1. Dikon nos mester hasi nos máksimo esfuerso pa kuida nos amistat ku Yehova?

BO TA un Testigu di Yehova batisá? Si ta asina, bo tin algu masha balioso: un amistat personal ku Dios. Pero e amistat ei ta ser ataká pa e mundu di Satanas, i tambe e por ser debilitá pa motibu di nos propio imperfekshonnan. Tur kristian ta enfrentá e situashon difísil akí. P’esei, nos mester hasi nos máksimo esfuerso pa kuida nos amistat ku Yehova.

2. (a) Ki ora bo por bisa ku bo tin un amistat, òf bon relashon, ku un persona? (Wak nota.) (b) Kiko nos tin ku hasi pa fortalesé nos amistat ku Yehova?

² Kon real Yehova ta pa bo? Bo ta sinti ku e ta bo Amigu di bèrdat? Lo bo ke fortalesé bo amistat, òf relashon, kuné? Santiago 4:8 ta bisa kiko bo mester hasi: “Hala serka Dios, i lo e hala serka boso.” Tuma nota ku e teksto akí ta papia di dos akshon, un di nos parti i un di parti di Yehova: nos ta dal paso pa aserká Dios, i e ora ei é ta aserká nos. * Mas nos hasi esaki, mas  real Yehova lo bira pa nos i mas será nos amistat kuné ta bira. E ora ei nos lo tin e mesun konfiansa ku Hesus tabatin ora el a bisa: “Esun ku a manda mi ta eksistí di bèrdat, i . . . ami konos’é.” (Huan 7:28, 29) Pero ki pasonan konkreto nos por dal pa hala mas serka Yehova?

3. Kon nos por komuniká ku Yehova?

³ Pa nos por tin un amistat mas será ku Dios, nos mester komuniká kuné regularmente. Pero kon nos por hasi esei? Wèl, kon bo ta mantené komunikashon ku un amigu òf amiga ku ta biba leu? Boso ta skirbi otro i kisas hopi biaha ta papia ku otro na telefòn. Kon nos por papia ku Yehova? Nos tin ku hasi orashon regularmente. (Lesa Salmo 142:2.) I nos ta laga Yehova papia ku nos, ora ku regularmente nos ta lesa su Palabra skirbí, Beibel, i meditá riba loke nos a lesa. (Lesa Isaías 30:20, 21.) Den e artíkulo akí nos lo bai wak kon ora nos ta skucha Yehova i ta papia kuné e ta bira mas real pa nos, loke ta fortalesé nos amistat kuné.

4, 5. Duna un ehèmpel kon Yehova ta papia ku bo mediante su Palabra.

⁴ Nos sa ku Beibel ta kontené e mensahe di Dios pa hende en general. Pero Beibel lo por yuda abo hala mas serka Dios? Sí! Kon asina? Segun ku bo ta lesa i studia Beibel, wak kon bo ta reakshoná riba su konsehonan. Pensa tambe riba maneranan ku bo por pone e konsehonan ei na práktika den bo bida. Ta asina bo ta laga Yehova papia ku bo mediante su Palabra skirbí. Anto e ta bira un Amigu íntimo ku tur ora bai ta yuda bo, i lo bo sinti bo mas serka dje.—Heb. 4:12; Sant. 1:23-25.

⁵ Por ehèmpel, kon bo ta sinti bo ora bo lesa i meditá riba e konseho di Hesus pa “stòp di montoná tesoro riba tera”? Si ya kaba bo ta poniendo e interesnan di Reino na promé lugá, e pasashi akí ta laga bo sinti komo si fuera Yehova ta elogiá bo. Di otro banda, si bo ta mira ku bo tin ku simplifiká bo bida pa dediká mas tempu na e Reino, e ora ei ta komo si fuera Yehova ta usa e pasashi akí pa yuda bo komprondé kiko abo tin ku hasi pa bo por hala mas serka dje.—Mat. 6:19, 20.

6, 7. (a) Kiko ta pasa ku nos amor pa Yehova i su amor pa nos ora nos ta studia Beibel? (b) Ku ki meta nos mester hasi estudio personal?

⁶ Ora nos ta studia Beibel, nos ta haña  sa kiko ta e kambionan ku nos por hasi pa sirbi Yehova mihó. Pero tambe nos ta haña mas apresio pa Yehova su bunita personalidat i pa e bon kosnan ku e ta hasi, i esei ta pone nos stim’é mas tantu ainda. I ora Yehova ta mira kuantu nos ta stim’é, su amor pa nos tambe ta krese i nos amistat kuné ta bira mas será.—Lesa 1 Korintionan 8:3.

⁷ Pero si nos ke pa Yehova ta nos amigu di bèrdat, ta masha importante pa nos studia Beibel ku e meta korekto. Hesus a bisa: “Pa haña bida eterno, nan tin ku siña konosé bo, e úniko Dios berdadero, i esun ku bo a manda, Hesukristu.” (Huan 17:3) Ta bèrdat ku ora nos ta lesa Beibel, nos ta siña hopi kos nobo i interesante, pero, manera Hesus a bisa, nos meta prinsipal mester ta pa siña “konosé” Yehova mihó.—Lesa Éksodo 33:13; Sal. 25:4.

8. (a) Kiko un hende lo por puntra su mes si e lesa e relato di 2 Reinan 15:1-5? (b) Si nos konosé Yehova bon, kiko nos lo pensa di e manera ku e ta aktua?

⁸ Ora nos siña konosé Yehova bon, manera un amigu íntimo, nos lo no bira preokupá si tin biaha nos no ta komprondé dikon el a aktua na un sierto manera den algun relato di Beibel. Por ehèmpel, 2 Reinan 15:1-5 ta bisa ku e nashon di Huda tabata adorá diosnan falsu. Apesar di esei, Rei Azarias a sigui ‘hasi bon den bista di Yehova.’ Sinembargo, Yehova a kastigá Azarias ku lepra, i “e tabata un leproso te dia di su morto.” Pero dikon? E parti akí di e relato no ta bisa. Akaso Yehova a kastigá Azarias sin un bon motibu? Nò. Si nos konosé Yehova bon, nos sa ku su disiplina semper ta korekto, pasobra e ta korigí hende manera mester ta, esta, “ku hustisia.” (Yer. 30:11) P’esei, aunke kisas nos no sa dikon Yehova a kastigá Azarias, nos por tin sigur ku su huisio tabata hustu.

9. Kon Beibel ta yuda nos komprondé dikon Yehova a kastigá Azarias ku lepra?

⁹ Sinembargo, den e kaso di Rei Azarias Beibel ta duna nos mas detaye den un otro pasashi. E kos ta ku Rei Azarias tabata konosí tambe komo Rei Uzías. (2 Rei. 15:7, 32) E relato paralelo na 2 Krónikanan 26:3-5 i 16-21 ta splika nos ku aunke Uzías pa un tempu a hasi loke tabata bon den bista di Yehova, mas despues den su bida “su kurason a bira asina orguyoso” ku esaki a hiba na su pèrdishon. El a purba di hasi algu ku ta saserdote so tabatin mag di hasi. Ora ku 81 saserdote a purba di par’é, kon el a reakshoná? Su orguyo a pon’é bira “masha rabiá” ku e saserdotenan. E detayenan adishonal akí ta yuda nos komprondé awor dikon Yehova a kastig’é ku lepra.

10. (a) Dikon nos no tin nodi di haña un splikashon di delaster un kos ku Yehova hasi? (b) Kon nos por tin mas konfiansa ku Yehova semper ta hasi loke ta hustu?

¹⁰ Kiko nos ke mustra ku e informashon ku nos a kaba di trata? Wèl, e relato di Rei Azarias ta duna nos sufisiente detaye ku ta yuda nos komprondé dikon Yehova a kastig’é. Pero, suponé ku Beibel no a duna tur e detayenan ei, manera sa sosodé den otro relatonan kòrtiku. Kiko nos lo a hasi? Nos lo kuminsá puntra nos mes si loke Yehova a hasi ta hustu? Òf nos lo pensa ku nos tin sufisiente informashon den Beibel ku ta garantisá nos ku Yehova semper ta hasi loke ta hustu? (Deu. 32:4) Mas mihó nos konosé Yehova, mas nos lo stim’é i konfi’é. Nos lo ta konvensí ku semper e ta hasi loke ta hustu, i nos lo no tin nodi di haña un splikashon di delaster un kos ku e hasi. Segun ku nos ta studia Beibel i meditá riba  loke nos ta lesa, Yehova ta bira mas real pa nos i nos konfiansa den dje ta sigui krese. (Sal. 77:12, 13) I komo resultado, nos amistat kuné lo bira mas será.

11-13. Dikon bo tin sigur ku Yehova ta skucha orashon? (Wak e promé plachi.)

¹¹ Orashon ta laga nos hala mas serka Yehova. Nos por alab’é, gradisié i pidié konseho. (Sal. 32:8) Pero pa nos por tin un berdadero amistat ku Yehova, nos mester ta konvensí ku e ta skucha orashon.

¹² Tin hende ta kere ku e úniko benefisio di orashon ta ku e ta laga bo sinti bo mihó. Nan ta bisa ku si un hende hasi orashon tokante un problema i esaki keda solushoná esei no ta pasobra Dios a skucha e orashon. Mas bien, ta pasobra e orashon a yuda e persona pone su pensamentunan na òrdu, identifiká e problema i haña un solushon. Ta bèrdat ku orashon por produsí e benefisionan ei, pero kon bo por tin sigur ku Yehova realmente ta skucha bo orashonnan?

¹³ Pensa riba esaki: Promé ku Hesus a bini na tera, el a mira Yehova kontestá orashon di Su sirbidónan. Anto ora Hesus tabata riba tera, el a usa orashon pa komuniká ku su Tata i kont’é su sintimentu- i pensamentunan. Un biaha, el a asta hasi orashon henter anochi. (Luk. 6:12; 22:40-46) Lo el a hasi esei si e tabata pensa ku Yehova no ta skuch’é? Lo el a siña su siguidónan pa hasi orashon si esei tabata simplemente un terapia ku lo a laga nan sinti nan mihó? Klaru ku nò. Hesus tabata konvensí ku orashon ta un medio real pa papia ku Yehova. Na un okashon, el a bisa: “Tata, mi ta gradisí bo ku bo a tende mi. Mi sa ku semper bo ta tende mi.” Nos tambe por tin e mesun konfiansa ku Yehova ta skucha nos orashon.—Huan 11:41, 42; Sal. 65:2.

14, 15. (a) Dikon ta bon pa nos pidi kosnan spesífiko den nos orashon? (b) Kon orashon a yuda un ruman muhé haña un amistat mas será ku Yehova?

¹⁴ No ta semper bisto kiko ta Yehova su kontesta riba nos orashonnan. Pero si nos ta pidié kosnan spesífiko ora nos ta papia  kuné, lo ta mas fásil pa nos mira su kontesta, i e ta bira mas real pa nos. Ademas, si nos ta konta Yehova tur loke ta preokupá nos, nos lo sinti nos mas serka dje.

¹⁵ Un prueba di esei ta e eksperensia di Kathy. * E no tabata gusta sirbishi di vèlt, pero tòg e tabata bai regularmente. El a konta: “Mi no tabata gusta sirbishi di vèlt. I ora mi bisa ku mi no tabata gust’é, mi ke men ku mi no tabata gust’é niun tiki. Ora m’a baha ku penshon, un ansiano a animá mi pa bira pionero; el a asta duna mi e papel pa yena pa bira pionero. M’a disidí di hasié, pero tambe m’a kuminsá pidi Yehova tur dia pa yuda mi pa mi siña gusta e trabou di prediká.” Yehova a kontestá su orashon? Kathy a bisa: “Ya mi tin tres aña ta traha pionero. Komo ku mi ta pasa mas tempu den sirbishi i ta siña for di e otro rumannan, m’a mehorá mi abilidat di prediká. Awor, mi no gusta prediká, mi stim’é. Es mas, mi amistat ku Yehova ta mas será ku nunka.” Bo a tuma nota ki efekto e orashonnan di Kathy tabatin riba su amistat ku Yehova?

16, 17. (a) Kiko nos mester hasi pa nos amistat ku Yehova sigui krese? (b) Kiko nos lo trata den e siguiente artíkulo?

¹⁶ Nos amistat ku Yehova por sigui krese durante henter nos bida. Pero manera nos a wak den e artíkulo akí, p’e hala serka nos, nos tin ku hasi nos parti promé i hala serka dje. Pues, nos mester sòru pa semper nos keda den komunikashon ku nos Dios: lesa i studia Beibel i hasi orashon. Ku ki resultado? Nos relashon ku Yehova lo bira mas i mas fuerte, i ku su yudansa nos lo por superá e problemanan ku ta presentá den bida.

¹⁷ Pero tin biaha problemanan ta keda persistí apesar di nos orashonnan sinsero. Na momentonan asina, nos konfiansa den Yehova por tambaliá. Kisas nos ta kuminsá puntra nos mes si Yehova realmente ta skucha nos orashonnan òf si ainda e ta konsiderá nos komo su amigu. Kiko nos por hasi pa nos no stòp di konfia den dje? Kon nos por sa si di bèrdat ainda e ta nos Amigu? E siguiente artíkulo lo kontestá e preguntanan ei.