Den e promé siglo, apòstel Pablo a bisa e ansianonan ku tabata sirbi den e kongregashon di Efeso: “Presta atenshon na boso mes i na henter e tou, meimei di kua spiritu santu a nombra boso komo superintendente pa pastoriá e kongregashon di Dios, ku el a kumpra ku sanger di su Yu.” (Echo. 20:28) Kon spiritu santu ta enbolbí den e nombramentu di ansiano i sirbidó ministerial awe?

Di promé, spiritu santu a motivá e eskritornan di Beibel pa skirbi kiko ta e rekisitonan pa un ruman hòmber bira ansiano òf sirbidó ministerial. Na 1 Timoteo 3:1-7 nos ta haña un lista di 16 rekisito pa ansiano, i algun otro pasashi di Beibel, manera Tito 1:5-9 i Santiago 3:17 i 18, ta menshoná algun rekisito mas. E rekisitonan pa sirbidó ministerial nos ta haña na 1 Timoteo 3:8-10, 12 i 13. Di dos, tantu e rumannan ku ta hasi rekomendashon komo esnan ku ta hasi nombramentu ta pidi Yehova spesífikamente pa laga spiritu santu guia nan ora nan tin ku determiná si un ruman ta kumpli ku e rekisitonan bíbliko na un grado rasonabel. Di tres, e ruman ku ta ser rekomendá pa bira ansiano òf sirbidó ministerial mester laga mira na e manera ku e ta hiba su bida ku el a kultivá e fruta di Dios su spiritu santu. (Gal. 5:22, 23) Pues, e spiritu di Dios ta enbolbí den tur aspekto di e proseso di nombramentu.

Pero ken realmente ta nombra e rumannan ei? Den pasado tabata manda tur rekomendashon relashoná ku nombramentu di ansiano i sirbidó ministerial pa e sukursal lokal. Einan, rumannan asigná pa e Kuerpo Gobernante tabata analisá e rekomendashonnan akí i hasi e nombramentunan apropiá. Kaba, sukursal tabata notifiká e kuerpo di ansiano di e desishon. Anto e ansianonan, na nan turno, tabata informá e rumannan en kuestion di nan nombramentu i tabata puntra nan si nan tabata dispuesto pa aseptá e asignashon i si di bèrdat nan tabata kumpli ku e rekisitonan. Por último, tabata hasi un anunsio na e kongregashon.

Den promé siglo tabatin biaha ku e apòstelnan a hasi nombramentunan spesífiko, manera ora ku nan a apuntá shete hòmber pa supervisá e partimentu di kuminda di tur dia pa e biudanan. (Echo. 6:1-6) Sinembargo, e ehèmpel akí no ta mustra ku e apòstelnan a nombra ansiano ku sirbidó ministerial, pasobra e shete hòmbernan ei kisas ya kaba tabata sirbi komo ansiano promé ku nan a haña e tarea adishonal akí. Pues, kon e nombramentu di ansiano i sirbidó ministerial tabata tuma lugá den promé siglo?

E Skritura no ta splika detayadamente kon kada nombramentu a tuma lugá e tempu ayá, pero sí nos ta haña algun indikashon di e manera ku esei tabata bai. Beibel ta bisa ku ora Pablo ku Bárnabas tabata  biniendo kas bèk for di nan promé biahe komo misionero, “den kada kongregashon nan a nombra algun hòmber pa sirbi komo ansiano. Nan tabata hasi orashon i yuna, pa despues enkargá e hòmbernan na Yehova, esun den ken nan a pone fe.” (Echo. 14:23) Añanan despues, Pablo a bisa su kompañero di biahe Tito den un karta: “Mi a laga bo na Kreta pa bo por korigí e kosnan ku tabata laga hopi di deseá i pa bo nombra ansiano den kada stat, manera mi a instruí bo.” (Tito 1:5) Anto ta parse ku Timoteo, kende a biaha ekstensamente ku apòstel Pablo, tambe a haña e mesun outoridat ei. (1 Tim. 5:22) Manera nos por mira den e kasonan akí, ta e superintendentenan biahero tabata hasi e nombramentunan akí, no e apòstelnan ku ansianonan na Herúsalèm.

Ku e presedente bíbliko akí na mente, e Kuerpo Gobernante di Testigunan di Yehova a ahustá e manera ku ta nombra ansiano i sirbidó ministerial. Desde 1 di sèptèmber 2014, esaki ta tuma lugá di e siguiente manera: Kada superintendente di sirkuito ta repasá kuidadosamente e rekomendashonnan di e ansianonan den su sirkuito. Durante su bishita na e kongregashonnan, lo e hasi esfuerso pa siña konosé e rumannan ku a ser rekomendá i, si ta posibel, traha huntu ku nan den sirbishi. Despues di analisá e rekomendashonnan huntu ku kada kuerpo di ansiano, e superintendente di sirkuito tin e responsabilidat di nombra e ansianonan i sirbidónan ministerial den e kongregashonnan di su sirkuito. Di e manera akí e proseso ta kuadra mas ku e patronchi di e promé siglo.

Ken ta hasi kiko den e proseso akí? Manera semper, ta “e esklabo fiel i prudente” tin e responsabilidat prinsipal di duna kuminda na e sirbidónan di kas. (Mat. 24:45-47) Ku yudansa di spiritu santu, e esklabo fiel ta investigá e Skritura pa sa kon mester organisá e kongregashon mundial i despues e ta duna instrukshon riba e manera práktiko pa apliká prinsipionan bíbliko relashoná ku esei. E esklabo fiel ta nombra tambe tur superintendente di sirkuito i miembro di Komité di Sukursal. Kada sukursal, na nan turno, ta duna yudansa práktiko pa implementá e instrukshonnan ku ta bini di e esklabo fiel. Kada kuerpo di ansiano, di nan parti, tin e deber importante di evaluá kuidadosamente si e ruman hòmbernan ku nan ta rekomendá pa sirbi den e kongregashon di Dios ta kumpli ku e rekisitonan bíbliko. I por último, kada superintendente di sirkuito tin e responsabilidat serio di analisá huntu ku orashon e rekomendashonnan ku e kuerpo di ansiano a hasi i despues nombra e hòmbernan ku ta kumpli ku e diferente rekisitonan.

Ora nos ta komprondé kon e nombramentunan ta tuma lugá, nos ta mira mas mihó tambe kon spiritu santu ta enbolbí den e proseso. Anto esaki ta duna nos mas konfiansa den e rumannan ku a ser nombrá den kongregashon i nos lo tin mas rèspèt pa nan tambe.—Heb. 13:7, 17.

Revelashon 11:3 ta papia di dos testigu ku lo a profetisá pa 1.260 dia. Kaba e relato ta bisa ku e bestia salbahe lo a “vense nan i mata nan.” Pero pa gran sorpresa di tur mirónes, despues di ‘tres dia i mei’ e dos testigunan akí ta ser resusitá.—Rev. 11:7, 11.

Ken e dos testigunan akí ta? E relato mes ta yuda nos identifiká nan. Di promé, e relato ta bisa ku nan ta ser simbolisá pa “e dos palunan di oleifi i e dos kándelarnan.” (Rev. 11:4) Esaki ta laga nos kòrda riba e kándelar i dos palu di oleifi ku e profesia di Zakarías ta deskribí. Den e profesia ei, e palunan di oleifi a simbolisá “e dos ungínan,” esta, Gobernador Zorobabel i Sumo Saserdote Hosue ku tabata ‘pará banda di e Señor di henter tera.’ (Zak. 4:1-3, 14) Di dos, segun e relato e dos testigunan ta hasi señalnan similar na esnan ku Moises i Elías a hasi.—Kompará Revelashon 11:5, 6 ku Numbernan 16:1-7, 28-35 i 1 Reinan 17:1; 18:41-45.

Kiko ta loke e profesia di Revelashon i di Zakarías tin en komun? Den tur dos kaso, e relatonan ta referí na e hòmbernan ungí ku a dirigí e pueblo di Dios durante un periodo difísil di prueba. Pues, ken ta esnan ku den e kumplimentu di Revelashon kapítulo 11 a prediká pa tres aña i mei “bistí na paña di saku”? Esei ta e rumannan ungí ku a dirigí e pueblo di Dios durante e tempu ku e Reino di Dios a keda establesí den shelu na 1914. *

Despues ku nan a prediká bistí na paña di saku, e ungínan akí a ser matá simbólikamente ora ku nan a ser enkarselá pa un periodo di tempu mas kòrtiku: tres dia i mei. E enemigunan di e pueblo di Dios a kere ku nan a logra kaba ku e obra di e dos testigunan pa semper, i esaki a hasi e opositornan ei masha kontentu.—Rev. 11:8-10.

Sinembargo, manera e profesia a indiká, na final di e tres dianan i mei simbóliko, e dos testigunan a ser resusitá: E ungínan a ser librá for di prizòn. Ademas, esnan ku a keda fiel a risibí un nombramentu spesial serka Dios mediante nan Señor, Hesukristu. Na 1919, nan tabata entre esnan ku a ser nombrá pa sirbi komo un “esklabo fiel i prudente” ku lo a atendé e nesesidatnan spiritual di e pueblo di Dios durante e último dianan.—Mat. 24:45-47; Rev. 11:11, 12.

Un punto interesante ta ku Revelashon 11:1 i 2 ta konektá e susesonan akí na e periodo ku lo a midi, òf inspekshoná, e tèmpel spiritual. Malakías kapítulo 3 ta menshoná un inspekshon similar di e tèmpel spiritual, siguí pa un periodo di purifikashon. (Mal. 3:1-4) Kon largu e inspekshon i trabou di purifikashon akí a dura? Esei a dura di 1914 te na prinsipio di 1919. E periodo akí a inkluí tantu e 1.260 dia (42 luna) komo e tres dianan i mei simbóliko menshoná den Revelashon kapítulo 11.

Nos ta masha kontentu ku Yehova a sòru pa e trabou di purifikashon spiritual akí tuma lugá pa asina limpia un pueblo spesial pa hasi obranan ekselente! (Tito 2:14) Ademas, nos ta apresiá e bon ehèmpel di e ungínan fiel ku a dirigí e pueblo di Dios durante e periodo difísil di prueba ei i asina a sirbi komo e dos testigunan simbóliko. *