ku a haña e kaminda di salbashon.” (Echo. 2:41, 47) Hesus su disipelnan tabatin asina tantu éksito den e trabou di prediká ku Beibel a bisa ku “e palabra di Dios a sigui krese, i e kantidat di disipel na Herúsalèm a sigui oumentá masha hopi mes.” Sí, hopi hende sinsero, asta “un gran kantidat di saserdote” a aseptá e siñansanan di Kristu. (Echo. 6:7) Mas despues tambe Yehova a duna evidensia ku e tabata sostené e organisashon nobo akí, tresiendo “hende di e nashonnan” den e kongregashon kristian.—Lesa Echonan 10:44, 45.

13. Ki trabou Dios a duna su organisashon nobo?

¹³ No tabatin ningun duda ta ki trabou Dios a duna e siguidónan di Kristu pa hasi. Tempu ku Hesus tabata riba tera, el a pone un bon ehèmpel pa nan, pasobra djis despues di su boutismo el a kuminsá prediká tokante “e Reino di shelu.” (Mat. 4:17) Ademas, Hesus a siña su disipelnan kon pa hasi e mesun trabou. El a bisa nan: “Boso lo ta mi testigunan na Herúsalèm, den henter Hudea i Samaria, i te na e parti mas leu di tera.” (Echo. 1:8) E disipelnan di Hesus a komprondé bon kla kiko a ser sperá di nan. Pablo i Bárnabas, por ehèmpel, a bisa e opositornan hudiu na  Antiokia, Pisidia: “Boso tabata e proménan ku mester a tende e palabra di Dios. Ma komo ku boso ta rechas’é i no ta konsiderá boso mes digno di bida eterno, nos ta bai serka e nashonnan. De echo, Yehova a duna nos e mandamentu akí: ‘Mi a nombra bo komo lus pa e nashonnan, pa bo hiba salbashon te na e parti mas leu di tera.’” (Echo. 13:14, 45-47) For di promé siglo, Yehova su organisashon ta laga hende sa kiko Yehova ta hasiendo pa salba humanidat.

14. Kiko a pasa ku Herúsalèm den promé siglo, i ken a sobrebibí?

¹⁴ Mayoria di e hudiunan no a aseptá e bon notisia i no a hasi kaso di e spièrtamentu di Hesus, kende a bisa su disipelnan: “Ora boso mira Herúsalèm rondoná pa ehérsito, boso por ta sigur e ora ei ku su desolashon a yega serka. E ora ei laga esnan ku ta na Hudea hui bai den seru, laga esnan ku ta den stat sali bai i esnan ku ta den kunuku no mester drenta stat.” (Luk. 21:20, 21) I a sosodé manera Hesus a profetisá. E hudiunan a lanta kontra e romanonan, i na aña 66 despues di Kristu, Sestio Galo a rondoná Herúsalèm pa destruyé. Pero ònferwagt e ehérsito romano a bati retirada, i esei a duna e siguidónan di Hesus oportunidat pa bandoná Herúsalèm i Hudea. Segun e historiadó Eusebio, hopi di nan a krusa Riu Hordan pa hui bai Pela na Perea. Na aña 70, e ehérsito romano, bou di mando di General Tito, a regresá Herúsalèm i destruyé. Pero e kristiannan fiel sí a skapa pasobra nan a hasi kaso di Hesus su spièrtamentu.

15. Apesar di kiko e kongregashon kristian a sigui krese?

¹⁵ Apesar di difikultat, persekushon i otro prueba di fe, Kristu su siguidónan a sigui oumentá den promé siglo. (Echo. 11:19-21; 19:1, 19, 20) E kongregashon kristian a sigui prosperá den sentido spiritual pasobra nan tabatin Dios su bendishon.—Pro. 10:22.

16. Kiko tur kristian mester a hasi pa nan por a keda uní i ku un fe fuerte?

¹⁶ Pa e kristiannan por a keda uní i ku un fe fuerte, nan tur mester a hasi esfuerso. Nan mester a studia e Skritura diligentemente, asistí regularmente na nan reunionnan i hasi e trabou di prediká zelosamente. E kosnan akí a kontribuí na e spiritualidat i union di e pueblo di Dios di e tempu ei, manera ta e kaso awe tambe. E kongregashonnan tabata bon organisá. Tabatin ansiano i sirbidó ministerial, kendenan tabata dispuesto pa traha duru na benefisio di e kongregashonnan. (Flp. 1:1; 1 Ped. 5:1-4) E rumannan tabata gusta ora superintendentenan biahero, manera Pablo, tabata bishitá nan kongregashon. (Echo. 15:36, 40, 41) E similaridatnan entre nos adorashon i esun di e kristiannan di promé siglo ta remarkabel. Nos ta masha gradisidu ku semper Yehova a organisá su sirbidónan. *

17. Kiko nos lo trata den e siguiente artíkulo?

¹⁷ Segun ku e mundu di Satanas ta yegando na su fin, e parti terenal di Yehova su organisashon ta moviendo padilanti mas rápido ku nunka. Kiko di abo? Bo ta kanando pareu ku Yehova su organisashon? Bo ta hasiendo progreso den sentido spiritual? E siguiente artíkulo ta siña nos kon nos por progresá, kanando pareu ku Yehova su organisashon.