GUY HOLLIS PIERCE, un miembro di e Kuerpo Gobernante di Testigunan di Yehova, a terminá su sirbishi aki riba tera, djamars dia 18 di mart 2014. E tabatin 79 aña di edat. I komo ku e tabata un di e rumannan di Kristu, el a ser resusitá pa biba den shelu.—Heb. 2:10-12; 1 Ped. 3:18.

Guy Pierce a nase dia 6 di novèmber 1934, na Auburn, California, Merka, i a batisá na aña 1955. Na 1977, el a kasa ku Penny i huntu nan a lanta vários yu. P’esei, e por tabata manera un tata pa hopi ruman. Na 1982, e ku su esposa stimá, Penny, a bira pionero. I na 1986 el a kuminsá sirbi komo superintendente di sirkuito na Merka, i nan a hasi e trabou ei pa 11 aña largu.

Na 1997, Guy ku Penny Pierce a kuminsá sirbi komo miembro di e famia di Bètel na Merka. Ruman Pierce a traha den e Departamento di Sirbishi, i na 1998 el a kuminsá sirbi komo ayudante den e Komité di Personal di Kuerpo Gobernante. I dia 2 di òktober 1999, durante e reunion anual di Watch Tower Bible and Tract Society of Pennsylvania, nan a anunsiá ku Ruman Pierce a ser nombrá komo miembro di Kuerpo Gobernante. Durante e último añanan, el a sirbi den e komiténan di Personal, Redakshon, Publikashon i di Koordinadó.

Semper Ruman Pierce tabatin un smail riba su kara i un bon sentido di humor. Debí na esei, hende di diferente rasa i kultura tabata sinti nan kómodo kuné. Sinembargo, e kualidatnan ku realmente a atraé hende na dje tabata su amor, su humildat, su rèspèt pa Dios su lei- i prinsipionan i su fe fuerte den Yehova. Pa Guy Pierce, solo tabatin mas chèns di keda sin sali ku e promesanan di Yehova keda sin kumpli; i e tabata ke pa tur hende na mundu sa esei.

Ruman Pierce tabata traha duru pa Yehova; e tabata lanta trempan i hopi bes e tabata sigui traha te anochi lat. El a biaha rònt mundu pa animá su rumannan kristian; nunka e tabata muchu kansá pa dediká tempu na e miembronan di famia di Bètel i na otro hende ku tabata ke disfrutá di su kompania òf ku tabatin mester di su konseho òf yudansa. Aunke hopi aña a pasa, ainda rumannan ta kòrda su hospitalidat, amistat i konsehonan bíbliko ku nan a disfrutá di dje.

Nos ruman i amigu stimá a laga tras su kasá, su seis yunan, su nietu- i bisañetunan i un gran kantidat di yu spiritual. Mark Sanderson, un otro miembro di Kuerpo Gobernante, a duna e diskurso di entiero na Bètel di Brooklyn djasabra dia 22 di mart 2014. El a papia entre otro di Ruman Pierce su speransa selestial i a lesa loke Hesus a bisa Su disipelnan: “Den kas di mi Tata tin masha hopi lugá. . . . Ora mi bai i prepará un lugá pa boso, lo mi bini bèk i risibí boso serka mi, pa kaminda mi ta, boso tambe por ta. I kaminda mi ta bai, boso sa e kaminda.”—Huan 14:2-4.

Sí, nos lo sinti Ruman Pierce su falta masha hopi mes. Pero, nos ta kontentu ku e tabata “sa e kaminda” ku ta hiba na su “lugá” di biba permanente.