1. Den ki periodo di tempu nos ta biba?

AWE nos ta biba den “tempunan krítiko, difísil pa trata kuné.” Segun Beibel, for di aña 1914 nos ta biba den “e último dianan,” e periodo di tempu di mas malu den historia. (2 Tim. 3:1-5) Es mas, e Palabra di Dios a profetisá ku e situashon mundial lo sigui empeorá pasobra “hende malbado i gañadónan lo bai di malu pa pió.”—2 Tim. 3:13.

2. Ku kiko hopi hende ta entretené nan mes awe? (Wak e promé plachi.)

² Hopi hende ta entretené nan mes ku kosnan violento, inmoral òf ku kosnan ku ta enserá magia i demonismo. Por ehèmpel, Internet, televishon, pelíkula, buki i revista ta hasi komo si fuera no tin nada malu den violensia i inmoralidat. Ademas, komportashon ku un tempu tabata inaseptabel òf ilegal awor ta kompletamente normal i asta a bira legal den algun pais. Pero esei no ke men ku Dios ta aseptá e tipo di kondukta ei.—Lesa Romanonan 1:28-32.

3. Kiko mundu ta pensa di hende ku ta biba na armonia ku e normanan di Dios?

³ Den e promé siglo, e kristiannan tabata evitá di entretené  nan mes ku kosnan violento i inmoral, ya ku nan tabata biba na armonia ku e normanan di Dios. Esaki a pone hende kritiká nan i persiguí nan. Apòstel Pedro a skirbi: “Nan ta keda straño ku boso no ta sigui anda ku nan den nan bagamunderia, i p’esei nan ta papia malu di boso.” (1 Ped. 4:4) Awe ta meskos. Komo ku nos tambe ta biba na armonia ku e normanan di Dios, e hendenan ta haña ku nos ta straño. Pero esaki no ta straña nos, pasobra Beibel ta bisa ku “tur hende ku ta deseá di biba ku deboshon na Dios komo disipel di Kristu Hesus tambe lo ser persiguí.”—2 Tim. 3:12.

4. Dikon Beibel ta bisa nos pa no stima mundu?

⁴ Beibel ta konsehá hende ku ke hasi e boluntat di Dios pa “no stima mundu ni e kosnan ku tin den mundu.” (Lesa 1 Huan 2:15, 16.) Tur loke tin den mundu ta bou di kontrol di Satanas, “e dios di e mundu akí.” Esei ta inkluí organisashonnan religioso, polítiko, komersial i medionan di komunikashon. (2 Kor. 4:4; 1 Huan 5:19) Komo kristian, nos no ke pa mundu kontaminá nos, p’esei nos tin ku wak bon ku ken nos ta anda. Dios su Palabra inspirá ta spièrta nos: “No laga hende gaña boso. Mal kompania ta daña bon kustumber.”—1 Kor. 15:33.

5, 6. Nos mester evitá di anda ku ken, i dikon?

⁵ Si nos ke mantené nos bon kustumbernan, nos no por tin amistat ku hende ku ta hasi malu, i esei ta konta pa personanan pafó di kongregashon pero tambe esnan paden. Nos no mester anda ku miembronan di kongregashon ku deliberadamente ta desobedesé e leinan di Yehova. De echo, si un kristian kometé un piká serio i no arepentí, nos ta kibra tur trato kuné.—Rom. 16:17, 18.

⁶ Si nos tin amistat será ku hende ku no ta sirbi Yehova, por sosodé ku nos ta bai hasi meskos ku nan djis pa nan aseptá nos. Por ehèmpel, si nos ta amigu ku personanan inmoral, nos por kai den e tentashon pa kometé inmoralidat. Esei a pasa ku algun ruman, i mester a ekspulsá nan pasobra nan no a arepentí. (1 Kor. 5:11-13) I si nan no bolbe serka Yehova, nan situashon lo por bira manera apòstel Pedro a deskribí.—Lesa 2 Pedro 2:20-22.

7. Ken nos mester skohe komo amigu íntimo?

⁷ Aunke nos ta trata di ta amabel ku tur hende, nos no mester forma amistat será ku hende ku no ta obedesé e leinan di Dios. P’esei, lo ta robes pa un kristian soltero kuminsá ‘date’ òf sali ku intenshonnan romántiko ku un persona ku no ta un fiel sirbidó batisá di Yehova i kende no ta respetá Su normanan haltu. Ta hopi mas importante pa nos keda fiel na Yehova i haña su aprobashon ku ser aseptá pa hende ku no stim’é. Nos amigunan íntimo mester ta hende ku ta hasi e boluntat di Dios. Hesus a bisa: “Esun ku ta hasi e boluntat di Dios ta mi ruman hòmber, mi ruman muhé i mi mama.”—Mar. 3:35.

8. Ki efekto mal kompania tabatin riba e nashon di Israel?

⁸ Mal kompania ta hiba na desaster, manera e kaso di e nashon di Israel di antigwedat ta demostrá. Despues ku Yehova a libra nan for di Egipto, el a dirigí nan na e Tera Primintí i a spièrta nan pa e hendenan ku tabata biba einan. E di ku nan: “No adorá nan diosnan, ni sirbi nan, ni hasi konforme nan echonan. Bo mester derotá nan kompletamente i  kibra nan pilánan sagrado na pida pida. Ma sirbi SEÑOR boso Dios.” (Éks. 23:24, 25) Sinembargo, mayoria di israelita no a hasi kaso di e instrukshonnan di Dios i a bira infiel. (Sal. 106:35-39) Pa e motibu ei, siglonan despues, Hesus a bisa nan: “Dios lo bandoná boso tèmpel!” (Mat. 23:38) Yehova a rechasá e nashon di Israel i a skohe un pueblo nobo: e kongregashon kristian.—Echo. 2:1-4.

9. Dikon nos tin ku tene kuidou ku loke nos ta skohe pa lesa, skucha i wak?

⁹ Si nos no tene kuidou ku loke nos ta lesa i wak, nos por daña nos relashon ku Yehova. Gran parti di loke medionan di komunikashon i e mundu di entretenimentu ta produsí ta promové e idea- i metanan di Satanas i, mas ku klaru, esakinan no ta fortalesé nos fe den Dios ni den su promesanan. Pues, nos tin ku tene masha kuidou ku loke nos ta skohe pa lesa, skucha i wak pa nos no entretené nos mes ku kosnan ku ta lanta “deseonan mundano.”—Tito 2:12.

10. Kiko lo bai pasa ku e mundu di entretenimentu?

¹⁰ Djis akí nos lo no tin ku tene kuidou mas ku loke e mundu di entretenimentu ta ofresé, ya ku e mundu di Satanas—di kua e ta forma parti—lo ser eliminá. Beibel ta deklará: “Mundu ta pasa bai i tambe su deseonan, ma esun ku ta hasi e boluntat di Dios ta keda pa semper.” (1 Huan 2:17) Un eskritor di salmo tambe a bisa algu similar: “Hasidónan di maldat lo wòrdu kòrtá kitá afó; ma esnan ku spera riba SEÑOR lo heredá e tera. Ma e humildenan lo heredá e tera, i lo deleitá nan mes den pas abundante.” Kuantu tempu esei lo dura? E mesun salmo ta kontestá: “E hustunan lo heredá e tera, i lo biba den dje pa semper.”—Sal. 37:9, 11, 29.

11. Kon Yehova ta yuda nos keda fiel na dje?

¹¹ E organisashon di Yehova, na kontraste ku mundu, ta produsí material ku ta siña nos tur loke nos mester sa pa alkansá bida eterno. Hesus a bisa den un orashon na Yehova: “Pa haña bida eterno, nan tin ku siña konosé bo, e úniko Dios berdadero, i esun ku bo a manda, Hesukristu.” (Huan 17:3) Yehova ta usa su organisashon pa duna nos kuminda spiritual na abundansia pa asina nos por siña konos’é. Nos tin revista, foyeto, buki, vidio i website ku ta yuda nos sirbi Yehova. Tambe, tur siman e organisashon ta prepará vários reunion pa mas ku 110.000 kongregashon rònt mundu. Na e reunionnan ei, i tambe na asamblea i kongreso, nos ta usa publikashonnan basá riba Beibel ku ta oumentá nos fe den Yehova i den loke el a primintí.—Heb. 10:24, 25.

12. Kiko Beibel ke men ku kasa “basta ta den Señor”?

¹² Un kristian mester wak bon ken e ta skohe komo amigu, i esei ta mas importante ainda ora ku e ke kasa. E Palabra di Dios ta spièrta nos: “No uni ku hende ku no ta kreyente. Pasobra ki relashon hustisia tin ku maldat? Òf kiko lus tin en komun ku skuridat?” (2 Kor. 6:14) Beibel ta bisa bon kla ku si un Testigu di Yehova ta deseá di kasa, e por hasi esei “basta ta den Señor.” Es desir, e por kasa solamente ku un otro Testigu dediká i batisá ku ta biba na armonia ku e normanan di Beibel. (1 Kor. 7:39) Esun ku sigui e konseho akí ta haña algu masha  balioso: un kompañero(a) ku lo yud’é keda fiel na Dios.

13. Ki mandato relashoná ku kasamentu Yehova a duna e nashon di Israel?

¹³ Yehova sa kiko ta mihó pa su sirbidónan, i semper el a bisa bon kla kiko e ta pensa di matrimonio. Por ehèmpel, wak e mandato ku el a duna e nashon di Israel relashoná ku e nashonnan bisiña ku no tabata adorá Yehova: “No kasa ku nan tampoko; no kasa boso yu muhénan ku nan yu hòmbernan, ni laga boso yu hòmbernan kasa ku nan yu muhénan, pasobra nan yu muhénan ta kapas di pone boso yu hòmbernan bira lomba pa SEÑOR, di manera ku nan ta bai sirbi otro dios. E ora ei SEÑOR su rabia lo lanta kontra boso i kaba ku boso lihé.”—Deu. 7:3, 4, BPK.

14, 15. Kiko a pasa ku Sálomon pasobra el a desobedesé e mandato di Yehova?

¹⁴ Sálomon, yu hòmber di David, ta un ehèmpel tristu di loke por pasa ora un hende no hasi kaso di Dios su mandato i kasa tòg ku un persona ku no ta sirbi Yehova. (Ekl. 4:13) Djis despues ku Sálomon a bira rei di Israel, el a pidi Dios dun’é sabiduria, i Yehova a kontestá su orashon. Rei Sálomon a bira asina sabí ku su fama a plama tur kaminda, i e reina di Seba a disidí di bishit’é pa wak ku su mes wowo si tabata bèrdat loke e hendenan tabata bisa. Na ki konklushon e reina a yega? Sorprendí, e di: “Mira, ni mitar nan no a konta mi. Den sabiduria i prosperidat bo ta surpasá e palabranan ku mi a tende.”—1 Rei. 10:7.

¹⁵ Sinembargo, apesar di tur loke Yehova a hasi pa Sálomon, el a desobedesé su mandato pa no kasa ku hende di e nashonnan bisiña, personanan ku no tabata adorá Yehova. Sálomon a “stima hopi muhé estranhero,” i ku tempu e tabatin 700 esposa i 300 konkubina. Kiko tabata e resultado? Ora el a bira bieu, su esposanan pagano “a hasi su kurason desviá pa sigui tras di otro diosnan . . . i Sálomon a hasi loke tabata malu den bista di SEÑOR.” (1 Rei. 11:1-6) Pues, e muhénan ei tabata mal kompania pa Sálomon i esei a afekt’é, ya ku e no a keda fiel na Yehova. Esei ta un spièrtamentu masha kla pa kristiannan ku tin pensá di kasa ku un persona ku no stima Yehova!

16. Kiko Beibel ta konsehá sirbidónan di Yehova ku ta kasá ku hende ku no ta kreyente?

¹⁶ Kiko si bo tabata kasá kaba ora bo a siña konosé Yehova? Beibel ta bisa: “Boso, esposanan, sea sumiso na boso esposo, ya ku si tin algun ku no ta obedesé e palabra, boso por gana nan na e fe pa medio di boso kondukta sin papia ni un pia di palabra.” (1 Ped. 3:1) Aunke e palabranan ei ta dirigí na esposanan kristian ku ta kasá ku un persona ku no ta sirbi Yehova, nan ta konta tambe pa esposo kristian. E konseho di Beibel ta masha kla: Sea un bon kasá, i hasi esfuerso pa pone e normanan di Yehova na práktika den bo matrimonio. I manera a yega di pasa hopi biaha, por sosodé ku ora bo kasá tuma nota di e kambionan den bo kondukta, esei ta yud’é aseptá e bèrdat.

17, 18. (a) Kiko a yuda Noe sobrebibí e Diluvio? (b) Kiko a yuda e kristiannan di e promé siglo sobrebibí e destrukshon di Herúsalèm?

¹⁷ Pues, mal kompania ta daña bon kustumber. En kambio, bon kompania por yuda nos keda fiel na Yehova. Pensa riba e ehèmpel di Noe, kende tabata biba den un mundu malbado. Beibel ta bisa ku den su tempu “maldat di hende tabata  grandi riba tera, i ku tur intenshon di e pensamentunan di [nan] kurason tabata kontinuamente maldat so.” (Gén. 6:5) Pa e motibu akí, Yehova a disidí di trese e Diluvio pa kaba ku e mundu malbado ei. Pero Noe tabata diferente. Beibel ta bisa ku e tabata “un hòmber hustu” ku a “kana ku Dios.”—Gén. 6:7-9.

¹⁸ Noe no a buska kompania di hende ku no tabata stima Yehova. E ku e shete miembronan di su famia a tene nan mes okupá ku e trabou ku Dios a duna nan pa hasi, i esei a inkluí trahamentu di e arka. Tambe Noe tabata “un predikadó di hustisia.” (2 Ped. 2:5) Noe su predikashon, su trabou riba e arka i e bon asosiashon ku su famia a ten’é okupá hasiendo kosnan ku a agradá Dios. Ku ki resultado? Noe ku su kasá i su tres yunan ku nan kasá a sobrebibí e Diluvio. Nos mester ta masha gradisidu na nan ku nan a keda fiel i a skohe e bon kompania di otro, ya ku ta for di nan nos tur a bini. E kristiannan di e promé siglo tambe ta un ehèmpel pa nos. Nan a sobrebibí e destrukshon di Herúsalèm na aña 70 pasobra nan a tene nan mes separá for di hende ku no tabata stima Yehova.—Luk. 21:20-22.

19. Kiko nos mester hasi pa nos por keda fiel na Yehova?

¹⁹ Komo sirbidó di Yehova, laga nos imitá e ehèmpel di Noe ku su famia i e obedensia di e kristiannan di e promé siglo. Nos mester keda separá for di e mundu malbado akí. Laga nos buska e kompania di e miónes di rumannan fiel ku tin rònt di nos, kendenan ta hasi nan bèst pa sigui e guia di Dios. Esei lo yuda nos “para firme den fe” durante e tempunan difísil akí ku nos ta biba aden. (1 Kor. 16:13; Pro. 13:20) Anto djis pensa riba e futuro maravioso ku ta spera nos! Si nos tene kuidou ku ken nos ta anda awe den e último dianan, nos lo por sobrebibí e fin di e mundu malbado akí i biba pa semper den Yehova su mundu nobo di hustisia!