DESPUES ku Anita a batisá komo un Testigu di Yehova, su kasá a kuminsá hasi su bida imposibel. * Anita a konta: “E no tabata laga mi bai reunion i a prohibí mi asta di menshoná Dios su nòmber. E tabata bira furioso si e djis tende e nòmber Yehova.”

Ademas, tabata masha difísil pa Anita siña su yunan tokante Yehova. El a konta: “Mi no tabatin mag di adorá Yehova den mi propio kas. Mi mester a studia ku e muchanan na skondí, i mi no tabatin mag di bai reunion ku nan.”

E situashon di Anita ta demostrá ku oposishon di famia por pone nos lealtat na Yehova na prueba. Pero nos por haña nos tambe ku otro pruebanan, manera un enfermedat króniko òf morto di un yu òf kasá. Kisas un miembro di famia ta bira lomba pa Yehova. Kiko por yuda bo keda fiel na Yehova den e tipo di situashonnan ei?

Apòstel Pablo a kontestá: “Boso tin mester di perseveransia.” (Heb. 10:36) Pero kiko por yuda bo perseverá?

Un di e kosnan ku mas ta duna nos forsa pa soportá prueba ta di hasi orashon na Yehova i konfia den dje, manera e kaso di Ana ta mustra. Un djaluna atardi, Ana a haña e notisia ku su kasá a muri diripiente. Nan tabatin 30 aña kasá. Ana a bisa: “El a bai traha i no a bolbe kas mas. E tabatin 52 aña so.”

Kiko a yuda Ana trata ku e situashon? E echo ku el a hañ’é ta bai traha atrobe a yud’é, ya ku su trabou tabata eksigí hopi konsentrashon i esei a distraí su mente un poko. Ma esei no a kita e doló ku e tabata sinti. El a konta: “Mi tabata deshogá mi kurason serka Yehova i tabata rog’é pa duna mi forsa pa trata ku mi pèrdida doloroso.” Yehova a kontestá su orashonnan? Ana tin sigur ku el a hasié pasobra despues ku e kaba di hasi orashon, e tabata sintié trankil i kalmu. Ademas, e di: “Mi ta konvensí ku Yehova lo resusitá mi kasá den Paradeis.”—Flp. 4:6, 7.

Yehova, Esun ku semper ta skucha orashon, a primintí su sirbidónan ku lo e duna nan tur loke nan tin mester pa keda fiel na dje. (Sal. 65:2) Bo no ta haña ku e promesa akí ta fortalesé nos fe? E no ta duna bo e forsa pa perseverá?

Yehova ta duna nos ánimo via e kongregashon. Por ehèmpel, tempu ku e kongregashon na Tesalónika tabata sufri persekushon kruel, Pablo a urgi e kristiannan einan pa nan “sigui animá otro i fortalesé otro, manera de echo [nan tabata] hasiendo kaba.” (1 Tes. 2:14; 5:11) E tesalonisensenan a logra superá e prueba di fe akí debí ku nan tabata hopi uní ku otro i tabata yuda otro ku amor. Nan perseveransia ta un ekselente ehèmpel pa nos awe i ta siña nos kiko por yuda nos perseverá.

Pa nos por animá otro, nos mester tin un amistat será ku nos rumannan den kongregashon. (Rom. 14:19) Esei ta importante foral den tempunan difísil. Pablo mes a pasa den hopi difikultat, pero Yehova a dun’é e forsa pa perseverá. Tabatin biaha ku Dios a animá Pablo via su rumannan den fe. De echo, ora Pablo a manda kumindamentu pa algun miembro di e kongregashon na Kolósas, el a bisa lo siguiente di nan: “Nan a bira un fuente di gran konsuelo pa mi.” (Kol. 4:10, 11) Sí, e amor ku e rumannan akí tabatin pa Pablo a motivá nan pa konsol’é i fortales’é ora ku mas e tabatin mester di esei. Probablemente bo tambe ta kòrda okashonnan ku rumannan di bo kongregashon a yega di bisa òf hasi algu ku a animá bo.

Un otro manera amoroso ku Yehova ta apoyá nos ta pa medio di e ansianonan di kongregashon. E hòmbernan maduro akí ta “manera un refugio kontra bientu, i un protekshon kontra tempestat, manera koridanan di awa den un tera seku, manera sombra di un baranka masha grandi mes den un tera ku tin set di awa.” (Isa. 32:2) Ta un konsuelo pa sa ku e rumannan akí ta kla pa yuda nos. Abo ta hasi bon uso di e regalo akí di Yehova? E animashon i apoyo di e ansianonan por yuda bo perseverá.

Klaru ku e ansianonan no por solushoná tur nos problemanan. Nan ta hende imperfekto meskos ku nos. (Echo. 14:15) Pero asina mes, nos por sinti nos mas mihó ora nan ta hasi orashon pa nos. (Sant. 5:14, 15) Por ehèmpel, ansianonan a animá un ruman hòmber na Italia ku tabata sufri pa años di un malesa di spir serio. E ruman a bisa: “E amor i kariño di e ansianonan i nan bishitanan frekuente a duna mi e forsa pa wanta.” Si bo ta sufriendo, Yehova ke pa bo pidi e ansianonan yuda bo.

Pero tin mas kos ku por yuda nos perseverá. Por ehèmpel, ta importante pa keda mantené un bon rutina spiritual. Konsiderá e kaso di John. Tempu e tabatin 39 aña, el a haña sa ku e tin un tipo di kanser ku no ta komun. El a atmití: “Mi no a haña ta hustu ku mi a bira malu na un edat asina yòn.” E tempu ei, John su yu hòmber tabatin apénas 3 aña. El a sigui konta: “Esei ke men ku mi kasá no solamente tabatin ku kuida nos yu chikí, sino kuida ami tambe. Banda di esei, e tabatin ku yuda mi bai tur mi sitanan na hospital.” E tratamentunan di kimo a laga John keda morto kansá i ku walmentu di stoma. Pa kolmo, John su tata tabata malu i den fase terminal, pues e tabatin mester di kuido konstante.

Kiko a yuda John ku su famia trata ku e situashon difísil akí? El a bisa: “Maske kon kansá mi tabata, mi tabata sòru pa nos famia sigui fielmente ku nos programa di aktividatnan spiritual. Nos tabata bai tur reunion, nos tabata bai sirbishi tur siman i nos tabata tene nos estudio di famia tur biaha, asta ora tabata difísil pa hasi esei.” John a realisá ku un faktor klave pa perseverá bou di kualke difikultat ta di sigui mantené su mes spiritualmente fuerte, es desir, sòru p’e tin un bon relashon ku Yehova. Aunke na promé instante e tabata den shòk i hopi preokupá, no a tarda mashá ku el a bira mas trankil. E tabata sa ku Yehova tabata stim’é i a dun’é e fortalesa nesesario. Yehova por yuda bo tambe ora bo ta preokupá òf tin miedu. John a bisa: “Yehova por hasi bo fuerte, meskos ku el a hasi ami fuerte.”

Ora bo ta sufri, kòrda riba e palabranan di Pablo: “Boso tin mester di perseveransia.” Ku e sosten di Dios, bo por enfrentá kualke prueba òf sirkunstansia difísil, tantu awor komo den futuro. P’esei, konfia den Yehova pa medio di orashon, forma un amistat será ku e rumannan di bo kongregashon, pidi e ansianonan yuda bo i mantené un bon rutina spiritual. Ku Yehova su yudansa bo por perseverá!