1, 2. Den e Skritura Hebreo, na kiko e palabra “banki pa pia” por referí?

YEHOVA DIOS a bisa: “Shelu ta mi trono, i tera ta e banki pa mi pia.” (Isa. 66:1) El a bisa tambe: “Lo mi hasi e lugá di mi pianan glorioso.” (Isa. 60:13) Kon Yehova ta hasi e banki pa su pia bunita? I kiko esaki ta nifiká pa nos ku ta biba riba e ‘banki pa su pia’?

² Den e Skritura Hebreo, e palabra “banki pa pia” ta ser usá tambe pa deskribí e antiguo tèmpel di Israel. (1 Kró. 28:2; Sal. 132:7) E tèmpel ei tabata e sentro di adorashon berdadero riba tera. P’esei e tabata asina bunita den bista di Yehova i tabata duna gloria na e lugá di sosegá su pia.

3. (a) Kiko e gran tèmpel spiritual ta? (b) Ki tempu el a kuminsá funshoná?

³ Awe, e sentro di adorashon berdadero ya no ta un tèmpel ku man di hende a traha, sino un tèmpel spiritual. E tèmpel ei ta duna mas gloria na Yehova ku kualke edifisio literal. Kiko e tèmpel spiritual akí ta? E ta e sistema ku Dios a krea pa nos por rekonsiliá kuné, bira su amigu i sirbié, un sistema ku ta funshoná danki na e sakrifisio di Hesukristu. El a kuminsá funshoná na aña 29 di e promé siglo ora ku Hesus a ser batisá i ungí komo Sumo Saserdote di Yehova su gran tèmpel spiritual.—Heb. 9:11, 12.

4, 5. (a) Segun Salmo 99, kiko ta loke mas e sirbidónan di Yehova ta deseá di hasi? (b) Kiko kada un di nos mester puntra nos mes?

 ⁴ Nos ta masha gradisidu ku Yehova a krea un sistema ku ta permití nos alab’é. Nos ta demostrá nos gratitut na Yehova ora nos ta papia ku otro hende tokante su nòmber i tokante e sakrifisio di reskate di su Yu. Ta masha emoshonante ku tin mas ku 8 mion kristian berdadero ta duna gloria na Yehova tur dia! Tin hende religioso ta kere ku nan lo alabá Dios despues di nan morto, ora nan bai shelu. Pero esei ta un kibokashon. Komo Testigu di Yehova, nos sa ku nos mester alab’é awor, aki riba tera.

⁵ Di e manera ei nos ta sigui e ehèmpel di e fiel sirbidónan di Yehova di pasado deskribí na Salmo 99:1-3, 5-7. (Les’é.) Manera e salmo ei ta indiká, Moises, Aron i Samuel a apoyá e sistema ku Dios tabatin den nan tempu pa adorashon berdadero ku henter nan kurason. Awe, e restu di e rumannan ungí di Hesus ta sirbi fielmente den e patio terenal di e tèmpel spiritual. Despues nan lo bai shelu pa sirbi komo saserdote huntu ku Hesus. Ademas, tin miónes di “otro karné” ku ta apoyá nan fielmente. (Huan 10:16) E dos gruponan ei ta adorá Yehova huntu aki riba tera—e banki pa su pia—aunke nan kada un tin un speransa diferente. Pero kada un di nos mester puntra nos mes: ‘Mi ta apoyá Yehova su areglo pa adorashon puru ku henter mi kurason?’

6, 7. (a) Ki problema a desaroyá djis despues ku e kongregashon kristian a ser formá? (b) Kiko Yehova a hasi basta siglo despues?

⁶ Ménos ku un siglo despues ku e kongregashon kristian a keda establesé, e apostasia profetisá a kuminsá desaroyá. (Echo. 20:28-30; 2 Tes. 2:3, 4) Esei a pone ku a bira mas i mas difísil pa mira ken tabata sirbi Yehova na su tèmpel spiritual. Ken tabata su berdadero sirbidónan? Despues di hopi siglo, e momento a yega pa Yehova klara e asuntu ei mediante su Rei resien instalá, Hesukristu.

⁷ Na aña 1919, e personanan ku tabatin e aprobashon di Yehova i ku tabata sirbi na su tèmpel spiritual a keda identifiká klaramente. Nan a ser refiná spiritualmente, es desir, nan a hasi sierto ahuste pa asina nan forma di adorá Yehova por a bira mas aseptabel p’e. (Isa. 4:2, 3; Mal. 3:1-4) Na e momento ei, un vishon ku apòstel Pablo a mira mas ku 1.800 aña promé a kuminsá kumpli na un manera limitá.

8, 9. Kiko ta e paradeis ku apòstel Pablo a mira den un vishon?

⁸ Nos ta haña e vishon di Pablo na 2 Korintionan 12:1-4. (Les’é.) Pablo a referí na loke el a mira den e vishon sobrenatural ei komo un revelashon, ya ku esei tabatin di haber ku algu ku lo a eksistí den futuro. Pablo “a ser hibá na e di tres shelu,” kaminda el a mira un paradeis. Kiko e paradeis ei ta? E apòstel a mira un paradeis físiko (e paradeis ku lo bini pronto riba tera), un paradeis spiritual (ku nos lo eksperensiá plenamente den e mundu nobo) i un paradeis selestial (e kondishonnan maravioso ku ta eksistí den shelu den “e paradeis di Dios”).—Luk. 23:43; Rev. 2:7.

⁹ Pero dikon Pablo a bisa ku el a “tende palabranan ku no por ser papiá i ku hende no mag ripití”? Pasobra no tabata e momento p’e splika en detaye e kosnan maravioso ku el a mira den e vishon. Pero awe sí tin mag! Yehova ta permití nos papia di e bendishonnan ku su pueblo ta disfrutá di dje.

10. Dikon e paradeis spiritual i e tèmpel spiritual no ta meskos?

 ¹⁰ Komo Testigu di Yehova, nos tin kustumber di papia di nos “paradeis spiritual.” Pero na kiko esaki ta referí? E ta referí na e ambiente trankil i agradabel ku Dios ta duna su pueblo i ku ta permití nan disfrutá di pas kuné i ku nan rumannan. E ta un ambiente úniko, yen di kos spiritual. Pues, e paradeis spiritual i e tèmpel spiritual no ta meskos. E tèmpel spiritual ta e sistema ku Yehova a establesé pa adorashon berdadero. E paradeis spiritual ta identifiká bon kla ken ta esnan ku tin e aprobashon di Dios i ku ta sirbié na su tèmpel spiritual.—Mal. 3:18.

11. Ki privilegio nos tin awe komo kristiannan berdadero?

¹¹ Ta emoshonante pa sa ku for di aña 1919, Yehova a duna hende imperfekto e privilegio di yuda kultivá i ekstendé e paradeis spiritual riba tera! Abo ta partisipá den e trabou maravioso akí? Bo ta sinti bo motivá pa sigui kolaborá ku Yehova pa hasi e lugá kaminda e ta sosegá su pia mas bunita?

12. Kon bini nos sa ku Isaías 60:17 a kumpli? (Wak e promé plachi.)

¹² Beibel a profetisá ku lo a sosodé un transformashon maravioso, sí, lo tabatin kambio- i ahustenan den e parti terenal di e organisashon di Yehova ku lo a hasié mas bunita. (Lesa Isaías 60:17.) Kristiannan mas yòn òf mas nobo den e bèrdat kisas a lesa òf tende di e kambionan ei. Pero meimei di nos tin hopi ruman ku a mira e transformashon maravioso ei ku nan mes wowo! P’esei mes nan ta konvensí ku Yehova ta usando nos Rei Hesus pa guia i dirigí Su organisashon i ku lo e no laga nos na kaya! Laga e rumannan ei konta bo algun di nan eksperensianan; esei sigur lo fortalesé bo fe i konfiansa den Yehova.

13. Segun Salmo 48:12-14, ki responsabilidat nos tur tin?

¹³ Sin importá kuantu tempu nos tin den e bèrdat, nos tin ku konta otro hende tokante e organisashon di Yehova. E solo echo ku ta eksistí un paradeis spiritual meimei di e mundu kruel i malbado akí ta un milager! Nos tin un konosementu masha balioso ku nos mester pasa pa “e próksimo generashon.” Di promé, nos mester konta nan tokante e kosnan maravioso ku e organisashon di Yehova, representá pa “Sion,” a hasi. Tambe nan mester sa e bèrdat tokante nos paradeis spiritual.—Lesa Salmo 48:12-14.

14, 15. (a) Menshoná algun ahuste ku a tuma lugá den e organisashon den dékada di 1970. (b) Kon e kambionan ei a benefisiá nos?

¹⁴ Kristiannan ku tin hopi aña den e bèrdat tabatin e oportunidat di mira algun ahuste ku a hasi e parti terenal di e organisashon di Yehova mas bunita. Por ehèmpel, nan ta kòrda tempu ku e kongregashonnan tabatin un sirbidó di kongregashon en bes di un kuerpo di ansiano, tempu ku paisnan tabatin un sirbidó di sukursal en bes di un Komité di Sukursal i tempu ku e organisashon tabata ser dirigí pa e presidente di Sosiedat Watch Tower en bes di e Kuerpo Gobernante ku nos konosé awe. Aunke tur e ruman hòmbernan ei tabatin e apoyo di asistentenan fiel, ta un persona so tabata responsabel pa tuma desishonnan final, sea den kongregashon, na sukursal òf na e sede mundial di Testigunan di Yehova. Pero den dékada di 1970, e rumannan a hasi sierto ahuste pa asina grupo di ansiano karga e responsabilidat di tuma desishon en bes di un solo persona.

 ¹⁵ E kambionan akí a duna bon resultado, i esei tabata di spera tambe. Dikon? Pasobra e rumannan a komprondé e Skritura mas mihó i a sigui e patronchi ku tabatin den dje. Awor, en bes di tin un persona so ku ta tuma tur desishon, nos tin grupo di ansiano ku ta manera “regalo” di Yehova. Kada un di e ansianonan ei tin kualidatnan ku ta komplementá otro i esei ta benefisiá henter e organisashon.—Efe. 4:8; Pro. 24:6.

16, 17. Kua di e ahustenan resien ku tabatin den e organisashon bo a gusta mas, i dikon?

¹⁶ Pero e transformashon no a keda te einan. Resientemente tabatin algun ahuste den e diseño, kontenido i sistema di distribuí nos publikashonnan. Ta masha dushi pa ofresé e hendenan publikashonnan atraktivo i práktiko den sirbishi! Ademas, kada biaha ku nos ta usa e teknologia di mas moderno (manera e website jw.org) pa plama e mensahe di e bèrdat, nos ta demostrá ku nos tin e mesun interes ku Yehova, esta, di yuda hende rònt mundu haña e guia ku asina tantu nan tin mester.

¹⁷ Nos ta mira tambe e benefisio di e ahuste ku tabatin den e reunionnan di kongregashon ku a permití nos haña mas tempu pa Adorashon Komo Famia òf pa estudio personal. I nos ta apresiá e kambionan ku a hasi den e programanan di asamblea i di kongreso. Hopi biaha nos ta tende e rumannan bisa ku kada aña e programanan akí ta bira mas mihó! Anto pa no papia mes di e kantidat di skolnan bíbliko ku tin awor ku ta kapasitá nos pa sirbi Dios mihó. Esta kontentu nan ta hasi nos! Den tur e ahustenan akí nos ta mira e man di Yehova ta dirigí su organisashon. Ta bisto ku e ta sigui hasi e paradeis spiritual  ku nos ta disfrutá di dje kada biaha mas bunita!

18, 19. Kon nos por yuda hasi nos paradeis spiritual mas bunita?

¹⁸ Ta un onor ku Yehova ta permití nos yuda hasi nos paradeis spiritual mas bunita. Pero kon nos ta hasié bunita? Wèl, ora nos ta prediká e bon notisia di Reino ku entusiasmo i ta hasi mas hende disipel. Kada biaha ku nos yuda un hende bira un sirbidó di Yehova, ta komo si fuera nos ta ekstendé, òf rèk, e fronteranan di e paradeis spiritual.—Isa. 26:15; 54:2.

¹⁹ Un otro manera ku nos ta hasi nos paradeis spiritual mas bunita ta ora nos ta hasi esfuerso pa mehorá nos personalidat kristian. Di e manera ei nos ta hasi e paradeis akí mas atraktivo pa hende pafó di e organisashon. Hopi biaha, e promé kos ku ta atraé hende na e organisashon—i di mes na Yehova i Hesus—no ta nos konosementu di Beibel, sino nos komportashon limpi i pasífiko.

20. Na armonia ku Proverbionan 14:35, kiko mester ta nos deseo?

²⁰ Esta kontentu Yehova i Hesus lo mester ta sinti nan ora nan ta mira nos bunita paradeis spiritual awe! E goso ku nos ta sinti awor p’e echo ku nos ta yuda hasi e paradeis akí mas bunita ta djis un ñapa di e goso ku nos lo sinti despues ora ku nos kombertí e tera den un paradeis literal. Keda kòrda loke Proverbionan 14:35 ta bisa: “Rei tin delisia den un sirbidó sabí.” Laga nos aktua sabí anto i sigui traha duru pa hasi e paradeis spiritual mas bunita!