1, 2. (a) Kon bo ta imaginá bo ku bo bida lo ta den e mundu nobo? (Wak e promé plachi.) (b) Kiko ta loke lo duna nos e alegria di mas grandi den e mundu nobo?

“LOKE REALMENTE TA BIDA.” Riba kiko bo ta pensa ora bo lesa e palabranan ei? Segun apòstel Pablo, ta “bida eterno” ta loke realmente ta bida. (Lesa 1 Timoteo 6:12, 19.) Pa mayoria di nos, esei ta e bida ku Dios a primintí di duna nos den Paradeis i ku lo dura pa eternidat. Esaki ta e bida ku lo hasi nos realmente felis i ta p’esei nos ta asina ansioso p’e yega. Kasi nos no por imaginá nos kon lo ta pa lanta tur mainta ku bon salú, felis i kontentu, sí, sin niun doló. (Isa. 35:5, 6) Esta dushi lo ta pa pasa tempu huntu ku bo famia- i amigunan, inkluso esnan ku a ser resusitá! (Huan 5:28, 29; Echo. 24:15) Ademas, nos lo tin chèns di siña toka muzik, siña kon pa diseñá nos mes kas, siña mas tokante siensia òf profundisá nos mes riba kualke otro tereno ku nos gusta.

² Nos ta spera ansiosamente riba tur e bon kosnan ei, pero loke lo duna nos e alegria di mas grandi ta di por sirbi Yehova. Esta felis nos lo ta ku Yehova su nòmber i reputashon a ser limpiá di tur reproche i ku tur hende lo asept’é komo nan  Soberano! (Mat. 6:9, 10) Lo ta masha emoshonante pa mira ku por fin Yehova su propósito original pa humanidat i pa e tera ta kumpli. Anto kòrda ku e tempu ei lo ta muchu mas fásil pa hala serka Yehova, segun ku pokopoko nos ta bira perfekto.—Sal. 73:28; Sant. 4:8.

3. Nos mester prepará for di awor pa kiko?

³ Nos tin sigur ku Yehova lo hasi tur e kosnan maravioso akí, pasobra Hesus a bisa ku “pa Dios tur kos ta posibel.” (Mat. 19:25, 26) Pero si nos ke biba den e mundu nobo ei—no djis durante e Reinado di Mil Aña di Kristu, sino pa semper—nos tin ku dal paso awor pa “haña un gara firme” riba e bida eterno. Nos tin ku biba pendiente di e fin di e mundu malbado akí, i nos mester prepará for di awor pa e bida den e mundu nobo. Kon nos por hasi esei?

4. Ilustrá kon nos por prepará for di awor pa biba den e mundu nobo.

⁴ Kon nos por prepará for di awor pa biba den Paradeis? Wèl, imaginá ku bo tin ku bai biba na un otro pais. Kon lo bo prepará pa e kambio ei? Kisas lo bo kuminsá ku siña e idioma i e kustumbernan di e pais. Podisé lo bo purba algun kuminda típiko di einan. Tal bes bo ta asta kuminsá biba manera ta einan bo ta kaba. Tur esei lo yuda ku unabes bo yega den e pais, lo bo tin ménos problema pa adaptá. Meskos ta konta pa Paradeis: Nos por prepará for di awor p’e mundu nobo i purba di biba komo si fuera nos ta einan kaba. Laga nos analisá algun manera ku nos por hasi esaki.

5, 6. Dikon for di awor nos mester kria e kustumber di obedesé e instrukshonnan di Yehova ku nos ta haña mediante su organisashon?

⁵ Den e mundu djawe, Satanas a konvensé mayoria di hende ku nan por hasi loke nan ke i ku nan no tin ku duna niun hende kuenta i rason, muchu ménos Dios. Kiko tabata e resultado di e spiritu di independensia akí? Hopi sufrimentu i infelisidat. (Yer. 10:23) Esta diferente bida lo ta den e mundu nobo! Einan, nos tur lo obedesé Yehova i respetá su derecho di bisa nos kiko pa hasi.

⁶ Lo ta un plaser den e mundu nobo pa sigui e instrukshonnan di Yehova, kombertí e tera den un bunita paradeis i yuda siña e hendenan ku resusitá. Pero kiko si e rumannan ku ta dirigí e organisashon ta manda nos hasi un trabou ku nos no gusta mashá? Kon nos lo reakshoná? Nos lo sigui nan instrukshon i hasi nos bèst pa kumpli kuné lo mihó ku nos por i asta purba di disfrutá di e tarea? Kasi sigur nos tur ta kontestá ku sí! P’esei ta asina importante pa for di awor nos kria e kustumber di obedesé e instrukshonnan ku nos ta haña di Yehova mediante su organisashon. Asina nos ta prepará nos mes pa biba den e mundu nobo.

7, 8. (a) Dikon nos mester kooperá ku e organisashon di Yehova? (b) Ki kambionan algun ruman mester a hasi? (c) Nos por tin sigur di kiko den e mundu nobo?

⁷ Si nos ke ta kla prepará pa biba den e mundu nobo, nos tin ku siña for di awor di keda kontentu ku loke nos tin i di kooperá ku otro i ku e organisashon di Yehova. Por ehèmpel, kisas nos ta haña un asignashon nobo di sirbishi. Laga nos asept’é gustosamente i kumpli kuné ku smak. Si nos siña hasi esei awor, nos lo hasi meskos den Paradeis. (Lesa Hebreonan 13:17.) Den tempu di e israelitanan, nan a usa lòt pa parti e Tera Primintí. (Num. 26:52-56; Hos. 14:1, 2) Kisas den Paradeis nos tambe lo ser asigná unda pa biba, i por ta esei no ta  kaminda nos a pensa. Pero si nos a siña kooperá, nos lo keda satisfecho i nos lo sirbi Yehova felismente, sin importá unda nos ta biba.

⁸ Bida den Paradeis bou di mando di e Reino ta un privilegio ku ta bal tur esfuerso. P’esei nos tin ku hasi tur nos posibel pa kooperá ku e organisashon di Yehova i kumpli ku e asignashonnan ku nos haña. Klaru ku nos sirkunstansianan por kambia. Por ehèmpel, algun bètelita di Merka a haña e asignashon nobo pa bai traha den vèlt i awor ta disfrutá di hopi bendishon den otro formanan di sirbishi di tempu kompleto. Algun superintendente di sirkuito tambe a haña un kambio di asignashon debí na edat i otro faktornan, i awor nan ta pionero spesial. Si nos siña pa ta kontentu ku loke nos tin i pidi Dios yuda nos duna lo mihó ku nos por den su sirbishi, nos lo ta felis i nos lo disfrutá di hopi bendishon apesar di e tempunan krítiko ku nos ta biba aden. (Lesa Proverbionan 10:22.) I kiko di nos speransa pa futuro? Podisé nos a pensa kaba unda nos lo tin gana di biba. Pero kiko si e organisashon di Yehova pidi nos bai biba un otro kaminda? Nos por tin sigur ku e tempu ei lo no importá unda nos ta biba ni ki asignashon nos tin, ya ku nos lo ta asina gradisidu ku nos ta biba den Paradeis ku nos lo ta super felis.—Neh. 8:10.

9, 10. (a) Dikon nos lo mester tene pasenshi den e mundu nobo? (b) Kon nos por demostrá for di awor ku nos tin pasenshi?

⁹ Den e mundu nobo lo tin biaha ku nos mester tin pasenshi. Por ehèmpel, suponé ku nos tende ku algun famia ta kontentu di nan alma pasobra un par di nan famia- i amigunan a resusitá. En kambio, nos tin ku warda ainda pa nos hendenan resusitá. Kiko nos lo hasi? Nos lo alegrá huntu ku e otro famianan i warda ku pasenshi riba nos bùrt? (Rom. 12:15) Si for di awor nos siña warda ku pasenshi pa e promesanan di Yehova kumpli, den futuro lo ta mas fásil pa nos tene pasenshi.—Ekl. 7:8.

¹⁰ Tambe nos mester tene pasenshi ora bini kambio den nos forma di komprondé bèrdatnan for di Beibel; esei ta un otro manera pa prepará pa biba den e mundu nobo. Kon nos ta reakshoná ora tin algu ku nos no ta komprondé? Nos ta dediká tempu pa studia e informashon nobo i ta hasi esfuerso pa aseptá e kambionan? Den tal kaso lo ta mas fásil pa nos aseptá e instrukshonnan nobo ku Yehova lo duna den Paradeis.—Pro. 4:18; Huan 16:12.

11. Dikon nos mester siña pordoná otro for di awor?

¹¹ Un otro kualidat ku lo yuda nos bon den e mundu nobo ta di ser kla pa pordoná. Dikon? Pasobra nos imperfekshonnan lo no disparsé di un dia pa otro durante e Reinado di Mil Aña di Kristu. Lo tuma tempu pa nos tur—hustu i inhustu—bira perfekto. (Echo. 24:15) Nos lo por resolvé nos diferensianan e tempu ei i trata otro ku kariño? Si for di awor nos siña pordoná otro libremente i di tin bon relashon ku otro, den Paradeis lo ta hopi mas fásil pa hasi meskos.—Lesa Kolosensenan 3:12-14.

12. Dikon nos mester prepará for di awor pa biba den e mundu nobo?

¹² Ta probabel ku den e mundu nobo nos lo no haña semper loke nos ke ora nos ke. Nos lo mester tin un aktitut gradisidu i keda kontentu den kualke situashon ku nos ta, segun ku nos ta benefisiá di Yehova su gobernashon amoroso. Bon mirá, den Paradeis nos lo tin mester di tur e kualidatnan ku Yehova ta siña  nos kultivá aworakí. Si nos kustumbrá biba aworakí manera nos lo bai biba e tempu ei, nos lo kultivá kualidatnan ku nos lo por usa pa eternidat. Di e manera ei “e mundu binidero” ta bira mas real pa nos. (Heb. 2:5; 11:1) Ademas, asina nos ta demostrá ku di bèrdat nos ke biba den un mundu kaminda ta reina hustisia. Bo ta mira dikon ta asina importante pa prepará bon pa bida eterno den e mundu nobo di Dios?

13. Kiko lo ta na promé lugá den e mundu nobo?

¹³ Laga nos wak un manera mas ku nos por prepará pa e bida den e mundu nobo. Aunke den e tempu ei nos lo tin un abundansia di kuminda i di tur otro nesesidat físiko riba tera, loke lo hasi nos mas felis ta e echo ku nos nesesidatnan spiritual ta ser satisfasé i ku nos lo tin un amistat perfekto ku Yehova. (Mat. 5:3) Aktividatnan spiritual lo ta na promé lugá i lo ta un plaser di por ta okupá den e sirbishi di Yehova. (Sal. 37:4) Si for di awor asuntunan spiritual ta na promé lugá, nos lo ta bon prepará pa biba den e mundu nobo.—Lesa Mateo 6:19-21.

14. Ki metanan spiritual por yuda hóbennan keda ku nan bista fihá riba bida eterno?

¹⁴ Kiko nos por hasi pa sirbi Yehova ku mas goso? Entre otro, pone metanan spiritual. Por ehèmpel, si bo ta yòn i bo tin pensá di dediká bo mes na e sirbishi di tempu kompleto, buska artíkulonan ku ta papia tokante e diferente opshonnan ku tin i pone un di nan komo bo meta. * Dikon bo no ta papia ku un ruman ku a sirbi Yehova pa hopi aña den sirbishi di tempu kompleto? E eksperensia i entrenamentu teokrátiko ku bo ta haña den sirbishi di tempu kompleto sigur lo yuda bo sigui sirbi Yehova den e mundu nobo.

15. Menshoná algun meta spiritual ku nos lo por pone.

¹⁵ Tin hopi meta mas ku nos por pone den e sirbishi di Yehova. Por ehèmpel, nos por purba di bira mas ábil den un sierto aspekto di sirbishi. Tambe nos por dediká tempu na studia prinsipionan di Beibel pa asina nos por komprondé nan mihó i sa kon pa pone nan na práktika den nos bida. Kiko di mehorá nos partinan, nos diskursonan òf nos komentarionan na reunion? Esakinan ta djis algun idea. E punto ta ku ora nos ta pone meta  spiritual, nos lo tin mas entusiasmo pa aktividatnan teokrátiko i esaki lo yuda nos prepará nos mes pa biba den e mundu nobo.

16. Dikon nos por bisa ku e mihó manera di biba ku tin ta di sirbi Yehova?

¹⁶ Kisas un hende ta puntra: “Si mi dediká tur mi tempu na prepará pa e mundu nobo di Dios, lo mi no pèrdè e chèns di tin un mihó bida aworakí?” Klaru ku nò! E mihó manera di biba ku tin ta di sirbi Yehova, pasobra ta asina el a kreá nos i esei ta loke ta hasi nos mas felis. Nos no ta sirbié obligá ni djis pa sobrebibí e tribulashon grandi, ya ku nos sa ku un bida sin Yehova ta un bida bashí. No tin nada mas mihó ku risibí su guia den nos bida i sinti su amor. (Lesa Salmo 63:1-3.) Klaru ku nos no tin ku warda te ora Paradeis yega pa nos por disfrutá di e bendishonnan ku Yehova tin pa hende ku ta sirbié ku henter nan kurason; nan ta disponibel for di awor! De echo, tin algun di nos ku ya pa hopi aña ta kosechá e bendishonnan ei i nos sa di eksperensia ku no tin nada otro ku lo por a duna nos mayor satisfakshon.—Sal. 1:1-3; Isa. 58:13, 14.

17. Ki lugá nos interesnan personal i plaser lo tin den Paradeis?

¹⁷ Den e mundu nobo lo tin tempu pa hasi e kosnan ku mas nos ta gusta. Bon mirá, Yehova a krea nos ku e deseo di alkansá logronan personal i di disfrutá di bida plenamente, i e ta primintí ku lo e “satisfasé e deseo di tur ser bibu.” (Sal. 145:16; Ekl. 2:24) Sosiegu, plaser i interesnan personal tin nan lugá awe, pero nos lo disfrutá mas di nan si nos pone nos relashon ku Yehova na promé lugá. Asina tambe lo ta den Paradeis. Pues, lo ta sabí di nos parti pa sigui buska promé e Reino i konsentrá riba e benefisionan ku nos ta haña di sirbi Dios.—Mat. 6:33.

18. Kon nos ta mustra ku nos ta prepará nos mes pa biba den Paradeis?

¹⁸ Den Paradeis, nos lo ta masha felis mes, muchu mas di loke nos por imaginá nos mes. Laga nos prepará nos mes for di awor i asina demostrá kuantu gana nos tin di biba einan. Kon? Nos ta hasi esfuerso pa desaroyá e kualidatnan ku Yehova ke pa nos tin, nos ta prediká e Reino ku entusiasmo i nos ta pone e adorashon di Yehova na promé lugá. Pronto e mundu nobo lo ta un realidat, i Yehova lo kumpli ku tur su promesanan. P’esei, laga nos biba komo si fuera nos ta einan kaba!