“EUREKA!” E palabra akí ta nifiká: “Mi a hañ’é!” Hopi biaha bo tabata tende e palabra akí ora un minero haña oro. Esaki sigur tabata e kaso durante e famoso temporada di siglo 19 ku hopi hende tabata basha bai California, Merka, en buska di oro. Pero Charles Taze Russell i otro Studiantenan di Beibel a haña algu muchu mas balioso ku oro: e bèrdat bíbliko. I nan tabata ansioso pa kompartí esaki ku otro hende.

Pa zomer di aña 1914, ya kaba miónes di hende den suidatnan grandi a wak e “Foto-Drama di Kreashon,” un bunita obra di ocho ora ku e Asosiashon Internashonal di Studiantenan di Beibel (I.B.S.A.) a produsí. E drama akí—ku su pelíkulanan impreshonante, slidenan bibu di koló, narashon fasinante i bunita músika klásiko—a hiba su públiko riba un biahe den historia, for di kreashon te na fin di Hesukristu su Reinado di Mil Aña.—Rev. 20:4. *

Pero kiko di e hendenan ku tabata biba den pueblitonan i den kunuku? Pa hasi sigur ku e personanan akí, kendenan tabata en buska di e bèrdat, no pèrdè e “Foto-Drama,” I.B.S.A. a kuminsá presentá na ougùstùs 1914 e “Drama Eureka”—un vershon sin pelíkula di e “Foto-Drama.” E vershon akí tabata fásil pa transportá. Tabatin tres vershon di e “Drama Eureka,” na vários idioma: “Eureka X,” ku a konsistí di tur narashon i músika; “Eureka Y,” ku a konsistí di tur oudio i algun bunita slide di koló; i “Eureka pa Famia,” spesialmente pa usa na kas, ku tabata konsistí di algun narashon i kantika. Via I.B.S.A. mes hende por a kumpra tokadisko i algun ekipo di proyekshon barata.

Komo ku e Studiantenan di Beibel no tabatin mester di un proyektor pa pelíkula òf un skèrm grandi pa presentá e “Drama Eureka,” nan por a hiba e mensahe di Reino na hendenan di kunuku tambe i asina alkansá teritorionan nobo. “Eureka X” tabata oudio so, pues nan por a present’é kualke ora di dia. E proyektor pa slide ku nan tabata usa pa presentá “Eureka Y” no tabata traha ku koriente ma ku lampi di carbide (un tipo di gas). Un artíkulo den e Toren di Vigilansia finlandes a bisa: ‘Nos por presentá e “Drama” kasi tur kaminda.’ I asina nan a hasi tambe.

En bes di hür teaternan grandi, e Studiantenan di Beibel tabata hasi esfuerso pa haña lugánan ku nan por a usa grátis, manera skol, sala di korte, stashon di trein i asta kas privá pa presentá e “Drama Eureka.” Hopi di e presentashonnan a tuma lugá na aire liber. Komo skèrm, nan tabata usa un laken blanku grandi ku nan  tabata kologá na muraya di mangasina. Anthony Hambuch a bisa: ‘Kunukeronan tabata pone reinan di tronkon den un parti di nan kunuku pa hende por a sinta i disfrutá di e programa.’ Anthony Hambuch i su tim, kendenan tabata presentá e “Drama Eureka,” tabata usa vehíkulo ku motor pa transportá nan ekipo, ekipahe i kosnan pa kamper i kushiná.

E kantidat di hende ku tabata bin wak e “Drama Eureka” tabata varia di un man yen te ku sientos di hende. Na Merka, den un pueblito di 150 habitante, un total di 400 persona a asistí na e presentashonnan ku a tuma lugá na un skol. Na otro lugá, algun hende a kana 8 kilometer, ida i buèlta, pa bai wak e “Drama Eureka.” Na Suesia, Charlotte Ahlberg su bisiñanan, kendenan a reuní na Charlotte su kasita, a keda ègt konmoví ora nan a skucha e grabashonnan. Un 1.500 persona a bai wak un presentashon na un stat remoto di mina na Australia. E Toren di Vigilansia (na ingles) a informá ku na skolnan i universidatnan, ‘maestro- i studiantenan a keda enkantá ku e imágennan, e músika i e bunita narashon.’ E “Drama Eureka” tabata popular asta na lugánan ku tabatin teater.

E “Drama Eureka” tabata un instrumento útil den e “trabou di ekspanshon di klasnan,” òf kongregashonnan. Kon asina? E Studiantenan di Beibel tabata manda oradónan na diferente área pa duna diskurso i presentá e “Drama Eureka.” I si tabatin sufisiente hende interesá, nan tabata lanta kongregashonnan nobo. Ta difísil pa kalkulá kuantu hende realmente a wak e “Drama Eureka.” Aunke na 1915 tabatin hopi tim ku tabata presentá e “Drama,” ta 14 di e 86 timnan so tabata raportá regularmente na sede mundial. Lamentando ku e sifranan tabata inkompleto, e informe di e aña ei a indiká ku mas ku un mion hende a wak e “Drama” i ku alrededor di 30.000 persona a pidi literatura bíbliko.

Kisas e “Drama Eureka” no a ègt marka historia, pero, manera nos a komprondé, miónes di hende—di Australia te Argentina, di Suráfrika te na e islanan Britániko, na India i den Karibe—a wak e presentashon úniko akí. Hopi di e hendenan akí a haña e bèrdat di Beibel—ku ta mas balioso ku oro—i nan por a grita: “Eureka!”