KOMO sirbidó di Yehova, nos tin e onor di partisipá den e trabou di mas importante ku ta tumando lugá awe riba tera, esta, predikashon di e bon notisia i e aktividat di hasi disipel. Pero, sea ku nos ta pionero òf publikadó, tin biaha no ta fásil pa nos mantené nos entusiasmo den sirbishi.

Por ehèmpel, algun publikadó kasi no ta haña hende pa papia kuné ora nan ta prediká di kas pa kas. De echo, mayoria di hende no ta na kas, i ora nan ta na kas, nan no ke skucha e mensahe di Reino òf asta ta reakshoná rabiá. Otro publikadónan tin teritorio asina grandi i produktivo ku nan ta sinti ku nunka nan lo logra prediká na tur hende den dje. I algun ruman den kongregashon a bira desanimá pasobra nan tin años ta prediká, ma ainda e fin no a yega.

Akaso ta un sorpresa ku de bes en kuando nos tin ku lucha pa no pèrdè nos entusiasmo pa e trabou di prediká? Nò. Nos ta biba den un mundu ku “ta den poder di e Malbado,” Satanas e Diabel. Pues, lo no ta fásil pa proklamá e mensahe di e Palabra di Dios den e mundu akí.—1 Huan 5:19.

Pero un kos ta sigur: no ta importá ki opstákulo bo ta konfrontá den sirbishi, Yehova por yuda bo vense nan. Ma kiko por duna bo mas entusiasmo pa sirbishi? Laga nos konsiderá algun sugerensia.

Tur aña, míles di hende ta batisá komo Testigu di Yehova. Si bo a batisá resientemente komo símbolo di bo dedikashon na Dios, sin duda lo bo ke siña di rumannan ku tin hopi mas tempu ta prediká. I si bo ta un publikadó di Reino pa hopi aña, bo no ta kere ku lo ta bon pa bo train esnan mas nobo? Sin duda, esei lo duna bo gran satisfakshon.

Hesus tabata sa ku su disipelnan mester a haña guia pa nan por a bira bon maestro, i p’esei  el a mustra nan kon nan mester prediká. (Luk. 8:1) Awe tambe publikadónan nobo tin mester di yudansa pa nan bira bon maestro.

Nos no mester kere ku djis pasobra un publikadó nobo ta sali den sirbishi, lo e bira un maestro kapas pa siña otro hende. E tin mester di guia personal di un maestro amabel i kariñoso. Entre e kosnan ku e publikadó ku eksperensia tin ku siñ’é ta: (1) kon pa prepará un presentashon i train e, (2) kon pa tene un kòmbersashon ku un doño di kas òf ku un hende riba kaya, (3) kon pa ofresé literatura, (4) kon pa rebishitá hende ku a mustra interes i (5) kon pa kuminsá un estudio di Beibel. Un publikadó nobo lo por bira un bon maestro si e opservá i imitá e manera di siña di e publikadó ku eksperensia. (Luk. 6:40) Ademas, e publikadó ku ménos eksperensia sin duda lo sinti su mes mas sigur si e sa ku e tin un hende banda di dje ku ta kla pa yud’é si ta nesesario. Lo e benefisiá tambe si bo dun’é palabranan di elogio i sugerensianan práktiko.—Ekl. 4:9, 10.

Klaru ku nos ta hasi esfuerso pa papia ku e doñonan di kas, pero tin dia e mihó kòmbersashon ku nos tin ta ku nos kompañero den sirbishi. Kòrda ku Hesus a manda su disipelnan bai prediká “dos dos.” (Luk. 10:1) Asina nan por a animá i motivá otro. Pues, e tempu ku nos ta pasa den sirbishi di vèlt ku un otro ruman ta un bon chèns pa nos tin “un interkambio di estímulo.”—Rom. 1:12.

Riba kiko asina boso por papia? Por ehèmpel, bo por kont’é un bon eksperensia ku bo tabatin den sirbishi di vèlt resientemente òf bo por kompartí un punto interesante ku bo a siña durante bo estudio personal òf estudio di famia. Bo a tende algu na reunion ku a animá bo? Papia tokante esei. I si bo ta predikando ku un publikadó ku bo no tin kustumber di traha kuné, puntr’é kon el a bini den e bèrdat, kiko a konvens’é ku esaki ta e organisashon di Yehova, ki privilegionan el a yega di tin den kongregashon òf ki eksperensianan ekstraordinario el a pasa aden. Podisé bo tambe por kont’é algun di e kosnan bunita ku bo a eksperensiá den e bèrdat. Sea kual sea e reakshon di e hendenan den teritorio, ora nos ta prediká huntu ku nos rumannan, nos ta haña bon chèns di “sigui . . . fortalesé otro.”—1 Tes. 5:11.

Pa nos por mantené nos entusiasmo den sirbishi, nos mester tin un bon programa di estudio  personal. “E esklabo fiel i prudente” ta publiká informashon riba masha hopi tópiko. (Mat. 24:45) Pues, bo por skohe for di un gran variedat di tema. Por ehèmpel, un bon tema ku nos por analisá den nos estudio personal ta: Dikon e trabou di prediká ta asina importante? Den e kuadro athunto nos ta haña algun motibu.

Analisá e puntonan menshoná den e kuadro, ya ku nan por motivá bo pa sigui prediká ku entusiasmo. Un bon proyekto di estudio personal lo ta pa buska mas motibu pakiko nos mester prediká. Despues, meditá riba e motibunan akí i riba e tekstonan bíbliko ku ta apoyá nan. Esaki sigur lo duna bo mas apresio i entusiasmo pa e trabou di prediká.

Regularmente nos ta haña sugerensia for di e organisashon di Yehova ku por yuda nos mehorá nos predikashon i alkansá mas hende. Por ehèmpel, banda di e trabou di kas pa kas, nos por prediká via karta, telefòn, riba kaya òf den lugánan públiko. Tambe nos por kompartí e bon notisia ku hende informalmente òf den teritorio di negoshi. Podisé nos lo por hasi kambio den nos bida pa nos por bai prediká den teritorionan ku tin masha tiki Testigu di Yehova.

Abo ta dispuesto pa purba maneranan nobo di prediká? Bo a yega di hasié? Hopi ruman ku a purba e sugerensianan akí a keda masha kontentu ku e resultadonan. Laga nos wak tres ehèmpel.

E promé ehèmpel ta tokante kon pa kuminsá estudio di Beibel. Un ruman ku yama April a disidí di purba un sugerensia ku a sali den Nos Ministerio di Reino i a ofresé tres kolega di trabou  un estudio di Beibel. Pa su sorpresa, tur tres a aseptá pa studia i tambe a kuminsá asistí na e reunionnan di kongregashon.

E di dos ehèmpel tin di haber ku lagamentu di revista. Nos a ser animá pa buska personanan ku lo ta interesá den artíkulonan spesífiko ku ta sali den nos revistanan. Un superintendente di sirkuito na Merka a disidí di ofresé un artíkulo di ¡Despertad! tokante tayer di outo na e managernan di tur negoshi di tayer den un sierto área. Na un otro okashon, e ku su kasá a ofresé e artíkulo di portada “Komprondé pa Bo Dòkter” na mas ku 100 ofisina di dòkter. E superintendente di sirkuito a bisa: ‘E bishitanan ei tabata un bon manera pa yuda hende sera konosí ku nos trabou di prediká i ku nos literatura. Unabes nan a siña konosé nos un tiki, nos por a bishitá nan mas biaha.’

E di tres ehèmpel ta trata predikashon via telefòn. Un ruman ku yama Judy a manda un karta pa nos sede mundial pa gradisí e rumannan pa e sugerensianan ku nan a duna pa prediká via telefòn. Su mama di 86 aña ta partisipá regularmente den e forma akí di sirbishi sagrado apesar ku e mama tin hopi problema di salú. E mama ta masha kontentu pasobra el a logra haña un estudio di Beibel na telefòn ku un señora di 92 aña!

E sugerensianan ku ta sali den nos publikashonnan realmente ta duna resultado. Purba nan! Nan por yuda bo mantené bo goso i entusiasmo pa sirbishi.

Kon nos por determiná si nos ta eksitoso den nos trabou di prediká? Wèl, esei no ta dependé di kuantu publikashon nos a laga, kuantu estudio nos tin ni kuantu hende nos a yuda bira Testigu di Yehova. Pensa riba Noe. Kuantu hende, fuera di su famia, el a yuda pa bira sirbidó di Yehova? Ni ún. Pero esei no ke men ku el a hasi su trabou malu. Loke realmente ta konta ta pa nos ta fiel i kumpli ku e enkargo ku Yehova a duna nos.—1 Kor. 4:2.

Hopi publikadó di Reino ta ripará ku nan tin ku pone metanan rasonabel pa nan no pèrdè nan entusiasmo den e trabou di prediká. Kiko por ta algun di e metanan akí? Den e kuadro “Pone Metanan Rasonabel” nos ta haña algun idea.

Pidi Yehova yuda bo haña maneranan pa disfrutá mas di e trabou di prediká i pa bo por prediká kada dia mas mihó. Ora bo alkansá bo metanan, lo bo tin e goso di a logra algu i e satisfakshon di sa ku bo ta hasiendo tur loke bo por pa prediká e bon notisia.

Ta bèrdat ku predikashon di e bon notisia por ta un reto. Pero tin kosnan ku por yuda bo disfrutá di bo sirbishi. Por ehèmpel, gosa di un interkambio di estímulo ku bo kompañero di sirbishi, tene un bon programa di estudio personal, sigui e sugerensianan di e esklabo fiel i pone metanan rasonabel. Mas ku tur kos, kòrda ku Yehova Dios a duna bo e gran privilegio di prediká e bon notisia komo un di su Testigunan. (Isa. 43:10) Pues, disfrutá di sirbishi i prediká ku entusiasmo!