1. Kiko tin un lugá masha spesial den nos adorashon?

BO A yega di mira e nòmber Yehova grabá riba un edifisio públiko òf riba un opheto den un museo? Si esei tabata e kaso, sin duda komo Testigu di Yehova, lo bo a keda masha emoshoná pasobra e nòmber di Dios tin un lugá masha spesial den nos adorashon. No tin ningun otro organisashon na mundu ku ta usa e nòmber di Dios manera nos ta us’é. Pero e privilegio di por karga e nòmber di Dios ta trese responsabilidat kuné.

2. Ki responsabilidat e privilegio di por karga Dios su nòmber ta trese kuné?

² Pa nos por tin Yehova su aprobashon, nos tin ku hasi mas ku djis usa su nòmber. Nos tin ku biba na armonia ku Su normanan moral. P’esei, Beibel ta kòrda nos ku sirbidónan di Yehova mester ‘apartá nan mes for di maldat.’ (Sal. 34:14) Apòstel Pablo tambe a mustra esaki bon kla ora el a skirbi: “Laga tur ku ta menshoná e nòmber di Yehova distansiá nan mes for di inhustisia.” (Lesa 2 Timoteo 2:19.) Komo Testigunan di Yehova, en bèrdat nos ta konosí pa e echo ku nos ta menshoná  òf usa e nòmber di Dios. Pero kon nos mester distansiá nos mes for di inhustisia, òf maldat?

3, 4. Ki deklarashon di Pablo algun hende tin problema pa komprondé, i dikon?

³ Na 2 Timoteo 2:19, Pablo ta papia di un ‘fundeshi sólido ku Dios a pone.’ Riba e fundeshi ei tin dos mensahe grabá. Esun di promé ta bisa ku “Yehova konosé esnan ku ta pertenesé na dje;” e mensahe akí ta tumá for di Numbernan 16:5. (Wak e artíkulo anterior.) Pero kiko di e di dos mensahe ku ta bisa “laga tur ku ta menshoná e nòmber di Yehova distansiá nan mes for di inhustisia”? Algun hende tin problema pa komprondé e palabranan akí. Dikon?

⁴ Aunke ta parse ku Pablo su palabranan ta sitá for di un otro parti di e Skritura Hebreo, no tin ningun teksto ku ta kuadra ku e deklarashon akí di Pablo. P’esei anto, na kiko Pablo a referí ora el a bisa “laga tur ku ta menshoná e nòmber di Yehova distansiá nan mes for di inhustisia”? Djis promé ku Pablo a hasi e deklarashon ei, el a sita for di Numbernan kapítulo 16, ku ta kontené e relato di e rebelion di Koré. Awor, kiko di e di dos deklarashon? Esaki tambe ta referí na susesonan ku tin di haber ku e rebelion ei?

5-7. Na ki susesonan den tempu di Moises Pablo a referí ora el a ekspresá e palabranan na 2 Timoteo 2:19? (Wak e promé plachi.)

⁵ Beibel ta bisa ku Datan i Abiram, e yu hòmbernan di Eliab, a djòin Koré i huntu nan a dirigí e rebelion kontra Moises i Aron. (Num. 16:1-5) Nan a mustra falta di rèspèt pa Moises i no a rekonosé e outoridat ku Dios a dun’é. Komo ku e hòmbernan rebelde akí a sigui biba entre e pueblo di Dios, nan tabata un peliger pa e israelitanan ku sí a keda fiel. Ora e dia a yega pa Yehova demostrá ken ta su sirbidónan leal i ken ta e rebeldenan, el a duna un mandato kla.

⁶ Beibel ta bisa: “SEÑOR a papia ku Moises, bisando: ‘Papia ku e kongregashon, bisando: “Retirá for di rònt di e tèntnan di Koré, Datan i Abiram.”’ E ora ei Moises a lanta i a bai serka Datan i Abiram, i e ansianonan di Israel a siguié. I el a papia ku e kongregashon, bisando: ‘Kita awor for di e tèntnan di e hòmbernan malbado akí, i no mishi ku nada ku ta pertenesé na nan, pa boso no peresé pa kousa di tur nan piká.’ Asina nan a retirá for di rònt di e tèntnan di Koré, Datan i Abiram.” (Num. 16:23-27) Despues, Yehova a mata tur e rebeldenan. Pero e adoradónan leal di Yehova sí a sobrebibí. Dikon? Pasobra nan a “distansiá nan mes for di inhustisia,” alehando nan mes for di e rebeldenan.

⁷ No tin duda, Yehova por mira kiko tin den kurason di hende! Pues, e sa ken ta esnan ku ta pertenesé na dje. No opstante, su sirbidónan leal mester a tuma akshon desisivo: Nan mester a distansiá nan mes for di e malbadonan. P’esei, ta posibel ku Pablo tabata referí na e relato na Numbernan 16:5, 23-27 ora el a skirbi: “Laga tur ku ta menshoná e nòmber di Yehova distansiá nan mes for di inhustisia.” E konklushon ei ta parse lógiko ya ku ta for di Numbernan 16:5 Pablo a sita ora el a bisa: “Yehova konosé esnan ku ta pertenesé na dje.”—2 Tim. 2:19.

8. Dikon nos tin ku hasi mas ku djis usa e nòmber di Dios òf djis forma parti di e kongregashon kristian?

⁸ Pablo a usa e susesonan den tempu di Moises pa kòrda Timoteo ku e mester a dal pasonan desisivo pa protehá su relashon presioso ku Yehova. Meskos ku e adoradónan fiel di Yehova den tempu di Moises  mester a hasi mas ku djis menshoná e nòmber di Dios, kristiannan fiel den promé siglo tabatin ku hasi mas ku djis forma parti di e kongregashon kristian. Sí, tur sirbidó di Yehova tin ku dal pasonan desisivo pa distansiá nan mes di inhustisia. Kiko esaki a nifiká pa Timoteo? I kiko adoradónan di Yehova djawe por siña for di e konseho inspirá di Pablo?

9. Ki efekto “debatenan bobo i sin pia sin kabes” tabatin riba e kongregashon kristian den promé siglo?

⁹ E Palabra di Dios ta mustra bon kla kon nos por distansia nos mes for di inhustisia, òf maldat. Por ehèmpel, den e mesun kapítulo 2 di Segundo Timoteo, nos ta mira ku Pablo a bisa Timoteo ku no ta bon pa “pleita tokante palabra” i ku nos mester “evitá papiamentu di palabra bashí.” (Lesa 2 Timoteo 2:14, 16, 23.) Dikon Pablo a bis’é esei? Pasobra tabatin algun hende den kongregashon ku tabata promové siñansanan apóstata. Ademas, tabatin otronan ku tabata plama ideanan kontroversial. I aunke algun di e ideanan akí riba nan mes no tabata kontra siñansa di Beibel, nan tabata kousa desunion; nan tabata pone hende debatí i pleita tokante palabra, kreando asina un ambiente insaludabel entre e kristiannan. P’esei Pablo a enfatisá e importansia di “evitá debatenan bobo i sin pia sin kabes.”

10. Kon nos mester reakshoná ora nos haña nos konfrontá ku apostasia?

¹⁰ Awe, no ta usual ku adoradónan di Yehova ta haña nan konfrontá ku apostasia den kongregashon. Pero ora nos haña nos ku siñansanan ku ta bai kontra di loke Beibel ta siña, sin importá di unda nan ta bini, nos mester rechasá nan kategórikamente. No ta sabí pa nos komuniká ku hende apóstata, sea ta personalmente, via Internet òf otro medionan di komunikashon. Asta si nos intenshon ta pa yuda un persona asina, nos ta desobedesé Yehova pasobra su adoradónan mester rechasá, sí distansiá nan mes kompletamente for di, apostasia.

11. Kiko por hiba na “debatenan bobo,” i kon ansianonan kristian por pone un bon ehèmpel?

¹¹ Fuera di apostasia, tin otro kosnan ku por perturbá e pas di un kongregashon. Por ehèmpel, diferensia di opinion relashoná ku entretenimentu tambe por resultá den “debatenan bobo i sin pia sin kabes.” Pero kiko si un miembro di kongregashon ta promové entretenimentu ku ta violá Yehova su normanan moral? Ta klaru ku ansianonan mester hasi algu i no tolerá esaki djis pa evitá diskushon. (Sal. 11:5; Efe. 5:3-5) No opstante, nan mester tene kuidou pa nan no imponé nan gustu personal riba otronan. Mas bien, nan ta sigui e konseho ku Beibel ta duna superintendentenan kristian. Beibel ta bisa: “Pastoriá e tou di Dios ku ta bou di boso kuido, . . . no manera hende ku ta manda riba esnan ku ta propiedat di Dios, sino mas bien, bira ehèmpel pa e tou.”—1 Ped. 5:2, 3; lesa 2 Korintionan 1:24.

12, 13. (a) Kon Testigunan di Yehova ta skohe entretenimentu, i ki prinsipionan nan ta usa pa hasi esei? (b) Kon nos por usa e prinsipionan ku paragraf 12 ta trata den kaso di vários asuntu personal?

¹² Nos organisashon no ta analisá pelíkula, wega di vidio, buki òf kantika pa bisa nos kiko nos mester evitá. Dikon nò? Pasobra Beibel ta animá nos kada un pa entrená nos ‘kapasidat di komprondé pa nos mes por distinguí loke ta bon for di loke ta malu.’ (Heb. 5:14) Beibel ta duna nos prinsipionan básiko ku por yuda nos ora di skohe entretenimentu. Tur ora ku nos ta tuma desishon, nos mester “sigui hasi sigur di loke ta agradá Señor.” (Efe. 5:10) Beibel ta mustra ku un kabes di famia tin sierto grado di outoridat, pues e por disidí  ku su famia no ta partisipá na sierto entretenimentu. *—1 Kor. 11:3; Efe. 6:1-4.

¹³ E prinsipionan di Beibel ku nos a kaba di trata no ta konta solamente na momento di skohe entretenimentu. Opinion tokante nos forma di bisti i nos aparensia, salú i nutrishon i otro asuntunan personal tambe por lanta kontroversia. P’esei, si no tin prinsipio di Beibel ku ta ser violá, adoradónan di Yehova ta evitá di papia riba e asuntu, pasobra Beibel ta bisa ku “un esklabo di Señor no tin nodi di pleita, pero e mester ta amabel [diskreto; yen di takto] ku tur hende.”—2 Tim. 2:24, wak nota.

14. Ki ilustrashon Pablo a usa pa mustra ku kristiannan mester evitá mal kompania?

¹⁴ Den kua otro manera esnan ku “ta menshoná e nòmber di Yehova” tin ku “distansiá nan mes for di inhustisia”? Nan mester evitá mal kompania, esta, asosiashon estrecho ku hende ku ta praktiká inhustisia. Kon Pablo a ilustrá esaki? Despues di e ilustrashon tokante e ‘fundeshi sólido ku Dios a pone,’ el a konta un otro ilustrashon. El a skirbi tokante un “kas grandi” ku tin “no solamente wea di oro i di plata, sino tambe di palu i di klei, i algun pa un propósito onorabel, pero otronan pa un propósito sin onor.” (2 Tim. 2:20, 21) Kaba, el a konsehá kristiannan pa apartá nan mes, òf “keda leu,” for di e weanan ku ta pa un propósito “sin onor.”

15, 16. Kiko nos por siña for di e ilustrashon di “un kas grandi”?

¹⁵ Kiko ta e splikashon di e ilustrashon akí? Pablo a kompará e kongregashon kristian ku “un kas grandi” i e miembronan di e kongregashon ku “wea” òf artefaktonan di kas. Tin artefaktonan den un kas ku por ser kontaminá si nan bini den kontakto ku supstansianan peligroso òf si nan ta den un ambiente ku no ta higiéniko. Ora esei sosodé, e doño di kas tin ku  separá e artefaktonan kontaminá ei for di su artefaktonan limpi, manera esnan ku e ta usa pa kushiná.

¹⁶ Di mes manera, adoradónan di Yehova awe ku ta hasi esfuerso pa ta limpi den tur sentido mester evitá kontakto estrecho ku personanan den kongregashon ku konsientemente ta nenga di sigui e prinsipionan di Yehova. (Lesa 1 Korintionan 15:33.) Si den kongregashon mes nos tin ku evitá mal kompania, nos tin muchu mas motibu ainda pa hasi esei pafó di e kongregashon kristian. Dikon? Pasobra hopi hende ku no ta parti di e kongregashon ta ‘stima plaka, ta desobediente na mayornan, desleal, kalumniadó, feros, sin amor pa loke ta bon, traidor i ta stima plaser en bes di stima Dios.’—2 Tim. 3:1-5.

17. Kon e israelitanan fiel a demostrá ku nan a tuma un posishon firme kontra inhustisia?

¹⁷ Beibel ta bisa ku ora Yehova a duna e mandato pa “retirá for di rònt di e tèntnan di Koré, Datan i Abiram,” e israelitanan fiel “a retirá [mesora, NW].” (Num. 16:24, 27) Nan no a vasilá ni tarda. Beibel ta bisa ku nan “a retirá for di rònt di e tèntnan.” E adoradónan fiel di Yehova no a tuma ningun rísiko; nan a obedesé Yehova di henter nan kurason. Nan a tuma un posishon kla na banda di Yehova i kontra di inhustisia. Kiko nos por siña for di nan ehèmpel?

18. Kiko Pablo tabata ke men ora el a bisa Timoteo pa “hui for di e deseonan di hubentut”?

¹⁸ Nos relashon ku Yehova ta masha balioso. P’esei, nos mester dal pasonan mesora i desisivo pa proteh’é. Ta esei Pablo tabata ke men ora el a konsehá Timoteo pa “hui for di e deseonan di hubentut.” (2 Tim. 2:22) E tempu ei Timoteo tabata un adulto kaba, kisas den su 30 i piku aña. Pero asta un adulto por tin deseonan bobo di hubentut. Ora Timoteo a hañ’é ku e deseonan ei, e mester a “hui” for di nan. Ku otro palabra, Timoteo mester a ‘distansiá su mes di inhustisia.’ Hesus a deklará algu similar ora el a bisa: “Si bo wowo ta pone bo trompeká, sak’é benta afó.” (Mat. 18:9) Kristiannan djawe ku ta tuma e konseho ei na pechu ta aktua mesora i na un manera desididu pa protehá nan relashon ku Dios.

19. Ki pasonan desisivo algun ruman a dal pa protehá nan relashon ku Yehova?

¹⁹ Algun ruman ku tabatin problema ku alkohòl promé ku nan a bira Testigu di Yehova a tuma e desishon pa apstené nan mes kompletamente for di bibida alkohóliko. Otronan ku tin un òf otro debilidat ta evitá sierto tipo di entretenimentu, ku riba nan mes no ta malu pero, ku por lanta mal deseo den nan. (Sal. 101:3) Por ehèmpel, promé ku un ruman hòmber a bira Testigu, e tabata gusta bai fiesta kaminda inmoralidat tabata tuma lugá. Desde e tempu ku el a konosé e bèrdat, el a disidí ku e no ta baila mes mas, ni na fiesta di Testigunan di Yehova, pa su mal deseo- òf pensamentunan di pasado no lanta. Klaru ku esei no ta nifiká ku kristiannan no tin mag di baila ni usa alkohòl òf hasi otro kosnan ku riba nan mes no ta malu. No opstante, nos tur mester tene kuido i dal pasonan desisivo pa protehá nos relashon ku Yehova.

20. Aunke kisas no ta fásil pa “distansiá nos mes for di inhustisia,” ki konsuelo nos tin?

²⁰ E privilegio di por karga e nòmber di Dios ta trese responsabilidat kuné. Nos tin ku ‘distansiá nos mes for di inhustisia’ i ‘apartá nos mes for di maldat.’ (Sal. 34:14) Ta bèrdat ku no ta tur biaha ta fásil pa hasi esei. Pero nos tin e konsuelo ku Yehova semper lo stima “esnan ku ta pertenesé na dje” i ku ta pega na su norma- i prinsipionan hustu.—2 Tim. 2:19; lesa 2 Krónikanan 16:9a.