1-3. Dikon Lana ta konvensí ku Yehova sa kiko nos tin mester?

LANA, un pionero regular, hamas lo lubidá loke a sosodé kuné na Alemania na aña 2012. E ta konvensí ku Yehova a kontestá dos orashon masha spesífiko ku el a hasi. E promé orashon tabata den trein riba kaminda pa aeropuerto. El a pidi Yehova yud’é haña un hende pa prediká na dje. El a hasi e di dos orashon ora el a yega aeropuerto i nan a bis’é ku su vuelo tabatin retraso i lo a sali e siguiente dia. El a pidi Yehova yud’é pasobra el a usa kasi tur su euronan i e no tabatin kaminda pa pasa anochi.

² Lana no a ni kaba di hasi e di dos orashon ku el a tende un hende bis’é: “Hei Lana, kiko bo ta hasi aki nan?” Tabata un mucha hòmber ku el a bai skol kuné i ku tabata bayendo Suráfrika. E tabata huntu ku su mama i su wela, kendenan a bin yam’é ayó. Ora e mucha hòmber su mama, Elke, a tende di Lana su situashon, el a invitá Lana pa bin keda serka nan. Elke ku su mama tabata masha hospitalario, i nan hasi Lana hopi pregunta tokante su kreensianan i su trabou di prediká.

 ³ E siguiente mainta, despues di un bon desayuno, Lana a kontestá mas pregunta ku nan tabatin, i nan a dun’é nan datonan pa un Testigu por a sigui bishitá nan. Lana a regresá kas sano i salvo, i ainda e ta traha pionero. E tin sigur ku Yehova a skucha su orashonnan, tabata sa kiko e tabatin mester i a yud’é na e okashon ei.—Sal. 65:2.

4. Di ki tipo di nesesidat nos lo bai papia awor?

⁴ Ora surgi un problema inesperá, nos no ta duda pa pidi Yehova yudansa, i e ta gusta skucha e orashonnan ei di su sirbidónan leal. (Sal. 34:15; Pro. 15:8) Pero e Orashon di Nos Tata ta siña nos ku tin nesesidatnan mas importante ku kisas nos ta pasa por haltu. Den e artíkulo akí nos lo papia di e último kuater petishonnan di e orashon modelo. Tres di nan ta enfatisá nos nesesidatnan spiritual i e di kuater, “duna nos awe nos pan di kada dia,” ta siña nos lèsnan importante ku ta yuda nos biba na armonia ku e orashon ei.—Lesa Mateo 6:11-13.

5, 6. Dikon nos mester pidi pa nos pan di kada dia aunke nos tin sufisiente kuminda?

⁵ Ta bon pa nota ku Hesus a siña nos pidi pa “nos” pan di kada dia, no djis “mi” pan di kada dia. Victor, un superintendente di sirkuito na Afrika, a splika: “Hopi biaha mi ta gradisí Yehova ku ami ku mi kasá no tin nodi di kibra kabes tokante kiko nos ta bai kome ni kon nos ta bai paga hür. Nos rumannan stimá ta perkurá pa nos tur dia. Pero mi ta pidi Yehova sí pa yuda nan sigui padilanti apesar di e problemanan ekonómiko di e mundu akí.”

⁶ Kisas nos tin sufisiente di kome, ma hopi di nos rumannan ta pober òf ta sufri di e konsekuensianan di un ke otro desaster. Nos mester hasi orashon p’e rumannan ei, pero no djis resa pa nan i keda sinta man krusá; nos mester aktua na armonia ku nos orashon. Por ehèmpel, nos por kompartí loke nos tin ku e rumannan den nesesidat. Tambe nos por apoyá e obra mundial ku nos donashonnan regular, pasobra nos sa ku nos plaka lo ser bon usá.—1 Huan 3:17.

7. Ki ilustrashon Hesus a usa pa splika ku nos no mester ta “anshá pa e dia di mañan”?

⁷ Ora ku Hesus a menshoná nos pan di kada dia, e tabata referí sin duda na nos nesesidatnan básiko en general. Pasobra djis despues el a splika ku Dios ta perkurá pa e flornan di mondi, anto el a puntra: “Kuantu mas lo e no bisti boso, hende di poko fe? P’esei, no sea nunka anshá i puntra: . . . ‘Kiko nos lo bisti?’” Na final, el a ripití e konseho importante akí: “No sea nunka anshá pa e dia di mañan.” (Mat. 6:30-34) E palabranan ei ta siña nos pa no bira materialista, sino mas bien, pa keda kontentu ku nos por satisfasé nos nesesidatnan básiko di tur dia, entre otro, un kas digno, un trabou pa kuida nos famia i e sabiduria pa trata ku problemanan di salú. Pero si nos ta pidi Dios pa satisfasé solamente nos nesesidatnan físiko, esei ta indiká ku nos prioridatnan no ta bon. Nos tin nesesidatnan spiritual ku ta hopi mas importante.

8. E petishon tokante nos pan di kada dia ta laga nos kòrda riba kiko? (Wak e promé plachi.)

⁸ E petishon tokante nos pan di kada dia ta laga nos kòrda riba un otro kos ku Hesus a bisa: “Hende no mester biba di pan so, sino tambe di tur palabra ku ta sali for di boka di Yehova.” (Mat. 4:4) Ke men, nos tin mester di kuminda spiritual  tambe. P’esei mes nos tin ku sigui pidi Yehova pa keda duna nos kuminda spiritual na e debido tempu.

9. Den ki sentido nos pikánan ta manera ‘debe’?

⁹ Dikon Hesus a bisa akinan “pordoná nos nos debenan,” miéntras ku mas despues el a bisa “pordoná nos nos pikánan”? (Mat. 6:12; Luk. 11:4) Mas ku 60 aña pasá, E Toren di Vigilansia a splika ku ora nos peka, ta komo si fuera nos ta krea un debe serka Yehova. Nos debe Yehova nos amor i obedensia. Pues, ora nos peka kontra dje, ta komo si fuera nos no a pag’é e amor ku nos deb’é. Si e tabata ke, lo e por a kibra su amistat ku nos. E Toren di Vigilansia a agregá: “Piká ta un falta di amor pa Dios.”—1 Huan 5:3.

10. (a) Dikon Yehova por pordoná nos pikánan? (b) Kiko nos mester hasi pa mustra nos apresio pa e amor di Yehova?

¹⁰ Tur dia nos tin mester di pordon pa nos pikánan. P’esei, nos ta gradisidu ku Yehova a perkurá e sakrifisio di reskate di Hesus. Sin e reskate ei nos lo no por haña pordon. Aunke Hesus a paga e reskate ei kasi 2.000 aña pasá, nos mester apresi’é komo si fuera ta awe el a duna nos e regalo ei. Bon mirá, e preis di e reskate pa nos bida tabata asina haltu ku niun ser humano imperfekto lo por a pag’é. (Lesa Salmo 49:7-9; 1 Pedro 1:18, 19.) Ademas, e orashon modelo ta papia di “nos pikánan,” no di “mi pikánan,” i esei ta kòrda nos ku tur kristian tin mester di e areglo miserikòrdioso akí. Yehova ke pa nos preokupá no solamente pa nos salú spiritual, sino tambe pa e salú spiritual di nos rumannan, sí, asta di esnan ku a kometé un piká kontra nos. Por lo general, e tipo di pikánan ei no ta grave, i nan ta duna nos e oportunidat di demostrá ku di bèrdat nos ta stima nos rumannan i ta dispuesto pa pordoná nan, meskos ku Dios ta pordoná nos.—Kol. 3:13.

11. Dikon ta importante pa nos ta dispuesto pa pordoná otro?

¹¹ Lamentablemente, nos ta imperfekto, i p’esei tin biaha ta difísil pa nos pordoná nos rumannan. (Lev. 19:18) Si nos kuminsá papia ku otro hende tokante e problema, kisas algun ruman ta tuma  parti pa nos i esei por kousa divishon den e kongregashon. Si nos no resolvé e konflikto, nos ta mustra ku nos no ta apresiá e kompashon di Dios ni e reskate. I nos Tata lo no pordoná nos tanten ku nos no ta pordoná otro. (Mat. 18:35) Hesus a papia di esaki djis despues ku el a siña su disipelnan kon pa hasi orashon. (Lesa Mateo 6:14, 15.) Ademas, pa nos risibí Yehova su pordon, nos tin ku hasi nos bèst pa nos no kometé pikánan grave, i esaki ta hiba nos na e siguiente petishon.—1 Huan 3:4, 6.

12, 13. (a) Kiko a pasa ku Hesus djis despues di su boutismo? (b) Dikon nos no mester kulpa un otro persona si nos kai den tentashon? (c) Kiko Hesus a demostrá ku su fieldat te na morto?

¹² Loke a pasa ku Hesus djis despues di su boutismo por yuda nos komprondé dikon nos tin ku pidi: “No laga nos kai den tentashon.” E spiritu di Dios a hiba Hesus den desierto. Kiko a pasa einan? “Diabel a purba di hink’é den tentashon.” (Mat. 4:1; 6:13) Dikon Yehova a permití esaki sosodé? Wèl, e motibu prinsipal pakiko Yehova a manda su Yu na tera tabata pa resolvé di unabes pa semper e dudanan ku a surgi ora ku Adam ku Eva a rechasá su outoridat. Nan rebelion a lanta e siguiente preguntanan: Yehova a krea hende ku defekto? Un hende perfekto lo por a keda leal na Dios apesar di e preshonnan di “e Malbado,” Satanas? Hende su situashon lo tabata mihó si nan a goberná nan mes, independiente di Dios, manera Satanas a insinuá? (Gén. 3:4, 5) Tabatin mester di tempu pa kontestá e preguntanan ei, pero al final tur persona den shelu i riba tera lo mira bon kla ku e manera di goberná di Yehova ta esun mihó.

¹³ Yehova ta santu, i e sigur no ta tenta niun hende pa hasi malu. Ta Satanas, e Diabel, ta “e Tentadó.” E ta esun ku ta krea situashonnan ku por hinka nos den tentashon. (Mat. 4:3) Sinembargo, nos tin e poder di disidí si nos lo kai den e tentashon òf nò. (Lesa Santiago 1:13-15.) Den kaso di Hesus, el a rechasá mesora kada un di e tentashonnan di Diabel dor di sita for di e Palabra di Dios, i asina el a defendé Dios su derecho di goberná su kreashon. Ma Satanas no a entregá. El a warda “te na un otro momento oportuno.” (Luk. 4:13) Hesus a sigui resistí tur Satanas su atakenan pa kibra su integridat. Asina el a demostrá ku Dios su manera di goberná ta hustu i ku un ser humano perfekto por keda fiel apesar di e pruebanan di mas difísil. Pero no lubidá ku te ku dia djawe Satanas ta sigui purba di hinka e disipelnan di Hesus den tentashon, i esei ta inkluí abo.

14. Kiko nos tin ku hasi pa nos no kai den tentashon?

¹⁴ E akusashonnan ku Diabel a lansa kontra Yehova no a ser kontestá kompletamente ainda. P’esei Yehova ta permitié sigui usa e mundu pa hinka nos den tentashon. Pues, no ta Yehova ta hinka nos den tentashon. Al kontrario. E tin e konfiansa ku nos por keda fiel i e ke yuda nos. Pero e ta respetá nos libertat di skohe, i p’esei nunka lo e no obligá nos di hasi loke ta korekto. Pues, e ta laga na nos pa disidí si nos lo keda fiel òf nò. Pa nos no kai den tentashon, nos tin ku hasi dos kos: keda spiritualmente fuerte i hasi orashon tur momento. Pero kon Yehova ta kontestá nos orashonnan?

15, 16. (a) Menshoná algun tentashon ku nos tin ku resistí. (b) Si un ruman kai den tentashon, ta ken su falta?

¹⁵ Yehova ta duna nos su poderoso spiritu  santu, i esei por duna nos e forsa pa resistí tentashon. Anto pa medio di su Palabra i su organisashon e ta spièrta nos pa situashonnan ku ta peligroso. Por ehèmpel, e ta spièrta nos pa no malgastá nos tempu, plaka i energia na kosnan ku no ta nesesario. Espen ku Janne ta biba den un pais riku na Europa. Pa hopi aña, nan a sirbi komo pionero regular den un zona di e pais kaminda tabatin mester di yudansa. Pero ora nan promé yu a nase, nan mester a stòp di traha pionero. Despues nan a haña un yu mas. Espen a bisa: “Hopi biaha nos ta pidi Yehova yuda nos pa nos no kai den tentashon awor ku nos no por partisipá dje tantu ei mas den aktividatnan kristian manera ántes. Nos ta pidié yuda nos pa mantené nos amistat kuné fuerte i pa sigui prediká ku entusiasmo.”

¹⁶ Un otro tentashon ku a bira hopi popular ta wakmentu di pornografia. Si nos entregá na e tentashon ei, nos no por kulpa Satanas. Dikon nò? Pasobra ni Satanas ni e mundu no por obligá nos di hasi malu. Echo ta ku algun ruman a kuminsá wak pornografia pasobra nan a keda pensa riba kosnan ku ta malu. Pero míles di otro rumannan sí a resistí e tentashon akí, i nos tambe por.—1 Kor. 10:12, 13.

17. (a) Kiko nos mester hasi pa biba na armonia ku e petishon “libra nos di e Malbado”? (b) Ki alivio nos lo sinti pronto?

¹⁷ Pa nos biba na armonia ku e petishon “libra nos di e Malbado,” nos mester hasi esfuerso pa no ta ‘parti di e mundu’ di Satanas. Nos no mester “stima mundu ni e kosnan ku tin den mundu.” (Huan 15:19; 1 Huan 2:15-17) Esaki ta un lucha konstante, pero pronto Yehova lo kontestá nos petishon i eliminá Satanas i su mundu. Ma nos no tin ku lubidá ku ora Satanas a ser bentá abou for di shelu, e tabata sa ku su dianan ta kontá. P’esei e ta masha rabiá i ta purba tur manera pa pone nos stòp di sirbi Yehova. Pues, nos tin ku sigui pidi Dios pa libra nos di dje.—Rev. 12:12, 17.

18. Si nos ke sobrebibí e fin di e mundu di Satanas, kiko nos tin ku sigui hasi?

¹⁸ Si bo ke biba pa semper den un mundu sin Satanas, sigui pidi Dios pa laga su Reino bini, pa su nòmber ser santifiká i pa su boluntat sosodé riba tera. Pidi Yehova perkurá pa bo nesesidatnan spiritual i físiko. Sí, hasi tur loke ta na bo alkanse pa biba na armonia ku e Orashon di Nos Tata.