1, 2. Kon Yehova ta komuniká ku su sirbidónan?

ATRAVES di historia, Yehova a usa diferente manera pa guia su pueblo. Den pasado, Yehova tabata usa angel, vishon òf soño pa revelá na su sirbidónan loke lo a pasa den futuro òf pa duna nan sierto asignashon spesífiko. (Num. 7:89; Eze. 1:1; Dan. 2:19) Tabatin okashonnan ku Yehova a skohe sierto hende pa represent’é i pa guia su pueblo. Sea kual sea e medio ku Yehova a usa pa guia su pueblo, ta esnan ku a sigui su instrukshonnan a ser bendishoná.

² Awe, Yehova ta usa su Palabra, su spiritu santu i e kongregashon kristian pa guia nos. (Echo. 9:31; 15:28; 2 Tim. 3:16, 17) I Yehova su guia ta asina kla ku ta komo si fuera nos ta tend’é bisa nos: “Esaki ta e kaminda, kana den dje.” (Isa. 30:21) Yehova ta usa Hesus tambe pa guia nos. Kon asina? Wèl, el a nombra Hesus pa guia e kongregashon kristian pa medio di “e esklabo fiel i prudente.” (Mat. 24:45) Nos mester tuma e instrukshonnan i guia ku nos ta haña di Yehova masha na serio, pasobra nos salbashon eterno ta dependé di nos obedensia.—Heb. 5:9.

3. Kiko por pone nos desobedesé Yehova? (Wak e promé plachi.)

³ Satanas e Diabel tambe sa ku Yehova su guia ta nifiká bida pa nos, p’esei e ta purba di stroba nos di skucha, òf  obedesé, Yehova. Nos kurason tambe por gaña nos i stroba nos di obedesé Yehova. (Yer. 17:9) P’esei, laga nos wak kon nos por evitá kualke opstákulo ku por stroba nos di obedesé e bos di Dios. Nos lo mira tambe kon un bon komunikashon ku Yehova lo yuda nos keda bon amigu kuné apesar di kualke situashon ku nos por konfrontá.

4. Kon Satanas ta purba di influensiá hende su manera di pensa?

⁴ Satanas ta usa ideanan di su mundu i informashon falsu pa purba di influensiá hende su manera di pensa. (Lesa 1 Huan 5:19.) Korant, buki, revista, radio, televishon i Internet ta plama informashon den tur skina di mundu. Aunke e medionan di komunikashon akí por ta útil, mayoria di biaha nan ta promové kondukta i estilo di bida ku no ta kuadra ku Yehova su normanan. (Yer. 2:13) Por ehèmpel, nan ta papia di matrimonio di mesun sekso komo si fuera esaki ta algu masha normal. I esei ta pone hopi hende pensa ku loke Beibel ta bisa tokante homoseksualidat ta eksagerá.—1 Kor. 6:9, 10.

5. Kon nos por evitá ku Satanas su ideanan engañoso ta influensiá nos?

⁵ Awor, kon hende ku ta stima Yehova su normanan por evitá ku e avalancha di ideanan mundano i satániko ta influensiá nan? Kon nan por distinguí loke ta bon for di loke ta malu? Manera Salmo 119:9 ta bisa, nos tin ku ‘mantené nos mes segun e palabra’ di Dios. Esei ta nifiká ku nos mester keda alerta i hasi kaso di loke Dios su palabra ta bisa. E Palabra di Dios ta un guia konfiabel ku ta yuda nos distinguí bèrdat for di falsedat. (Pro. 23:23) Sitando for di e Skritura, Hesus a bisa ku ‘hende mester biba di tur palabra ku ta sali for di boka di Yehova.’ (Mat. 4:4) Esei ta nifiká ku nos mester siña kon pa apliká prinsipionan bíbliko den nos bida. Por ehèmpel, hopi tempu promé ku Moises a registrá Yehova su lei ku ta kondená adulterio, Yosef, kende e tempu ei tabata hóben, tabata sa ku tal kondukta ta un piká kontra Dios. Ora e kasá di Potifar a purba di sedusié pa e tene relashon seksual kuné, nunka el a pensa di desobedesé Yehova. (Lesa Génesis 39:7-9.) Aunke e kasá di Potifar a sigui preshoná Yosef durante un temporada, Yosef no a skuch’é; el a obedesé e bos di Yehova. Ki lès nos por siña for di esaki? Pa nos por distinguí bon for di malu, nos mester skucha e bos di Yehova i sera nos orea pa e boroto konstante di Satanas su ideanan engañoso.

6, 7. Kon nos por evitá ku Satanas ta gaña nos?

⁶ Mundu ta asina saturá ku siñansanan religioso kontradiktorio ku hopi hende ta pensa ku no ta bale la pena pa buska e religion berdadero. Pero Yehova a sòru pa ken ku ke sirbié por haña e bèrdat fásilmente. Ta nos mester skohe ken nos ke skucha. I komo ku ta práktikamente imposibel pa enfoká riba dos stèm pareu,  nos mester ‘konosé e stèm di Hesus’ i skuch’é. É ta esun ku Yehova a nombra pa guia Su karnénan.—Lesa Huan 10:3-5.

⁷ Hesus a bisa: “Presta atenshon na loke boso ta tende.” (Mar. 4:24) Yehova su konsehonan ta kla i bon pa nos; ta nos mester ta dispuesto pa kumpli ku nan. Si nos no tene kuidou, nos por kuminsá hasi kaso di Satanas su mal konsehonan en bes di sigui Yehova su guia amoroso. Nunka nos mester laga ideanan di e mundu akí—ku ta ser promové via músika, pelíkula, programanan di televishon, buki, kompañeronan, edukadónan òf supuesto ekspertonan—kontrolá nos bida.—Kol. 2:8.

8. (a) Kon nos kurason por pone nos kai den trampa di Satanas? (b) Kiko por pasa ora nos ta ignorá señalnan di atvertensia?

⁸ Satanas sa ku nos ta imperfekto, p’esei e ta purba di usa nos debilidatnan kontra nos. Ora Satanas ta hasi esei, por ta difísil pa nos keda fiel na Yehova. (Huan 8:44-47) Laga nos suponé ku un persona ta kore tras di plaser asina tantu ku e ta kometé un mal echo ku nunka el a pensa di hasi. (Rom. 7:15) Kon bini el a hañ’é den e situashon tristu ei? Probablemente e persona ei tiki tiki a stòp di skucha Yehova. Por ehèmpel, e ta stòp di hasi orashon, ta mengua den su sirbishi di vèlt i ta falta reunion regularmente. Eseinan ta señalnan di atvertensia ku sea e no a tuma nota di dje òf ku el a skohe pa ignorá. P’esei ku tempu, el a sukumbí na su deseonan i a hasi loke e tabata sa ku ta malu. Kon nos por evitá di kometé un eror katastrófiko asina? Nos tin ku keda alerta i hasi kaso di señalnan di atvertensia i dal paso mesora pa korigí un asuntu. Un otro manera ku nos por demostrá ku nos ta skucha e bos di Yehova ta di rechasá tur idea apóstata.—Pro. 11:9.

9. Dikon ta importante pa for di trempan nos detektá kualke mal deseo òf pensamentu robes ku nos por tin?

⁹ Si un persona enfermo deskubrí trempan ki malesa e tin, e tin mas chèns di skapa. Di mes manera, si nos ripará ku nos tin deseo- òf pensamentunan robes, nos mester aktua mesora pa ‘Satanas no kue nos den su gara pa hasi su boluntat.’ (2 Tim. 2:26) Pero, kiko nos mester hasi ora nos ripará ku nos manera di pensa i nos deseonan no ta na armonia mas ku Yehova su boluntat? Mesora nos mester dal paso pa bolbe serka Yehova, nos mester habri nos kurason pa aseptá su konseho i hasi kaso di loke e ta bisa. (Isa. 44:22) Nos mester kòrda ku ún solo mal  desishon por tin konsekuensianan teribel pa nos i laga nos ku sikatris pa e restu di nos bida den e mundu malbado akí. Pues, ta sabí pa semper nos aktua mesora pa nunka nos kai den trampa di Satanas.

10, 11. (a) Kiko ta algun rasgo di orguyo? (b) Ki lès nos por saka for di e rebeldia di Koré, Datan i Abiram?

¹⁰ Nos mester rekonosé ku nos kurason por alehá nos di Yehova. Tuma por ehèmpel orguyo i golosidat. E karakterístikanan akí por stroba un persona di obedesé e bos di Yehova i pon’é kometé erornan grave. Un persona orguyoso ta pensa demasiado di su mes. Podisé e ta sinti ku e tin derecho di hasi loke e ke i ku niun hende no tin nada di bis’é, ni su kompañeronan kristian ni e ansianonan ni e organisashon di Dios. Un persona asina kisas a alehá su mes asina tantu for di Yehova ku kasi e no ta skucha e bos di Yehova mas.

¹¹ Tempu ku e israelitanan tabata den desierto, Koré, Datan i Abiram a rebeldiá kontra e outoridat di Moises i Aron. Orguyo a pone nan kuminsá adorá Yehova na nan manera. Kon Yehova a reakshoná? Yehova a mata nan tur. (Num. 26:8-10) E relato akí ta siña nos un lès importante: Rebeldia kontra Yehova ta hiba na desaster. Ta manera Beibel ta bisa: “Orguyo ta bini promé ku destrukshon.”—Pro. 16:18; Isa. 13:11.

12, 13. (a) Duna un ehèmpel ku ta mustra kon golosidat por hiba na kalamidat. (b) Splika kon golosidat por bira un karakterístika dominante.

¹² Laga nos papia awor di golosidat. Un persona golos hopi biaha ta tuma muchu libertat i ta komportá su mes na un manera inapropiá. Tuma por ehèmpel Gehazi, sirbidó di Eliseo. Despues ku Naman, hefe di e ehérsito sirio, a kura di lepra, e kier a duna profeta Eliseo algun regalo, ma Eliseo no a aseptá nan. Pero Gehazi sí tabata ke e regalonan akí. El a bisa den su mes: “Manera SEÑOR ta biba, lo mi kore bai [Naman] su tras i tuma algu for di dje.” I sin ku Eliseo tabata sa, Gehazi a kore bai serka Naman i a gañ’é pa e haña “un talento di plata i dos sèt di paña.” Kiko a pasa ku e hòmber golos Gehazi? Wèl, el a haña e lepra ku Naman tabatin.—2 Rei. 5:20-27.

¹³ Golosidat por kuminsá ku deseonan simpel. Pero si nos no kontrolá esaki, e por bira mas fuerte te ku e por bira un karakterístika dominante. E relato bíbliko tokante Akan ta ilustrá esaki bon kla. Akan a bisa: “Ora mi a mira entre e botin un bunita mantel for di Sinar i dos shen siklo di plata i un bara di oro di un peso di sinkuenta siklo, mi a kudishá nan i a kohe nan.” Akan no a rechasá su mal deseo. En bes di esei, el a hòrta e artíkulonan i a skonde nan den su tènt. Yehova a saka Akan su mal echo na kla i, riba e mesun dia ei, nan a piedra Akan i su famia mata. (Hos. 7:11, 21, 24, 25) Meskos ku Akan, nos tur por kai den e trampa di golosidat. Ta p’esei Beibel ta bisa pa nos ‘warda nos mes di tur sorto di golosidat.’ (Luk. 12:15) Si de bes en kuando nos haña nos ku pensamentunan robes òf ta kuminsá pensa riba kosnan inmoral, ta masha importante pa nos kontrolá nos pensamentunan pa deseonan robes no hiba nos na piká.—Lesa Santiago 1:14, 15.

14. Kiko nos mester hasi si nos ripará ku nos tin rasgonan di orguyo òf di golosidat?

¹⁴ Tantu orguyo komo golosidat por hiba na desaster. P’esei, pa nos por sigui obedesé e bos di Yehova, nos mester pensa riba e konsekuensianan di e karakterístikanan ei. (Deu. 32:29) Den su Palabra, Yehova ta bisa nos kiko ta korekto pa hasi  i kiko ta e benefisionan di esei. Ademas, Yehova ta bisa nos kiko ta e konsekuensianan di mal kondukta. P’esei, si orguyo òf golosidat ta impulsá nos pa hasi loke ta malu, ta bon pa nos pensa kon esei lo afektá nos, nos sernan kerí i nos relashon ku Yehova.

15. Kiko nos por siña for di e ehèmpel di Hesus?

¹⁵ Yehova ke lo mihó pa nos. (Sal. 1:1-3) E ta duna nos e guia ku nos tin mester na e momento apropiá. (Lesa Hebreonan 4:16.) Aunke Hesus tabata un hòmber perfekto, tur ora e tabata komuniká ku Yehova. Konstantemente e tabata hasi orashon. I Yehova, na su turno, a sosten’é i a gui’é na maneranan ekstraordinario. Yehova a manda su angelnan pa sirbi Hesus, el a duna Hesus su spiritu santu i a guia Hesus na momento ku e tabata bai skohe e 12 apòstelnan. Yehova a asta papia for di shelu pa mustra ku su Yu tabatin su apoyo i aprobashon. (Mat. 3:17; 17:5; Mar. 1:12, 13; Luk. 6:12, 13; Huan 12:28) Nos tambe mester hasi orashon sinsero i riba un base regular, manera Hesus tabata hasi. (Sal. 62:7, 8; Heb. 5:7) Orashon ta yuda nos mantené un bon komunikashon ku Yehova i sigui biba na un manera ku ta duna onor na dje.

16. Kon Yehova ta yuda nos obedesé su bos?

¹⁶ Yehova su guia ta na alkanse di tur hende ku ke siguié, pero e no ta obligá nos pa hasi esei. Si nos ke sigui su guia, nos tin ku pidié su spiritu santu i lo e duna nos esaki generosamente. (Lesa Lukas 11:10-13.) No opstante, ta masha importante pa nos ‘presta atenshon na e manera ku nos ta skucha.’ (Luk. 8:18) Dikon? Pasobra nos lo ta hipókrita si nos ta pidi Yehova yuda nos vense un deseo inmoral miéntras ku nos ta sigui wak pornografia òf pelíkulanan inmoral. Pa Yehova yuda nos, nos mester sòru pa nos ta den un ambiente òf na un sitio kaminda Yehova su spiritu santu por obra, manera por ehèmpel na nos reunionnan di kongregashon. Despues di a skucha e bos di Yehova na reunionnan di kongregashon, hopi sirbidó di Yehova a ripará ku nan tabatin mal deseo. P’esei, mesora nan a dal paso pa korigí e asuntu i asina spar nan mes di hopi doló.—Sal. 73:12-17; 143:10.

17. Dikon ta peligroso pa nos dependé riba nos mes?

¹⁷ Awor, kiko nos por siña for di e ehèmpel di Rei David di Israel di antigwedat? Tempu ku e tabata konfia kompletamente den Yehova, el a logra kosnan maravioso den su bida. Komo hóben, el a vense e filisteo gigante Goliat. Ku tempu, David a bira sòldá i tambe rei. I su tarea tabata pa protehá e nashon di Israel i tuma desishon pa nan. Pero ora David a kuminsá dependé riba su mes, su kurason a traishon’é i a pon’é kometé un piká grave ku Bètsabé. El a asta laga mata Urías, e kasá di Bètsabé. Pero ora el a haña korekshon di Yehova, humildemente el a atmití su eror i a drecha su relashon ku Yehova.—Sal. 51:4, 6, 10, 11.

18. Kiko por yuda nos sigui obedesé e bos di Yehova?

¹⁸ Beibel ta siña nos na 1 Korintionan 10:12 ku nos no mester konfia demasiado den nos mes. I komo ku nos no por ‘dirigí nos pasonan,’ otro persona tin ku hasi esaki pa nos: Sea nos ta obedesé e bos di Yehova òf e bos di su Atversario. (Yer. 10:23) P’esei, ta masha importante pa sigui hasi orashon konstantemente, sigui guia di Dios su spiritu santu i semper obedesé e bos di Yehova.