Bo a tuma tempu pa lesa e último edishonnan di E Toren di Vigilansia? Wèl, wak si bo por kontestá e siguiente preguntanan:

Ki ora e israelitanan mester a mata e lamchi di Pasku dia 14 di nisan?

Algun tradukshon di Beibel ta bisa ku nan mester a mata e lamchi ‘ora nochi tabata serando,’ esta, despues ku solo a baha, miéntras ku tabata kla ainda. (Éks. 12:6)—15/12, página 18-19.

Ki prinsipionan bíbliko por yuda hóbennan tuma desishonnan sabí?

(1) Buska promé e Reino i e hustisia di Dios. (Mat. 6:19-34) (2) Sirbi otro hende pa bo ta felis. (Echo. 20:35) (3) Sirbi Yehova ku goso den bo hubentut. (Ekl. 12:1)—15/1, página 19-20.

Kua ta e kuater koredónan di kabai ku ta koriendo desde 1914?

Hesus ta koredó di e kabai blanku i el a dal paso pa kore ku Satanas i su demoñonan for di shelu. Esun ku ta kore e kabai koló di kandela ta representá tur e gueranan ku ta afligí humanidat. Esun ku ta kore e kabai pretu ta representá hamber. Esun ku ta kore e kabai blek ta mata miónes di hende ku malesa. (Rev. 6:2-8)—1/2, página 6-7.

Na ki tempu “e kasamentu di e Lamchi” lo tuma lugá? (Rev. 19:7)

“E kasamentu di e Lamchi” lo tuma lugá despues ku Hesukristu, e Rei, kompletá su viktoria, esta, despues ku Babilonia e Grandi ser destruí i e guera di Armagedon a tuma lugá.—15/2, página 10.

Dikon e hudiunan di promé siglo tabata “den ekspektativa” pa e yegada di e Mesías? (Luk. 3:15)

Nos no sa sigur ku e hudiunan di promé siglo a komprondé e profesia di Daniel tokante e Mesías manera nos awe. (Dan. 9:24-27) Sinembargo, kisas nan a tende di e notisia ku e angel a duna e wardadónan di karné òf nan a haña sa loke Ana a bisa ora el a mira e bebi Hesus na e tèmpel. Ademas, tabatin astrólogonan ku a bin buska “esun ku a nase komo rei di e hudiunan.” (Mat. 2:1, 2) Despues, Huan Boutista tambe a indiká ku e Kristu lo a bini pronto.—15/2, página 26-27.

Kon nos por evitá ku nos ‘sí ta nò na mes momento’? (2 Kor. 1:18)

Tin biaha bèrdat sa sosodé ku debí na un situashon fuera di nos kontrol, nos no por kumpli ku nos palabra. Pero nos mester hasi nos bèst pa kumpli ku nos kompromiso- òf promesanan.—15/3, página 32.

Kon nos por resistí tentashon di wak pornografia?

Tres konseho ku por yuda nos ta: (1) Kita kara mesora si nos bista kai riba algu erótiko. (2) Paga tinu riba kiko nos ta pensa, enfoká riba kosnan positivo i hasi orashon na Yehova. (3) No wak pelíkula òf website ku ta kontené pornografia. —1/4, página 10-12.

Ki konsekuensianan inesperá un kristian por hañ’é kuné ora e laga su famia i bai traha afó?

Ora mayor- i yunan no ta biba huntu komo famia, yunan por sufri daño emoshonal, pèrdè nan balornan moral i alehá di nan mayornan. I parehanan ku ta biba separá for di otro por kai den tentashon pa kometé inmoralidat seksual.—15/4, página 19-20.

Dikon nan tabata kibra pia di kriminal kologá na staka?

E romanonan tabata klaba algun kriminal na staka. E hudiunan a pidi pa kibra pia di e kriminalnan ku tabata kologá banda di Hesus. Esei a pone ku a bira mas difísil pa nan hala rosea i nan lo a muri mas lihé. Asina e kurpanan lo no a keda henter anochi na staka. (Deu. 21:22, 23)—1/5, página 11.

Kua ta e kuater preguntanan ku nos tin ku tene na mente den nos trabou di prediká?

Ken mi ta papiando kuné? Unda mi ta papiando kuné? Ki ora ta mihó pa papia ku hende? Kon mi mester papia ku nan?—15/5, página 12-15.

Kuantu hende a muri di humamentu?

Durante e último siglo el a mata 100.000.000 hende. Aktualmente, 6.000.000 hende ta muri pa aña di humamente.—1/6, página 3.