1, 2. Kon Hesus a fortalesé su disipelnan dia el a resusitá?

TABATA e dia ku Hesus a resusitá. Dos di su disipelnan tabata kana bai un pueblito ku tabata keda un 11 kilometer for di Herúsalèm. Komo ku nan no tabata sa ku Hesus a resusitá, ainda nan tabata lamentá su morto. Diripiente, Hesus a aparesé, a kuminsá kana huntu ku nan i a konsolá nan. Kon el a konsolá nan? Wèl, “kuminsando ku Moises i tur e Profetanan, el a splika nan e kosnan tokante su mes den henter e Skritura.” (Luk. 24:13-15, 27) I segun ku e tabata splika nan e Skritura na plaka chikí, nan a keda asina emoshoná ku ta komo si fuera nan kurason tabata na kandela.—Luk. 24:32.

² E mesun anochi ei, e dos disipelnan akí a regresá Herúsalèm i a konta e otro disipelnan loke a pasa ku nan. I miéntras nan tabata papiando, Hesus a aparesé na nan tur. E disipelnan a haña miedu i tabata duda ku tabata Hesus mes. Kon Hesus a fortalesé nan? Beibel ta bisa ku Hesus “a habri nan mente kompletamente pa nan kapta nifikashon di e Skritura.”—Luk. 24:45.

3. Kiko por desanimá nos, i kiko por yuda nos keda ku nos goso den sirbishi?

³ Meskos ku e disipelnan ei, nos tambe sa sinti nos tristu.  Podisé nos ta desanimá pasobra aunke nos ta hasi hopi den e trabou di Señor, nos no ta mira fruta di nos trabou. (1 Kor. 15:58) Òf por parse ku e personanan ku nos ta studia Beibel kuné no ta hasi sufisiente progreso. Tin algun di nan ku asta ta rechasá Yehova. Awor, kon nos por keda ku nos goso den sirbishi? Algu ku lo por yuda nos ta un bon komprondementu di e ilustrashonnan di Hesus ku nos ta haña den Beibel. P’esei, laga nos analisá tres di e ilustrashonnan ei i wak kiko nos por siña for di nan.

4. Kiko ta e splikashon di e ilustrashon di Hesus tokante e sembradó ku ta drumi?

⁴ Lesa Marko 4:26-29. Kiko ta e splikashon di e ilustrashon tokante e sembradó ku ta drumi? E sembradó ta representá e predikadónan di e Reino. E simia ta e mensahe di Reino ku ta ser prediká na hende sinsero. E sembradó tin un rutina normal; e ta “drumi tur anochi i lanta tur mainta.” Ta tuma tempu pa un simia krese: for di tempu ku a plant’é te na kosecha. Durante e periodo ei, “e simia ta sprùit i krese bira grandi.” E kresementu akí ta tuma lugá “di su mes,” gradualmente i den etapa. Di mes manera, un persona ta krese den sentido spiritual gradualmente i den etapa. Ora un persona progresá te na e punto ku e ta sintié motivá pa sirbi Dios, e ta duna fruta den e sentido ku e ta dediká su bida na Yehova i batisá.

5. Dikon Hesus a konta e ilustrashon tokante e sembradó ku ta drumi?

⁵ Dikon Hesus a konta e ilustrashon akí? Hesus ta yuda nos komprondé ku Yehova ta esun ku ta laga e bèrdat krese den kurason di hende ku ta “dispuesto pa aseptá e bèrdat.” (Echo. 13:48; 1 Kor. 3:7) Nos ta planta i muha e simia di e bèrdat, pero nos no tin influensia riba su kresementu. Nos no por oblig’é p’e krese ni p’e bai mas lihé. Meskos ku e sembradó, nos no sa kon e kresementu ta tuma lugá. Debí ku nos ta okupá ku nos kosnan diario, hopi bes nos no ta ripará ku e simia di Reino ta krese den kurason di un persona. Pero ku tempu e simia por duna fruta, i e disipel nobo ei ta kuminsá yuda nos den e trabou di kosecha.—Huan 4:36-38.

6. Kiko nos mester atmití relashoná ku kresementu spiritual?

⁶ Kiko nos por siña for di e ilustrashon akí? Promé, nos tin ku atmití ku nos no tin influensia riba e kresementu spiritual di un studiante di Beibel. Si nos ta modesto, nos lo no pone preshon riba un studiante pa e batisá. Nos ta hasi tur loke nos por pa yuda i apoyá un studiante, pero e desishon pa dediká su bida na Yehova ta un desishon ku e mes tin ku tuma. Dedikashon na Yehova mester ta motivá pa amor pa Yehova, di otro manera e no ta aseptabel pa Yehova.—Sal. 51:12; 54:6; 110:3.

7, 8. (a) Ki lès mas nos ta siña for di e ilustrashon di Hesus tokante e sembradó ku ta drumi? Duna un ehèmpel. (b) Kiko e ilustrashon akí ta siña nos tokante Yehova i Hesus?

⁷ Di dos, si nos komprondé e lès tras di e ilustrashon akí, esaki lo evitá ku nos ta desanimá ora nos no mira fruta di nos trabou mesora. Sí, nos mester tin pasenshi. (Sant. 5:7, 8) Si nos a hasi nos bèst pa yuda e studiante i tòg e no progresá, nos sa ku esei no ta pasobra nos no tabata bon maestro. Yehova ta permití e simia di e bèrdat krese i duna fruta solamente den kurason di hende humilde ku ta dispuesto pa hasi kambio. (Mat. 13:23) Pues, nos no mester evaluá nos sirbishi solamente a base di e resultadonan. Den bista di Yehova, e éksito di nos sirbishi no ta dependé di e manera ku hende ta reakshoná na nos mensahe. Mas bien, Yehova ta balorá e esfuersonan ku nos ta hasi, sea ku e hendenan  ta progresá òf nò.—Lesa Lukas 10:17-20; 1 Korintionan 3:8.

⁸ Di tres, no ta tur biaha nos ta ripará e kambionan ku ta tuma lugá den kurason di un persona. Por ehèmpel, un pareha ku tabata studia ku un misionero a aserk’é i a bis’é ku nan ke bira publikadó no batisá. El a kòrda nan ku pa kualifiká, nan tin ku stòp di huma. Pa su gran sorpresa, nan a bis’é ku nan tin vários luna sin huma. Dikon nan a stòp di huma? Nan a realisá ku maske nan huma na skondí, Yehova por mira nan i ku Yehova ta odia hipokresia. P’esei, nan kurason a motivá nan pa tuma un desishon, sea nan ta huma dilanti di e misionero òf nan ta stòp di huma. Nan amor pa Yehova ku a kuminsá krese a yuda nan tuma e desishon korekto. Sí, nan a krese den sentido spiritual aunke e misionero no tabatin niun idea di e kambionan grandi ku a tuma lugá den nan kurason.

9. Kiko ta e splikashon di e ilustrashon tokante e reda?

⁹ Lesa Mateo 13:47-50. Kiko ta e splikashon di e ilustrashon di Hesus tokante e reda? Hesus a kompará e predikashon di e mensahe di Reino ku bahamentu di un reda grandi na laman. Meskos ku un reda ta kue “tur sorto di piská” i na gran kantidat, nos trabou di prediká tambe ta atraé un gran kantidat di tur sorto di hende. (Isa. 60:5) E miónes di hendenan ku ta asistí na nos kongresonan i Memorial tur aña ta un prueba di esaki. Algun di nan ta manera “bon” piská i ta bira parti di e kongregashon kristian. Sinembargo, tin otronan ku ta manera piská ku ‘no ta sirbi.’ Pues, no ta tur ta aseptabel pa Yehova.

10. Dikon Hesus a konta e ilustrashon tokante e reda?

¹⁰ Dikon Hesus a konta e ilustrashon akí? E separashon simbóliko di piská no ta referí na e huisio final durante e tribulashon grandi. Mas bien e ta resaltá loke lo sosodé durante e último dianan di e mundu malbado akí. Hesus a mustra ku no ta tur hende ku sinti nan atraí na e bèrdat lo bira sirbidó di Yehova. Tin hopi hende ku ta asistí na nos reunionnan òf ku ta studia Beibel ku nos pero ku no ta dispuesto di dediká nan bida na Yehova. (1 Rei. 18:21) Tin otronan ku a stòp di asosiá ku e kongregashon kristian. Por ehèmpel, tin hóbennan ku a ser lantá pa mayornan kristian pero ku no a kultivá un amor pa Yehova su normanan. Sea kual sea e situashon, Hesus a enfatisá ku kada persona tin ku tuma su mes desishon. I esnan ku tuma e desishon korekto ta ser konsiderá komo “rikesa di tur nashon.”—Ageo 2:7.

11, 12. (a) Kiko nos por siña for di e ilustrashon tokante e reda? (b) Kiko e ilustrashon akí ta siña nos tokante di Yehova i Hesus?

¹¹ Kiko nos por siña for di e ilustrashon tokante e reda? Si nos komprondé e lès tras di e ilustrashon akí bon, nos lo no keda demasiado tristu òf desilushoná ora un studiante di Beibel òf un di nos yunan no ke sirbi Yehova apesar di tur esfuerso ku nos ta hasi pa yud’é. E echo ku un persona a aseptá un estudio di Beibel òf a lanta den e bèrdat no ta nifiká ku outomátikamente e ta bira amigu di Yehova. Si e no ta dispuesto pa someté su mes na e outoridat di Yehova, e no por ta parti di e pueblo di Dios.

¹² Esaki ta nifiká ku esnan ku bandoná e bèrdat nunka mas lo ser permití pa bira parti di e kongregashon kristian? Òf e ta nifiká ku no tin speransa pa hende ku no a dediká nan bida ainda na Yehova? Nò. Tanten ku e tribulashon grandi no kuminsá, tin oportunidat pa e hendenan ei bira amigu di Yehova. P’esei, Yehova ta hasi un apelashon na nan bisando: “Bolbe serka mi, i lo mi bolbe serka boso.” (Mal. 3:7) I tin un otro ilustrashon di Hesus ku ta  enfatisá esaki: esun di e yu pèrdí.—Lesa Lukas 15:11-32.

13. Kiko ta e splikashon di e ilustrashon tokante e yu pèrdí?

¹³ Kiko ta e splikashon di e ilustrashon tokante e yu pèrdí? E tata bondadoso den e ilustrashon akí ta representá Yehova, nos amoroso Tata selestial. E yu hòmber ku a pidi e tata su herensia i ku despues a malgastá esaki ta simbolisá e personanan ku ta desviá i bai for di e kongregashon kristian. Nan ta bira parti di e mundu di Satanas ku ta manera “un pais leu,” alehá for di Yehova. (Efe. 4:18; Kol. 1:21) Ku tempu, algun di nan ta realisá ku nan a kometé un eror grave i nan ta disidí di bolbe den e organisashon di Yehova. Esaki ta rekerí esfuerso. Pero komo ku e personanan akí ta humilde i ta sinseramente arepentí di loke nan a hasi, Yehova ta pordoná nan i ta ansioso pa risibí nan atrobe den su organisashon.—Isa. 44:22; 1 Ped. 2:25.

14. Dikon Hesus a konta e ilustrashon tokante e yu pèrdí?

¹⁴ Dikon Hesus a konta e ilustrashon akí? Usando e bunita ilustrashon akí, Hesus a mustra ku Yehova ke pa esnan ku a desviá bolbe serka dje. E tata den e ilustrashon semper a keda ku speransa ku su yu lo bolbe. Ora ku for di “leu” el a mira su yu ta bini, el a kore bai kontr’é. E ilustrashon akí mester motivá hende ku a bandoná e bèrdat pa bolbe na Yehova sin tarda. Por parse difísil pa bolbe pasobra kisas nan tin bèrgwensa i ta spiritualmente suak. Pero e esfuerso ta bale la pena; Yehova, Hesus i e angelnan den shelu ta keda masha kontentu ora personanan asina bolbe serka Yehova.—Luk. 15:7.

15, 16. (a) Ki lèsnan nos por siña for di e ilustrashon di Hesus tokante e yu pèrdí? Duna algun ehèmpel. (b) Kiko e ilustrashon akí ta siña nos tokante Yehova i Hesus?

¹⁵ Kiko nos por siña for di e ilustrashon tokante e yu pèrdí? Nos mester imitá e ehèmpel di Yehova. Ora un persona bini bèk den kongregashon, nos no mester ta “demasiado hustu” i nenga di dun’é un bonbiní. Pasobra e úniko kos ku nos ta logra ku esei ta “ruina,” òf daña, nos relashon ku Yehova. (Ekl. 7:16) Un otro lès ku nos por siña ta ku ora un persona bandoná  e kongregashon kristian, nos mester mir’é komo “un karné pèrdí” i no komo un kaso pèrdí. (Sal. 119:176) Pues, si nos topa un persona ku a bandoná e kongregashon pero ku no ta ekspulsá, nos mester hasi tur nos esfuerso pa yud’é bini bèk. Sea ku e ta ekspulsá òf nò, nos mester informá e ansianonan mesora pa nan por dun’é e yudansa nesesario. Si nos ta hasi asina, nos ta demostrá ku nos a komprondé i ke apliká e lès ku tin tras di e ilustrashon di Hesus tokante e yu pèrdí.

¹⁶ E yunan pèrdí ku bolbe den nos tempu ta masha gradisidu pa e miserikòrdia ku Yehova ta demostrá na nan i pa e amor i apoyo ku nan ta risibí di e rumannan den kongregashon. Un ruman hòmber ku tabata 25 aña ekspulsá a bisa: “For di dia ku mi a ser restorá, mi goso a sigui oumentá segun ku Yehova ta ‘refreská mi.’ (Echo. 3:19) E rumannan ta apoyá mi i nan ta masha amoroso. Awor mi tin un dushi famia spiritual.” Un ruman muhé hóben ku a bolbe na Yehova despues di a keda sinku aña inaktivo a bisa: “Mi no por deskribí kon mi a sinti ora mi a eksperensiá e amor ku Hesus a papia di dje. Ser parti di e organisashon di Yehova ta un privilegio úniko!”

17, 18. (a) Ki lèsnan práktiko nos a siña for di e tres ilustrashonnan ku nos a analisá? (b) Kiko nos mester ta determiná pa hasi?

¹⁷ Ki lèsnan práktiko nos a siña for di e ilustrashonnan akí? Promé, nos tin ku atmití ku ta Yehova so por laga un persona krese spiritualmente. Pues, esei no ta den nos man. Di dos, no ta realístiko pa nos ferwagt ku tur hende ku ta asosiá ku nos òf ku ta studia Beibel ku nos lo sirbi Yehova. Finalmente, asta si algun ruman bandoná e bèrdat i bira lomba pa Yehova, nunka nos mester pensa ku nan lo no bolbe mas. I ora nan bolbe, laga nos risibí nan na un manera ku ta reflehá Yehova su punto di bista.

¹⁸ Laga nos tur sigui buska konosementu, komprondementu i sabiduria. P’esei, segun ku bo ta lesa e ilustrashonnan di Hesus, puntra bo mes: ‘Kiko ta e splikashon di e ilustrashon akí? Dikon e ta registrá den Beibel? Kon mi por apliká loke e ta siña mi? I kiko e ta siña mi tokante Yehova i Hesus?’ Di e manera ei, nos ta demostrá ku di bèrdat nos ta komprondé loke Hesus a bisa.