1, 2. Ki asignashon Yehova a duna Moises, i kiko Yehova a primintié?

IMAGINÁ bo ku bo tin ku presentá dilanti di e gobernante di mas poderoso na mundu pa papia na nòmber di Dios su pueblo. Kon lo bo sinti bo? Probablemente lo bo ta nèrvioso i kisas lo bo no por ni papia. Awor, kon lo bo prepará bo mes? I komo representante di e Dios todopoderoso, kiko bo por hasi pa bo palabranan por tin mas peso?

² Esei tabata e situashon ku Moises a hañ’é konfrontá kuné. Beibel ta bisa ku Moises “tabata masha humilde, mas ku tur hòmber ku tabatin riba superfisie di tera.” (Num. 12:3) Pero tòg Yehova a manda é serka Fárao, kende tabata un hòmber arogante i sin rèspèt. Yehova a bisa Moises pa e ordená Fárao pa laga Dios su pueblo, e miónes di israelitanan, liber pa nan por a bandoná e pais. (Éks. 5:1, 2) Ta di komprondé ku Moises a puntra Yehova: “Ta ken mi ta pa mi lo a bai serka Fárao i saka e yunan di Israel for di Egipto?” Probablemente Moises a sinti ku e tabata inkapas i ku e no tabata e persona adekuá pa papia ku Fárao. Pero Yehova a bis’é ku lo e no ta su so. Yehova a sigur’é: “Lo mi ta ku bo.”—Éks. 3:9-12.

3, 4. (a) Miedu di kiko Moises tabatin? (b) Den ki sentido nos tambe lo por haña nos ku desafio similar na esun ku Moises a konfrontá?

³ Miedu di kiko Moises tabatin? Kisas e tabata pensa ku  Fárao lo a rechas’é i keda sin hasi kaso di dje komo representante di Yehova Dios. Moises tabatin miedu tambe ku su mes hendenan lo no a kere ku ta Yehova a nombr’é pa libra nan for di Egipto. P’esei, Moises a bisa Yehova: “Suponé ku nan no kier kere mi, ni tende na loke mi ta bisa. Suponé ku nan bisa: ‘SEÑOR no a aparesé na bo.’”—Éks. 3:15-18; 4:1.

⁴ Awor kiko di nos? Ta bèrdat ku kisas nunka nos lo tin ku presentá dilanti di un gobernante importante. Pero kiko si bo tin difikultat pa papia tokante Dios i tokante su Reino ku hende den bo teritorio? E kontesta ku Yehova a duna Moises i loke a sosodé despues ta siña nos un lès masha importante. P’esei, laga nos wak kiko nos por siña for di e eksperensia di Moises.

5. Kiko Yehova a duna Moises, i kon esaki a dun’é kurashi? (Wak e promé plachi.)

⁵ Ora Moises a bisa Yehova ku e tabatin miedu ku hende lo no a tum’é na serio, Dios a prepar’é pa e por a enfrentá loke tabata sper’é ku éksito. E relato registrá na Éksodo ta bisa ku Yehova a puntr’é: “Kiko bo tin den bo man ei?” Moises a kontestá: “Un bara.” Yehova a bis’é: “Bent’é abou na suela.” Moises “a bent’é abou na suela i el a bira un kolebra, i Moises a hui p’e.” Ma Yehova a bisa Moises: “Saka bo man gar’é na su rabu.” Moises a saka su man i a gara e kolebra, i e kolebra a bira un bara den su man. E ora ei, Yehova Dios a bis’é ku esaki ta “pa nan kere ku SEÑOR . . . a aparesé na bo.” (Éks. 4:2-5) Sí, Yehova a usa su poder i a laga un bara sin bida bira un kolebra bibu. Ku e milager akí Moises por a proba ku en bèrdat e tabata un representante di Dios i ku Dios a dun’é outoridat. Yehova a bis’é: “I bo mester kohe e bara akí den bo man, ku kual bo ta hasi e señalnan.” (Éks. 4:17) Ku e símbolo di outoridat ei den su man, Moises a haña e kurashi ku e tabatin mester pa bai papia ku Fárao i ku e pueblo di Dios.—Éks. 4:29-31; 7:8-13.

6. (a) Kiko nos tin den nos man mayoria di biaha ku nos ta duna testimonio na un persona, i dikon? (b) Splika dikon Pablo a bisa ku “e palabra di Dios ta bibu i poderoso.”

⁶ Awor kiko di nos? Kiko nos tin den nos man ora nos ta papia ku hende tokante e mensahe di Beibel? Mayoria di biaha, nos tin nos Beibel i nos ta kla pa us’é. Aunke algun hende ta pensa ku Beibel ta djis un simpel buki, e ta muchu mas ku esei. E ta e Palabra inspirá di Yehova pa medio di kua Yehova ta papia ku nos. (2 Ped. 1:21) Beibel ta kontené Dios su promesanan i ta revelá na nos kiko e Reino di Dios lo hasi. Apòstel Pablo a skirbi: “E palabra di Dios ta bibu i poderoso.” (Lesa Hebreonan 4:12.) Dikon Pablo a bisa esei? Pasobra Yehova su promesanan no ta promesanan bashí: Yehova semper ta sòru pa nan kumpli. (Isa. 46:10; 55:11) Unabes un persona komprondé esaki enkuanto e Palabra di Yehova, loke e ta lesa den Beibel por tin gran influensia riba dje.

7. Kon nos por “manehá e palabra di e bèrdat korektamente”?

⁷ Yehova a duna nos su Palabra, Beibel, ku ta bibu. Kuné, nos por duna prueba ku e mensahe ku nos ta prediká ta konfiabel i ku e ta bini di Dios. P’esei, ora Pablo tabata entrená Timoteo, el a anim’é pa “manehá e palabra di e bèrdat korektamente.” (2 Tim. 2:15) Awor, kon nos por apliká Pablo su konseho? Skohiendo tekstonan apropiá pa lesa, ku por konmové kurason di e personanan ku ta skucha nos. I e tratadonan ku nos a haña na aña 2013 ta spesialmente prepará pa yuda nos hasi esei.

8. Kiko un superintendente di sirbishi a bisa di nos tratadonan nobo?

⁸ Tur e tratadonan tin e mesun estilo. Pues, unabes nos sa kon pa usa ún, nos sa  kon pa usa tur. I nan ta fásil pa usa. Un superintendente di sirbishi na Hawai, Merka, a skirbi: “Nos no por a imaginá nos mes kon efikas e tratadonan akí lo a resultá den sirbishi di kas pa kas i ora di prediká na lugánan públiko.” Dikon e tratadonan akí ta asina efikas i fásil pa usa? Segun e ruman, e manera ku e tratadonan ta hinká den otro ta impulsá hopi hende pa ekspresá nan mes. Debí ku riba nan portada tin un pregunta i su posibel kontestanan, un doño di kas lo no mester tin miedu ku e por duna un kontesta robes. I hopi bes, esaki ta hiba na kòmbersashonnan interesante.

9, 10. (a) Kon nos tratadonan ta yuda nos usa Beibel? (b) Kua tratado abo tabatin mas éksito kuné, i dikon?

⁹ Kada tratado ta kontené un teksto bíbliko, ku a ser skohé kuidadosamente, ku nos por lesa pa e doño di kas. Tuma, por ehèmpel, e tratado Sufrimentu Lo Kaba un Dia? Ora nos hasi e doño di kas e pregunta ei, e por kontestá sea “sí,” “nò” òf “kisas.” Sea kual sea su kontesta, bai mesora na e página paden i bisa: “Esaki ta loke Beibel ta bisa.” Despues, lesa Revelashon 21:3 i 4.

¹⁰ Nos por usa e mesun método akí ora di laga e tratado Kiko Bo Ta Pensa di Beibel? No ta importá kua di e tres kontestanan e doño di kas skohe. Bai mesora na e página paden i bisa: “Beibel ta bisa ku ‘henter e Skritura ta inspirá di Dios.’” Kaba, bo por bisa: “I Señora sa, e teksto di Beibel akí ta bisa algu mas.” Despues, habri bo Beibel i lesa 2 Timoteo 3:16 i 17.

11, 12. (a) Kon bo por usa e tratadonan nobo pa hasi bo sirbishi mas plasentero? (b) Kon e tratadonan akí por yuda bo prepará pa hasi rebishita?

¹¹ Dependiendo di e manera ku e doño di kas reakshoná, nos por determiná kuantu informashon mas di e tratado nos por trata. Pero sea kual sea e kaso, nos por tin e satisfakshon di a laga e tratado den man di e persona na nos promé bishita i di a lesa for di e Palabra di Dios p’e maske ta ún òf dos versíkulo so. I na un otro okashon, nos por bolbe pa sigui ku e kòmbersashon.

¹² Parti patras di kada tratado, bou di e suptema “Algu pa Pensa Ariba,” tin un pregunta i tekstonan di Beibel ku bo por trata na un siguiente bishita. Por ehèmpel, e tratado Kiko Bo Ta Pensa di Futuro? tin e  siguiente pregunta ku bo por trata na bo próksimo bishita: “Kon Dios lo kambia nos mundu i hasié un mihó lugá di biba?” I e tekstonan di Beibel ku bo por usa ta Mateo 6:9 i 10 i Daniel 2:44. E tratado E Mortonan Por Bolbe Biba? tin e siguiente pregunta: “Dikon nos ta bira bieu i muri?” E tekstonan ku bo por usa ta Génesis 3:17-19 i Romanonan 5:12.

13. Splika kon nos por usa e tratadonan pa kuminsá estudio di Beibel.

¹³ E tratadonan akí ta prepará spesialmente pa yuda nos kuminsá estudio di Beibel. Ora un persona skèn e kódigo QR * ku tin parti patras di e tratado, e ta ser dirigí mesora na un página riba nos website ku ta anim’é pa kuminsá un kurso di Beibel. E tratadonan ta hala atenshon tambe na e foyeto Dios Tin Bon Notisia pa Nos! i ta resaltá un lès spesífiko den e foyeto akí. Por ehèmpel, e tratado Ken Realmente Ta Goberná Mundu? ta animá hende pa lesa lès 5 di e foyeto. E tratado Kiko Ta e Yabi pa Felisidat den Famia? ta animá hende pa lesa lès 9. E tratadonan akí a ser prepará spesialmente pa yuda nos usa Beibel na nos promé bishita i ora nos ta hasi rebishita. Di e manera akí, nos por kuminsá mas estudio di Beibel. Kiko mas nos por hasi pa usa e Palabra di Dios na un manera mas efikas den sirbishi?

14, 15. Kon bo por imitá Pablo su ehèmpel den sirbishi?

¹⁴ Pablo su deseo sinsero tabata pa komprondé e manera di pensa di “mas tantu hende posibel” ku e topa den su sirbishi. (Lesa 1 Korintionan 9:19-23.) Dikon? E tabata ke “gana hudiu . . . , gana esnan ku ta bou di lei . . . , esnan sin lei . . .  [i] hende débil.” Sí, e kier a prediká na “tur sorto di hende” pa e por a yuda sikiera algun di nan ser salbá. (Echo. 20:21) Kon nos por imitá Pablo su ehèmpel ora nos ta prepará pa kompartí e bèrdat ku “tur sorto di hende” den nos teritorio?—1 Tim. 2:3, 4.

¹⁵ Tur luna Nos Ministerio di Reino ta duna sugerensia ku nos por usa pa presentá nos mensahe. Purba di usa e sugerensianan akí. Pero kiko si e hendenan den bo teritorio ta interesá den otro tópiko? E ora ei, ta bon pa prepará presentashonnan ku ta trata tópikonan ku lo interesá nan. Kon bo por hasi esei? Wèl, kuminsá pensa riba e hendenan den bo teritorio i riba loke mas ta interesá nan. Despues, pensa riba un teksto bíbliko ku lo por yuda nan. Un superintendente di sirkuito a splika kiko é i su esposa ta hasi pa nan usa Beibel mas tantu posibel den sirbishi. El a bisa: ‘Mayoria di doño di kas ta laga nos lesa un teksto di Beibel pa nan si nos ta breve i al kaso. P’esei, nos ta sòru pa nos tin nos Beibel habrí i, despues di kumindá e doño di kas, nos ta lesa e teksto pa nan.’ Den e siguiente paragrafnan, nos lo trata algun tópiko, pregunta i teksto di Beibel ku a duna bon resultado den sirbishi. Kisas bo por usa algun di nan den bo teritorio.

16. Splika kon lo bo por usa Isaías 14:7 den sirbishi.

¹⁶ Si bo ta biba den un área kaminda violensia i krímen ta na òrdu di dia, lo bo por puntra un persona: “Bo ta kere ku un dia nos lo lesa riba e promé página di korant: ‘Henter e tera ta na pas. Hende ta dal gritu di alegria’? Esaki ta loke Beibel ta bisa na Isaías 14:7. Anto Señora sa, Beibel ta kontené hopi promesa di Dios tokante e periodo di pas ku lo bini pronto.” Despues, puntra e persona si bo por lesa ún di e promesanan ei p’e for di Beibel.

17. Kon nos por usa Mateo 5:3 den un kòmbersashon?

 ¹⁷ Den e área kaminda bo ta biba, ta difísil pa hende gana nan pan di kada dia? Si ta asina, lo bo por kuminsá bo presentashon ku e siguiente pregunta: “Kuantu sèn un hende mester gana pa su famia por ta felis?” Despues di skucha e persona su kontesta, bo por bis’é: “Tin hopi hende ku ta gana muchu mas ku esei i tòg nan famia no ta felis. Kiko hende tin mester anto pa nan ta realmente felis?” E ora ei, lesa Mateo 5:3 i ofresé e persona un estudio di Beibel.

18. Kon nos por usa Yeremías 29:11 pa konsolá hende?

¹⁸ Tin hende den bo teritorio ku ta sufri debí na un òf otro tragedia ku a sosodé resientemente? Lo bo por kuminsá bo presentashon bisando: “Mi a bin bishitá Señora pa duna Señora un poko konsuelo.” (Lesa Yeremías 29:11.) Despues, bo por bisa: “Señora a ripará kiko ta e tres kosnan ku Dios ke pa nos tin? ‘Pas,’ ‘un futuro’ i ‘un speransa.’ No ta dushi pa sa ku Dios ke pa nos ta felis? Pero esei ta posibel?” E ora ei, bai na e lès korespondiente den e foyeto Bon Notisia.

19. Splika kon nos por usa Revelashon 14:6, 7 ora nos topa hende religioso.

¹⁹ Bo ta biba den un área kaminda tin hopi hende religioso? Si esei ta e kaso, kisas bo por kuminsá bo kòmbersashon bisando: “Si un angel mester papia ku Señora, Señora lo skuch’é? (Lesa Revelashon 14:6, 7.) E angel den e teksto akí ta bisa nos pa ‘teme Dios.’ Kiko Señora ta pensa? No ta importante pa nos sa di kua Dios e ta papiando? E angel mes ta duna nos un indikashon di ken e ta papiando ya ku el a referí na Esun ‘ku a traha shelu i tera.’ Ken esei ta?” Despues, lesa Salmo 124:8, ku ta bisa: “Nos yudansa ta den e nòmber di SEÑOR [“Yehova,” NW], kende a traha shelu i tera.” Kaba, ofresé e persona pa bo bini bèk pa splika mas tokante Yehova Dios.

20. (a) Kon nos por usa Eklesiástes 12:1 pa papia ku un hóben tokante nos Kreador? (b) Kua teksto abo a usa den sirbishi ku a duna bon resultado?

²⁰ Pa kuminsá un kòmbersashon ku un hóben, kisas bo por bisa: “Mi tin gana di lesa un teksto di Beibel pa bo ku ta spesialmente importante pa hóbennan. (Lesa Eklesiástes 12:1.) E teksto akí ta animá hóbennan pa nan kòrda riba nan Kreador. Awor, pa nos por kòrda riba nos Kreador, nos mester siña konos’é, no ta bèrdat? Kon nos por siña konos’é? Permití mi mustra bo esei den Beibel.”

21, 22. (a) Kon un teksto di Beibel bon skohí por kambia bida di un persona? (b) Kiko bo ta determiná pa hasi den sirbishi?

²¹ Nos no sa ki efekto un teksto di Beibel por tin riba un persona. Wak por ehèmpel loke a pasa na Australia. Dos ruman Testigu di Yehova a bati na porta di un mucha muhé hóben, i un di nan a puntr’é: “Yùfrou sa kon ta e nòmber di Dios?” Despues, nan a lesa Salmo 83:18 p’e. E mucha muhé a bisa: “Mi a keda sorprendí! Despues ku nan a bai, mi a kore 56 kilometer pa bai un libreria pa buska e nòmber den otro tradukshonnan di Beibel i den un dikshonario. Ora mi a keda konvensí ku e nòmber di Dios ta Yehova, mi a puntra mi mes kiko mas mi no sa.” Un poko tempu despues, é ku su futuro kasá a kuminsá studia Beibel i despues di un tempu nan a batisá.

²² No tin duda, e Palabra di Dios tin poder pa kambia bida di hende. Kon asina? Un persona ku ta lesa Beibel por kultivá fe fuerte den Yehova su promesanan. I e fe akí lo motiv’é pa apliká loke e ta siña. (Lesa 1 Tesalonisensenan 2:13.) E mensahe di Beibel ta mas poderoso ku kualke kos ku nos por bisa pa konmové kurason di un persona. P’esei, ta masha importante pa nos usa e Palabra di Dios mas tantu posibel den nos sirbishi. Kòrda, e ta bibu!