1, 2. Kiko superintendentenan di sirkuito a ripará den hopi kongregashon?

E SUPERINTENDENTE di sirkuito tabata serka di konkluí e reunion ku e ansianonan. El a wak e rumannan i a sinti un kariño profundo pa e hòmbernan diligente akí; algun di nan por tabata su tata. Ma tabatin un asuntu importante ku tabata preokup’é. El a puntra nan: “Rumannan, kiko boso a hasi pa entrená mas ruman hòmber pa karga responsabilidat den kongregashon?” Nan tur a keda ketu, ya ku nan ta kòrda ku durante su bishita anterior el a animá nan pa dediká mas tempu na esei. Finalmente, un di e ansianonan a atmití: “Frankamente, nos no a hasi masha kos.” E otro ansianonan a bisa meskos.

² Si bo ta un ansiano, probablemente bo tambe a yega di haña bo ku e situashon ei. Ta asina ku rònt mundu superintendentenan di sirkuito a ripará ku den hopi kongregashon tin e nesesidat pa ansianonan dediká mas tempu na entrená e rumannan—sea ruman yòn òf hende grandi—pa bira kapas pa yuda kuida e tou. Pero esaki por ta difísil pa algun ansiano. Dikon?

3. (a) Kon Beibel ta mustra ku ta importante pa entrená otro hende? (b) Dikon nos tur mester ta interesá den e entrenamentu akí? (Wak nota.) (c) Dikon pa algun ansiano kisas ta difísil pa entrená otro ruman?

 ³ Komo ansiano, sin duda bo sa ku ta importante pa dediká tempu na entrená ruman hòmber. * Tambe bo sa ku tin mester di mas ruman hòmber pa tene e kongregashonnan aktual spiritualmente fuerte i pa por forma kongregashon nobo den futuro. (Lesa Isaías 60:22.) Es mas, Beibel ta bisa ku ansianonan mester ‘siña otro hende.’ (Lesa 2 Timoteo 2:2.) Pero meskos ku e ansianonan menshoná den e introdukshon, kisas tòg ta difísil pa bo haña e tempu pa hasi esei. I esaki ta di komprondé. Bo tin ku dediká tempu na bo famia, na trabou, na responsabilidatnan di kongregashon i na otro asuntunan urgente. Ku tantu kos di hasi, por parse ku simplemente no ta sobra tempu pa entrená e ruman hòmbernan den kongregashon. Sinembargo, laga nos ban wak dikon tòg ta importante pa saka tempu pa hasi esei.

4. Dikon tin biaha ansianonan ta posponé e entrenamentu di ruman hòmber?

⁴ Dikon algun ansiano tin problema pa haña tempu pa entrená mas ruman hòmber? Podisé nan ta pensa: ‘Mi sa ku entrenamentu ta importante, pero tin otro asuntunan di kongregashon ku ta mas urgente i ku no por warda. Si mi posponé e entrenamentu pa un tempu, e kongregashon ta sigui drei.’ Pero esaki ta bèrdat? Por ta masha bon ku tin kosnan ku mester di bo atenshon mesora. Ma ora bo ta tarda pa entrená otro ruman hòmber, bo por perhudiká e bienestar spiritual di e kongregashon.

5, 6. (a) Kiko nos por siña for di e ehèmpel di un shofùr ku no tin tempu pa kambia zeta di su outo? (b) Kon nos por kompará esaki ku e entrenamentu den kongregashon?

⁵ Pensa riba e ehèmpel akí: Un shofùr sa ku pa kuida su motor i pa su outo kore bon, e mester kambia zeta ku regularidat. Pero kisas e ta haña ku ta mas urgente pa yena gasolin den tanki ku kambia zeta, ya ku sin gasolin, e outo no ta kore. Si e ta hopi okupá, lo e por pensa: ‘Mi no tin nodi di kambia zeta mesora. E outo ta sigui kore tòg, por lo ménos pa un tempu mas.’ Pero kiko ta e peliger? Si e shofùr sigui posponé e kambiamentu di zeta, tardi òf trempan, e motor ta djèm. Ora esei sosodé, lo e tin ku gasta hopi tempu i plaka pa drecha e outo. Kiko nos ta siña for di e ehèmpel akí?

⁶ Ansianonan tin hopi tarea importante ku nan mester atendé mesora, sino e kongregashon ta keda perhudiká. Pues, meskos ku e shofùr den e ehèmpel ta hasi sigur di pone gasolin den e tanki, asina ansianonan tambe tin ku “hasi sigur kiko ta e kosnan mas importante” i atendé nan mesora. (Flp. 1:10) Ma algun ansiano ta asina okupá ku asuntunan urgente ku kisas nan ta neglishá di entrená otro ruman hòmber. Ta komo si fuera nan ta blo pone gasolin den e outo pero no ta kambia su zeta. Pero si ansianonan sigui posponé e entrenamentu nesesario, tardi òf trempan, e kongregashon lo no tin sufisiente ruman hòmber kapasitá pa atendé tur loke tin di hasi.

7. Kon nos mester mira ansianonan ku ta saka tempu pa entrená mas ruman hòmber?

⁷ E lès ta masha kla: No pensa ku entrenamentu ta un tarea di ménos importansia.  Ansianonan ku ta interesá den e futuro di nan kongregashon ta saka tempu pa entrená e ruman hòmbernan ku tin ménos eksperensia i ku ta duna prueba ku nan ta bon mayordomo i un bendishon pa henter e kongregashon. (Lesa 1 Pedro 4:10.) Pero kon e kongregashon ta benefisiá?

8. (a) Kiko ta motivá ansianonan pa entrená mas ruman hòmber? (b) Ki responsabilidat urgente ansianonan ku a bai yuda kongregashonnan na otro pais tin? (Wak e kuadro “ Un Mishon Urgente.”)

⁸ Tur ansiano, asta esnan ku tin mas eksperensia, tin ku rekonosé humildemente ku segun ku nan edat ta subi nan lo no por sigui hasi e mesun kantidat di trabou ku nan ta hasiendo awor pa e kongregashon. (Mik. 6:8) Ademas, nan mester ta realista i tene kuenta ku di un dia pa otro susesonan inesperá por trese un kambio den nan sirkunstansianan i pone ku nan no por atendé nan responsabilidatnan di kongregashon. (Ekl. 9:11, 12, NW; Sant. 4:13, 14) Pues, un interes sinsero den e bienestar di e karnénan di Yehova ta motivá ansiano pa kompartí ku ruman hòmber mas hóben e eksperensia ku nan a akumulá den transkurso di añanan.—Lesa Salmo 71:17, 18.

9. Ki suseso ku ta na kaminda ta hasi entrenamentu di mas ruman hòmber sumamente importante?

⁹ Un otro motibu pakiko ansiano ku ta entrená otro ruman hòmber ta un bendishon pa e tou ta pasobra nan ta yuda fortifiká e defensanan di e kongregashon. Kon asina? Wèl, e entrenamentu ku nan ta duna ta pone ku lo tin mas ruman hòmber ku ta kla pa yuda e kongregashon keda uní i fiel na Dios, tantu awor komo den futuro serkano. No lubidá ku ta bai bini tempunan masha difísil: e tribulashon grandi ta serka. (Eze. 38:10-12; Mik. 5:5, 6) Pues, ansianonan stimá, nos ke pidi boso pa saka tempu regularmente pa entrená mas ruman hòmber pa bira kapas. Kuminsá ku esei for di awe.

10. Kon un ansiano por saka tempu pa entrená otro ruman hòmber?

¹⁰ Klaru ku nos ta komprondé ku boso programa ta yen kaba, ya ku boso tin aktividatnan importante di kongregashon pa atendé. Pero kisas boso tin ku usa parti di e tempu ei pa duna entrenamentu. (Ekl. 3:1) Esei lo no ta tempu pèrdí, sino mas bien, un bon invershon di boso tempu i lo benefisiá e kongregashon den futuro.

11. (a) Kiko ta remarkabel di e sugerensianan tokante entrenamentu ku algun ansiano di diferente pais a duna? (b) Segun Proverbionan 15:22, dikon ta bon pa analisá e sugerensianan di otro ansiano?

¹¹ Hopi ansiano di diferente pais ta dediká tempu na entrená otro ruman hòmber pa bira kapas i ku masha bon resultado. Resientemente, nos a puntra algun di nan kon nan ta hasi esei. * Maske nan sirkunstansianan ta masha distinto for di otro, tòg nan konseho tabata kasi meskos. Kiko esaki ta indiká? Wèl, meskos ku den tempu di apòstel Pablo, e entrenamentu basá riba Beibel ta konta pa rumannan “tur kaminda den tur kongregashon.” (1 Kor. 4:17) P’esei den e artíkulo akí i esun siguiente, nos lo analisá algun di e sugerensianan ku e ansianonan ei a duna.—Pro. 15:22.

12. Kiko ta e promé kos ku un ansiano mester hasi, i dikon?

¹² Kiko ta e promé kos ku un ansiano mester hasi? Wèl, meskos ku un kunukero tin ku prepará, òf drecha, e tera promé ku  e kuminsá sembra, asina tambe un ansiano tin ku prepará e kurason di e ruman promé ku e kuminsá siñ’é abilidatnan nobo. Dikon esaki ta importante? Pasobra esei lo motivá e ruman pa siña. Kon e ansiano ta ‘prepará e tera’? E por imitá e ehèmpel di un bon maestro di pasado, esta, profeta Samuel.

13-15. (a) Ki tarea profeta Samuel a haña? (b) Kon Samuel a kumpli ku su tarea? (Wak e promé plachi.) (c) Dikon e relato di Samuel mester interesá ansianonan awe?

¹³ Un dia, mas ku 3.000 aña pasá, Yehova a bisa profeta Samuel: “Mañan na e mesun ora akí lo mi manda un hòmber for di e tera di Benyamin serka bo, i lo bo ungié pa ta prens di mi pueblo Israel.” (1 Sam. 9:15, 16) Samuel ya tabata di edat avansá, i el a realisá ku lo e no por a sigui komo lider di e nashon di Israel mas. A yega e momento pa un otro hende tuma su lugá i Yehova tabata ke p’e ungi e lider nobo. Probablemente Samuel a puntra su mes: ‘Kon mi por prepará e hòmber ei pa su tarea?’ Wèl, el a traha un plan kon pa hasi esei.

¹⁴ E siguiente dia, Samuel a topa Saul, i Yehova a bisa e profeta: “Ata e hòmber.” Mesora Samuel a hasi manera el a plania, esta, el a krea un bon oportunidat p’e por a papia ku Saul: El a invitá Saul ku su sirbidó na un komementu i a duna nan e mihó lugá di sinta. Tambe el a duna Saul e mihó pidanan di karni i a bis’é: “Kome, pasobra el a wòrdu apartá pa bo pa e okashon akí.” Despues di e komementu, nan dos a kana bai kas di Samuel. Na kaminda, nan tabatin un kòmbersashon ameno. Samuel kier a hasi bon uso di e ambiente agradabel ku e bon kuminda i e kaminata a krea. Ora nan a yega kas, nan a bai riba dak i a sigui papia te ora nan a bai drumi. Su manisé, Samuel a ungi Saul, sunch’é i dun’é mas instrukshon. Despues di esei, el a manda Saul bai, bon prepará pa e susesonan ku lo a sigui.—1 Sam. 9:17-27; 10:1.

¹⁵ Samuel mester a ungi Saul pa bira lider di un nashon. Klaru ku esei no ta meskos ku entrená un ruman hòmber pa bira ansiano òf sirbidó ministerial den kongregashon. Pero tòg ansianonan awe por siña vários lès importante for di e manera ku Samuel a prepará e kurason di Saul. Laga nos analisá dos di nan.

16. (a) Kon Samuel a sintié ora ku Israel a pidi pa haña un rei? (b) Ku ki aktitut Samuel a kumpli ku e mandato di Yehova pa ungi Saul?

¹⁶ Sea un maestro dispuesto pa siña otro hende, no vasilá. Na promé instante, ora Samuel a tende ku e israelitanan tabata ke un rei humano, el a keda masha desepshoná i a sinti ku e pueblo a rechas’é. (1 Sam. 8:4-8) De echo, e tabata asina kontra pa kumpli ku nan petishon ku Yehova mester a bis’é tres biaha pa hasi loke nan a pidié. (1 Sam. 8:7, 9, 22) Apesar di tur kos, Samuel no a bira yalurs riba e hòmber ku lo a tuma su lugá komo lider ni a rabia kuné. Ora Yehova a bis’é pa bai ungi Saul, e profeta no a vasilá. El a obedesé di buena gana, no djis pasobra e mester a hasié, sino pasobra e tabata stima Yehova.

17. Kon ansianonan djawe ta imitá e aktitut di Samuel, i ki satisfakshon esei ta duna nan?

¹⁷ Meskos ku Samuel, awe ansianonan ku eksperensia ta trata e rumannan ku nan ta entrená na un manera bondadoso. (1 Ped. 5:2) E ansianonan akí ta dispuesto pa siña otro ruman hòmber, ya ku nan no tin miedu di kompartí algun di nan privilegionan den kongregashon ku nan. Nan no ta mira e rumannan ei komo rival, sino mas bien, komo kompañero di trabou ku lo yuda nan atendé e nesesidatnan di nan kongregashon. (2 Kor. 1:24; Heb. 13:16)  Despues e ansianonan inegoista akí ta sinti un gran satisfakshon ora nan ta mira kon e rumannan ku nan a entrená ta usa nan abilidatnan na benefisio di e kongregashon!—Echo. 20:35.

18, 19. (a) Kon un ansiano por prepará e kurason di e ruman ku e ta bai entrená? (b) Dikon ta importante pa un ansiano dal e pasonan ei?

¹⁸ Sea un amigu, no djis un maestro. E dia ku Samuel a topa Saul, e profeta lo por a saka su butishi, bira basha poko zeta riba kabes di Saul i mand’é bai. E rei nobo lo tabata ungí sí, pero lo e no tabata prepará pa dirigí e pueblo di Dios. En bes di hasi esei, Samuel a tuma su tempu pa prepará Saul su kurason. Promé ku el a ungi Saul, nan a kome huntu, kana huntu trankilamente, papia basta ratu i asta tuma un bon sosiegu. Pues, Samuel a warda e momento oportuno pa ungi e rei nobo.

¹⁹ Awe ta meskos. Promé ku un ansiano kuminsá entrená un ruman, e mester krea un ambiente agradabel i hasi esfuerso pa bira amigu di e ruman. E pasonan spesífiko ku un ansiano ta tuma pa krea un ambiente trankil i amistoso ta varia di un pais pa otro, ya ku esei ta dependé di kustumber- i sirkunstansianan lokal. Pero sin importá unda bo ta biba, si abo—komo un ansiano hopi okupá—ta saka tempu pa dediká na un ruman hòmber, lo e realisá ku e ta importante pa bo. (Lesa Romanonan 12:10.) Ruman hòmbernan na tur parti di mundu lo ta masha gradisidu pa e atenshon i kariño ku boso komo ansiano ta duna nan.

20, 21. (a) Kon lo bo deskribí un bon maestro? (b) Kiko nos lo trata den e siguiente artíkulo?

²⁰ Ansianonan, kòrda: Un bon maestro ta un persona ku no solamente ta gusta entrená otro hende, pero tambe ta stima e persona ku e ta entrená. (Kompará ku Huan 5:20.) Dikon esaki ta importante? Pasobra un ruman hòmber ta ripará mesora si realmente bo ta interesá den dje i, komo resultado, lo e ta mas dispuesto pa siña for di bo. P’esei, ansianonan stimá, boso mester ta maestro i amigu.— Pro. 17:17; Huan 15:15.

²¹ Despues ku un ansiano a prepará e kurason di un ruman, e por pasa pa e siguiente etapa: yuda e ruman optené e abilidatnan nesesario. Ki métodonan e ansiano por usa pa logra esei? Nos lo trata esaki den e siguiente artíkulo.