1, 2. Ki aktitut sirbidónan di Yehova semper tabatin?

YEHOVA su sirbidónan semper tabata pendiente di e kumplimentu di profesianan inspirá. Por ehèmpel, Yeremías a profetisá ku Babilonia lo a destruí Huda, i esei ta loke a sosodé na aña 607 promé ku Kristu. (Yer. 25:8-11) Isaías a profetisá ku Yehova lo a trese e hudiunan bèk na nan tera, i el a deklará: “Bendishoná ta tur esnan ku ta spera riba dje.” (Isa. 30:18) Mikéas tambe a spera riba kumplimentu di e promesanan di Yehova relashoná ku su pueblo di antigwedat, i el a bisa: “Lo mi spera riba e Dios di mi salbashon.” (Mik. 7:7) I pa hopi siglo, e sirbidónan di Dios a biba en espera di e kumplimentu di profesianan tokante e Mesías, òf Kristu.—Luk. 3:15; 1 Ped. 1:10-12. *

² Awe, nos tambe komo sirbidó di Dios ta den ekspektativa, ya ku nos ta warda riba e kumplimentu di profesianan relashoná ku e Reino di Yehova. Hesus, komo Rei di e Reino ei, lo kaba ku sufrimentu, eliminá e malbadonan i libra e pueblo di Dios di e mundu teribel akí ku ta den gara di Satanas.  (1 Huan 5:19) Pues, nos tin ku keda alerta i konsiente ku e fin ta mas serka ku nunka.

3. Si nos tin hopi tempu ta warda pa e fin yega, kiko kisas nos ta puntra nos mes?

³ Komo sirbidó di Yehova, nos ta anhelá pa mira e boluntat di Dios sosodé na tera meskos ku den shelu. (Mat. 6:10) Sinembargo, si nos tin hopi aña ta warda ansiosamente pa e fin yega, kisas nos ta kuminsá puntra nos mes: ‘Dikon nos mester sigui sper’é?’ Laga nos wak.

4. Kua ta un di e motibunan prinsipal pakiko nos tin ku “keda vigilá”?

⁴ Beibel ta splika bon kla kon nos mester spera e fin di e sistema akí. Hesus a bisa su siguidónan pa “keda vigilá” i pa “keda lantá.” (Mat. 24:42; Luk. 21:34-36) E solo echo ku Hesus a duna nos e mandato akí ta un bon motibu pa nos sigui spera ku e fin ta bini pronto. E organisashon di Yehova a pone un bon ehèmpel pa nos. Bes tras bes e ta rekordá nos via e publikashonnan pa “spera i kòrda semper riba e binida di e dia di Yehova” i pa keda ku nos bista fihá riba e mundu nobo ku Dios a primintí.—Lesa 2 Pedro 3:11-13.

5. Dikon nos awe mester ta mas alerta ku nunka?

⁵ E kristiannan di e promé siglo tabatin bon motibu pa keda den ekspektativa di e dia di Yehova, pero nos awe tin muchu mas motibu ainda. Dikon? Pasobra nos ta biba durante e presensia di Kristu. Kon nos por sa? Wèl, for di aña 1914 e señal di su presensia ku e mes a duna ta kumpliendo: e situashon mundial ta kada dia pió i e bon notisia di Reino ta ser prediká den tur parti di mundu. Pues, ta bisto ku nos ta bibando den e último dianan, òf “konklushon di e era akí.” (Mat. 24:3, 7-14) Siendo ku Hesus no a bisa kon largu e periodo akí lo dura, nos tin ku sigui vigilá i keda alerta pasobra e fin por yega un ora pa otro.

6. Dikon nos por ferwagt ku kos lo bira pió di loke e ta kaba?

⁶ Kisas un hende ta puntra: “Pero kiko si falta hopi tempu pa e fin yega i ainda kosnan mester bira muchu mas pió di loke nan ta awor?” Ta bèrdat ku Beibel ta bisa ku maldat lo oumentá masha hopi “den e último dianan.” (2 Tim. 3:1, 13; Mat. 24:21; Rev. 12:12) Pues, aunke e situashon di mundu ta malu, nos por ferwagt ku lo e bira pió.

7. Kiko Mateo 24:37-39 ta siña nos tokante e situashon di mundu ora ku “e tribulashon grandi” yega?

⁷ Pero kon malu e situashon tin ku bira promé ku “e tribulashon grandi”? (Rev. 7:14) Akaso bo ta kere ku tur pais lo mester ta den guera, ku tur hende lo tin ku pasa hamber òf ku den tur famia lo mester tin hende malu? Si esaki mester sosodé, e ora ei lo ta bisto pa tur hende—asta pa personanan ku no ta interesá den loke Beibel ta bisa—ku e profesianan ta kumpliendo i ku e fin ta serka. Sinembargo, Hesus a bisa ku mayoria di hende lo ‘no hasi kaso’ di su presensia, i ku nan lo sigui ku nan aktividatnan normal di bida i lo keda di shòk ora ku e dia di Yehova yega. (Lesa Mateo 24:37-39.) Pues, e Skritura no ta indiká ku promé ku e “tribulashon grandi” e situashon mundial lo bira dje malu ei ku hende lo haña nan obligá di kere ku e fin ta serka.—Luk. 17:20; 2 Ped. 3:3, 4.

8. Kiko ta bisto pa e hendenan ku ta obedesé e mandato di Hesus pa “keda vigilá”?

⁸ Bon mirá, e propósito di e señal ku Hesus a duna tabata pa laga su  siguidónan—ku sí ta obedesé su mandato pa “keda vigilá”—sa den ki tempu nan ta bibando. (Mat. 24:27, 42) I for di 1914, tur e detayenan di e señal a bin ta kumpli. No tin duda ku nos ta bibando awor den “e konklushon di e era akí,” esta, un periodo di tempu limitá ku lo terminá ora ku e mundu di Satanas ser destruí.

9. Dikon nos ta keda pendiente di e yegada di e fin?

⁹ Pues, dikon kristiannan djawe mester keda pendiente di e yegada di e fin? Pasobra esei ta loke Hesus a manda i pasobra nos ta rekonosé e señal di su presensia. Nos ta kere ku e fin ta serka, no djis pasobra nos ta kla pa kere kiko ku nos tende, sino pasobra nos tin prueba sólido ku ta basá riba Beibel. P’esei nos ta keda vigilá, alerta, lantá i prepará pa yegada di e fin.

10, 11. (a) Dikon Hesus a bisa su disipelnan ku nan mester ta prepará? (b) Kiko Hesus a bisa ku su disipelnan mester hasi si e fin no yega lihé manera nan a pensa? (Wak e promé plachi.)

¹⁰ Hopi di nos tin dékadanan lantá den sentido spiritual, pendiente di e fin. Ma nos no mester laga e echo ku hopi tempu a pasa pone nos pega soño den sentido spiritual. Nos mester ta kla prepará ora Hesus yega pa destruí e mundu di Satanas. Kòrda ku Hesus a bisa: “Keda alerta, keda lantá, pasobra boso no sa ki ora e tempu stipulá ta. Ta manera un hòmber ku a biaha pa eksterior i a laga su kas na enkargo di su esklabonan. El a duna kada un di nan un trabou i a duna e wardadó di porta òrdu pa keda vigilá. P’esei, keda vigilá, pasobra boso no sa ki ora e Doño di kas ta bini, sea ta kasi anochi, meianochi, ora gai kanta òf mainta trempan, pa ora e yega diripiente, e no haña boso drumí. Ma loke mi ta bisa boso, mi ta bisa tur hende: Keda vigilá.”—Mar. 13:33-37.

¹¹ Ora ku e siguidónan di Hesus a komprondé ku e presensia di Kristu a kuminsá na 1914, nan a realisá ku e fin por a yega un ora pa otro i nan a prepará nan mes pa esei. Kon? Nan a kuminsá prediká e Reino ku mas energia. Pero Hesus a indiká ku kisas lo el a yega mas lat di loke su disipelnan a pensa, sea “ora gai kanta òf mainta trempan.” Kiko nan mester a hasi den tal kaso? E di ku nan: “Keda vigilá.” Di manera ku, aunke nos tin hopi tempu ta warda, nos no mester pensa ku e fin lo tarda muchu mas ainda òf lo no yega nunka.

12. (a) Kiko Habakuk a puntra Yehova? (b) Kiko Yehova a kontest’é?

¹² Pensa riba profeta Habakuk, kende a haña e enkargo di spièrta e habitantenan di Herúsalèm ku e stat lo ser destruí. Otro profetanan promé kuné ya tabatin basta aña ta prediká e mesun mensahe ei. E situashon a bira asina grave ku e malbadonan tabata oprimí hende hustu i tur kaminda tabata reina inhustisia. P’esei no ta un sorpresa ku Habakuk a puntra Yehova: “Te ki tempu, o SEÑOR, lo mi sklama pa yudansa?” En bes di bisa e profeta ki dia e fin lo a bini, Yehova a primintié: “E lo no tarda.” Tambe Yehova a bisa Habakuk pa “sper’é.”—Lesa Habakuk 1:1-4; 2:3.

13. (a) Kiko Habakuk lo por a pensa? (b) Dikon lo tabata peligroso p’e pensa asina?

¹³ Imaginá bo si Habakuk a kansa di warda i a pensa: ‘Mi tin años ta tende tokante e destrukshon di Herúsalèm. Kiko si ainda falta hopi tempu pa esei sosodé? Pakiko ami tin ku sigui profetisá  komo si fuera ta mañan e destrukshon ta yega? Mi ta laga esei pa otro hende.’ Si Habakuk a pensa asina, lo el a pèrdè su bon relashon ku Yehova, i kisas asta pèrdè su bida ora ku e babilonionan a destruí Herúsalèm!

14. Dikon nos lo ta masha gradisidu ku Yehova a spièrta nos pa keda alerta?

¹⁴ Awor, laga nos imaginá ku bo ta den e mundu nobo. Tur loke a ser profetisá pa e último dianan a sosodé manera Yehova a bisa. Mas bo meditá riba esei, mas bo konfiansa den Yehova i den e promesanan ku ainda falta pa kumpli lo krese. (Lesa Hosue 23:14.) Yehova, e Dios ku tin kontrol apsoluto riba tempu, a trese e fin na e mihó momento. Esta gradisidu nos lo ta e tempu ei ku el a spièrta su pueblo pa keda alerta ya ku ‘fin di tur kos a yega serka’!—Echo. 1:7; 1 Ped. 4:7.

15, 16. Dikon nos mester hasi nos máksimo esfuerso pa prediká durante e tempu di fin akí?

¹⁵ Nos por tin sigur ku e organisashon di Yehova lo sigui kòrda nos riba e urgensia di e tempu. Pero e rekordatorionan ei no ta solamente pa tene nos okupá den e sirbishi di Dios, sino tambe pa yuda nos keda kòrda ku e señal di e presensia di Kristu ta kumpliendo i ku nos mensahe ta urgente. Kiko ta e mihó kos ku nos por hasi mirando den ki tempu nos ta biba? Wèl, sigui buska promé e Reino i e hustisia di Dios, i prediká e bon notisia ku entusiasmo!—Mat. 6:33; Mar. 13:10.

¹⁶ Un ruman muhé a yega di bisa hopi aña pasá: “Ora nos ta prediká e bon notisia di e Reino di Dios, nos . . . por yuda reskatá hende di un morto sigur den e binidero katástrofe mundial.” I si tin un hende ku sa di reskate, ta e ruman muhé ei, pasobra na 1945, e ku su kasá a sobrebibí un di e pió desasternan marítimo den historia dia ku e barku di luho Wilhelm Gustloff a senk. Míles di hende a muri. Pero pa straño ku por parse, asta den un situashon asina grave, tin hende ta pèrdè for di bista loke realmente ta importante. E ruman muhé ta kòrda kon segun ku e barku tabata senk un señora tabata yora: “Mi maletanan! Mi maletanan! Mi hoyanan! Tur mi hoyanan a keda den kamber. M’a pèrdè tur kos!” En kambio, otro pasaheronan ku sí a komprondé kiko tabata importante a riska nan bida pa skapa personanan ku a kai den e awanan friu di laman. Meskos ku e otro pasaheronan ei, nos ta hasi nos máksimo esfuerso pa skapa mas tantu hende posibel. Pa nos, e  trabou di prediká ta masha urgente pasobra nos sa ku e desaster di mas grandi den historia ta na kaminda i nos ke pa nan sobrebibí.

17. Dikon nos por bisa ku e fin por yega un ora pa otro?

¹⁷ E kosnan ku ta pasa awe ta mustra sin duda ku e profesianan di Beibel ta kumpliendo i ku e fin ta hopi serka. Pues, no pensa ku ainda falta hopi tempu mas pa “e dies kachunan” i “e bestia salbahe” ataká Babilonia e Grandi, e imperio mundial di religion falsu. (Rev. 17:16) Kòrda ku ta Dios ta esun ku lo “hinka den nan kurason” e idea pa ataká religion falsu, i esei por sosodé un ora pa otro, sin previo aviso. (Rev. 17:17) Ke men, fin di e mundu malbado di Satanas no ta masha leu. P’esei nos mester hasi kaso di e spièrtamentu di Hesus: “Presta atenshon na boso mes pa boso kurason nunka bira demasiado kargá ku komementu di mas, bebementu di mas i e inkietutnan di bida, i diripiente e dia ei sorprendé boso manera un trampa.” (Luk. 21:34, 35; Rev. 16:15) Laga nos sirbi Yehova ku un sentido di urgensia, i nos por tin sigur ku lo e “obra pa esun ku ta spera riba dje.”—Isa. 64:4.

18. Ki pregunta nos lo analisá den e siguiente artíkulo?

¹⁸ Miéntras nos ta warda riba e fin di e mundu malbado akí, laga nos hasi kaso di e konseho di disipel Hudas: “Rumannan stimá, fortalesé boso santísimo fe i hasi orashon bou di guia di spiritu santu pa asina boso por keda den e amor di Dios, miéntras ku boso ta spera riba e miserikòrdia di nos Señor Hesukristu, ku bida eterno na bista.” (Hudas 20, 21) Pero kon nos por demostrá ku nos ta prepará pa biba den e mundu nobo ku Dios a primintí i ku di bèrdat nos ta deseá p’e yega pa kaba? Esei ta e tópiko ku nos lo trata den e siguiente artíkulo.