1. Ki kapasidat nos tin ku por yuda nos imitá e kualidatnan di Yehova?

YEHOVA a duna nos e kapasidat di pone nos mes den sapatu di otro hende. Es desir, te na sierto grado, nos por imaginá nos mes un situashon aunke nos mes nunka no a pasa aden. (Lesa Efesionan 5:1, 2.) Kon nos por usa e kapasidat akí pa imitá Yehova? I dikon nos mester tene kuidou pa no us’é robes?

2. Kiko Yehova ta sinti ora e ta mira nos sufri?

² Yehova a primintí nos un futuro maravioso sin niun sufrimentu. E ungínan fiel ta masha kontentu ku Dios a primintí nan bida inmortal den shelu, i e ‘otro karnénan’ leal di Hesus ta alegrá den e speransa di biba pa semper riba tera. (Huan 10:16; 17:3; 1 Kor. 15:53) Ma Yehova ta komprondé bon kla ki angustia nos ta pasa aden awe, meskos ku el a komprondé kon e israelitanan tabata sufri komo esklabo den Egipto. Beibel ta bisa ku “den tur nan aflikshon e tabata afligí.” (Isa. 63:9) Siglonan despues di nan liberashon, ora nan tabata rekonstruí e tèmpel, nan a ser menasá pa nan enemigunan. Pero Yehova a trankilisá su pueblo, bisando: “Esun ku mishi ku boso ta mishi ku [mi] pret’i wowo.” (Zak.  2:8) Meskos ku un mama ta trata su yuchi ku kariño, asina Yehova ta protehá su sirbidónan ku kariño. (Isa. 49:15) Den un sentido, Yehova por pone su mes den lugá di otro hende, i el a duna nos e mesun kapasidat ei.—Sal. 103:13, 14.

3. Kiko ta mustra ku Hesus tabata yen di kompashon?

³ Hesus a sinti e doló di otro hende, maske e mes nunka no tabata den nan situashon. Por ehèmpel, e tabata sa ku hopi hudiu tabatin un bida pisá, ya ku e lidernan religioso a gaña nan i obligá nan obedesé reglanan ku nan mes a traha. E hendenan tabatin miedu di e lidernan akí. (Mat. 23:4; Mar. 7:1-5; Huan 7:13) Hesus no tabatin miedu di e lidernan ei ni e no a kere nan mentiranan. Pero tòg e por a komprondé kon e hendenan tabata sinti nan. P’esei, “ora el a mira e multitut, el a haña duele di nan, pasobra nan tabata soyá i deskuidá, manera karné sin wardadó.” (Mat. 9:36) Hesus tabata meskos ku su Tata; el a stima hende i tabata yen di kompashon.—Sal. 103:8.

4. Kiko Hesus tabata hasi pa hende ora el a mira nan sufri?

⁴ Ora Hesus a mira hende sufri, el a yuda nan pasobra e tabata stima nan. E tabata enditu su Tata. Por ehèmpel, despues di un biahe largu durante kua el a prediká den hopi pueblo huntu ku su apòstelnan, nan a disidí di bai un lugá solitario pa nan sosegá. Ma ora nan a yega einan, Hesus a topa un multitut grandi di hende ta ward’é. Kon el a reakshoná? El a haña duele di nan i a “kuminsá siña nan hopi kos.”—Mar. 6:30, 31, 34.

5, 6. Kiko nos mester hasi pa imitá e amor di Dios? Duna un ehèmpel. (Wak e promé plachi.)

⁵ Kon nos por imitá e amor di Yehova? Esei ta, entre otro, den e manera ku nos ta trata nos próhimo. Por ehèmpel, imaginá bo un hóben kristian ku yama Alan. Alan ta pensa riba un ruman hòmber di edat ku no por bai di kas pa kas pasobra e no por kana bon i kasi no por lesa pasobra e tin problema ku su bista. Alan ta kòrda ku Hesus a bisa: “Manera boso ke pa hende hasi ku boso, boso mester hasi meskos ku nan.” (Luk. 6:31) Pues, e ta puntra su mes: ‘Kiko mi ke pa hende hasi ku mi?’ Su kontesta franko ta: ‘Mi ke pa nan hunga futbòl ku mi!’ Ta klaru ku e ruman di edat akí no por kore hunga bala. Bon mirá, e palabranan di Hesus ta indiká ku Alan mester a puntra su mes: ‘Si ami tabata e ruman hòmber ei, kiko lo mi tabata ke pa hende hasi ku mi?’

⁶ Alan ta yòn ainda, pero tòg e por imaginá su mes situashonnan ku e mes nunka no pasa aden. Alan ta pasa tempu ku e ruman di edat i ta skucha bon ora e ta papia. Asina, pokopoko e ta bin komprondé kiko ta nifiká ku bo ta bira bieu i ku bo no por lesa bo Beibel mas ni kana di kas pa kas den sirbishi. Ta ora Alan kuminsá sinti e ruman su doló, e por mira ki yudansa e ruman tin mester, i esei ta motiv’é pa yud’é. Nos tur por hasi meskos. Pa imitá e amor di Dios, nos tin ku pone nos mes promé den sapatu di nos rumannan.—1 Kor. 12:26.

7. Kon nos por sa ki doló nos rumannan ta pasa aden?

⁷ No ta semper fásil pa komprondé e doló di otro hende. Hopi hende ta sufri kosnan ku nos mes nunka no a pasa aden. Por ehèmpel, hopi di nos rumannan tin limitashonnan físiko debí na malesa, aksidente òf behes. Otronan ta sufri di depreshon, atake di pániko òf trastorno emoshonal pa motibu di un òf otro tipo di abusu. Tin ruman ta mayor soltero òf ta  biba den kas ku famia ku no ta sirbi Yehova. Tur hende tin un òf otro problema, i hopi biaha ta problema ku nos mes no a yega di pasa aden. Den kasonan asina, kiko nos por hasi? Kon nos por imitá e amor di Dios? Ta asina ku kada persona kisas tin mester di algu otro pa yuda nan. Pues, si nos skucha bon i purba di komprondé e sintimentunan di e persona te kaminda nos por, nos lo haña sa kua ta e mihó manera pa yud’é. Podisé nos por dun’é un poko animashon spiritual òf hasi algu práktiko p’e. Ora nos ta hasi asina, nos ta imitá Yehova.—Lesa Romanonan 12:15; 1 Pedro 3:8.

8. Kiko a yuda Hesus trata hende ku bondat?

⁸ E Yu di Dios a bisa: “E Haltísimo . . . ta bondadoso asta ku hende malagradesí i malbado.” (Luk. 6:35) I Hesus a imitá su Tata tempu e tabata riba tera. Kiko a yud’é trata hende ku bondat? Wèl, Hesus a imaginá su mes ki efekto loke e bisa i hasi lo tabatin riba otro hende. Por ehèmpel, un biaha un muhé konosí komo pekadó a bini serka Hesus. E muhé tabata yora asina tantu ku su lágrimanan a muha Hesus su pia. Hesus por a mira ku e muhé a arepentí i tabatin masha duele di e kosnan malu ku el a hasi. I Hesus a realisá ku si e papia malu kuné, esaki sin duda lo a kibra su kurason. P’esei, el a elogiá e muh’é pa e bon ku el a hasi i a pordon’é. Hesus asta a papia bondadosamente ku un fariseo ku no a gusta loke Hesus a hasi pa e muhé akí.—Luk. 7:36-48.

9. Kiko por yuda nos imitá Yehova su bondat? Duna un ehèmpel.

⁹ Kon nos por imitá Yehova su bondat? Apòstel Pablo a skirbi: “Un esklabo di Señor no tin nodi di pleita, pero e mester ta amabel [òf, “yen di takto,” segun e nota] ku tur hende.” (2 Tim. 2:24) Hende ku tin takto sa kon pa trata ku situashonnan delikado pa no hùrt otronan. Imaginá bo den e siguiente situashonnan i pensa kon lo bo por ta bondadoso: Bo hefe no ta hasi su trabou bon. Kon lo bo reakshoná? Un ruman ta bini reunion despues di basta luna. Kiko lo bo bis’é? Un doño di kas den sirbishi ta bisa ku e ta muchu okupá pa papia. Lo bo tin komprenshon p’e? Bo kasá ta puntra bo na kas: “Dikon bo no a bisa mi ku bo a traha plan pa djasabra?” Lo bo kontest’é na un manera amabel? Si nos ta pone nos mes den lugá di otro hende i ta purba di imaginá nos ki efekto nos palabranan lo tin riba nan, nos lo sa kiko pa bisa i pa hasi, i nos lo ta bondadoso manera Yehova.—Lesa Proverbionan 15:28.

10, 11. Kiko por yuda nos imitá e sabiduria di Dios? Duna un ehèmpel.

¹⁰ E echo ku nos tin e kapasidat di imaginá nos susesonan ku nos mes no a eksperensiá por yuda nos imitá un di e kualidatnan mas sobresaliente di Yehova: su sabiduria. Yehova ta masha sabí i, si e ke, e por mira kiko lo bai pasa den futuro. Klaru ku nos no por wak den futuro, pero nos por demostrá sabiduria. Kon? Promé ku nos tuma un desishon, nos por pensa riba e posibel konsekuensianan di loke nos ta bai hasi. Nos no mester ta manera e israelitanan. Nan no tabata pensa mes riba kiko lo pasa si nan desobedesé Dios. Nan no tabata pensa tampoko riba nan relashon ku Yehova. Moises a realisá esaki, i e tabata sa ku nan lo a bai desobedesé Yehova apesar di tur loke el a hasi pa nan. P’esei, durante un reunion ku henter e nashon, el a resitá un kantika ku a bisa en parte: “Nan ta un  pueblo sin komprondementu, nan no tin idea di nada. Si nan tabata un tiki sabí, nan lo mester a komprondé kon lo para ku nan.”—Deu. 31:29, 30; 32:28, 29, BPK.

¹¹ Pues, pa nos imitá e sabiduria di Dios, nos mester usa nos imaginashon i “mira” e posibel konsekuensianan di loke nos ta hasi. Por ehèmpel, si nos ta namorá un persona, nos tin ku kòrda ku ora bo ta sinti bo atraé na un hende, ta masha difísil pa kontrolá bo sintimentunan i deseonan seksual. Nos lo no ke plania ni hasi nada ku lo por perhudiká nos relashon presioso ku Yehova! Tuma na pechu e siguiente palabranan inspirá: “Hende sabí ta mira peliger i ta evit’é, esun sin eksperensia ta dal bai i haña su kastigu.”—Pro. 22:3, BPK.

12. Ki ora imaginashon por ta peligroso?

¹² Un persona sabí ta frena òf kontrolá su pensamentunan. Dikon? Pasobra nos imaginashon ta manera kandela. Si nos usa kandela ku kuidou, e ta masha útil. Nos por kushiná kuné i tambe hasi otro kosnan. Pero kandela deskontrolá ta peligroso i por kima un kas i mata e habitantenan. Asina tambe, nos imaginashon ta útil si nos ta us’é pa pensa riba kosnan ku nos ta siña for di Yehova. Pero imaginashon ta algu peligroso si nos ta us’é pa alimentá mal deseo. Por ehèmpel, si nos ta blo pensa riba aktonan inmoral, dado momento nos lo kuminsá hasi nan di bèrdat. Pues, fantasianan inmoral por kibra nos amistat ku Yehova!—Lesa Santiago 1:14, 15.

13. Ki bida Eva probablemente a imaginá pa su mes?

¹³ Ban wak kon e promé muhé, Eva, a alimentá su deseo pa kome e fruta prohibí di “e palu di konosementu di bon i malu.” (Gén. 2:16, 17) E kolebra a bisa Eva: “Siguramente boso lo no muri! Pasobra Dios sa ku e dia ku boso kome di dje, boso wowo lo habri i boso lo ta manera Dios, konosiendo bon i malu.” Eva a keda pensa riba esaki i “a mira ku e palu tabata bon pa kuminda, i ku e tabata un delisia pa bista.” Kiko tabata e resultado? “El a kohe di su fruta i a kome.” Despues el a duna su esposo, i e tambe a kome. (Gén. 3:1-6) Aparentemente, Eva a gusta e idea ku Satanas a bini kuné: En bes di laga Dios bis’é kiko ta bon i malu, e mes por a disidí esaki. Pues, Eva a hasi mal uso di su imaginashon! Via Adam, Eva su kasá pekaminoso, “piká a drenta mundu, i morto pa medio di piká.”—Rom. 5:12.

14. Ki spièrtamentu Beibel ta duna tokante inmoralidat seksual?

¹⁴ Eva su piká den e Hòfi di Edén no a  enbolbé inmoralidat seksual. Ma Hesus a spièrta nos pa no entretené nos mes ku fantasianan inmoral. El a bisa: “Ken ku sigui wak un muhé ku pashon, ya kaba a kometé adulterio kuné den su kurason.” (Mat. 5:28) Pablo tambe a duna e spièrtamentu: “No plania di antemano pa satisfasé deseo di karni.”—Rom. 13:14.

15. Ki tipo di tesoro nos mester montoná, i dikon?

¹⁵ Un otro fantasia peligroso ta di imaginá nos mes ta bira riku, ya ku esaki por kita nos atenshon for di e sirbishi di Yehova. Bon mirá, e rikesa di un hende riku ta “manera muraya haltu den su mes imaginashon.” E no ta dun’é berdadero protekshon. (Pro. 18:11) Hesus a konta un historia pa mustra ku un hende ku ta “montoná tesoro pa su mes, ma no ta riku den bista di Dios” ta den un situashon sumamente lamentabel. (Luk. 12:16-21) Di otro banda, Yehova ta keda masha kontentu ora nos ta hasi kosnan ku ta agrad’é. (Pro. 27:11) Nos mes tambe lo ta felis ku nos a haña Dios su aprobashon pa motibu ku nos a “montoná tesoro den shelu.” (Mat. 6:20) No tin duda anto ku e tesoro di mas balioso ku nos por tin ta un bon relashon ku Yehova.

16. Kiko por aliviá inkietut?

¹⁶ Imaginá bo kuantu preokupashon nos lo tabatin si nos tabata bringa pa bira riku den e mundu akí. (Mat. 6:19) Hesus a konta un ilustrashon pa mustra ku “e inkietut di e era akí i e poder engañoso di rikesa” por stroba hende di pone e Reino di Dios na promé lugá. (Mat. 13:18, 19, 22) Ademas, tin hende ta preokupá tur ora bai ku asuntu di plaka, miéntras ku otronan ta den ansha pa tur kos malu ku lo por sosodé. Sinembargo, e tipo di pensamentunan negativo ei por hasi nos físikamente malu òf asta pone nos kuminsá pèrdè fe den Yehova. P’esei, laga nos konfia den Yehova i kòrda ku “ansha den kurason di hende ta hasié abatí, ma un bon palabra ta hasié kontentu.” (Pro. 12:25) Nos por haña “bon palabra” di animashon serka un hende ku ta komprondé nos, i esei por hasi nos kurason kontentu. Pues, pa aliviá bo inkietut, papia ku un hende di konfiansa, sea bo mayornan, bo kasá òf un bon amiga òf amigu ku ta mira kosnan for di e punto di bista di Dios.

17. Kon Yehova ta yuda nos ora nos tin preokupashon?

¹⁷ Niun hende no ta komprondé nos preokupashonnan mihó ku Yehova. P’esei Pablo a rekomendá: “No sea anshá tokante nada; mas bien, den tur kos, pa medio di orashon i súplika huntu ku gradisimentu, laga Dios sa kiko ta boso petishonnan; i e pas di Dios ku ta surpasá tur komprondementu lo protehá boso kurason i boso mente pa medio di Kristu Hesus.” (Flp. 4:6, 7) Pues, si bo tin inkietut, pensa riba tur e personanan ku t’ei pa protehá bo di kualke daño spiritual: e rumannan, e ansianonan, e esklabo fiel, e angelnan, Hesus i asta Yehova.

18. Kon nos imaginashon por yuda nos?

¹⁸ Manera nos a mira, nos ta imitá Yehova ora nos ta usa nos kapasidat pa komprondé kon otro hende ta sinti nan. (1 Tim. 1:11; 1 Huan 4:8) Nos lo ta mas felis si nos ta mustra amor i bondat na otro hende, si nos ta pensa riba e konsekuensianan di loke nos ta hasi i si nos no ta laga inkietut poderá di nos. Laga nos hasi bon uso di e regalo ku Dios a duna nos, esta, nos imaginashon, pa “mira” e futuro ku ta spera nos i pa imitá Yehova su amor, bondat, sabiduria i felisidat.—Rom. 12:12.