1. Ki nesesidat hende en general tin, i ken ta satisfasé e nesesidat ei?

HENDE no por sin otro. Nos ta sinti nos felis ora nos tin famia- i amigunan ku di bèrdat ta stima, balorá i komprondé nos. Pero e Persona ku mester ta nos mihó amigu ta nos Kreador, Yehova Dios.—Ekl. 12:1.

2. Kiko Yehova ta primintí nos, i dikon hopi hende no ta kere e promesa ei?

² Mediante su Palabra, Yehova ta urgi nos pa “hala serka” dje, esta, pa bira su amigu. I e ta primintí ku si nos hala serka dje, lo e “hala serka” nos. (Sant. 4:8) Esei ta un bunita promesa! No opstante, hopi hende no por kere ku Dios ke ta nan amigu; nan ta sinti ku nan no ta digno di aserká Dios i ku Dios ta muchu leu for di nan. Pero, di bèrdat nos por hala serka Yehova?

3. Kiko nos mester sa tokante Yehova?

³ Nos por hala serka Yehova pasobra e “no ta leu” for di niun persona ku ke siña konos’é. (Lesa Echonan 17:26, 27; Salmo 145:18.) Yehova ta kla i dispuesto pa aseptá nos komo su bon amigunan aunke nos ta imperfekto. (Isa. 41:8; 55:6) Di eksperensia, e salmista a skirbi di Yehova: “Abo ku ta skucha orashon, serka bo tur hende ta bini. Bendishoná  ta esun ku bo ta skohe i ta hala serka bo.” (Sal. 65:2, 4) Rei Asa di Huda tabata un bon ehèmpel di esaki. Laga nos wak kon el a hala serka Dios i kon Yehova a reakshoná. *

4. Ki ehèmpel Rei Asa a pone pa e pueblo di Huda?

⁴ Rei Asa tabatin hopi zelo pa adorashon berdadero. El a eliminá tantu prostitushon komo idolatria for di tèmpel, práktikanan ku tabata masha komun den e pais. (1 Rei. 15:9-13, NW) Komo ku Asa mes tabatin un bon relashon ku Yehova Dios i tabata obedesé Su mandamentunan, e por a urgi e pueblo pa “buska e SEÑOR Dios di nan tatanan i pa warda e lei i e mandamentu.” Yehova, na su turno, a bendishoná e promé dies añanan di Asa su reinado, di manera ku tabatin pas den e pais. Kiko a kontribuí na e trankilidat ei? Asa a bisa e pueblo: ‘Nos a buska SEÑOR nos Dios, i el a duna nos sosiegu na tur banda.’ (2 Kró. 14:1-7) Pero kiko a sosodé despues?

5. Ki situashon a pone Asa su konfiansa den Yehova na prueba, i kiko tabata e resultado?

⁵ Awor, imaginá bo ku abo tabata Rei Asa. Zera, e etiope, a sali pa bringa kontra bo nashon ku un ehérsito di 1.000.000 hòmber i 300 garoshi. (2 Kró. 14:8-10) Kon lo bo a reakshoná ora bo a mira e ehérsito grandi ei marcha bin invadí bo reino? Zera su ehérsito tabata dos biaha mas grandi ku esun di bo (ku a konsistí di solamente 580.000 persona). Kiko lo bo a hasi? Lo bo a puntra bo mes ta dikon Dios ta permití e invashon akí? Lo bo a purba di solushoná e problema akí riba bo mes? E manera ku Asa a reakshoná a mustra ku e tabatin pleno konfiansa den Yehova i ku e tabatin un relashon estrecho kuné. Asa a sklama: “Yuda nos, o SEÑOR nos Dios, pasobra ta den bo nos ta konfia, i den bo nòmber nos a bini kontra e multitut akí. O SEÑOR, abo ta nos Dios; no laga hende prevalesé kontra bo.” Kon Dios a respondé na Asa su rogamentu sinsero? Yehova “a derotá e etiopenan.” Ni ún persona di e nashon enemigu no a sobrebibí!—2 Kró. 14:11-13.

6. Ki ehèmpel di Asa nos mester sigui?

⁶ Kiko a yuda Asa konfia plenamente ku Yehova lo a gui’é i proteh’é? Beibel ta bisa ku “Asa a hasi loke tabata korekto den bista di SEÑOR” i ku su kurason “tabata kompletamente dediká na SEÑOR.” (1 Rei. 15:11, 14) Nos tambe mester sirbi Dios ku un kurason kompleto. Esei ta esensial pa nos por tin un bon relashon kuné, tantu awor komo den futuro. Nos ta masha kontentu ku Yehova a tuma inisiativa pa hala nos serka dje i pa yuda nos kultivá i keda ku un amistat íntimo kuné. Awor, laga nos wak dos manera ku Dios ta hasi esei.

7. (a) Kiko Yehova a hasi i ta hasiendo pa hala nos serka dje? (b) Kua ta e manera prinsipal ku Yehova ta hala nos serka dje?

⁷ Yehova a demostrá su amor pa humanidat ora el a krea e bunita tera akí komo nos hogar. I e ta sigui demostrá su amor perkurando loke nos tin mester diariamente pa nos por ta na bida. (Echo. 17:28; Rev. 4:11) Loke ta mas importante ainda ta ku Yehova ta perkurá pa nos nesesidat spiritual. (Luk. 12:42) Ademas, e ta garantisá nos ku e ta skucha nos orashonnan. (1 Huan 5:14) Pero  e manera prinsipal ku Dios ta hala nos serka dje i ta demostrá su amor na nos ta mediante e reskate. I ta pa medio di e reskate nos por hala serka Yehova. (Lesa 1 Huan 4:9, 10, 19.) Sí, Yehova a manda su “Yu unigénito” na mundu pa libra nos di piká i morto.—Huan 3:16.

8, 9. Ki papel Hesus ta hunga den e propósito di Yehova?

⁸ Yehova a perkurá e reskate pa benefisiá tur hende, asta hende ku a biba promé ku Kristu. Kon esei por ta posibel? Wèl, for di momento ku Yehova a profetisá tokante nos futuro Salbador, p’e tabata komo si fuera e reskate a ser pagá kaba, pasobra e tabata sa ku su propósito pa ku humanidat lo no a faya. (Gén. 3:15) Siglonan despues, apòstel Pablo a gradisí Yehova pa e “liberashon ku ta basá riba e reskate ku Kristu Hesus a paga.” Ademas, Pablo a splika ku Dios ‘a tene pasenshi ku [hende] i a pordoná e pikánan ku nan a kometé den pasado.’ (Rom. 3:21-26) Pues, si no tabata pa Hesus, nos lo no por a hala serka Dios.

⁹ Ta mediante Hesus so hende humilde por siña konosé Yehova i disfrutá di un relashon íntimo kuné. Kon e Skritura ta enfatisá e bèrdat akí? Pablo a skirbi: “Dios a demostrá su amor pa nos di e manera akí: Kristu a muri pa nos miéntras ku nos tabata pekadó ainda.” (Rom. 5:6-8) Hesus a paga e sakrifisio di reskate no pasobra nos ta meresé esei ma pasobra tantu é komo Yehova ta stima nos. Hesus a bisa: “Ningun hende no por bini serka mi a ménos ku e Tata, ku a manda mi, hal’é serka mi.” Na un otro okashon, Hesus a bisa: “Ningun hende no ta yega serka e Tata si no ta pa medio di mi.” (Huan 6:44; 14:6) Awor, kon Yehova ta hala hende serka dje mediante Hesus? Pa medio di spiritu santu. Sí, pa medio di spiritu santu, e ta hala nos serka dje i ta yuda nos keda ku un bon relashon kuné pa nos por biba pa semper. (Lesa Hudas 20, 21.) Awor, laga nos trata un otro manera ku Yehova ta hala nos serka dje.

10. Kon Beibel ta yuda nos hala mas serka Dios?

¹⁰ Te asina leu, nos a menshoná òf sita vários teksto for di 14 buki di Beibel. Si nos no tabatin Beibel, kon nos por a sa ku nos por hala serka nos Kreador? Kon nos por a siña di e reskate i haña sa ku nos por hala serka Yehova mediante Hesus? Ta Beibel ta revelá na nos Yehova su bunita personalidat i su propósito pa humanidat. Por ehèmpel, na Éksodo 34:6 i 7, Yehova a deskribí su mes komo un Dios “yen di kompashon i grasia, kende no ta rabia lihé i kende ta abundá den miserikòrdia i bèrdat; kende ta mantené miserikòrdia pa milnan, kende ta pordoná inikidat, transgreshon i piká.” Ken lo no sinti nan atraí na un persona asina? Yehova sa ku, mas nos siña tokante dje pa medio di Beibel, mas real lo e bira pa nos i nos lo sinti nos mas serka dje.

11. Dikon nos mester hasi esfuerso pa siña tokante Yehova? (Wak e promé plachi.)

¹¹ E prólogo di e buki Hala Serka Yehova ta mustra ku segun ku nos ta sera ku un persona, nos ta siña konos’é i atmirá su kualidatnan. Pues, pa nos por tin un amistat estrecho ku Dios, nos mester siña konos’é i haña sa ken e ta realmente. Pa logra esei, ta importante pa studia loke Beibel ta revelá tokante Dios su kualidatnan. P’esei, nos mester ta masha  gradisidu ku Yehova a laga skirbi su Palabra na un manera ku ta fásil pa nos komprondé.

12. Dikon Yehova a usa hende pa skirbi Beibel?

¹² Yehova por a laga e angelnan skirbi Beibel. Al fin al kabo, nan ta masha interesá den nos i den nos aktividatnan. (1 Ped. 1:12) I no tin duda ku e angelnan por a skirbi Dios su mensahe pa humanidat. Pero, nan lo no por a relatá kosnan for di un punto di bista humano. Nan no tin e sintimentunan, nesesidatnan i debilidatnan ku nos tin. Yehova sa ku e angelnan ta masha diferente for di nos, p’esei el a laga hende skirbi Beibel. Asina nos por komprondé pensamentu- i sintimentunan di e eskritornan di Beibel i otro personahenan ku tin den Beibel. Nos por komprondé nan doló, desepshon, duda, miedu i fayonan. Nos ta komprondé kiko nan a sinti den nan momentonan di goso. I meskos ku profeta Elías, tur e eskritornan di Beibel tabatin “e mesun sintimentunan ku nos.”—Sant. 5:17.

13. Kon Yonas su orashon ta laga bo sinti?

¹³ Laga nos analisá, por ehèmpel, e relato di Yonas. Yehova a duna profeta Yonas un asignashon importante, pero Yonas a kore pa su asignashon. Si un angel a skirbi e relato akí, lo e no por a duna un bon deskripshon di e sintimentunan di Yonas. Sin duda, tabata bon ku Yehova a laga Yonas mes skirbi su historia, inkluso e orashon ku el a hasi na Dios den fondo di laman. Yonas a bisa: “Ora mi a sinti ku rosea di bida tabata kaba pa mi, mi a kòrda riba bo, SEÑOR.” (BPK)—Yonas 1:3, 10; 2:1-9.

14. Dikon nos por komprondé loke Isaías a skirbi tokante su mes?

¹⁴ Wak tambe kiko Yehova a inspirá  profeta Isaías pa skirbi tokante su mes. Despues ku Isaías a mira e gloria di Dios den un vishon, el a realisá kon imperfekto e tabata i a bisa: “Ai di mi, pasobra mi ta ruiná! Pasobra mi ta un hòmber di lep impuru, i mi ta biba meimei di un pueblo di lep impuru; pasobra mi wowo a mira e Rei, e SEÑOR di ehérsitonan.” (Isa. 6:5) Un angel lo no por a ekspresá e palabranan ei, pero Isaías sí. I nos por komprondé kon Isaías lo a sintié.

15, 16. (a) Kon bini nos por komprondé loke otro hende ta sinti? Duna algun ehèmpel. (b) Kiko lo yuda nos hala mas serka Yehova?

¹⁵ E angelnan por a bisa enkuanto nan mes ku nan “no ta digno,” manera Yakòb a bisa di su mes, òf ku nan ta “pekadó,” manera Pedro a ekspresá di su mes? (Gén. 32:10; Luk. 5:8) Un angel lo a “haña miedu,” manera algun disipel di Hesus? Si un angel a hañ’é ku persekushon, lo e mester “a tuma kurashi” pa prediká e bon notisia manera Pablo i otronan mester a hasi? (Huan 6:19; 1 Tes. 2:2) Nò, pasobra e angelnan ta perfekto den tur sentido i nan ta poderoso. Pero e personanan ku Yehova a usa pa skirbi Beibel tabata imperfekto meskos ku nos awe; pues nos ta komprondé nan sintimentunan. Sí, ora nos ta lesa e Palabra di Dios, di bèrdat nos por ‘alegrá ku esnan ku ta alegrá i yora ku esnan ku ta yora.’—Rom. 12:15.

¹⁶ Ora nos ta meditá riba e manera ku Yehova a trata su sirbidónan fiel di pasado, nos lo haña sa hopi kos maravioso di nos Dios, kende ku pasenshi i amor a hala hende imperfekto serka dje. Di e manera ei, nos lo siña konosé Yehova profundamente i stim’é masha hopi mes. I resultado di esei ta ku nos lo hala mas serka dje.—Lesa Salmo 25:14.

17. (a) Ki spièrtamentu sabí Azarias a duna Asa? (b) Dikon nos por bisa ku Asa no a hasi kaso di Azarias su spièrtamentu, i kiko tabata e konsekuensia?

¹⁷ Despues ku Rei Asa a gana e bataya kontra e ehérsito etiope, profeta Azarias a bisa é i e pueblo: “SEÑOR ta ku boso ora boso ta kuné. I si boso busk’é, e lo laga boso hañ’é; ma si boso bandon’é, e lo bandoná boso.” (2 Kró. 15:1, 2) Pero lamentablemente, mas despues, Asa no a hasi kaso di Azarias su spièrtamentu. Ora e reino di Israel a bin bringa kontra Huda, Asa a haña miedu. I en bes di akudí na Yehova atrobe pa yudansa, Asa a sera aliansa ku e sirionan, kendenan tabata pagano. Yehova a bis’é: “Bo a aktua ku bobedat den esaki. Di bèrdat, for di awor padilanti siguramente lo bo tin guera.” I en bèrdat, durante e último añanan di Asa su gobernashon tabatin guera kontinuamente. (2 Kró. 16:1-9) Kiko nos por siña for di esaki?

18, 19. (a) Kiko nos mester hasi si nos a distansiá nos mes for di Dios? (b) Kon nos por hala mas serka Yehova?

¹⁸ Nunka nos mester alehá nos mes for di Yehova. Si nos a distansiá nos mes for di Yehova Dios, dal paso mesora i hasi loke Oséas 12:6 ta bisa: “Bolbe serka bo Dios, tene miserikòrdia i hasi hustisia, i spera kontinuamente riba bo Dios.” Pues anto, laga nos sigui hala mas i mas serka Yehova. Kon? Nos mester sigui meditá ku apresio riba e reskate i studia e Palabra di Dios diligentemente.—Lesa Deuteronomio 13:4.

¹⁹ E salmista a skirbi: “Ta bon pa mi keda serka di Dios.” (Sal. 73:28) Esaki ta bon pa nos tambe. Laga nos pone komo meta pa sigui siña mas kos nobo tokante Yehova; asina nos ta haña mas motibu pa stim’é. I mas nos hala serka Yehova, mas lo e hala serka nos, awor i pa semper!