AMI ku Gwen a kuminsá siña baila tempu nos tabatin 5 aña. E tempu ei nos no tabata konosé otro ainda. Ma segun ku nos a krese, nos tur dos a disidí di hasi bailamentu di balèt nos karera. Pero ora nos a yega e tòp di nos profeshon, nos a legumai tur kos. Kiko a pone nos tuma e desishon ei?

David: Ami a nase na 1945 na Shropshire, Inglatera. Mi tata tabatin un boerderij den e ambiente trankil di kunuku. Despues di skol, mi tabata gusta duna galiña kuminda, piki webu i kuida e baka- i karnénan. Den fakansi, mi tabata yuda ku e trabou di kosecha, i tin biaha mi tabata kore nos trèktòrnan.

Pero pokopoko un otro interes a kuminsá dominá mi bida. For di tempu mi tabata chikí, mi tata a ripará ku asina ku mi tende muzik mi kier a baila. P’esei ora mi tabatin 5 aña, el a bisa mi mama pa hiba mi un skol di baile pa mi siña ‘tap dancing.’ Mi maestro di baile a haña ku mi tabatin e potensial pa bira un bailarin di balèt, i el a siña mi esei tambe. Ku 15 aña, mi a gana un bùrs pa bai e prestigioso Royal Ballet School na Lònden. Einan m’a topa Gwen, i e maestronan a hasi nos pareha di baile.

Gwen: Ami a nase na Lònden na 1944. Tempu mi tabata chikí, mi tabatin hopi fe den Dios. M’a purba di lesa Beibel, pero mi no a komprondé mashá. Mas promé, tempu mi tabatin 5 aña, m’a kuminsá bai lès di baile. Seis aña despues, mi a gana un kompetensia di baile ku tabata habrí pa henter Gran Bretaña. E premio tabata un puesto den e sekshon junior di e Royal Ballet School. E skol akí tabata situá na White Lodge, un bunita manshon di siglo 18 na Richmond Park, djis pafó di Lònden. Einan m’a bai skol i tambe haña lès di balèt serka maestronan di renombre. Ku 16 aña, mi a pasa pa nivel senior di e Royal Ballet School ku tabata keda den sentro di Lònden i ta einan m’a topa David. Denter di algun luna, nos dos tabata baila huntu den esenanan di balèt presentá den óperanan na e Royal Opera House na Covent Garden, Lònden.

David: Sí, manera Gwen a konta, nos a haña chèns di baila na e famoso Royal Opera House i tambe huntu ku e Festival di Balèt di Lònden (ku awor yama Balèt Nashonal Ingles). Un di e koreógrafonan di e Royal Ballet School a lanta un grupo internashonal na Wuppertal (Alemania) i a skohe nos dos pa bai kuné komo bailarin. Durante nos karera, nos a baila den teaternan rònt mundu, i nos a presentá ku selebridatnan manera Margot Fonteyn i Rudolf Nureyev. E tipo di bida kompetitivo akí ta hasi bo un hende orguyoso, i nos tabata kompletamente dediká na balèt.

 Gwen: Henter mi mente i mi kurpa tabata dediká na bailamentu. Ami ku David tabatin e mesun ambishon di yega e tòp di nos profeshon. Mi tabata gusta duna mi firma na fanátiko, risibí bukèt di flor i tende aplouso di e públiko. Den e mundu di teater, mi tabata rondoná pa hopi inmoralidat, humamentu i bebementu. Anto meskos ku otronan den mi profeshon, mi tabata dependé mashá riba mi amuletonan di suerte.

David: Despues di hopi aña komo bailarin, m’a kansa di biaha. M’a lanta riba un boerderij, pues m’a kuminsá anhelá un bida mas trankil. Esei a pone ku na 1967 m’a legumai mi karera i kuminsá traha na un boerderij grandi banda di kas di mi mayornan. E kunukero a laga mi hür un kas chikí ku e tabatin. E ora ei m’a bèl Gwen na e teater i a pidié pa kasa ku mi. Esei tabata un desishon difísil p’e, ya ku el a haña promoshon pa baila solo i su karera tabata progresá bon. Pero tòg el a aseptá mi proposishon i a kasa ku mi i a bin biba den kunuku; un bida ku e no tabata sa nèt nada di dje.

Gwen: Sí, tabata hopi difísil pa mi kustumbrá ku e bida di boerderij. Mester a hala lechi i duna porko ku galiña kuminda den tur tipo di wer. Esaki tabata kompletamente un otro bida! David a kuminsá un kurso di nuebe luna na un skol di krio di bestia p’e por a siña e métodonan mas nobo ku nan tabata usa den e ramo ei, i mi tabata keda mi so te anochi ora e yega kas. Rònt di e tempu ei, nos promé yu muhé a nase; nos a yam’é Gilly. David a konsehá mi pa siña kore outo, i un dia ku mi tabata bishitá e pueblito pegá ku nos, m’a mira Gael, kende m’a topa tempu ku e tabata traha den un tienda den nos área.

Gael a invitá mi bin bebe te serka dje na kas. Nos tabata wak potrèt di kasamentu di otro, i riba su potrèt tabatin un grupo pará dilanti di un lugá ku yama Salòn di Reino. M’a puntr’é ta ki sorto di misa esei ta. Ora el a bisa mi ku e ku su kasá ta Testigu di Yehova, m’a bira masha kontentu, pasobra mi tabatin un tanta masha kariñoso ku tambe tabata Testigu. Pero mi tata no tabata niun tiki kontentu ku mi tanta tabata den e religion ei i asta a tira su bukinan den ko’i sushi. Semper m’a puntra mi mes dikon mi tata, ku tabata un persona masha amabel, tabata trata mi tanta asina malu.

Por fin m’a haña chèns di sa kiko tabata e diferensia entre e religion di mi tanta i e siñansanan di iglesia. Gael a mustra mi loke Beibel ta siña realmente. M’a keda babuká ora m’a haña sa ku  hopi doktrina, manera Trinidat i alma inmortal, ta kontrali na loke Beibel ta bisa. (Ekl. 9:5, 10; Huan 14:28; 17:3) I pa promé biaha m’a mira e nòmber di Dios, Yehova, den Beibel.—Éks. 6:3, NW.

David: Gwen a konta mi kiko e tabata siña. I m’a kòrda kon mi tata tabata bisa mi na mucha ku mi mester lesa e Buki Santu. Pues, ami ku Gwen a bai di akuerdo pa studia Beibel ku Gael i su kasá, Derrick. Despues di seis luna nos a bai biba na Oswestry, den e mesun kondado di Shropshire, ya ku nos a haña chèns di hür nos propio boerderij chikí. Einan Deirdre, un Testigu di e área, a sigui studia Beibel ku nos. Deirdre tabatin hopi pasenshi, ya ku na promé instante nos progreso tabata lento. Nos tabata masha okupá ku nos krio di bestia. Pero pokopoko e bèrdat a saka rais den nos kurason.

Gwen: Un opstákulo grandi ku ami mester a superá tabata superstishon. Isaías 65:11 a yuda mi komprondé kon Yehova ta mira hende ku, na moda di papia, ta drecha mesa pa “e dios di suerte.” (BPK) A tuma tempu i orashon pa mi por a deshasí di tur amuleto i talisman di suerte ku mi tabatin. Ademas, ora m’a siña ku “ken ku halsa su mes, lo keda humiá, i ken ku humiá su mes, lo keda halsá,” m’a bin realisá ki tipo di hende Yehova ta buska pa sirbié, esta, hende humilde. (Mat. 23:12) Mi kier a sirbi e Dios akí ku tabata asina interesá den nos ku el a duna su Yu presioso komo reskate. Rònt di e tempu ei m’a haña un yu muhé mas i tabata masha emoshonante pa siña ku nos famia por a biba pa semper den un paradeis riba tera.

David: Ora m’a mira e manera maravioso ku profesianan di Beibel tabata kumpli—por ehèmpel, esnan ku tin na Mateo kapítulo 24 i den e buki di Daniel—m’a keda konvensí ku esaki ta e bèrdat. M’a realisá ku nada den e mundu akí no por para banda di un bon relashon ku Yehova. Pues, ku tempu m’a bira ménos ambisioso. M’a bin komprondé ku mi kasá i mi yunan tabata mesun importante ku mi. Filipensenan 2:4 a konvensé mi ku mi no mester pensa riba mi so ni riba mi deseo di haña un boerderij mas grandi. Mas bien, mi mester pone e sirbishi di Yehova na promé lugá den mi bida. Tambe m’a stòp di huma. Reunion tabata djasabra anochi, i esei tabata nèt ora di hala lechi. Anto e Salòn di Reino tabata keda un 10 kilometer leu. Ma ku yudansa di Gwen, nunka nos no a falta reunion, ni nos no a keda sin sali ku nos yu muhénan den sirbishi di vèlt tur djadumingu mainta, despues ku nos kaba di hala lechi di e bakanan.

Nos famianan no tabata kontentu ku e kambio ku nos a hasi. E tata di Gwen a keda seis aña largu sin papia kuné. Mi mayornan tambe a purba di stòp nos di asosiá ku e Testigunan.

 Gwen: Yehova a yuda nos wanta tur e retonan ei. Ku tempu, e rumannan di Kongregashon Oswestry a bira nos famia nobo, i ku amor nan a apoyá nos durante nos pruebanan. (Luk. 18:29, 30) Nos a dediká nos bida na Yehova i a batisá na 1972. Mi kier a yuda mas tantu hende posibel konosé e bèrdat, pues m’a kuminsá traha pionero.

David: E añanan ku nos tabatin e boerderij tabata físikamente pisá; spiritualmente, nos a purba di pone un bon ehèmpel pa nos yunan. Pero ku tempu, debí na redukshon di supsidio di gobièrnu, nos mester a entregá e boerderij. Nos no tabatin kas ni entrada, i nos di tres yu muhé tabatin apénas un aña. Nos a pidi Yehova yuda nos i guia nos. E ora ei nos a haña e idea pa habri un skol di baile i asina usa nos talento pa kria nos famia. Nos esfuerso pa pone Yehova na promé lugá a duna fruta: nos tres yu muhénan a kuminsá traha pionero ora nan a kaba skol. Gwen tambe tabata pionero, pues e por a apoyá nan tur dia.

Despues ku nos dos yunan mas grandi, Gilly ku Denise, a kasa, nos a sera e skol di baile. Nos a skirbi sukursal pa puntra unda nos por a bai yuda. Nan a bisa nos ku tin nesesidat den parti zùitost di Inglatera. Ku un yu so na kas, esta, Debbie, mi tambe a kuminsá traha pionero. Sinku aña despues, sukursal a pidi nos bai yuda algun kongregashon mas pa nort. Despues ku Debbie a kasa, nos a traha 10 aña den e programa di konstrukshon internashonal. Nos a sirbi na Zimbabwe, Moldavia, Hungria i Kosta di Marfil. Despues nos a regresá Inglatera pa yuda ku konstrukshon di e Bètel di Lònden. Anto debí na mi eksperensia ku boerderij, nan a pidi mi bai yuda na e boerderij ku Bètel tabatin e tempu ei. Aktualmente, nos ta sirbi komo pionero den e parti nortwèst di Inglatera.

Gwen: Nos promé karera tabata balèt, i esei tabata dushi pero pasahero. Nos di dos karera—esun mas importante—ta nos sirbishi na Yehova, i esei ta duna nos gran goso i ta eterno. Ainda nos ta forma un bon pareha, pero no den balèt, sino den e trabou di pionero. Esaki ta permití nos yuda hopi hende siña bèrdatnan presioso ku por skapa nan bida, i esei ta duna nos un felisidat sin igual. E ‘kartanan di rekomendashon’ akí ta mihó ku kualke fama den mundu. (2 Kor. 3:1, 2) Si nos no a haña e bèrdat, ora asin’akí nos lo tabatin solamente rekuerdo, potrèt bieu i algun programa di teater di nos karera anterior.

David: Un karera den e sirbishi di Yehova a hasi un gran diferensia den nos bida. Ami sa ku esei a yuda mi bira un mihó esposo i tata. Beibel ta bisa nos ku Miriam, Rei David i otronan a ekspresá nan felisidat ku baile. Anto nos, huntu ku hopi hende mas, ta anhelá di baila di alegria den e mundu nobo di Yehova.—Éks. 15:20; 2 Sam. 6:14.